ئاوێنه‌……سه‌رهه‌نگ خامۆش

ئاوێنه‌
 سه‌رهه‌نگ خامۆش 
Xamosh_s@hotmail.com

 كه‌ ئاوێنه‌
جله‌كانی داده‌كه‌نێ
ڕووت..ڕووت
وه‌ك خۆی تۆ ده‌بینێ

كه‌ ئاوێنه‌
له‌ سیمای تۆ ڕاده‌مێنێ
له‌ شه‌رمانا
برژانگه‌كانی لێكده‌نێ

ئاوێنه‌یه‌ك
به‌دوای بوونی خۆیدا
وێڵ بوو
كه‌ تۆی بینی
خۆی له‌بیر كرد

كه‌ خۆت له‌ باوه‌شم ده‌سویی
دڵم نایێ
توند بتگوشم
نه‌بادا هه‌روه‌ك ئاوێنه‌
بشكێی

چه‌ندین ساڵه‌
به‌دیار ئاوێنه‌یه‌كه‌وه‌ ماتم
من پیر بووم و
ئاوێنه‌ش
هه‌ر وه‌ك تۆ مایه‌وه‌

به‌یانیان
كه‌ سه‌یری ئاوێنه‌ ده‌كه‌م
له‌ نێو تۆدا
خۆم ده‌بینم

تۆو ئاوێنه‌
له‌یه‌ك ده‌چن
كه‌ ده‌تبینم
پرچی خه‌مم
شانه‌ ده‌كه‌م

ساڵانیكه‌
خۆم نه‌دیووه‌
له‌و ڕۆژه‌وه‌
كه‌ ئاوێنه‌كه‌م شكاوه‌
تۆش لێم وونی…!!!