Skip to Content

Saturday, January 16th, 2021

به‌رواری ژان …. ستار ئه‌حمه‌د

Be First!
by May 1, 2013 هۆنراوە

 

 

 

 

كوا ئه‌و كاتانه‌ی ده‌ریا به‌ لێشاو..

كوڵمی ئه‌م خاكه‌ی ده‌برد به‌ ده‌ما.

چڵ‌و پۆی چنار له‌گه‌ڵ باڕێژه‌ ,

بۆ ئاهه‌نگی گوڵ ده‌كه‌وته‌ سه‌ما.

*    *    *

كه‌ نساری چڵ هه‌ساره‌ی خۆزگه‌ی..

له‌ نیگای زامی رووبارا ئه‌دی.

كانیاوی سۆز له‌سه‌ر په‌ڕه‌ی جه‌رگ ,

خه‌می ده‌تاسان بۆ خۆشه‌ویستی.

*    *    *

شه‌وگارێك له‌ پاڵ لوتكه‌ی ئه‌ندێشه‌..

دڵ بۆ تریفه‌ی ئاسمان ده‌له‌رزی.

ئای چه‌ند ساتێكی وێڵ‌و ناكام بوو ,

ته‌مه‌نی بردین له‌ تافی سه‌وزی.

*     *     *

ئه‌مڕۆش ده‌بینی ده‌ستی لێكبڕان..

شیوه‌ن ده‌گێڕێ بۆ كۆرپه‌ی هیوا.

ره‌وڕه‌وه‌ی تاسه‌ی له‌سه‌ر جه‌سته‌ی مه‌رگ ,

به‌ره‌و كه‌ناری دورگه‌ی حه‌ز ده‌ڕوا.

*   *   *

رابردوو.. لیسته‌ی به‌رواری ژانه‌.

پاشه‌ڕۆژ.. چرۆی گوڵی خه‌زانه‌.

ئه‌مڕۆ بووه‌ته‌ به‌رۆكی دوێنێ.

كیژۆڵه‌ی هه‌تاو ئاسۆ نادوێنێ.

*    *    *

تان‌و پۆی خه‌مێك .. خوناوی شیعرێك..

خه‌ناوكه‌ی په‌نجه‌ی نه‌و بووكی رۆژه‌.

برینی ژوانێك.. نیگای شاعیرێك ,

نه‌خشه‌ی ته‌مه‌نن دوور له‌ پرۆژه‌.

*     *     *

ئێمه‌ له‌ نه‌بوون عومرمان نوسراوه‌ ,..

ووشه‌ی سواوه‌ی ژه‌نگی رۆژگارین.

سه‌رابێك دیده‌ی زه‌مین لێڵبكا ,

له‌گه‌ڵ وورده‌ ئه‌شك ده‌بێ ببارین ,

*    *    *

مۆمی توواوه‌ی زه‌مه‌نی خاكین..

گۆڕی سه‌ر گۆڕی حه‌زره‌تی (نالی)ین.

بۆ زامی سه‌ختی سه‌دان (حه‌بیبه‌) ,

بۆ خاك‌و خۆڵی مێژوو ده‌ناڵین.

 

Previous
Next

Leave a Reply