Skip to Content

Tuesday, September 22nd, 2020

ئیعترافەكانى رێبوار سیوەیلى

Comment
by September 9, 2008 ئەدەب

 ئیعترافەكانى رێبوار سیوەیلى
  نوسینى: ریبوار سیوەیلى
  و. لەفارسیەوە: توانا ئەمین

  1
  باشترین ستایشى پیاو
  بۆ ژن
  ئایەتى ئاوێزانبوونە..
 
  2
  تەنانەت ئەگەر هیچ بەهانەیەك نەبێت
  بۆ مەستى
  دەبێ هەوڵدەین لە ستایشكردنى ژندا و
  جوانییەكەى، قوم.. قوم.. هەڵدەین
  تــا زمان لە بارى توندوتیژى
  رزگارى بێت..
 
  3
  دەبێ جەستەى ژن بكەینە پەرستگا
  تا لەهەر سجودێكى چێژدا،
  پەى دەرپەى ماچى كەین و
  چێژى دەستبازیش
  بگاتە: لوتكە.
 
 
  4
  لەگەڵ تۆدا تــا هەر خۆشییەك رۆیشتم
  تا ئیتر گومان نەكەم
  غوربەت،
  رۆحمى دزیوە.
 
  5
  دەبێ ئەو دارستانەت لەیادبێ
  كە بەپاسكیلەوە پیاسەمان تیادەكرد و
  هەر كاتێكیش مەیلى ئاوێزانبوون
  لەودیو بۆتەى نیگاكانمانەوە سەرەتاتكێى دەكرد
  بەئەندازەى چێژێك دەمردین!
 
  6
  نیگا،
  كەزمانى هاوبەشى ئێمە بوو
  بەبارتەقاى جیابوونەوەیەك بووە سەراب،
  تا ئەوپەڕیشى
  خاڵى.
 
  7
  پێش ئەوەى بڕۆى،
  داهاتووم لێرەبوو
  خۆشم،
  لەگەڵ تۆ..
 
  8
  سەرەنجام هێندە تەنیا ببووم
  كە تەنیا نیشانەى ئاوەدانى ئەم ژوورە
  دەنگى بەجێماوى تۆ بوو
  لە سەماعەى تەلەفۆندا
  منیش ئەوەندە سووتا بووم،
  بۆم نەدەدۆزرایەوە،
  گەرووى وەڵامدانەوە..
 
  9
  هێندە خۆشم دەویستى
  تا زەمزەمەى ناوت
  ساڕێژى كرد لە لێومەوە و
  شیعرمى پڕ كرد..
 
  10
  ئاو دەپۆشم و
  لە چاوەڕوانیى خۆردا
  پەنا بۆتۆ دەهێنم..
  چ بوونێكى پڕ چێژە،
  لەسەر پێستت،
  دووبارە بوونەوە هەڵم..
  11
  دەتگوت جەستەت بۆنى بایامى لێدێت!
  منیش درەختێكم دەهێنایەوە یاد
  گەڵاكانى وەك پێستى تۆ ناسك و
  لقەكانیشى
  لە ڕەنگى چاوەكانت..
 
  12
  عەشق مناڵیى من بوو
  كاتێ سەرت دەخستە سەرسنگم و
  پەنجە ناسكەكانت لە مووەكانمدا دەگێڕان
  ختووكەى دڵمت دەدا،
  منیش گوێم ڕادێرابوو بۆ دەنگى جاویدانەى:
  خۆشمدەوێى..
 
  13
  هەموو جارێ پێشئەوەى بێى،
  ماڵەكەم دەڕازانەوە و
  تەنیاییم دەسڕییەوە لە شتەكان
  سەراپاى بوونیشم
  پڕدەبوو لە ژیان..
 
  14
  ژیانى ئێمە كە بەقەد ژوورێ بچوك
  منوتۆش كە بەگەورەیى باوەشێك بوین،
  سەراپاى شتى ماڵەكەشمان
  كە لەجانتایەكدا جێى دەبوەوە..
  دواى فیراق
  جیهانمان پڕكرد:
  من و تۆ
  هەركەسەمان بۆ وڵاتێك سەرمان هەڵگرت
  كاتى هەراج
  هەر شتێكیان بۆ ماڵێك بردو
  من و تۆش
  تەنیا ماینەوە..
 
  15
  بە خێرایى جیابوونەوە
  خۆت لە دەستى من سەندەوە
  لە ناكاو بینیم،
  لەتاو بریندارى
  هەڵوەشام،
  بێجگە لە نووزەى ژێر وێرانییەكانى جەستە
  هیچم بۆ نەمایەوە..
  بەخێرایى جیابوونەوە
  نامۆبووم لە خۆم..
 
 
  16
  ئەوكاتەى فیراق،
  بەخێرایى هەورەتریشقە لێیدام
  دەمزانى هیچ خودایەك
  نقەى هیچ سورەتێكم نابیستێ
  تازە لە زومرەى سووتاوەكان بووم..
 
  17
  فیراق
  شەهیدانە تەنیای خستین و
  هەردووكمان
  دایكانە
  بۆ یەكتر گریاین..
  ئێستاش لە ئێمە تەنها دوو گۆڕ ماوەتەوە:
  كەمن لەهەردووكیاندا خەتووم.
 
  18
  پەرداخە رەنگاوڕەنگەكەت
  هێشتا لێرەیە و
  بێدەنگییەكى تاڵ
  رۆحە شوشەییەكەى
  پڕكردووە لە چاوەڕوانى..
 
 
  19
  ئیتر دانانیشم
  لە كەنار ئەو سفرە بچووكەیا
  كە پردێكمان لە ماچ
  بەسەردا ڕایەڵ كردبوو
  تا چێژى پێكەوەبوون
  بەسەریا ڕابوورێ..
  ئەمێستا نیگام
  لەوسەرەوە بەر"هیچ" دەكەوێ و
  چێژى چەقینە ناوخرۆشانى
  یادوەرییەكان،
  كون دەكا..
 
  20
  ئاسانە سڕینەوەى ناوت
  لە هاردى كۆمپیتەرو
  خاڵیكردنەوەى ئەلبوم لە وێنەكان و
  ناردنەوەى نامەكان بۆ هەمان ناونیشان
  وەلىَ..
  چی بكەم:
  لە یادوەرى خۆم و
  تەنیایى ئەم ژوورەو
  دەریچەى ئەم ماڵە،
  كە پیاسەڕێى نامەكانت بوو؟
 
  21
  هیچ کاتێ سیماى سامناكى کۆپنهاگنو
  تــاڵى شەوانى تاراوگە
  بەقەد ئەو دەمە سەخت نەبوون
  كە من دڵشكاو
  لەچرپاكەمان
  هاتمە خوارێ و
  لەسەر عەردى ژورەكە
  وەك مەلێكى پێككراو
  لەسەر جادەى مەرگ،
  تەنیا كەوتم..
 
  22
  ئەو رۆژە بسپێرە بەیادەوەرى:
  كە لەدارستانەكەیا
  هەستمانكرد دەبێ
  هەر لەوآ روتبینەوەو
  نەمامى ئاوێزانبوونێك بچێنین..
 
  23
  فەرمووت
  كەدەبێ بڕۆم و
  لەگەڵ خۆمى بەرم كتێبو جلەكانم
  …………..
  ئاهــ …
  نازانى
  چەند دەسبەتاڵ گەڕامەوە
 
  24
  ئەم ژوورە،
  كە باخى ئاوێزانبوونەكانمان و
  لە پەنجە گوناهویستەكانمانەوە
  داهاتوو دزەى دەكرد
  ئەمێستا توولە ڕێیەكە،
  دڵۆپە ئەسرینە پڕ لە بێدەنگییەكانیش
  پیایدا ڕانابوورن
  مەرگیش،
  لەسەر لێوارى پەنجەرەكەى نیشتووە.
 
 
  25
  رەنگە لەجێگایەكى زۆر دوورەوە
  نامەیەكت بۆ بنوسم:
  كە ئێستاش لە یادما زیندویت و
  گەرمیى قاچە بچووكەكانیشت
  هەسپێدەكەم،
  كە هێندە بە دەستەكانم ئاشنابوون..
 
  26
  تــا هەمووان باوەڕ بەدڵپاكى ئەو بێنن
  پیاوێك، كە هەمیشە خۆى بوو
  لەم شارە غەمئەنگێزە
  تەنیاو سەبوور
  خودایانە
  سەفەر دەكا،
  سەرەنجامیش:
  "لم یلد ولم یولد
  ولم یكن لە كفو احد"
 
  27
  وێنەكانت، نازەنین
  وەكچۆن گوتت، لەتوپەت كران..
  ئەگەرچى نازانى ئێستاش
  نیگامیان لەچوارچێوە گرتووە:
  دیمەنەكەیان!
 
  28
  ئێستاش،
  كەدەرگاى حەمامەكە دەكەمەوە
  دەنگى گۆرانیەكانت
  لەژێر دوشەكەدا دەبیستم و
  كەسكتر دەبێ بەهەر دڵۆپێك
  نەمامى بوونم
  تۆ ئێستاش بۆ رۆحى بێ سنوورى من
  ………………………………
  ………………………..
  …………………
  …………
  ………
  …
  ..
  .
  .
  .
  بارانى…
 
  29
  تەلەفۆنەكەم دانا
  "هیچ"بە هانامەوە هات
  پڕ بەدڵیشم تەنیایى،
  قاچەكانم سارد بوونەوە
  لەو بێدەنگییە سامناكەدا
  گوێم لێبوو:
  ئیدى تۆ ناتەوێ هەبیت
  ئیتر.. نیت
 
  ئاى.. عەشق
  دەتوانى چەند بریندارمان كەیت..
  دەبێ هەناسە بەم
  تا ئەم دڵپڕییە،
  گەرووى داهاتووم نەگرێ.
  ئەم شەوەش
  لە ژێر تاوى یادەكانى پێكەوەبووندا
  پارچەپارچەم نەكا و
  لەوە زیارتر بەم هەموو وردیلەییەوە
  لێكهەڵنەوەشێم..
  چ ڕاستییەكى باوەڕنەكراوە عاشقبوون
  چەندەش واقیعییە جیابوونەوە؟
  دەتسپێرم بە داهاتووت
  بە ئاوێزانبوونى ئەو ڕۆژانەى
  كە دەزانم،
  لە یادى ماچەكانمداى
  دەبێ بڕۆم و
  بەتاڵیان كەمەوە دەستەكانم
  لە قوورسایى زۆریى یادەكان
  ئەم چەقۆی فەریادەش
  با هەر ساتێ لە بوونم ڕۆچێ.
  لێشاوێ كابووس دەبینم
  چاوەڕوانن
  خەونەكانم بخەنە بۆسەوە..
 
 
  * بەقەولى ئیتالییەكان ئەمە خیانەتێكى منە لەرێبوار سیوەیلى، خۆى لەبنەڕەتدا ئەم شیعرانە بە فارسى نوسراون و سیوەیلى لەكتێبى (زمانى عەشق، زەمەنى ئەنفال)دا لەبەشى فارسیەكەیدا بەناونشانى (اعترافو زهرخند)بڵاویكردونەتەوە، ئەمەى دەیخوێنیتەوە هەڵبژاردەیەكى ئەو تێكستە شیعریانەیەو ئێمە بۆ كوردییەكەى ئەو تایتڵەمان بەپەسەند زانى، بەو هیوایەى توانبێتمان ئەو تامو چێژەى لەئەسڵى شیعرەكاندا هەیە، دەستى كەمیش بێت گواستبێتمانەوە.
  توانا
  برام كاك توانا
  سڵاو و دەستخۆشیت لێدەكەم. سەرەتا زۆر خۆشحاڵ بووم بەوەى ئاوڕت لەم كۆمەڵە شیعرە دایەوە، كە بەشێكى ترە لە (زمانى عەشق). هەشت ساڵە ئەو كۆمەڵە شیعرە بڵاو كراوەتەوە و كەس پرسیارى نەكرد بۆچى كۆمەڵە شیعرێك بە سێ زمان و سێ فۆرمى شیعریى جیاواز، خۆى پێشكەش دەكا. بۆچى عەشق و تراژیدیاكەى لە سێ ئاستى زمانیدا دێتە قسە؟؟. هەر وەك بۆخۆت ئاماژەت پێداوە ئەمە هەڵبژاردەیەكە لە بەشى شیعرە فارسییەكان، بەناونیشانى (دانپیانان و ژەهرخەند)، ئەمە چیرۆكى ئەو بەشەن لە عەشق كە لە ژەهردا دەگەوزێن، ژەهرى خەندە. هیوادام ئەم دەستپێشخەرییەى تۆ، چاوكرانەوەى ئەو كەسانەى بە دوادا بێت كە خەریكى ڕەخنە و ڕاڤەى شیعرن. من بە وەرگێڕانەكەت خۆشحاڵم و لەو شوێنانەى بە پێویستم زانیبێ، هەروەك بۆخۆت مافى ئەوەت دابوومێ، كەمە دەستكارییەكم كردووە. هەروەها چەند شیعرێكى تریشم لە هەمان بەشى فارسییەوە خستە سەر كارەكەى بەڕێزتان، تاكو وێنەیەكى تەواوتر بدەن بە دەستەوە. ئەوەى ماوە بڵاوكردنەوەیانە وەك ئەوەى كە دەقى شیعرین، من لەمەیان زۆر دەترسم، بەتایبەتى لە ڕۆژنامە.
  خۆشەویستیم بە سێوێكدا دەنێرم
  ڕێبوار سیوەیلى
  19/8/2008 پیرزین
 
 

Previous
Next

Leave a Reply