Skip to Content

Monday, September 28th, 2020

ئەگەرەكانى پاش سووتانى جەستەى ژن لەنێوان ژیانو مردندا..!

Be First!
by October 20, 2008 ژنان

 ئەگەرەكانى پاش سووتانى جەستەى ژن لەنێوان ژیانو مردندا..!
 سەروەر كەریم

 sarwarkareem@gmail.com

 یەكێك لەو دیاردانەی لەكۆمەڵگا نەریتیو ئاینیو پیاوسالارییەكاندا زۆرترین پانتایی داگیركردووەو رۆژانە دووبارە دەبنەوەو رێژەی قوربانییەكان زیاد دەكات، ئەویش دیاردەی خۆسووتاندنی ژنان یاخود سووتاندنیانە، ئەم دیاردەیە تەواوی كۆمەڵگاكانی هەڵگری ئاینی ئیسلام دەگرێتەوە، لەبەرئەوەی ئەو كۆمەڵگایانە تەواوی ماكەكانی شەرەفیان بەستۆووەتەوە بەژنانەوەو لەوەش واوەتر پەیوەستیان كردووە بەخۆشەویستیو كرداری سێكسی لەدەرەوەی پەیوەندیی هاوسەری، هەر ژنێكیش لەو یاسایە لابدات دووچاری گەورەترین سزا دەبێت، كە كوشتن، یاخود سووتاندنە، چونكە ئەو عەقڵیەتە ئەو كردارە بەلەكەداربوونی شەرەفو ئابڕوچوون دەزاننو بۆ كڕینەوەی دەبێت ئەو تاكە لەناوبچێت، دیاردەی خۆسووتاندنی ژنان لەكوێرە دێیەكی كوردستانەوە بۆ كوێرە دێیەكی فەلەستین هەمان شێوازی هەیەو هەمووشیان پەیوەستن بەفەرهەنگو كەلتوری ئاینیو پیاوسالارییەوە، چونكە ژن لەو یەكانەدا لەدەرەوەی ئینسانی بووننو هیچ مافێكیان نییە.
 (رۆمانی زیندە سووتێنراو) یەكێكە لەو رۆمانانەی كە خودی نووسەرو پاڵەوانی رۆمان یەك كەسایەتییەو رووداوەكانی پۆلێن كردنی ئەو حەقیقەتانەیە، كە بەسەر خودی نووسەردا هاتووەو بەرێكەوت لەمردن رزگاری بووە، بۆئەوەی بتوانێت پەردە لەسەر رووی عەقڵیەتی پیاوسالاری ئاینی، پیاوانی فەلەستین لابدات، كە چۆن ژنان بەئارەزوو ویستی خۆیان دەكەنە قوربانیو هیچ یاساو رێسایەكی ئینسانی نییە بەر بەو تاوانانە بگرێت، نووسەر هەوڵیداوە تەواوی ژیانی خۆیو سەفەری ژیانی هەر لەمنداڵیەوە تادەگات بەقۆناغی هەرزەییو دروستكردنی پەیوەندیی خۆشەویستیو ژیانی ناو خێزانو هەڵسوكەوتی پیاوانو چۆنیەتی خنكاندنی ژنان بەناوی ناموس پەرستیو سووتاندن، لەلایەن كەسوكاریەوەو گەیشتن بەخۆرئاوا..
 سەفەری بەدنیا هاتنی سوعاد هیچ كات بەدەست خۆی نەبووە، لەئەنجامی كرداری سێكسی نێوان باوكیو دایكی بەبآ بیركردنەوە لەبەدیهێنانی ئینسانێك بەوجود هات، كە ئەم لەدایكبوونە لەكۆمەڵگایەكی ئاینی دواكەوتوودا هەر لەسەرەتاوە چاوهەڵهێنانە بەدنیای پڕ لەچەوساندنەوەو ئازاردا، لەبەرئەوەی بەكچی لەدایك دەبێت، ئەم كچبوونە سەرچاوەی شەرمو ئابڕووچوونە لەلای عەقڵیەتی نێرسالاری بۆیە هەمیشە كچان هەر لەسەرەتای بوونیانەوە هەزارو یەك سنووری ئاینیو خێڵەكیو خێزانی بەدەوریا دەكێشرێتو رۆژانە ئەو پەیامانە بەگوێیدا دەدرێتو دەبێت ئەویش تەواوی ئامۆژگارییەكان وەك ئەڵقەیەك بكاتە گوێیو بیپارێزێ، ئەگەر وانەكات چارەنووسی مردنە، لەسەرەتای رۆمانەكەدا ئەم وشانەی پۆلێن كردووە من كچم، كچ دەبێت خێرا بڕواتو سەری دابخات، وەك ئەوەی هەنگاوەكانی بژمێرێت هەرگیز نابێت لەڕێگای خۆی لابدات یان سەری بەرزبكاتەوە، چونكە ئەگەر پیاوێك بیبینێت هەموو لادێكە مۆری چارمۆت دەنێن بەناوچەوانیەوە، ئەگەر ژنێكی مێرداری دراوسێ یان هەر داپیرەیەك یان هەر كەسێكی تر لەدەرەوەی ماڵ بیبینێتو دایك یان خوشكە گەورەكەی لەگەڵدا نەبێت لەگەڵ مەڕەكانیدا نەبێت، كۆڵە گزەری بەكۆڵەوە نەبێت، یان سەبەتە هەنجیری پێنەبێت یەكسەر پێیدەڵێن چارمۆت.
 نووسەر دەیەوێت پێمان بڵێت كچ بوون لەگەڵ ئەوەی سەرچاوەی شەرمو ئابڕوچوونی خێزانە بەردەوامیش دوای شوكردنیش دەبێت زنجیر بكرێت، چونكە هەر ئەوەندە بەسە بەبێ هیچ لادانێك كەسێك وشەی سۆزانی بخاتە پاڵ، كە لەكۆمەڵگا دواكەوتووەكاندا زۆر ئاسانە بۆ مەرامی تایبەتی یاخود لەكەداركردنی خێزانێك كەسێك بوختان بۆ كچێك یان ژنێك بكات، ئیتر چارەنووسی بەكوشتن دەگات، ژیان كردن لەئاوها ژینگەیەكدا جگە لەوەی دووچاری ئازارو مەینەتی دەبێت، هیچ ئاسۆیەك چاوەڕوانت ناكات، بۆیە ژنان بەردەوام لەچاوەڕوانی مەرگدا رادەوەستن، نەك ئەوەی خۆشییەكانی ژیان.
 نووسەر هەوڵیداوە لەڕێگەی بیرەوەریەكانییەوە بگەڕێتەوە ناو ژیانی لەدایكبوونی ئاماژەكانی ژیانی ژنانو كچانی لادێكەی بەیان بكاتو پەردە لەڕووی ئەو ژیانە ناهەموارە لابدات، كە پڕیەتی لەنەهامەتیو توندوتیژیو قوربانیدان، لەگەڵ ئەوەی ژنان لەو لادێیەی ئەودا نرخی لەئاژەڵ كەمتر بووە، چونكە عەقڵیەتی نێرسالاری هەموو شتەكان بەقیاسی سوود دەپێوێ. رەگەزی مێش سوودی بۆ ئەوان نییە، بەڵام ئاژەلًَ سوودی پێدەگەیەنێو سەرچاوەیەكە بۆ بژێوی ژیان، نووسەر لەسەر مێبوون ئاوا گوزارشتی لێكردووە (وەك سەرنجمدابوو لەو شوێنەی كە لێی هاتبووم بەكچی لەدایكبوون كارەسات بوو ژن دەبێت لەپێشدا كوڕی بێت، بەلایەنی كەمەوە یەكێكی ببێتو ئەگەر هەر كچی ببێت ئەوا جێگای نەفرەتە، ئەوپەڕی دوو یان سآ كچ پێویستە بۆ ئیشی ناوماڵ، كێڵگەو چاودێری ئاژەڵ، ئەگەر كچی زیاتر لەدایك بێت ئەوا نەگبەتییەكی گەورەیەو لەزووترین كاتدا دەبێت لەكۆڵ خۆمانیان بكەینەوە، تا تەمەنی نزیك حەڤدە ساڵ بەمشێوەیە ژیام بەبێ ئەوەی هیچ شتێك بزانم تەنها ئەوە نەبێت، كە بەهای من لەئاژەڵێك كەمترە لەبەرئەوەی كچم). بێ بایەخبوونی رەگەزی مێ لەفەرهەنگی پیاوسالاریداو حسابكردنی وەك كاڵایە، كاڵایەك نرخی لەئاژەڵێك كەمتر بێت دەبێت ئەو ئینسانە لەو ژنیگەیەدا چی بوونێكی هەبێت، جگە لەكۆیلەیەكی ملكەچی خواستەكانی پیاو جێبەجێكردنی فەرمانەكانی، بەبێ هیچ نەخێرو سەرپێچی كردنێك، ژیانی رەگەزی مێ هەر لەمنداڵییەوە چارەنووسی دیاری دەكرێت بەوەی مەحكومە بەملكەچبوون بۆ هەر كارێك كە پێی دەسپێردرێتو نابێت بەئەستەم لێی لابدات، چونكە لێدانی رۆژانە بەردەوامە، ئەگەر هەڵەشی نەكردبێت هەردەبێت لێدان بخوات، لەبەرئەوەی زەبروزەنگی پیاوی لەبەرچاوبێت، بۆیە هەر لەتەمەنی منداڵیەوە كاری بەسەردا دەدەنو فێری دەكەن كە ئەو بوونە بەئارەزووی تۆ نییە، تۆ بۆ ئەوە هاتوویتە بوون كارەكەرێكی زۆر باشی پیاو بیتو خۆت تەرخان بكەیت بۆ خۆشگوزەرانی پیاو، خۆ ئەگەر رۆژێك بەدەستى ئەویش نەبوو كارێك روویدا ئەوا بەدڵنیایی لێدان بەوپەری دڕندانە دەبێتە میوانی جەستەی كچەكان.
 نووسەر زۆر بەروونی ئەو شێوازەی پۆلێن كردووە، كە چۆن لێدان بەوپەڕی دڵرەقی بوونی هەبووە ئاوا گوزارشت دەكات (بۆچی مەڕەكان خۆیان هاتوونەتەوە؟) بەقژ رام دەكێشێتو لەچێشتخانەكەدا دەمدا بەزەویدا چۆك دادەمو ئەویش بەردەبێتە گیانم دەست دەخاتە پرچم، وەك ئەوەی بیەوێت لەبنا دەریبهێنێت بەمەقەستی گەورەی خوری بڕینی مەڕ دەكەوێتە هەڵپاچینی قژم، بەحاڵ قژی بەسەرەوە دەهێشتم، چەند بگریامایە هاوارم بكردایە یان بپاڕامایەتەوە شەقی زیاترم دەخوارد، ئەم فەرهەنگە شەرم هێنەری پیاوسالاری هیچ یاساو رێسایەك ناناسآ بەرامبەر بەرەگەزی مآو هەموو شتێك دەكاتە قوربانی ساتێك لەزەتی خۆی.
 رەگەزی مآ هەر لەمنداڵییەوە لەسەر ئەو ژیانە پڕ لەئازارو نەهامەتییە رادەهێنرێن هیچ ئاسۆیەكیش نییە بۆ داكۆكیكردن لێیان، زۆرترین جار لەسەر پەیوەندیەك یاخود نەخێرێك رەگەزی مآ وەك ئاژەڵێك سەردەبڕن یان دەخنكێنرێنو ژیانیان لێ زەوت دەكرآ وەك كارێكی ئاسایی تێدەپەڕێو دەكرێت بەژێر خۆڵەوە، چونكە لەو فەرهەنگەدا ژیان دارستانێكە بەهێز بآ هێز لەناودەباتو تەرمەكەشی دوای ماوەیەك ئەسەری نامێنێت، سەرباری ئەوەی پیاوان بە بەرچاوی خێزانەوە كاری لەناوبردن، خنكاندن، سووتاندن كوشتن ئەنجام دەدەنو زۆرجار رەگەزی مێینە بەچاوی خۆی كارەساتی كوشتنو لەناوبردنی نزیكترین كەسی خۆی دەبینێت ئەمەش دووچاری ترسو ئازاری دەروونی دەكاتو قەت ناتوانێت ئەو وێنە تراژیدیایە لەبەرچاوی لابدات وەك ئەوەی نووسەر ئاماژەی بۆ دەكات كە چۆن بەچاوی خۆی خنكاندنی خوشكەكەی بینیوە (لەماڵەوە بووم گوێم لەقاوو قریشك بوو، پاشان بینیم حەنانی خوشكم لەسەر زەویەكە دانیشتووەو قاچئ دەستی دەهاوێت، ئەسعەدی برام بەسەریدا نوشتاوەتەوەو باوەشی پێداكردووە، بەوایەری رەشی تەلەفۆنەكە خەریكی خنكاندنیەتی) سەرباری زۆرترین زیندانی كردنو لێدانو لەناوبردن، بەڵام ژنانیش لەپشتی پەردە تاریكەكانەوە زۆرجار پەنایان بۆ خۆشەویستیو دیداری نهێنی بردووە، كە سەرەنجامی ئاشكرابوونی تەنها مردنەو هیچ رێگایەكی تر لەپشت ئەوەوە بوونی نییە كەچی ژنانو كچان پەنایان بۆ دەبرد، رەنگە ئەوە گەورەترین قوربانیدانی ژنان بووبێت، لەپێناو بەڕێكردنی ساتێك بەویستی خۆیان نووسەر لەبارەی بوونی پەیوەندی نهێنی سۆزدارییەوە ئاماژە بەپەیوەندی دایكی دەكات كە چۆن بەبوونی ئەو ژنیگە ترسناكەوە دەستی بۆ ئەو پەیوەندیە بردووە (دەستمكرد بەلێكردنەوەو دایكم پێیووتم سوعاد گوێبگرە لێرە لەگەڵ كەرەكە دەمێنیتەوە هەرچی هەنجیری ئەملاو ئەولای رێگاكەیە كۆیدەكەیتەوە، بەڵام لەم دارە زیاتر دوور ناكەویتەوە، لێرە دوورناكەویتەوە، ئەگەر باوكت بینی بەئەسپە سپیەكەیەوە بەرەو ئێرە هات یان براكەت یان هەر كەسێكی تر فیكەیەك لێدەو من بەخێرایی دێم، كەمێك لەڕێگاكە دووركەوتەوەو پیاوێكی بینی كە بەسەر ئەسپێكەوە چاوەڕوانی دەكرد، بەدەموچاویدا دەمناسی ناوی فازیل بوو پیاوەكە سەرێكی خڕی پێوە بوو بچووكو بەهێز بوو ئەسپەكەی باش چاودێریكرابوو، زۆر سپی بوو خاڵێكی رەشی پێوە بوو، كلكی تەواو پرچكرابوو نازانم ژنی هەبوو یان نان دایكم لەبارەی باوكمەوە كەوتە قسەكردن لەگەڵیدا، لەوە تێگەیشتم كەپێیوتم ئەگەر هەركەسێك هات فیكەیەك بكێشە، دایكو سوارەكە لەچاو ونبوون).
 هەڵبەتە بەبوونی ئەو هەموو ترسو لەناوبردنەوە، بەڵام ژیانی هەستەوەریو حەزلێكردن ناتوانرێت رێگای لێ بگیرێتو بەنهێنی ئەنجام دەدەرێت، گەرچی سزای مەرگە، چونكە بوونی پەیوەندی لەدەرەوەی ژیانی هاوسەرگیری شكاندنی شەرەفە، دەبێت لەكورتترین ماوەدا سەرپێچیكەر لەناوببرێت، تا شەرەفی لەدەست بشۆردرێتەوە، داخستنی دەرگاكان بەڕووی مرۆڤدا یاخیبوون زیاد دەكاتو مرۆڤ هەوڵدەدات هەرچۆنێك بێت لەو دۆخە رزگاری بێت، نووسەر كە خۆی پاڵەوانی رۆمانەكەیە ئاماژەی بەبێزارییەكانی خۆی كردووەو لەوێوە بۆ داوی خۆشەویستیو چوونە ناو پەیوەندییەكی سێكسی مەترسیدار كە باش دەیزانی سەرئەنجامی بەكوێ دەگات (بەبێدەنگی ئەوەی كردی تاخوێنم لێهاتو ئینجا لەپڕ سەرسام بوو، وەك ئەوەی چاوەڕوانی شتێكی وەهای نەكردبێت، لەو باوەڕەدابوو ئەمەم لەگەڵ كوڕانی تردا كردووە؟ لەبەرئەوەی تەنیا دەمامەوە لەگەڵ مەڕەكاندا؟ خۆی دانی پیادانا، كە چاودێری كردوومو بینیویەتی كچێكی راستگۆم، لەرووم نەدەهات سەیری بكەم شەرمم دەكرد، چەناگەمی بەرزكردەوەو وتی: خۆشم دەوێیت، منیش تۆم خۆش دەوێت).
 سەفەرە پڕ لەئازارەكەی ژیانی كچێك بەردەوام دەبێت دوای دیداری خۆشەویستیو سێكس، دەگات بەسەرئەنجامی لەناوبردنیو سووتاندنی، بەڵام پاش ئازاردانێكی دەروونی زۆرو فریوخواردنی بەوەی پیاوێك خۆشی دەوێتو دەیكاتە ژنی خۆی، رۆژەكانی دوای سێیەمین دیداری سێكسیو دیارنەمانی ئەو پیاوە كارەساتو ئازارو نزیكبوونەوەی لەرۆژەكانی مەرگ دەستیپێدەكات دوای ئەوەی بێ هیوا دەبێت لەوەی ئەو پیاوە بێتە خوازبێنیو لەمەرگ رزگاری بێتو رۆژ دوای رۆژیش سكی زیاتر بەرزدەبێتەوەن تا ئەوەی خێزانەكەی ئیتر هەست بەدووگیانبوونی دەكەن لەگەڵ ئەوەی ئەم هەر خۆی دەدزیەوەو بەڵگەی خێزانەكەی رەتدەكردەوە، بەڵام بەرزبوونەوەی زیاترى سكی لەمەرگی نزیك دەكردەوە تا سەرەنجام ئەوەی لێی دەترسا كۆبوونەوەی خێزانی بوو، بۆ لەناوبردنی ئەم فتوای مەرگەی بەگوێی خۆی گوێی لێبوو، كە مێردی خوشكەكەی دانرا بۆ لەناوبردنی، دەی چی لەو هەواڵە ترسناك تر بێت گوێبیستی نەخشەی كوشتنی خۆت بیتو نەشتوانیت هیچ بەرەنگاربوونەوەیەك ئەنجام بدەیتو دەبێت وەك هەر ئاژەڵێك كە بۆ خواردن بشێت چاوەڕوانی سەربڕین بیت، تا گەیشتن بەساتی مەرگ دەبێت چەند ئازارو ناسۆر بەر بەگەروت بگرێو مێشكت داگیربكات ساتی رووبەڕووبوونەوە لەگەڵ دڕندەی مەرگ بێ بایەخ بوونی ژیانی ئینسان تا ئەو ئەندازەیەی بانگی مەرگ بدەن بەگوێتدا (لەپڕ هەستمكرد شتێكی سارد بەسەرمدا دەرژێتو یەكسەر كڵپەی ئاگر لەگیانم بەرزبووەوە، وەك چۆن فیلمێك خێرای دەكەنەوە دیمەنەكان تاویان دایە خۆیان، بەپێی پەتی بەو حەوشەیەدا كەوتمە راكردن، كێشام بەقژی  خۆمدا، قیژاندم هەستمكرد كراسەكەم بەدوامدا دەشەكێتەوە، كراسەكەشم ئاگری گرتبوو بۆنی بەنزینم دەكرد لەراكردن نەكەوتمو كراسە درێژەكەم رێگری دەكرد لەوەی هەنگاوی گەورە بنێم، تۆقین پاڵی پێوەدەنام بۆ دەرەوە، تاوم دایە خۆم بەرەو باخەكە وەك تەنیا رێگایەكی دەرچوون، هەستمكرد دەسووتێمو هەموو گیانم ئاگرەو هەر هاواریش دەكەم، بەڵام لەپاش ئەوە ئیتر هیچم بیرنایەت).
 عەقڵیەتی نێرسالاری بەبینینی ئەو سوتاندنە شاگەشكە دەبێت بەوەی توانی ئابڕووی تكاوی بشواتەوە بۆیە بەوپەڕی دڵ رەقیەو مرۆڤ دەسووتێنێ لەوانەیە هەمان پیاو بووبێتە هۆكاری دروستكردنی چەندین پەیوەندی لەگەڵ ژنانداو هەرگیز بەویان نەوتووە تۆ ئابڕوی خێزانت شكاندووەو وەك بەرزەكی بانان بۆى دەردەچی، هەڵبەتە دوای ئەوەی كچی سووتێنراو بەرێكەوت رزگاری دەبێتو دەگەیەنرێتە نەخۆشخانە، سەفەری ژیانی پڕ لەناسۆر بەردەوام دەبێت، ئەو سەفەرەی بەبێ خواستی خۆی هاتە ژیانەوە هەر بەبێ خواستی خۆشی بەردەوام دەبێت وەك ئەوەی نموونەكانی ژیانی پڕ لەنەهامەتی ژنانی ژێر سایەی فەرهەنگی پیاوسالاری لەودا كۆبووبێتەوەو كارەكتەری هەموو دەورەكان بێتو نمایشی بكات، لێدان، سووتاندن، سووكایەتی كردنی رۆژانە لەئاژەڵ كەمتر، بەڵام ئەو سەفەرە هەر درێژەی هەیە، لەبەرئەوەی دوای سووتاندن، هێشتا نەمردووە دەبێت بەو هەموو سووتاویەوە ئازار بچێژێ لەبەرئەوەی هێشتا شەرەف نەشۆردراوەتەوە، نەخۆشخانە سزادانێكی تری ئەو مرۆڤەی كە ویستیان ژیانی لێ زەوت بكەن، كارمەندانی نەخۆشخانە بەوپەڕی دڵ رەقیەوە مامەڵەیان لەگەڵ ئەو مرۆڤە دەكرد، كە لەچاوەڕوانی مەرگدا، چونكە ئەوانیش هەڵگری هەمان عەقڵیەتی شەرەفپارێزی بوونو ئەویش كچێك لەدەرەوەی هاوسەری پەیوەندی سێكسی هەبووەو دووگیانە، مافی ژیانی نییەو دەبێت بمرێت تا خێزانەكەی ئاسوودەبن كە شەرەفیان كڕیوەتەوە، بۆیە هیچ چارەسەرێكیان نەكردو وەك لەبیركراوێك لەگۆشەیەكدا فڕییاندا بوو، بەدەم ئازارەوە نیوەمردویەك لەجێگای مەرگدا ژیان دەبەخشێت، بەبێ ئەوەی هەست بەوەبكات كە مرۆڤێك دەهێنێتە بوونەوە ئەوە گەورەترین دیمەنی تراژیدیایە، مرۆڤێك خۆی لەسەرەمەرگدا بێتو تەنها بێت، بەڵام منداڵی بێت هەر خۆی تاكو تەنها بێت، ئەوەیە كۆمەڵگای نامرۆڤانەو دڵ رەق كآ دەتوانى ئەو دەتوانآ ئەو تراژیدیایە بنەخشێنآ جگە لەو كچەی دەبێت سەفەرە ئازاراوییەكانی بەردەوام بێت تاكۆمەڵگای خەوتووی نێرسالاری ریسوابكاتو بەئاگای بهێنآ، بەڵام كام هەستی مرۆڤانە، عەقڵیەتێك مانای سۆزو خۆشەویستی نەزانآ كەی گوێ بەوە دەدات تراژیدیای ژیانی ژنان چۆنە بۆیە كاتێك خێزانەكەی دەزانن هێشتا زیندووە، باوكو دایكی سەردانی دەكەن تەنها لەبەرئەوەی بەهەر رێگایەك بێت لەناوی بەرن، دوای سووتاندنیش هێشتا رێگا ماوە بۆ لەناوبردنی، ئەمجارەیان كارەكتەری لەناوبردن، خودی ژن كە خۆی قوربانی دەستی ئەو فەرهەنگە دژی ژنەیە (دەستێكی خستە ژێر سەریەوەو بەرزی كردەوە بۆ پەرداخەكە كە بەدەستەكەی تری گرتبووی، تائەوكاتە هیچ كەسێك هیچ شتێكی نەدابوومێ بیخۆمەوە، پەرداخە زلەكەی لەدەمم نزیككردەوە بەلایەنی كەمەوە حەزم دەكرد، لێوەكانمی پآ تەڕبكەم، زۆرم تینوبوو، هەوڵمدا چەناگەم بەرزبكەمەوە، بەڵام نەمتوانی لەپڕ دكتۆرەكە هاتە ژوورەوەو دایكم بەرزبووەوە، پەرداخەكەی لەدەستی دایكم سەندو كێشای بەرەفەی پەنجەرەكەداو هاواری كرد! نا! شلەی ناو پەرداخەكە رژا بەسەر رەفەكەدا بڵاوبووەوە بێدەنگ وەك ئاو وابوو دكتۆرەكە پەلی دایكمی گرتو بەپاڵ كردیە دەرەوە لەژوور، كە هێشتا تەماشای پەرداخەكەم دەكردو دەبوایە بمخواردایەتەوە، دەبوایە وەك سەگ زمانم تێخستایە، زۆرم تینوبوو، تینووی مەرگو تینوی ئاو، دكتۆرەكە گەڕایەوە لای منو پێیووتم شانست هەبوو لەو ساتەدا هاتمە ژوورەوە، لەپێشدا باوكتو ئینجا ئێستا دایكت).
 مانەوە لەسەر پێخەفی مەرگو ململانێكردن لەنێوان ژیانو مردندا، رۆژانە ئازارەكانی روو لەزیادبوون دەكرد، بەڵام هێشتا سەفەری ئەو كچەی سووتێنرا، كۆتایی نەهاتووەو چەندین دیمەنی تری ماوە تا تەواوی ئازارەكانی ژیان ببیآ وەك ئەوەی بۆ ئەوە لەدایكبووە، تا تەواوی خەمەكانی ژنانی ژێر پەردەی پیاوسالاری نمایش بكات.
 مانەوە لەچاوەڕوانی مەرگدا لەناكاو فریادرەسێك دێتە بوونو دەبێتە ئەو فریشتەیەی كە یارمەتیدەری چیرۆكی سەفەری ئەو كچە بێتو لەمردنی حەتمی رزگاری بكات، هاتنی كچێكی خۆرئاوایی سەرلەبەری كردن رادەوەستێنێو قوربانیەكی دووچار لەمردن رزگاردەكاتو ژیان دەكاتەوە بە بەرخۆیداو كۆرپەی بێنازی لەدایكبووش رزگاردەكات، ئەو كچەی لەكوێرە دێیەكی فەلەستین لەدایكدەبێتو بەهەموو تەمەنی تاسووندنی بۆ چركەیەك هەستی بەبوونی خۆی وەك مرۆڤ نەكردەوەو دوای سووتاندنیشی بەناوی نامووس پەرستییە هەر ئازاردانو هەوڵی لەناوبردنی بەردەوام بووە، بەڵام هەوڵەكان شكست دەهێننو ئەو قوربانییە بەبێ خواستی فەرهەنگی نێرسالاری رزگاری دەبێتو لەنەخۆشخانەی مەرگەوە سەفەرەكەی بەرەو خۆرئاواو زیندووبوونەوە دەست پێدەكات، گەرچی گەیشتنی بەخۆرئاوا گەیشتن بووە بەزیندووبوونەوەو هەڵبژاردنی ژیانێك دوور لەلێدانو توندوتیژی، بەڵام ئازارو ناسۆرەكانی دەروون هەر بوونی دەمێنێتو مرۆڤ بەسانایی ناتوانێت لێی دەربازبێت، چونكە مرۆڤێك جەستەی سووتابێو ترسو ئازاری ناودڵی تەنها بێت راهاتن بەژیانی نوێ ماوەیەكی زۆری دەوێت تارادێت، بەهەرحاڵ ئەو سەفەرە گەیشت بەخۆرئاواو بووەوە بەمرۆڤێكی ئاساییو لەوێش توانی بەخواستی خۆی هاوسەرگیریی بكاتو مناڵی بێتو لەسەر ژیانی ئەوێ رابێت، سەرەنجامى سەفەرەكەی بەو كوڕەشی شادبێت كە هاوسەفەری بوو لەچوار دیواری ماڵداو بەسەرهاتنی ژیانی خۆی بۆ منداڵەكانی بگێڕێتەوەو بكرێتە رۆمانێك.
 دیارە ئەو رۆمانە زۆر زیاتر هەڵدەگرێت قسەی لەسەربكرێتو ئاماژەكانی توندوتیژیو شەرەفپارێزی بەیان بكەین، چونكە خودی نووسەر كارەكتەری حەقیقی ناو رووداوەكانەو هەموو بەسەرخۆی هاتووە كە گۆشەیەكە لەسەر ژیانی تەواوی رەگەزی مێینە لەكۆی كۆمەڵگاكانی خاوەنی كەلتوری ئاینیو پیاوسالاریو خێڵەكیدا كە تائێستاش سوعادەكان دەكوژرێن، دەسووتێنرێن، بەبێ خواستی خۆیان ژیانیان لێ زەوت دەكرێتو بەردباران دەكرێن، سەنگەسار دەكرێن، ئەمە سیمای هەرە زیندووو ژیانی ژنانی ژێر سایەی ئەو یەكانەیە هەر چۆنێك گوزارشتی لێ بكەیت هێشتا ناتوانیت تەواو گوزارشت لەو ئازارو دڵرەقیانەی بكەین كە بەرامبەر بەژنان دەكرێت، ئەگەر لەحەفتاكانی سەدەی بیستدا سوعاد سووتێنرا ئەوا ئێستاش سووتاندنو كوشتنی ژنان بەناوی ناموس پەرستییەوە درێژەی هەیە نەك لەلادێیەكی فەلەستین بەڵكو لەكوردستانو ئێرانو تەواوی وڵاتانی ژێر سایەی عەقڵیەتی شەرەف پارێزی.
 سلێمانی 16/8/2008
 تێبینی: زیندە سووتێنراو قوربانیەكی یاسای پیاوسالاری
 نووسینی: سوعاد. وەرگێڕانی لەئینگلیزییەوە نوری كەریم
 *چارمۆتا: بەمانای قەحبە دێت.
 
 
 

Previous
Next

Leave a Reply