خه‌یاڵی مردن…محه‌مه‌د ئه‌سعه‌د
0
Be First!
باران هه‌ڵئه‌وه‌رێته سه‌رجه‌سته‌ی شار
من له ناو پاسه‌كه‌دا
هه‌سته‌كانم ته‌ڕ ئه‌چنه‌وه
ئه‌كه‌ومه‌وه بیری
ئه‌و ئێوارانه‌ی له نێو هه‌وره‌كاندا
چرۆی فڕینم ئه‌گرت
وه‌ك گریانێك تینووی
دابارین ئه‌بووم…ئه‌باریم
وه‌ك چۆن ئێستا باران
به‌سه‌ر جه‌سته‌ی شاردا
دائه‌كا
میهره‌بانه…سپێده‌یه‌كه
ئه‌ڵێی له ڕوحی ئه‌و ژوانانه
ڕژاوه‌ته نێو دڵی شاره‌وه
كه هه‌میشه دره‌خته‌كان
گه‌ڵا له ماچه‌كانیان و
من وشه له ده‌ست گوشینه‌كانیان ئه‌گرم
هه‌وره‌كان لێم ئه‌ڕوانن
منیش خه‌می چۆله‌كه‌یه‌كم
تیا ڕواوه
كه ڕه‌نگبێ ئێستا
له ته‌ڕبووندا كه‌وتبێته
خه‌یاڵی مردنه‌وه
یان وابیركاته‌وه
ئیتر ئه‌و له‌م شاره‌دا
له‌بیرچۆته‌وه
