Skip to Content

Friday, December 4th, 2020

حاسیبێ‌ بو مه‌ چ نه‌كر!!…..عبدالرحمن بامه‌رنی

Be First!
by June 21, 2009 گشتی

حاسیبێ‌ بو مه‌ چ نه‌كر!!
عبدالرحمن بامه‌رنی

 

تشتێ‌ ژ هه‌میا پتر من دكێشنه‌ بیرێن زاروكینیێ‌، ئه‌و روژێن نه‌خوشن ئه‌وێن خه‌ونێن من تێدا نه‌بوینه‌ راستی! خه‌ونا ژ هه‌میان ژی پتر كه‌نیا من دگه‌ل دهێت، هه‌كو ل ماتانێ‌ ده‌قێ من یێ‌ سور (فه‌روی) ژمن بری و وێ‌ شه‌ڤێ‌ هه‌میێ‌ مات ژ عه‌سمانی دبارین. هه‌كو ئه‌ز مه‌زن بویم ژی لبیرا منه‌ به‌ری قه‌ستا چیایی بكه‌م من حاسیبه‌ كره‌ دناڤ ده‌ستێن خوه‌ دا و قه‌دێن دارا لدویف روژێن زڤستانێ‌ دبرین و روژێ‌ دێ‌ چه‌ند سوپێن دارا هلكه‌م. چ جارا ژی ژبیرا من ناچیت هه‌كو من نڤێژ لسه‌ر ستریا دكرن و چه‌ند ئه‌و ستری ددژوارتر ژی بان و جهێ‌ من سه‌رێ‌ خوه‌ لێ‌ بو سوجدێ‌ دبر نه‌خوشتربا، من هزر دكر ئه‌ز پتر یێ‌ نێزیكی خێرا دبم. ل هه‌وه‌ ناڤه‌شێرم من زمانێ‌ ئاخفتنێ‌ نه‌بو تا ئه‌ڤ ره‌ش ره‌شكه‌ ده‌ركه‌تین، نوكه‌ ئه‌ز دشێم هه‌می تشته‌كێ‌ من ددلێ‌ خوه‌دا خرڤه‌ كری دارێژمێ‌. ل به‌راهیێ‌ هه‌میا جلێن كوردی و شیتك دكرنه‌ به‌رخو، هه‌له‌ی بابێ‌ وی ره‌خته‌كێ‌ ساجورا ل پشتا خوه‌ ب شدینیت. ده‌رسوكێن سور لسه‌ر ئێزدیا هاتنه‌ گرانكرن و هه‌ڤجار ب گێسنێ‌ ته‌ره‌كتورێ‌ هاته‌ گوهرین و ته‌قچكێن روینشتنێ‌ ژی بونه‌ كورسیكێن لسه‌ر تایرا و هه‌ر كه‌سێ‌ كورسیكه‌ك ب تالع و نه‌سیبی گه‌هشتیێ‌، ئه‌نیا خوه‌ پێڤه‌نا و نڤێژ بوكرن! هه‌میا دڤیا خه‌ون هه‌بان و هه‌میان ژی خه‌ون ب وان كورسیكان ڤه‌ددیتن. ده‌وله‌ت سه‌رێ‌ خودانێن كورسیكان ژی، هه‌ر كه‌سێ‌ لدوور زڤری و ئه‌زمانێ‌ خوه‌ بو حلی كری بهوسته‌ك بره‌خ ڤه‌ بو خو ستاند و بو خودان تشت. هه‌می تشت بو نه‌ هه‌ڤكێشه‌ و دا ژیان برێڤه‌ بچیت، هه‌می تشت دبو نه‌ ددو! هه‌ر ژ شه‌ڤ و روژان، ره‌ش و سپیان، تا دگه‌هیه‌ دوو سه‌روك وه‌زیرا و دوو حكومه‌تا و كه‌نگی هاتیه‌ گوهێن مه‌ كورسیك ب ئێكجاری هاتن لێكڤه‌كرن، شنوی نه‌عورا مه‌ لسه‌ر بنێ‌ خو راوه‌ستیا.
ژبێ‌ ئێقبالی و ده‌رده‌سه‌ری و ته‌وه‌قوعاتێن مه‌ یێن بله‌ز، كه‌ركوك و خانه‌قین و باژێرێن دیێن ته‌عریبكری یێن دمیننه‌ لوێڤه‌ی خه‌تا 36 ێ‌، ئه‌و دارێن مه‌ ب حاسیبێ‌ بو سه‌رما زڤستانێ‌ ژ چیایی كێشكرین ژی، یێن هشكاره‌ دبن. ئه‌و نڤێژێن مه‌ لسه‌ر ستریان ژی كرین، به‌ریكێن مه‌ تژی شه‌كروك نه‌كرن. خودێ‌ خێركه‌ت بلا وه‌ بێهنه‌كا فره‌ه و درێژ تر هه‌بیت، دگه‌ل من دا ده‌ستێ‌ خوه‌ بلند بكه‌ن و بێژن خودێ‌ بكه‌ت وه‌ك پار سال هشكه‌ سالی ڤه‌كێشیت، هه‌كه‌ عه‌سمان خودێ‌ نه‌كه‌ت شوینا ته‌به‌لان دارێن قه‌د كری ژی ببارینیت! نه‌ كو دێ‌ كه‌ركوك پێ‌ زڤریت، به‌لكو دێ‌ سه‌رما مه‌ كه‌ته‌ داره‌كێ‌ ره‌ق و قرا مه‌ خره‌كا دێ‌ پێ‌ رابیت؟!!

bamerni77@yahoo.com

 

 

Previous
Next

Leave a Reply