Skip to Content

Saturday, December 5th, 2020

حه‌سره‌تی گه‌ڕانه‌وه‌ بۆ یه‌كه‌م ده‌رگا ..سه‌ڵاح قابیل

Be First!
by September 19, 2012 ئەدەب

 

 

 

پیاسه‌ی كۆڵانه‌كانی ئه‌م مه‌نفایه‌ ته‌واو نابێ و 

هێشتان له‌ژێر لافیته‌ی پرسه‌وه‌

خه‌نده‌كان سیتیانی ڕه‌ش ئه‌پۆشن

هه‌ر نزایه‌ك 

سكاڵایه‌كی به‌قاچیه‌وه‌ به‌ستاوه‌ و

باخچه‌كان شرینی به‌سه‌ر 

باخه‌وانێكی له‌عه‌ده‌مه‌وه‌ هاتوو ئه‌بارێنن

له‌ئه‌مڕۆیه‌كی وندا و سبه‌یه‌كی پڕ گۆمان

باسه‌كانی دوێنێ به‌پۆشاكی نوێوه‌

دێنه‌ ئه‌م ڕه‌شبه‌ڵه‌كه‌

شه‌ویش به‌سه‌ر ئاشقانا تێپه‌ڕ نابێ و

هه‌ر زوو ئاسمانی

ڕێبوارێكی پیاده‌ ئه‌پۆشێت

ئه‌ویش جانتاكه‌ی پڕ كردووه‌ له‌

حه‌ز و ئاوات و ماچێك به‌ڕه‌گه‌وه‌

وه‌ك دیلێكی ڕێگا ون 

شه‌وێكی بیانی قه‌ڵه‌و ئه‌كه‌ن

هه‌ر ده‌رگا ده‌بڕێ و 

له‌دوا ده‌رگادا

ئاوێنه‌یه‌ك ڕێی پێ ئه‌گرێ

بگره‌ گۆچانێك تۆ ته‌واو پیر بووی 

یان .

بمبه‌و به‌یه‌كه‌م ده‌رگام بناسێنه‌ 

با چیتر هاتووه‌كان

له‌م ڕێگایه‌دا گه‌نجی نه‌دۆڕێنن

به‌ویش بڵێ من ته‌مه‌نم 

له‌سه‌فه‌ردا ته‌واو كرد

شانی چه‌پم بێ واژوو 

به‌سپێتی جێبهێڵه‌

له‌وێش له‌مشت و مڕی هه‌وره‌كاندا

بریسكێ بێنه‌ و 

بیكه‌ به‌مه‌شخه‌ڵی یه‌كه‌م ده‌رگا

ئه‌ها ئه‌و كۆرپانه‌ چۆن 

له‌دایكه‌ بارانێك ئه‌ترازێن و 

چه‌ن په‌رۆشن بۆ ماچێكی ئه‌م عه‌رزه‌ 

تا ده‌ستی یه‌ك بگرن و 

له‌سه‌ر سینگیدا (باران بارانه‌ )بڵێنه‌وه‌

پاییز به‌میوانی دێ و 

دارێك هه‌نیسك قووت ئه‌دا 

دیسان ئه‌بێ گڵاكان كات به‌قوربانی و 

كۆرپه‌یه‌كی ڕه‌قه‌وه‌ بوو 

گۆرانییه‌كی پایزانه‌ بنه‌خشێنێ

ڕوحیانه‌تێك ده‌ستی وێڵبازی ئه‌گرێ و

به‌كه‌نیسه‌یه‌كی ئه‌ناسێنێ

چی باسه‌ !

به‌ڵێ له‌مه‌نفاوه‌ بۆ عه‌ده‌م 

هیچ ناگۆڕێ .

ئێره‌ كوێیه‌ 

ئێره‌ كوێیه‌ چ بازارێكه‌ وا

دۆلار پێی گرتووه‌ و

كه‌شیده‌كان پێلاوی بۆ ئه‌سڕن 

سه‌گه‌كان بێ حه‌په‌ كلكی بۆ سور ئه‌ده‌ن

ته‌نانه‌ت سێبه‌ریشی له‌وه‌ ناچێ ته‌نها بێت

بڕۆ و چیتر 

قه‌ڵه‌م به‌م مێژووه‌دا مه‌كه‌ و 

حه‌زه‌كانت مه‌كه‌ خۆراكی 

جانتایه‌كی بیانی

وه‌ره‌ و بریسكه‌كان كۆكه‌ره‌وه‌ 

گه‌ر مه‌شخه‌ڵێكی كزیش بێت 

له‌یه‌كه‌م ده‌رگای هاتووه‌كانی هه‌ڵواسه‌

17/9/2012دێ 

 

Previous
Next

Leave a Reply