Skip to Content

Monday, November 30th, 2020

توانه‌وه‌ له‌ده‌شتی غوربه‌تا

Be First!
by August 9, 2012 هۆنراوە

 

 

تاڵ وه‌كو ئه‌و شه‌وانه‌ی 

مردن له‌سه‌ر گه‌ڵای خه‌نده‌یه‌ك 

خوێنی پژانه‌ رۆحی ژانه‌وه‌ 

ده‌سته‌كان تێكه‌ڵی سه‌مای موحیبه‌ت و 

په‌نجه‌كانمان له‌سه‌ر ده‌فته‌ری عومر هه‌ڵوه‌رین 

نه‌وه‌كو پیاسه‌یه‌كی خه‌مگین 

یه‌خه‌ی سه‌رابه‌كانی یادوه‌ریمان بژاكێنێ‌ 

چوون مه‌راق چۆن به‌ركی خۆزگه‌یه‌ك هه‌ڵده‌دڕێ‌ 

دوای جریوه‌ی جوانی كه‌وتووین 

له‌نسێی سۆزێكی تروسكه‌دا هه‌ڵنشتین 

لانه‌ی ترس و جاده‌ی گومان رایده‌ژه‌نین 

لانكی عیتاب و رۆژگاری پڕاوپڕ له‌خاڵیبوونه‌وه‌ 

نیگای شه‌وه‌زه‌نگی ده‌به‌خشیه‌ ساته‌كانی میهرو 

دڵنه‌وایی مورێدێكی عیشق چاوه‌ڕێی ده‌كردین 

بۆرامووسانی رووناكی و 

نوستن له‌سه‌ر لاسكی سۆزدا 

دارێك به‌ری خه‌ونێكی نه‌گه‌یانده‌ مه‌رام 

هه‌ڵوه‌سته‌یه‌ك… 

زامه‌كانی ئه‌نگوستمانی نه‌دۆزییه‌وه‌ 

به‌ده‌ر له‌ته‌نیایی خواو 

تاریكی ساته‌كانی مانگی ژێر هه‌ورو 

توانه‌وه‌ی من تۆ له‌ده‌شتی غوربه‌ تا 

كه‌سێك نه‌بو گولله‌یه‌ك به‌ ماچ بگۆڕێته‌وه‌ 

چڵێَك له‌قه‌ڵه‌م ماره‌ بكاو 

چركه‌یه‌ك له‌ته‌مه‌نی خۆی داگیرسێنێ‌ 

وه‌لی به‌فر برینه‌كانی خاكی ده‌سڕی 

گه‌ڵا سه‌مای به‌سه‌مفۆنیای عیشق ده‌كردو 

كه‌ناریه‌كانیش له‌ده‌ستی راوچیه‌ك ده‌ترسان 

وه‌كو ئێمه‌ راپێچی ده‌ترسان 

وه‌كو ئێمه‌ راپێچی بێده‌نگی و حوزنی بكا 

پیاسه‌یه‌ك قه‌ده‌ری ترس و راڕایی 

ئه‌وینێك ته‌مه‌نی له‌په‌رده‌ی بووكێنی ناسكتر 

چاوه‌ڕێی شه‌وێكی قه‌ترانی جوتبوون بوون 

ساته‌كان هه‌ڵوه‌رین… 

روژه‌كان به‌باسكی زه‌مینا هه‌ڵتووتان 

نه‌من توانیم… 

له‌ئاوێته‌بوونی عه‌شق و مه‌رگ جوێبمه‌وه‌ 

نه‌تۆش ده‌رگایه‌كت شكاند 

ژوانێك به‌رووتا داده‌خا 

بۆیه‌ ژوانێك ده‌مگه‌زێ‌ 

مردنێك به‌ره‌و كه‌نا ری سڕینه‌وه‌ كێشمده‌كات 

له‌هه‌وره‌زێی ئه‌ندێشه‌و 

نزای خه‌ره‌نده‌كاندا سوێمده‌بێته‌وه‌ 

ناگه‌مه‌ هیچ… 

له‌بڕواكان به‌رچنه‌یه‌ك له‌سێوی عه‌ده‌م ده‌چنم 

له‌خوێنی گه‌ڵای بێنه‌واییدا سه‌رده‌نێمه‌وه‌ 

سه‌رم لیگۆڕ ده‌ترازێ‌ و 

له‌كۆشی ورده‌گڵا ده‌بمه‌ سه‌هه‌ند 

كام عومری پێشوه‌خته‌ به‌دوێنێم ده‌ناسێ‌ 

ئه‌مڕۆم ده‌كاته‌ وێردی شه‌وچه‌ره‌ی عه‌شقێكی بێئومێد 

له‌خۆما ده‌نێژرێم و 

له‌زاری بێده‌نگیا ترپه‌ی دڵه‌كان ده‌ژمێرم 

دڵی گه‌ردوون… 

هێنده‌ سزای هاوخه‌می ناشتووه‌ 

له‌هه‌وره‌بانی تریفه‌دا 

گه‌واڵه‌مه‌رگی ئاسمانه‌كان ده‌پێچێته‌وه‌ 

له‌نوتفه‌ی ئه‌ستێره‌یه‌ك هاتمه‌بوون 

له‌سكی گه‌واڵه‌یه‌كدا لایلایه‌ی پرشنگم قۆزته‌وه‌ 

نه‌بابووه‌ ده‌سرازه‌ی شه‌وانی بێلانكم 

نه‌ئاسمان خه‌مێكی له‌دڵما سڕیه‌وه‌ 

بۆیه‌ مه‌رگ به‌عومرم ئاشنایه‌ 

به‌خاكیش ئه‌وینم گڕده‌گرێ‌ 

من خه‌ونێك هێنامی 

له‌جه‌سته‌ی به‌ردێكا به‌كانی ناساندم 

له‌نسێی گردێكا… 

داری حورمه‌تی له‌دڵا رواندم 

ئه‌مێستاش به‌شێكم به‌رزیه‌و 

ئه‌وی دیم له‌گۆڕی سه‌ردڵی خاك ده‌چێ‌ 

ئه‌و گۆڕه‌ی من و تۆی خسته‌وه‌ 

گه‌لێكی به‌گڕی تاواند سووتاند 

ده‌مێكیش بۆده‌می گڕستان 

خه‌ونی زۆرداری داپاچی 

ئه‌و گۆڕه‌ی… 

له‌خه‌نده‌ی ئاسمان بێزاربووه‌ 

له‌خه‌رقه‌ی خاكیشا… 

له‌نه‌وای ئاوازی ده‌رناچی 

چۆن كه‌یلین به‌خۆزگه‌ی ره‌نگاڵه‌..؟ 

چه‌ند مه‌ستین به‌سینه‌ی ته‌فره‌و حه‌ز…؟ 

بۆ ژانێك راونه‌كه‌ین…؟ 

مردنێك به‌باڵای عومرمان نه‌دوورین 

ئازارێك سكاڵای ئه‌زموونمان ده‌نۆشێ‌ 

جوودابوون به‌هیچمان ده‌سپێرێ‌ 

 

Previous
Next

Leave a Reply