Skip to Content

Tuesday, January 19th, 2021

ئازار و بون ئه‌به‌دین ! ….ئومێد حه‌مه‌ عه‌لی

Be First!
by July 20, 2012 ئەدەب

 

 

 

 

له‌ خه‌ره‌ندی ناكۆتای بونداین و

هه‌ڵگری ئازارێكی سه‌رمه‌دین 

به‌ڵام ئه‌فسوس

بینمان به‌بینی گۆرانییه‌كه‌وه‌ گرتووه‌

سه‌رڕێژ له‌شاگه‌شكه‌بون و

بێبه‌ری له‌خودی خۆی !

 ئای شاگه‌شكه‌بون به‌ده‌م ژیانه‌وه‌  

تۆ به‌زه‌رده‌خه‌نه‌ی گه‌مژانه‌وه‌ و

به‌حه‌قیقه‌تێكی ساخته‌كراوه‌وه‌

گه‌ره‌كته‌ هه‌ستی به‌هه‌شتمان پێببه‌خشی

ئێمه‌ , ته‌واو , ته‌واو

له‌نێو لۆچ و پۆچی فێڵه‌كانی تۆدا ڕۆچوین

تاقوڵایی ئه‌قڵمان پڕبوین له‌تۆ

پڕ , پڕ

ئێمه‌ به‌چه‌قه‌نه‌یه‌كی تۆ سه‌ما ئه‌كه‌ین

له‌بێده‌نگی تۆدا ئه‌توێینه‌وه‌ و

فه‌نا ئه‌بین !

 

شاگه‌شكه‌بون سه‌مایه‌كه‌

بۆ ژیان بێ‌ , یان بۆ هه‌بون

هیچێ‌ نیه‌ غه‌یری نه‌بون

 

ئه‌ودیوی شاگه‌شكه‌بون هۆشمه‌ندییه‌ و

وڵاتی غه‌مزه‌ده‌كانه‌ ,

نیشتمانێكه‌ ,

ته‌ریكه‌كان , نیگه‌ران و به‌دبه‌خته‌كان

له‌وێن , له‌وێ‌ !

ئه‌وان له‌هه‌ر شوێنێكیتربن ,

نامۆن و ڕه‌نگی ئاواره‌یی ,

به‌ڕوخسار و ڕۆحیانه‌وه‌ 

هه‌ڵده‌نیشێ‌ !

وه‌ره‌ ئه‌ی نامۆبون

وه‌ره‌ ئه‌ی ئاواره‌یی

وه‌رن ئه‌ی مه‌عشوقه‌كانم

قوڵتر و بێبنتربنه‌وه‌ و

نزیك , نزیك له‌منه‌وه‌ پیاسه‌كه‌ن و

هه‌وارهه‌ڵده‌ن , ماڵچێبكه‌ن له‌م بونه‌مدا

من و بونم ته‌نها

نیشتمانی ئێوه‌ین

من و بونم ته‌نها و ته‌نها

له‌ئاماده‌یی ئێوه‌دا ,

ئه‌كارین ببین به‌خۆمان !

 

ئای ڕۆژگاری شاگه‌شكه‌بون

چه‌ند به‌تاریكیه‌كانت ئاشنام !

ئای تاریكی ئه‌نگوستچاو

چه‌ند سه‌رسامم به‌

ڕه‌سه‌نیه‌ت و 

سه‌رمه‌دیه‌ت و

هه‌رهه‌بونی تۆ !

تۆ !

له‌ته‌ك بونا 

هاوڕێ‌ و

له‌ته‌ك ناكۆتادا یه‌ك و

له‌هه‌ناوی منا

دۆست و ته‌نانه‌ت خودی هۆشمه‌ندیمیت

 

 

ئازیزه‌كه‌م

ئه‌ی به‌ندی نێوان من و بون

ئه‌ی دواهه‌مین ماڵی حه‌قیقه‌ت

تۆ , كه‌ خۆت به‌تاڵكردۆته‌وه‌

له‌شاگه‌شكه‌بون و

ئامێزت واڵاواڵاكردۆته‌وه‌ بۆ حه‌قیقه‌ت

بۆ غه‌مێكی ئه‌زه‌لی بون

تۆ ئه‌ی هاواری بونی من 

ئه‌ی هێمای ڕۆشنبونه‌وه‌ی جه‌وهه‌ری مرۆڤایه‌تیم

تۆ و هه‌ر تۆ

ڕه‌سه‌نترین ماڵی میتافیزیكی منی

تۆ خودی منی

شه‌پۆله‌ ئاگرینه‌كانی ناو بونمی

ئه‌و تروسكانه‌ی

كه‌ له‌نیگه‌رانیه‌كانمه‌وه‌ له‌دایكبون

ئه‌و پانتاییانه‌ی

كه‌ ته‌نها له‌پێوابونه‌كانما هه‌ن

تۆ سه‌فه‌ری ڕاسته‌قینه‌ی هیچ ی به‌بونا

تۆ ته‌نهایت ته‌نها , ئه‌ی تاقانه‌ترین غه‌م 

ئازیزم ! تۆ ته‌نهای ته‌نها !

 

                    2012-07-18

لیپێتسك – ڕوسیا                                                                                                                                                    

 

Previous
Next

Leave a Reply