Skip to Content

Thursday, October 1st, 2020

ئه‌و ساتانه‌ی ده‌کرێ په‌شیمانی به‌یانی بن

Be First!

       

به‌کر ئه‌حمه‌د

2007-11-16

ژیان به‌ لامدا تێپه‌ڕی
ئه‌و کاتانه‌ی له‌ گه‌رمه‌ی یاریکردندا
کوڕه‌که‌م ده‌ڵێ: بابه‌‌ سه‌یرکه‌ و
من سه‌رقاڵی ئاخاوتنی ته‌له‌فۆنم.

ئه‌و کاتانه‌ی هاوسه‌ره‌که‌م له‌ گه‌رمه‌ی خه‌ونی خۆیدایه‌ و
پێڵووی چاوانی هه‌ڵده‌فڕێ
منیش په‌رده‌ی سه‌ر په‌نجه‌ره‌کان لا ده‌ده‌م.

ئه‌و کاتانه‌ی کچه‌که‌م له‌به‌ر ئاوێنه‌ی ناو ماڵدا
له‌ گه‌نجێتی خۆی ده‌ڕوانێ
منیش ده‌ڵێم: کتێبه‌که‌ت بانگت ده‌کا.

ئه‌و کاتانه‌ی به‌فر له‌و دیو په‌نجه‌ره‌وه‌ سه‌ما ده‌کا و
من سه‌ر قاڵی ته‌ماشاکردنی تێڤێم.

ژیان به‌ لامدا تێپه‌ڕی
ئه‌و کاتانه‌ی ژیان ده‌ڵێ: گوێهه‌ڵدێره
منیش هێدفۆنێک له‌ گوێدا و
چاوێک له‌ولا و
دڵێک له‌م لا.‌

 

Previous
Next

Leave a Reply