Skip to Content

Monday, November 30th, 2020

تۆ وابکە …. هیوا سەعید

Be First!
by October 28, 2012 هۆنراوە

 

 

 

بۆم –

سێبه‌ری دره‌ختێ بی

له‌سه‌ر ڕێگه‌ی ماندوبوونم

شیله‌ی لێوی کانیێ بی

له‌ لێواری تینوبوونم

 

تاکو منیش خۆشه‌ویستیت

داچۆڕێنمه‌ ناو خوێنمه‌وه‌،

ناو دڵمه‌وه‌،

ناو گیانمه‌وه‌،

ناو گلێنه‌ی چاوانمه‌وه‌.

 

بۆوه‌ی نه‌ڵێم:

ئاسمانێک بووم هه‌ور جوانی لێ تۆراندم،

باخی دڵی زه‌مینێک بووم

پایز گوڵی لێ وه‌راندم

 

بۆوه‌ی نه‌ڵێم:

چوومه‌ ژوانی ئێواره‌یه‌ک

                 به‌جێیهێشتم،

له‌ بناری تاریکی شه‌و

وه‌ک خۆره‌تاو باڵای ناشتم

 

ئه‌ستێره‌کی گه‌شاوه‌ به‌

تا سپێده‌ش تۆی خۆشبوێ

به‌هارێکی ڕازاوه‌ به‌

تا بارانیش تۆی خۆشبوێ

 

تۆ وابکه‌

له‌ چیرۆکه‌ خه‌ماوییه‌کان

                نه‌تناسمه‌وه‌

له‌گه‌ڵ هاژه‌ی هیچ ڕوبارێ

توڕه‌بوونت نه‌بیسمه‌وه‌

 

داستانیک بی

خۆشه‌ویستی

نه‌فره‌ت نه‌کا له‌ هه‌بوونت

کوژانه‌وه‌ قه‌ت نه‌بێته

به‌سه‌رهاتی ئاوابوونت.

Previous
Next

Leave a Reply