Skip to Content

Monday, October 26th, 2020

تابلۆی ئازیزان … ستار ئه‌حمه‌د

Be First!
by January 31, 2013 ئەدەب

 

 

ئێواره‌یه‌ك به‌ر له‌ئێستا

رێگاكان تێكه‌ڵی یه‌كبوون 

شه‌قامه‌كان سڕانه‌وه‌

شوێنه‌كان جێگه‌یان گۆڕا

سات راوه‌ستا

باڵداره‌كان بۆ لانه‌یان گه‌ڕانه‌وه‌

ئاله‌و كاته‌

دڵێك بۆ گه‌رمیان هه‌ڵفڕی

ژنێك پرچی عومری بڕی 

ساوایه‌كی خنجیلانه‌

كۆرپه‌ی شیعری 

خسته‌ نێو گۆڕی جۆلانه‌

خه‌وتن بووه‌ به‌رگی برسی 

خه‌و ئاڵای مه‌رگ و جوودابوون

خۆر بێزاربوو له‌ئاوابوون

سێ‌ رێبواری تینووی دیدار

بوونه‌ به‌سته‌ی ماڵاوایی

بوونه‌ هێشووی هه‌ڵوه‌ریوی

ره‌زو بێستانی ئاوایی 

ده‌ستی قه‌ده‌ر كاری خۆیكرد

رۆحی سێ‌ كۆتری كێوی 

سێ‌ په‌روانه‌ی 

ته‌ریوی باخچه‌و هه‌ڵاڵه‌

له‌نێو ئاگرا دامركان

پشكۆی ژوانی بێواده‌

بووه‌ نیگای میوانداریی

ئێواره‌ لێوی ئاڵكردو

له‌ جیاتی پرشنگ خوێن باری 

ره‌شه‌بای ئه‌جه‌ل و مردن 

به‌ره‌و گڵكۆی مافی بردن

له‌نێو گێژاوه‌ی هاوارا

به‌چكه‌ كه‌وێ‌

بۆ سه‌رخه‌وێ‌

له‌سنگی دایكی ده‌گه‌ڕا

زۆری خوێندو

وه‌ڵام نه‌بوو

ده‌نگێ‌ نه‌بوو

وای له‌ژانی ماڵاوایی

ئێستاش زامدار 

دان وئاوی 

ته‌نها تابلۆی ئازیزانه‌

شه‌وانه‌ دێنه‌ به‌رچاوی 

غه‌ریبی ئه‌و 

وه‌كوو شه‌وی شاعیرانه‌

بێكه‌سی ئه‌و پڕ له‌ ئه‌شكه‌

دڵی ده‌فی ده‌روێشانه‌

كێ‌ له‌حاڵی تێده‌گات و 

كێ‌ ده‌بێته‌ كۆش و لانه‌ی 

كێ‌ گه‌ردانه‌ی شیعری ناسك 

بكاته‌ دیاری و جه‌ژنانه‌ی 

كام به‌رامه‌

ده‌گاته‌ هه‌ناسه‌ی دایك

وشه‌ نییه‌ به‌قه‌د باوه‌

تین بداته‌ ناخی گیان و 

ببێته‌ تابلۆی هۆنراوه‌

وه‌ره‌ باڵداری بێباڵ و 

گۆڕغه‌ریبی به‌بێماڵ و

هه‌ناسه‌ی شێواوی هاوڕێم

منیش وه‌ك تۆ ئاواره‌ی دێم 

منیش له‌ زێد دابڕاوم 

منیش وه‌ك تۆ به‌بێ‌ باوك 

له‌لانه‌ی خۆم ده‌ركراوم 

وه‌ره‌ گه‌رمیان ..یه‌جگار گه‌رمه‌

دڵی هه‌تیو به‌رگه‌ی ناگرێ‌ 

جێگه‌ی بێمه‌ئوا كه‌ركوكه‌

گه‌رمیان لانه‌ی باڵدارێكه‌

زمانی مافی چڕنووكه‌

ئه‌وان له‌زاری بولبول و 

شیعری شاعیران وه‌ڕسن 

ئه‌وان له‌حاڵی نه‌دارو 

سۆزی شاعیران ناپرسن

نووسین لایان وڕێنه‌یه‌

شاعیران به‌شێت ده‌زانن

ئه‌وان كه‌ی خانه‌قای برسی و

دڵسۆزی خه‌م و میوانن

 

 

Previous
Next

Leave a Reply