Skip to Content

Monday, October 26th, 2020

ئه‌ستێره‌كانی هاوڕێم

Be First!

 

 

ئه‌ستێره‌كانی هاوڕێم

هه‌رگیز به‌شه‌و ناخه‌ون

هه‌ر تاریكایی داهات 

ئه‌وانیش ده‌رده‌كه‌ون

*                *                *

حه‌ز ده‌كه‌ن پێكه‌وه‌ بن

تاریكایی ڕاوبنێن

تا به‌یانی گۆرانی

بۆ پرشنگی خۆر بڵێن 

*                *               *

كه‌ خۆر هه‌ڵهات ئه‌وانیش

ده‌ڕۆن و دیار نامێنن

چه‌پك چه‌پك تیشكی گه‌ش

له‌ ناخیاندا ده‌ڕوێنن

*                *              *

له‌ ئاسمانی به‌رینا

به‌ تیشكه‌وه‌ گه‌شت ده‌كه‌ن

تاریكایی له‌ كوێ‌ بێ 

ڕوناكایی بۆ ده‌به‌ن 

*                *                *

 

چونكه‌ ئه‌ستێره‌كانیش

هه‌روه‌كو ئێمه‌ جوانن

هاوڕێی ئازیزی ئێمه‌ن

هه‌رچه‌نده‌ له‌ ئاسمانن

*                   *                 *

 

28/4/ 2011         

 

یاریی

یارییه‌ هه‌ی یارییه‌

بۆ منداڵان دیارییه‌

جێگای یاریی به‌ جارێ 

هه‌ر خۆشی لێ ده‌بارێ

له‌و شوێنه‌ی یاریی تیایه‌

پێكه‌نین و قاقایه‌

ئه‌وه‌تانێ له‌م شوێنه‌

وا یاریی خه‌ت خه‌تێنه‌ 

*                       *                     *

سه‌یری خه‌تیان كێشاوه‌

به‌ردێكیان تیا داناوه‌

له‌ ناو خانه‌كانیدا

ژماره‌ی تیا نووسراوه‌

*                         *                      *

كه‌ نۆره‌ی هه‌ر كه‌سێك بێ 

پێویسته‌ ڕێك و پێك بێ 

به‌رده‌كه‌ خانه‌ خانه‌

به‌ره‌ و پێش بات ژیرانه‌

ئه‌و كه‌سه‌ی كه‌ وریایه‌

ڕێزی هاوڕێی له‌ لایه‌

بۆ ئه‌وه‌ی خۆشی یاریی 

بیبات به‌ره‌ و به‌ختیاریی 

*                      *                        *      

 

بووكه‌شووشه‌

بووكه‌شووشه‌،هاوڕێ كه‌م

بێ تۆ چۆڵه‌ جێ و ڕێ كه‌م

من دڵی تۆ ناشكێنم 

چیت ده‌وێت بۆت ده‌هێنم

جلی جوانت بۆ ده‌كڕم

ده‌تشۆم و پاك ده‌تسڕم

وه‌ك دوو هاوڕێی دڵسۆز واین

به‌یانی له‌ خه‌و هه‌ستاین 

ده‌م و چاومان پاك ده‌شۆین

خۆ ده‌گۆڕین،نان ده‌خۆین

ئه‌وسا ده‌چین بۆ باخچه‌

بۆ ناو دار و گوڵخونچه‌

به‌ خۆشی و دڵنیایی

ده‌یكه‌ین به‌ به‌زم و شایی

گۆرانییه‌ك به‌ هاوكار 

ده‌ڵێین بۆ گه‌ڵ و به‌هار 

بۆ منداڵی لادێ و شار

بۆ مرۆڤی خوێنده‌وار

بۆ خۆر و ئه‌ستێره‌ی شه‌نگ 

بۆ په‌پووله‌ی ڕه‌نگاوڕه‌نگ 

*                          *                       *

 

ئامێزی خه‌یاڵ

چه‌ند خۆشه‌ ئه‌و كاتانه‌ی

له‌ ئامێزی خه‌یاڵام

له‌و دنیا به‌رینه‌دا  

كه‌سێكم به‌رزه‌ باڵام

*                *                * 

چه‌ند خۆزگه‌ و هیوام هه‌یه‌ 

ده‌یانگه‌مێ بێ كێشه‌

له‌ یه‌كێكیان تێر نه‌بووم

یه‌كێكی تر له‌ پێشه‌ 

*                  *               *

دنیایه‌كه‌ ڕه‌نگاوڕه‌نگ

سه‌ربه‌ست تیا دێم و ده‌چم

به‌ زوویی و به‌ ئاسانی

چیم بوێت پێی شاد ده‌بم

*                          *                    *

خۆزگه‌ ئه‌م جیهانه‌شمان

وه‌كو جیهانی خه‌یاڵ

بۆ خۆزگه‌ و هیواكانمان 

ئاسمانێك ده‌بووساماڵ

 

 

13/6/2010

 

Previous
Next

Leave a Reply