Skip to Content

Tuesday, November 24th, 2020

بەرەو کۆنگرەی حزبی شوعی … بەشی سێیەم

Be First!
by June 19, 2012 گشتی



مارکسیزم = ماتریالیزم= دیالێکتیک= مێژوو= ئازادی سیاسی =  دیموکراسی = یەک ئامانجی= ڕزگاری =  سۆسیالیزم

لەم کۆنگرەیەدا وەک هەمو مارکسیستێک پێویستە خود پیاچونەوەیەک و خود ڕەخنەی توند بەڕیوە ببرێت گەر خەمی پیشوەچوونی ئەم حزبە و بیرو باوەرە سۆسیالیستیەکان ئەجیندەیە لە کوردستاندا  و ئەم حزبە بریارە نوێنەرایەتی بکات.  تا ئەم حزبە جاڕیکی دیکە نموونەیانە لەو قەیرانە دەرچێت کە ئەمڕۆ یەخەی ئەم حزبە مارکسیستیەی گرتووە بۆئەوەی   جیا لە هەموو ئەحزابە کوردیەکانی ئەمڕۆ لە هەرێم ، بتوانێت پەرچەمی داواکانی کە دەبێت ڕەنگدانەوەی داواکانی خەڵکی ڕەش  و ڕووتی هەر چوار پارچەی کوردستان بێت لە هەموو حزبەکانی دیکە شەکاوە تر بێت، وەک گوتم دەبێت داواکانی رەنگدانەوەی داوای خەڵکی ڕەش و ڕووتی شەقامی کوردی بێت، نەک بۆینباخ لەبەر و بیرۆکراتە ئییدارییەکان وەک ئەوەی ئەمڕٶ دەیبینین لە حکومەتی هەرێمی کوردستان کە فەرش بۆ نوێنەرانی داگیرکەرانی خاکی کوردستان ڕادەخەن و بەچەپڵە لە بۆنەکاندا لەبەر وێنەگرتن و خۆدەرخستن لە میدیاکاندا ئاگایان لە دنیا نەماوە.، ئەو سیاسییانەی حزبی شوعیش کە هەندێکیان  دەیانەوێت کۆپی وان بکەن و لە سیاسەت و لە ستایڵی ژیانیاندا، خەریکە ئەم حزبە دەکەنە ئیدارە و فەرمانگەیەک وەک لەوەی حزبێكی مارکسیستی ئەڵتەرناتیڤخوازی تێکۆشەر و بەرنامە شۆرشگێر بێت.
ئەم حزبە بۆ رزگاری خۆی و گەلە چەوساوەکەی پێویستیە بێتە شاقەمەکانەوە جارێکی دیکە، بێتە ناو کارگەکان و فەرمانگە و کتێبخانە و باخەکانەوە و ئارگومێنتەکانی بباتە ناو کۆمەڵگەوە،  چونکە ئەم خەباتە بەردەوامە  و سبەی کوردستانێش ئازاد بێت خەباتی شوعیەکان ناوەستێت تا ئەو سەربەخۆییە بە قازانجی خەباتی جەوساوەکانی و  گەلانی دنیا بشکێنێتەوە ، بەڵام ئەمڕۆ ئیتر لەوە ڕوونتر نابێت کە ئەرکیەتی بانگەوز بکات  بۆ بەرەی ڕزگاری نیشتمانی ئازادیخواز و خۆی و دیموکراتخواز و نێونەتەوەخواز و کۆمۆنیست بینانە، نەک داوای فیدرالیەت بکات و لەبەر قازانجی خۆیان بە سیاسەتی سەرمایەداری جیهانی و ئەجێندە و پرۆژانەی ئیپریالیستی ئەمریکی ڕەدوو بکەون، کە ئەمڕۆ خەڵكی دنیا هەموو دژین، کەچی سەرۆکی ئەم حزبە دوای هەر کۆبونەوەیەک لەگەل تاڵەبانی دێت لە ڕاگەیاندنەکانەوە هەمان ئیدیعا دەکاتەوە کە “عێراقی فیدراڵ” و “تەحەزوب” و ئەم قسە بێمانایانە، لە کاتێکدا جێگری سەرۆک وەزیران هەلدێت، سیاسەت لە عێراقدا مەزهەلەیە ئەمڕۆ ئەمە لە خۆر ڕوونتر دەبینرێت، ئیتر نازانم خۆیان گێل دەکەن ئەم بەرپرسە “شوعیانە” یان دەیانەوێت ئێمە و خەڵك و شەامی کوردی گێل بکەن؟ یان خۆیان دەزانن کەس لە کوردستان ئامادە نییە گوێ لە کەمال شاکر بگرێت و خەڵكی کوردستان هەر نایناسن و وەک لە بۆنە و بەڕاستی مەراسیمەکانیشدا  دیارە ، کە جگە لە شوعییەکان، کەسی دیکە هەر تاقەتیان نییە گوێیان لێبگرن.  
سەرکردایەتی سیاسی ئەم حزبە کە خۆشەویستی دڵی میللەتی جاران بوو، لە دوای ١٩٩١ ەوە هەمیشە بەدەست بەتاڵی هاتۆتەوە لە هەموو ئەو کۆبونەوانەی دەیکەن و کەسیش نازانێ تیایدا باسی چ دەکەن، تا ئەمڕۆش دەبینین کە بەردەوامن و هیچی ئەوتۆی بەرچاویان بەرهەمنەهێناوە لە ڕووی سیاسی و کەلتووری و ئابووریەوە.  ئەمە ڕاستییەکانە  هەرچەندە ئازاربەخشیشبن، بەڵام  ئەرکی ئێمەیە وەک مارکسیست بەرلە هەمووشتێک بەدوای خودی راستیدا وێڵبین، گەر هەیە، چونکە ئەوە تەنیا ڕاستییە دادمان دەدات، گەر پێمان وایە مارکسیزم سۆسیالیزمیش زانستە ؟
  شوێنکەوتنی ئەم حزبە بە هەنگاوەکانی سیاسەتی نێودەوڵەتی و هەژمونی سەربازی ئیمپریالیزم لە دوای ساڵی ٢٠٠٣ ەوە و  و دانیشتن و سازشکردن بۆ ئەمریکییەکان( کە ناڵێم تەوافوقیان لەگەڵ ئەمریکیەکان ئیمزا کردووە)، بەڵام بوونە بەشێک لە حکومەتی هەرێم بەشداریکردنە لەو پرۆژە ئیمپریالیستیەدا  و هاوپەیمانی درووستکردن لەگەڵ ڕاستڕەوە توندڕەوە جیهانییەکان و تەپڵلێدان بۆ سیاسەتی “جەنگ دژی تیرۆر”  ، کە خەڵکی بێتاوانی ئەفگانیستان و عێراق و دیاسپۆرای پەنابەران باجەکەیان داو دەدەن، لە ئەوروپاش بە یاسا و ڕێسا ڕاسیزم و ناسیۆنالیزم و هێرش بۆ سەر بزووتنەوە کرێکاری و چەپەکان توندتر کردەوە و بە سیاسەتە ئابووریەکانیش هێرشێکی ئایدۆلۆژی بێوێنە و بێپیشینە دەکەنە سەر خەڵکی جیهان ئەمڕٶ نوێنەرانی ئەم سیستەمە جیهانییە چەوسێنەرە، کە لە ئیفلاس بوون و داڕوخانی بانەکانید دەیکاتا، کەچی وا ئەم حزبە دوای سیاسەتەکانی کەوت لە ڕێگای شوێنەکەوتنی بریکارانی ئیمپریالیزم لە ناوچەکەدا کە پارتی و یەکێتی و هێزەکانی دیکەن لە حکومەت یەک بە دوا یەکەکانی دوای جەنگی عێراقەوە. وەلێ سەرباری ئەوەی کە دنیا ئەمڕٶ گۆڕانکارییەکەی جدی بەسەردا هاتووە، سیاسەتەتی دەرەکی جیهانیش لە ناوچەکەدا خەریکە دەگۆڕێ و شتەکان بەرەو ڕوونبونەوەی زیاتر دەڕۆن و دوای ٢٠ ساڵ ڕووخانی سۆڤیەت ئەمڕٶ بە سەدان هەزار خەڵك دەبنەوە ئەندامی حزبی شوعی ڕووسی،  لەم ساتەوەختە وەرچەرخێنەرانەدا ئەم حزبی شوعییەی تیشکی لۆژیکمان خستۆتە سەر  لە هەرێمی کوردستاندا و و هاوڕیانی کوردمان لە باشوور ئەندامانی ئەو حزبەن و لە چاوەڕوانی کۆنگرەی نوێدان ، هێشتا ئەمڕٶش سیاسەتی سەرکردایەتیەکەی زۆر ناڕۆشنە و ، سیاسەتێکی پاسیڤی بێبەرهەم پیادە دکات کە تەنها موچەی ئەندامانی حزب دەردەهێنێت نەک ڕادیکالێزم و خەباتگێری و تێکۆشانی کۆمۆنیستانەی شۆڕشگێری بە ترادسیۆن مارکسیست  .
لەگەڵ پاڵپشتیکردنی ئەو سیاسەتە ئەمریکیە و کوێربوون لە ئاستی سیاسەتی نێودەوڵەتیدا، تەنها  نەقسی فیکری و سیاسی و ڕێکخراوەی و حزبی خودی ئەم حزبە پیشاندەدەن کە هەمووان چاومان بڕیوەتە ئاسۆ دێرینەکانی. بەشداریکردنی شوعییەکانی عێراقیش لە هەڵبژاردنێکی تەزویری بە ناو”دیموکراسی” ئەمریکیدا، بە ڕاستی زامە و  زێدە ئازار بەخشە، بەتایبەتی لە کاتێکدا ئەوەی زۆرێک لە خەڵكی دنیا کە بەرەو نوێ – لیبڕاڵیزم چوون وا دەەگڕێنەوە، تەنانەت فۆکۆیاما لە سیمینارەکانیدا لە نیویۆرک دەڵێت کە”  من هەڵەبوو پێشبینیەکانم شتێکی تر پێویستە،” هەروەها لە کاتێکدا کە هەرچی شوعی دنیایە دژی ئەو پرۆسەی  “میللەت درووستکردنەی” ئەمریکایە کە ئەجێندەی ئیمپریالیستی خۆی بوو و فاشیل بوو تیایدا لە ژێر دەمامکی ئەو  “دیموکراسییەی” لەژێر بارانی هاوەندا لە بەغداد بەڕێوە دەچوو، کەچی شوعیەکانی عێراق کە ڕەنگدانەوەی سیاسەتیان لە سیاسەتی پاسیڤی شوعیەکانی هەرێمیشدا هەیە ئەمڕۆ، زۆر ساویلکانە، زۆر پێشبینینەکراوانە بەهۆی خاڵی بوونەوە لە فیکر و هەتیوکەوتنی فیکری و ماددی لە دوای روخانی سۆڤیەتی نا- سۆسیالیستی، وە خولانەوە لە بازنەی کەلتووری ناسیۆنالیست ڕاستڕەو و فیوداڵە ڕاستڕەوەکانی کوردستاندا، بەو دەردەی بردن کە وای لێهاتووە ئەمڕۆ بە ڕێژەی ژمارەی ئەندامەکانی خۆی ،  ئەم حزبە نەتوانێت لەو هەرێمە گچکەیەی  کوردستاندا دەنگ بهێنێت بە ڕێژەی ژمارەی ئەندامەکانی خۆی لە هەڵبژاردنە سیاسییەکاندا. ئەوە بەم شێوەیە   ئەمڕٶ باجەکەی دەدات هەم لە عێراق هەم لە کوردستاندا ، خیام گوتەنی: “تۆڵەی دەمی پێکەنینە ئا ئەم سووتانە.”
باشە ئەمە هەڵەکانە، دەی ئەرکەکانمان چین؟ دیارە  سەرباری تەواوی ئەم خاڵە نێگەتیڤانەی حزب، ناکرێت ئێمەش وەک سەرکردایەتی ئەم حزبە پاسیڤ بین بۆیە ڕەخنە دەکەم وەک تاکەکەسێک، گەر ئەوە مارکسیستی ڕاستگۆیە کە ئێمە خوازیارین بۆ ئەوەی گۆڕانکاری ڕادیکاڵی سیاسی ئابووری کۆمەڵایەتی پێ بکەین لە ناو حزب و بۆ خەڵكی کوردستانیش ئەمە ئەرکمانە لەەگڵ خۆمان ڕاستگۆیانە ڕەخنە بکەین. وەلێ باوە ئەمڕۆ تەنانەت زۆرێک لەوانەی خۆ بە “چەپ” دەناسینن، دەڵێن بڕٶینە دەرەو و دابنیشین،  بەڵام نەخێر، من پێموایە دانیشتن لایەنگرییە هەرچەندە من لەگەڵ ئەم حزبەشدا نیم، بەڵام پیموایە هەڵبژاردنی بێلایەنی خۆی لەخۆیدا لەیەنگریکردنی بێلایەنیەو ، چٶن بۆ نموونە لیبڕاڵەکان ئیدیعای ئەوە دەکەن کە ئایدۆلۆژیست نین ، بەڵام  لە ڕاستیدا ئایۆلۆژیای وان ئەوەیە کە ئایدۆژیایان نییە.  بۆیە بەڵی بێلایەنی کەلتووری ئێمە نییە و خۆی لە خۆیدا لایەنگریکردنی بێلایەنییە لە سیاسەتدا، پێموایە ئەم میتۆدە گەر بۆ زۆر  لایەنی کۆمەڵایتی و سایکۆلۆژی و هونەری و هتد زێدە پێویستن و پیدەچیت وزە بەخشیش بن بۆ دروستکردنی داهێنانی گەورەی ئیندیڤیدوالیستی ، وەلێ لە سیاسەتدا نە ترادسیۆنی مارکسیستی سۆسیالیستیی و کۆمۆنیستانە، نە هیچ پەیوەندیەکەی بە تێکۆشانی بزووتنەوەی کرێکاریمانەوە هەیە نە بەرهەمی سیاسیشی هەیە، بەڵكو وەک نوێ لیبرالیزم نیشانی دا نەهامەتی بەرهەمدەهێنیت.  ئەم میتۆدە زۆر بێبەرهەمە کە دانێشن لە سیاسەتدا و تەنها پاڵپشتی ئەوە دەکات راستڕەوە توندڕە و و دواکەتوو و هێزە دەسکلاکانی داگیرکەرانی کوردستان و  ئیمپریالیزمی جیهانی بێنە پیشتر لە گۆڕەپانی سیاسی و کۆمەڵایتیدا و لە گۆڕاپانی حزبیشدا وەک لەبەرچاوە،  بۆیە نابێت بچنە دەرەوەی و بایکۆتی  حزب کەن لە هیج وڵاتێک تا ئەو کاتەی مەگەر ئەوان ڕیگاتان پێنەدەن و دەرتان کەن، کە لە ترادسیۆنی مارکسیستی ڕاستەقینەدا شتێکی نەکرە.
دانێشتن ماڵوێرانی حزبی و فیرکی و فەلسەفیشێ بەدوادا دێت و  ئەمە خود کوژیە و لە دوای رووخانی سۆڤیەتەوە  بوو  بە باو و ئەمڕٶ چەپی تێکۆشەر و مارکسیست سوپاسگوزارن بۆ ڕووخانی بانکەکان و لێژبوونەوەی سەرمایەداری جیهانی و  شۆرشەکان و ڕاپەڕینەکانی ئەم یەک دوو ساڵەی دواییش وایان کرد نەک هەر ئەو ئەندامان و شۆرشگێر و لایەنگرانە بێنەوە ناو بزووتنەوەکەمانەوە و جارێکی دیکە پەیوەست بنەوە بە ڕادیکاڵیزم و شۆرش و سەندیکاو حزبە شوعیەکانەوە کە لە کوردستانێشدا بەدی دەکرێت، بەڵکو زۆرێک لەو لیبڕاڵانەش کە  پیشبینیمان نەدەکردن و چەپ هەر لە بیری کردبوون وا پۆل پۆل دێنەوە بەردەرگای ئەحزابە جیاوازە چەپڕەوە ڕادیکاڵ و سۆسیالیستی و تەنانەت شوعیە ستالینیستەکانیش لە وڵاتەکان بەهۆی گەڕانیان بەدوای ئەڵتەرناتیڤی ئەم سیستەمە مرۆڤ کوژەدا، لە فەرەنساو یۆنان ئەمە زۆر ئاشکرا دیارە. ئەمەش بۆ ئەوە دەگەڕێتەوە  کە لە ساڵی ٢٠٠٨ ەوە لەگەڵ ئیفالسکردنی بانکە جیهانیەکاندا ، ئیدی جگە لە مارکس و مارکسیزم، فەلسەفەیکی تریان شک نەدەبرد تا شرۆڤە و ڕێگاچارەسەری کێشەکان بەدەستی خۆمان بۆمان دیاری بکات و، بیانخاتە بەردەممان بە ڕوونی. ئەوەش هەر ئەو هۆکارە بوو وایکردووە ئەمڕٶ گەروەترین کارە هونەری و ئەدەبی و سینەمایی و فەلسەفی و  میدیایەکانی جیهان تێکڕا نەمتیکی مارکسیسستی بگرنەوەبەر لەبۆ ئازادی دەربڕین یان لەناویاندا زۆر ئاشکراتر لە ٢٠ ساڵی ڕابردوو بەدیارە مارکسیزم و رەنگدانەوەی تێڕوانینەکان لە میدیای جیهانی بە زوبان ئینگلیزیەکانی ئەمڕٶماندا هەن و.

لەبەر ئەو هۆکارانەی باسمان کردن و زۆر هۆکاری کەلتووری دیکەش لە سیاسەتی کوردیدا، کە پێدەچێت برادەران و هاوڕییانی حزب لە کوردستان زیاتر ئاگاداری بن، چونە دەرەوە و بایکۆت کردن، شەرمەزارییە، زیاتر بڵێم خودکوژی فیکری و مەعنەوەی و خۆذۆڕاندنە، ئەوانەش کە جار جار لە کۆنگرەکاندا ئیدیعای ناو گۆڕینی ئەم حزبە دەکەن کە بیستومانە ئەم پێشنیارە کراوە، نازانم لە کوردستان چۆن تەماشای ئیدیعایەکی لەو جۆرە دەکەن، لەدەرەوە دڵنیام شەرمەزارییە و   هەر خودکودژی دەکەن و لەو نەمتەن کە لە دەرەوەی کوردستان خۆیان دۆراند و ئەمڕٶ دەگەڕینەوە ناو بزووتنەوەکە.
حزب پێویستی نییە ناوی “شوعییەکەی” بگۆڕێت، ئەوەی پێویستە ئەوەیە چۆن “شوعی” بێت،  پرسەکە ئەوە نییە حزب شوعیە، پرسەکە ئەوەیە حزب لە چی ئاستێکی شووعیەتدایە و تا چەند لە ناو خەڵکی هەژاری ئەم وڵاتەو تا چەند سەرکردایەتی شٶڕشی کوردستان دەکات و لێرەوە باڵانسی هێزی سیاسی دەخوێندرێتەوە لە دەرەوەی کوردستاندا. چونکە ئیشکالاتەکە لەوە نییە ئەمڕٶ کە حزب “شوعی” نییە، ئشکالاتەکە ئەوەیە کە حزب بەهۆی هەلومەرەجەکانی ڕابردوو کە شیکردنەوە و شرۆڤەی ڕۆشنی خۆی بۆ نەبووەن و غیابی فەلسەفە و فیکر و سیسەتەمی تۆکمە ی دیموکراتی رادیکاڵی، زیاتر بەرەو ڕاست و لیبڕالیزم هەنگاوی زۆری  پێ ناوە و سازشی زۆری  پێکردووە،  کێشەکە ئەوەیە کە زۆر” شوعی” نییە  و بە پرەنسیبی سیاسی و ڕەفتار مارکسیست نییە،  بۆیە کێشەکە ناو نیە لە راستیدا ئەمەش گەمژەییە ناوگۆڕین هیج ناگۆڕیت.
ئەمڕٶ لەچاو ئەحزابە مارکسیستەکانی دیکەی وڵاتانی دنیادا تەنانەت وڵاتە عەرەبیەکانیش هەر بەراورد ناکرێت لاوازی ئەم عزبە کوردییە . تەنانەت لە چاو هێزی ئەحزابە شوعیەکانی فەڵەستینیش بەروارد ناکرێت، بۆیە وای لێهاتووە  ئەمڕٶ هێندە لاواز و گچکە بووە و زۆرێکیش کوێرانە دەڵێن با ناوی بگۆڕێت یان بچینە دەروە و “دانیشین”. ئەمانە تێکڕا پاساون و لەو شوعیانەوە ئەم بۆچوونە دێت کە هەندێکیان لە ئەوروپا هایلایڤ دەژین و بە کەلتووری پیاوی سپی کوێر بوون و  بە خەڵک و خوشك و برا بە پێست ڕەشەکانمان گوتەی ڕەگەزپەرستی و نەژادپەرستی دەلێن و لەذٶڕان و شکست و دۆڕاندنی مەبدەئی خۆیان چی تریان پی نییە ئەو بەناو”شوعییە” کوردانە. من لە دیاسپۆراوە لە ئەزموونی خۆمەوە ئەم “دانێشتن و چوونە دەرەوەیە”م لەو “شوعیانەوە” زۆر دەبیستم کە کەلتووری ڕٶژئاوا کوێری کردوون و لە رووی زانیاریەوە گەمژەن و بۆیە ئاوا ئاسان بە کەلتووری باو خۆیان دەفرۆشن ، چونکە شۆڕشەکەی مارکس ئەوان ناتوان شانی بخەنە بەر، زۆر لەوە کەمترن.
گەر حزب  پێویستیشی بکات ناوی بگۆڕێت، لێکردنەوەی “عێراق” ە تەنها لە ناوەکی و ئەمەش پێموایە گەر خۆی نەیکات باجەکەی دەدات ، هەر وەک چۆن ئەمری واقیع حزبی کوردستانی پێ درووستکردن لە سەرەتای نەوەدەکاندا، ئاواش ڕٶژیک ئەو ناوە لێدەکەنەوە، بەڵام ئەو کاتەی لێکردنەوەی یان نەکردنەوەی فایدەی چی دەبێت، ؟ لە کاتێکدا ئێستا ئەو “عێراقو” لێکردنەوەیە هەوڵویستێکی سیاسی جدی دەبێت؟  بە هەرحاڵ، بایکۆت کردنیگشتی  هەر بزووتنەوەیەکی کرێکاری، یەکتر قبوڵ نەکردنە، بۆیە مانەوە ئەرکی شۆڕشگێرییە سەرباری جیاوازیەکان، مەگەر ستالینیستیانە و دیکتاتۆرانە دەریان بکەن، ئەو کاتە ئێمە قسەیەکمان نامێنێت. ئەوە ئەوکاتە قسەیەکی دیەکەیە، هەروەها، زۆر بێمانایە ئێمە لەگەڵ کرێکارە مانگرتووەکانی جیهاندا هاوکار و هاوڕا بین خۆمان بە هاوخەباتیان بزانین ، بەڵام بزووتنەوە کرێکاریەکانی خۆمان لە ناوچەکە و لەناو میللەتی خۆمان بایکۆت کەین؟ هەر زۆر بێمانایە ڕاستیەکەی، بۆیە ئەرکی یەکەم بەر لە ڕەخنەکان، خۆ بە بەشێک زانینە لە هەموو ئەحزاب و ڕەوتە کۆمۆنیست و “شوعی” و مارکسیستەکانی ناوچەکەی تیایدا دەژین ئەمەش ئەو حەقەمان پێدەدات رەخنەیان ئاراستە کەین و هەروەک ئەرنێستۆ گیڤارا لە کۆنگرەی ئاسیا ئەفریکا  وئەمریکای لاتین لە وڵاتی جەزائیر گووتی: “هەبوونی یەک دوژمن بەسە بۆ ئەوەی کە هەموومان یەک بین”. بۆیە،  هێشتا نابێت لە یەک ببینەوە و سێکتارینستانە و هەرزەکارانە بیرکەینەوە، چونکە ئەمرۆ ئاشکرایە ئەمە خاڵی بێهێزیمانە.
لە گۆشە نیگایەکی تریشەوە سەیری بکەین، دانێشتن و  چوونە دەرەوە لەم حزبە بەڕاستی جۆرێکە لە پاساو هێنانەوە بۆ سەنگەر گواستنەوە جا لە پێناوی ماددە و سەرمایەدا بێت کە ئەمریکا هێنای یان بۆ ئیمتیازاتی ئیستیهلاکی دیکە بن کە ئەمڕۆ زۆر باوە لە ناو گۆرەپانی سیاسەتی کوردیدا لە هەرێمی وکردستان. وەک بینیمان زۆرێک هاوڕییان کردیان و بێشەرمانە لە سەنگەرەکانی ترەوە دەیانبینین ئەمڕۆ، بۆیە گەورەترین هەڵەیە گەر ڕاست  و چەپ هێڵێکیش بەسەر حزبێکدا  بهێننین تەنیا بەهۆی ئەوەیە جیاوازی فکریمان هەیە، بۆیە  سەرباری ئەم ڕەخنانەم لەم حزبە، ناوگۆڕین و بایکۆتکردنی ئەم حزبە و بزووتنەوە کرێکاری سەدنیکاییەکان،  بایکۆت دەکەم،  چونکە ناوگۆڕین پاشگەزبوونەوەیە لە مێژووی حزب، پاشگەزبوونەوەیە لەو پەیمانەی کۆمۆنیزم و سۆسیالیزم لە ڕووی سیاسییەوە بە خۆفرۆشتن ئەژماردەکرێت لە دەرەوەی وڵات، بەڕاستی ناوگۆڕین بۆیە بایکۆت دەکەم چونکە خیانەتە و خۆفرٶشتنە بەو پرۆژە ئەمریکییە نوێ – لیبڕاڵییە جیهانییە سەرکوتگەرە جەنگخوازە شکستخواردوەی ئەمریکاو سەرمایەداری جیهانی کە لەناوچەکەی ئێمەدا ناویان ناوە “عێراقی فیدڕاڵ” ، وە دواجار خەڵکێکی زۆری تر لەم حزبە دووردەخاتەوە، زۆر لەوە کە ئەمڕٶ لەبەرچاومانە ، چونکە تۆ گەر وەفات بۆ مێژوو و تێکۆشانی شەهیدان و ناسنامەی حزبی خۆت نەبوو، دەبێت بۆ گەل و خاکەکەت ، بۆ هەژارانت، بۆ ئەم نەتەوەیە کە بە سروشت پرۆلیتارییە،  دواجار چەندە بێوەفا بیت؟ یان دەکرێت ئیدی گەلێکی ماف زەوتلێکراوی  وەک کورد، چۆن متمانەت پێبکات ؟

Previous
Next

Leave a Reply