Skip to Content

Thursday, September 24th, 2020

خوێنەرى تەمبەڵ و گرفتە دەرونییەكانى !!!

Comments
by October 12, 2008 گشتی

 خوێنەرى تەمبەڵ و گرفتە دەرونییەكانى !!!
 رێبوار رەزا چوچانى

 قەیرانى خوێنەر یەكێكە لە قەیرانە بنەڕەتییەكانى رۆشنبیرى كوردى، چونكە خوێنەر بەر لەوەى هەوڵى درك كردنەكانى پەیامى هەر دەقێك بدات، خۆى بەشدارە لە دروستكردنى ئەو فەزایەى كە لە نووسیندا بەرجەستە دەبێت، بەشدارێكى كارایە لە تەفسیر كردنى ئەو پەیوەندییەى كەلە نێوان نووسین و خوێنەردا هەیە و كەشفكارێكى جدى ئەو دنیا مەودا فراوانەیە، كە نووسین دەیەوێت بیخوڵقێنێت، خوێنەرى جدى درك بەم رەهەندە دەكات، بەڵام ئەو خوێنەرانەى كە تواناى درك كردنى ئەو مەودایانەیان نییە، خوێنەرێكن كە تەنیا وێنەى وشەكان دەناسن و تاكە گرفتیان كورتى و درێژى نووسینەكانە، بەبىَ ئەوەى ئەهمییەتى ئەو نووسینانە بزانن، بۆیە ئەم گرفتە ئێستا لە هەموو كات زیاتر لە ناو خوێنەرى كوردا دەبینرێت، كە بەبىَ ئەوەى ئامانج و پەیام و فیكرى دواى نووسینەكان درك بكەن، هەوڵى راڤەكارییەكى هەڵە دەدەن، بۆ ئەو دەق و نووسینانەى كە دێنە بەردەستیان، بەبىَ ئەوەى بتوانن، مەودایەك لە نێوان خۆیان ئەو نووسینەى كە سەرقاڵى تەفسیركردنیانن بدۆزنەوە.
 پرۆسەى خوێندنەوە و ئازاد كردنى بیر، یەكێكە لەو پرۆسانەى كە لە بەرانبەریدا، عەقڵ پێویستى بە مەودایەكى فراوان هەیە، بۆ ئەوەى بتوانێت ئەو فیكرەى لە دواى هەر نووسێنێكەوە هەیە كەشف بكرێت، كە دەشىَ زۆرجار نووسینێكى سادە فیكرێكى گەورەى لە دواوە بێت، فیكرێك لەو پەڕى حاڵەتەكانەوە هێما بۆ شتەكان بكات، هەست كردن بەو فیكرە و كەشف كردنى كارێكى ئاسان نییە و ئەو عەقڵانەى كە مەودایەكى بەرتەسكیان هەیە، ناتوانن ببنە كەشفكارێكى هەر فیكرێك، هەندێكجاریش بە پێچەوانەوە نووسینە درێژ دادڕەكان، هیچ فیكرێكیان لە پشتەوە نییە، كە بتوانێت راڤەى دنیا و شتە چەسپاوەكانى دەوروبەر بكات، لەگەڵ ئەوەشدا دەبێت باوەڕمان بەوە هەبێت، كە هەموو مرۆڤێك دەتوانێ بیر بكاتەوە ئەگەر مەیلى هەبێت بۆى، هەموو مرۆڤێك هەستى درك كردن بە شتەكانى لەلا گەڵاڵە دەبێت، بەڵام هەندێكجار ئەو فیكرە ئەوەندە ساوایە، خاوەنەكەى دەكاتە كۆیلەى وەهمێك، كە پەلامارى دار و دیواریش بدات، ئەوكاتیش ئەم حاڵەتە دروستبوو، ئیتر ژیان هێندە بچوك هەست پێدەكرێت لە لاى ئەو مرۆڤە بەدبەختە، كە ناتوانێ هەرگیز وەك خۆى ببینێت.
 گرفتى خوێندنەوە وەنەبىَ گرفتێكى تازە بێت، بەڵكە لە یەكەم حاڵەتى دروستبوونى ژیانەوە دروست بووە، كە دەشىَ زۆرجار تەفسیركردنى روداو و پێشهاتەكان، مرۆڤ روبەڕوى ئیشكالیەتێكى گەورە بكاتەوە و نەتوانێت ماناكان بدۆزێتەوە، ئەوكات هەر دەربڕینێك لە بەرانبەر هەر حاڵەتێكدا، دەرخەرى مەودایى فیكرى و عەقڵى مرۆڤ دەبێت، كە زۆرجاریش ئەو مەودایە ئەوەندە بەرتەسك دەبێت، تەنانەت ناتوانێت لە بەر لوتى خۆى زیاتر، بستێكى تر ببینێت.
 تەفسیركردنى بابەتەكان تا ئێستا لەم كۆمەڵگەیەدا، كەمجار بە ئاقارێكى تەندروستدا رۆشتووە، ئەمەش پەیوەندى بە ئاستى فیكرى و تێگەشتنى مرۆڤەكانییەوە هەیە، بەڵام نابێت ئەوە لە بیر بكەین، خوێندنەوە كارێكى سەرپێییانە نییە، كارێك نییە مرۆڤ بە ئاسانى بتوانێت بەسەریدا زاڵ بێت و بە ئاقارێكیدا بەرێت، كە بە ئارەزووى خۆى گەمە بەماناكانى بكات، ئائەمەیە گرفتە سەرەكییەكەى مرۆڤە بەدمەستەكان، كە زۆرجار كۆیلە بوونى مرۆڤ بۆ ناوبانگ، ناچارى ئەم حاڵەتەی دەكات، ئەوكاتەى كە مرۆڤ دەبێتە كۆیلەى ناوبانگ، هەر ئەو كۆیلەییە وایلێدەكات، ئەگەر لەسەر حسابى دۆڕاندنى شعور و تێگەشتنەكانیشى بێت، بەدمەستانە بە دواى كۆیلەبوونیدا هەنگاو بنێت، مرۆڤ كە مەوداى عەقڵ و بینینەكانى بەر تەسك بوو، تواناى تێگەشتنیشى كەم دەبێتەوە، بە جۆرێك لە بابەتەكان تێدەگات، كە دور بێت لە حەقیقەتى ئەو بابەتەوە، مرۆڤ كە نەیتوانى ئەو دیوى گوتارەكان ببینێت، روكەشانە دەكەوێتە تەفسیركردنیان و ناشتوانێت كەرەستەكانى خۆى بخاتە كار، تا بە تەواوى تێفكرینەكانى راست بشكێتەوە، چونكە لە ئەزەلەوە كەرەستەكانى، بەشى ئەوە ناكات كە بیناى تێگەشتنێكى گەورەى پێبكات، مرۆڤ كە مەوداى بیر كردنەوەى نەبوو، مەوداى هەڵسەنگانیشى بۆ نامێنێتەوە، چونكە عەقڵى لەوە زیاتر بڕ ناكات و وەك ئەسپێكى شەل، زوو لە لاڕێدا دەكەوێت، ئەوە مرۆڤە كەم دەستەكانن وا لە ژیان دەڕوانن، كە لەو پەڕى سادەییدا خۆى نمایش دەكات، هەموو كاتێكیش زوڕنا ژەنین بە موزیكەكانى مۆزارت تێدەگەن، وا دەزانن موزیكە بێزاركەرەكانى ئاهەنگە شەوانەییەكانى گەندەڵكارەكان، بیتهۆڤنن دابەشى كردوون و ئەوانە هونەرن و كەس نابێت پێیان بڵێت، ئەمانە میزاجى هونەرى مرۆڤ تێك دەدەن، ئەو عەقڵانەى كە تواناى تەفسیركردنى ژیانیان نییە، ژیان لەو پەڕى سادەییدا دەبینن، ئەو عەقڵانەى كە ناتوانن ماناى گوتارەكان تەفسیر بكەن و تێبگەن و تەنیا خوێندنەوەیەكى حەرفیان دەكەن، ناتوانن كارسازانە لە بارەى هەر گوتارێكەوە تێهزرێن و ماناكانى گوزارشت بكەن، مرۆڤە بێفیكرەكان مرۆڤگەلێكن، كاتێك باس لە كۆى هەر شتێك دەكرێت، ئەو (كۆ)یە بە ( + )ى ماتماتیك تێدەگەن، خودى بیركردنەوەش، مادام وشەى بیرى تێدەكەوێت، بە بیركارى(ماتماتیك) دەخوێننەوە، ئا لێرەوە نا ئاگایى خود دەست پێدەكات، نا ئاگاییەك كە دێوانە ئاسا، بە دواى ناوبانگدا هەنگاو دەنێت، تا لە كۆتایی لە حاڵەتێكدا خۆی دەبینێتەوە، كە بۆتە كۆیلەیەكى قیت و قۆز و خوێن شیرینى هەندێك سیمبولى وەهمى، كە دواجار هەست بە مایە پوچى خۆی دەكات، لەو حاڵەتەشدا تواناى تێگەشتن و گوزارشت كردنى كۆیلەیى و خودى ژیانیشی نییە، ئەم عەقڵانە تەفسیر بۆ شت و حاڵەتەكان بكەن، دەبێت چۆن گوزارشتیان لێبكەن، بۆیە لێرەوە پێویستە بچینە لاى (ڤلادیمێر نابۆكۆف)، چونكە نابۆكۆف لە بارەى خوێنەرى باش و نووسەرى باش، پێیوایە بەر لەوەى مرۆڤ بخوێنێتەوە، دەبێت عیشقێكى رادەبەدەرى هەبێت بۆ خوێندنەوە، ئەو كات دەتوانێت وردەكارى ئەو جیهانە درك بكات، بە دواى بەرچنگخستنیان هەنگاو بنێت، كەواتە لێرەوە دەبێت بپرسین، ئایە خوێنەرانى ئێمە تاچەند هەوڵ دەدەن، وردەكارییەكان بدۆزنەوە، كە وردەكارى هەر دەقێك پەیوەستە بە گەڕان بە دوایاندا و هەوڵدان بۆ دۆزینەوەیان، ئەوكات عەقڵى خوێنەر درك بەو مانا و پەیامانە دەكات، كە لە گوتار و دەقەكاندا هەیە، بەڵام لە هەندێك حاڵەتدا خوێنەرى ئێمە، ئەوەندە كەم دەستە، لە جیاتى تێگەشتن و كەشفكردنى پەیامى نووسین و دەقەكان، بوغز و رق و كینە لە دڵیدا دروست دەبێت و دواتر لە دەرفەتێكدا هەڵیان دەڕێژێت، ئەمەش دەرخەرى رووى دزێوى و نەزانى و غەرقبونى هەندێك خوێنەرە، لە ناو دەریایەك لە جەهل، دواتر نابۆكۆف، لەسەرەتاى راوەستانەكانى لەسەر ئەم بابەتە، بە نامەیەكى فلۆبیر دەست پێدەكات، كە بۆ خۆشەویستەكەى نووسیووە، فلۆبیر لە نامەكەیدا نووسیویەتى" مرۆڤ ئەگەر بە لایەنى كەمەوە، بە باشى چەند كتبێك بناسێت، چ توێژەرەوەیەكى دیارى لێدەردەچێت؟ "، ئەم دێڕە نووسینە كە پرسیارێكى فرە رەهەندە، دەشىَ بۆ بە ئاگاهێنانەوەى ئەو عەقڵانە بێت، كە هێشتا نەیانتوانیوە ئاشناى تەفسیركردنى ورد بن، لە بارەى هەر حاڵەتێكەوە، كە راستەوخۆ پەیوەندى بە رامانە عەقڵییەكانەوە هەیە، دواتر نابۆكۆف دەڵێت" دەبێت هەمیشە ئەو راستییە لەبەرچاو بگرین، كە كارى هونەرى خولقاندنى جیهانێكى تازەیە، كەواتە یەكەمین شت ئەوەیە، كە دەبێت زۆر بە وردییەوە ئەم جیهانە بخوێنینەوە، بە جۆرێك لێینزیك بینەوە، وەك ئەوەى هەر ئێستاكە خولقابىَ و پەیوەندى بەو بەو جیهانەوە نییە، كە لەوەو پێش ناسیومانن"، نابۆكۆف لە رێگەى ئەم دەربڕینەوە هێما دەكات بۆ جیهانێك، كە هێشتا زۆرینەى خوێنەرانى ئێمە پێینەگەشتوون، جیهانێك كە لەكاتى تەفسیركردنى هەر دەق و پەیامێك، دەبێت رابردووەكان تێپەڕێنین و بە دواى دۆزینەوەى جیهانێكى تازەوە وێڵ بین، كە لە دواى ئەو دەق و نووسینەوە، وەك باكگراوندێك وجوودى هەیە و مانیفێستى خۆى دەكات، بەڵام گرفتى سەرەكى خوێنەرى تەمبەڵ ئەوەیە، كە ناتوانێت ئەو جیهانە تازەیە بدۆزێتەوە، ناتوانێت رابردووەكان تێپەڕێنێت و وێڵى دۆزینەوەى ئەو جیهانە تازەیە بێت، كە ئەو دەق و نووسینە دەیەوێت چێى بكات، خوێنەرى تەمبەڵ بە سەرپێییەوە بەلاى نووسینەكاندا گوزەر دەكات و لە جیاتى تەفسیركردن و ئاوڕدانەوە و تێگەشتن لەو پاڵنەرانەى كە بونەتە هۆكارى دروستبوونى ئەو نووسینە، هەوڵى سادەكردنەوەى دەدات، كە ئەمەش پەیوەندى بە سادەیى عەقڵى ئەو خوێنەرەوە هەیە، خوێنەرێك كە نەتوانێت خەمە گەورەكانى پشتەوەى هەر نووسینێك ببینێت، ئەو خوێنەرە وەك قوتابییەكى تەمبەلأ، كە تواناى دەرخ كردن و سەعى كردنى وانەكانى نییە، ناتوانێت ببێتە خاوەن تێگەشتنێكى كامڵ، لە بارەى ئەو بوارانەى كە دەیەوێت قسەى لەسەر بكات، ئەگەر قسەشى لەسەر كرد، جگە لە دەربڕینى تێگەشتنە سەقەتەكانى، ناتوانێت زیادەیەك بخاتە سەر ئەو شتانەى كە هەیە، كەواتە هەر دەربڕینێكى ئەو خوێنەرە تەمبەڵە، لە عوقدەیەكى دەرونى زیاتر هیچى تر نابێت، ئەمەش هیچ بایەخێكى نییە، بەڵام دەبێت بپرسین، ئایە عوقدە دەرونییەكان بۆ دروست دەبن و لە چ كاتێكدا سەرهەڵدەدەن؟  دەستكەوتنى وەڵامى ئەم پرسیارەش، دەگەڕێتەوە بۆ پێكهاتەى هەموو ئەو كاریگەرییانەى، كە دەبنە دروستكەرى مرۆڤ و دروستكەرى روانینەكانى خودى مرۆڤ، لە بەرانبەر ژیان و دەوروبەردا، یان دەبێتە دەرخەرى پەروەردە سەقەتەكانى هەندێك لە كۆمەڵگە خۆرهەڵاتییەكان و كۆمەڵگەى ئێمەش بەدەر نییە لەو كۆمەڵگەیانە، مرۆى ئێمە وا پەروەردە كراوە، هیچ كاتێك هەوڵى خوێندنەوەى یەكتر نەدات، كاتێك مرۆى ئێمە لەسەر ئەم حاڵەتە راهێنرابێت و گەورە كرابێت، ئیدى نەك تواناى تەفسیركردنى ژیانی نییە، بەڵكە تواناى تەفسیركردنى خۆیى و ناسینى خۆى و دۆزینەوەى پێگەى خۆیشى نییە، ئەمەش ناچارمان دەكات، بگەڕێینەوە سەر ئەو هەڵوەستانەى كە پێویستە لە بەرانبەر ئەم جۆرە عەقڵە زەلیل و كەمدەست و نەزانانە هەمان بێت، چونكە تێگەیاندنى ئەم عەقڵە بەرتەسكانە و ئاشنا كردنیان بە دنیاى تازە، زەحمەتییەكى لە رادەبەدەرى دەوێت، لەبەر ئەو هۆكارەى ئەم جۆرە عەقڵانە، لە ئەزەلەوە بڕیارى خۆیانداوە كە تێگەشتنێكى سەقەت هەڵبژێرن لە بەرانبەر هەر حاڵەتێكدا، بۆیە كارێكى نائاسانە ئەو بڕیارەیان پێهەڵبوەشێنرێتەوە، یان رەنگە ئەم حاڵەتە پەیوەندى بە تەمبەڵى خۆشیانەوە هەبێت، كە تواناى هەڵسەنگاندنى كایەكانیان نییە، مرۆى ئێمە لە سەرەتاوە بە ناو قۆناغبەندییەكى ناتەندروستدا تێدەپەڕێت(كە لە كاتى تردا باسى ئەو قۆناغبەندییەم كردووە و دوبارە كردنەوەى بە پێویست نازانم) ئەو قۆناغبەندییە كاریگەرى دەبێت لەسەر دنیابینییەكانى، كاریگەرى دەبێت لەسەر مەوداى بینین و بیركردنەوەكانى لە ئاست هەر شتێكدا، ئا لێرەوە ئەم كاریگەرییە دەیكاتە بونەوەرێكى چەقبەستوو، كە ناتوانێت لە ناو چەقبەستوویدا، فیكرى ئازاد بكات، ئازادییەك بداتە فیكرى، كە مەوداى تێفكرینەكانى بەرفراوان بكات و بە قوڵى لە ئاست هەر شتێكدا تێبفكرێت، سەیرەكە لێرەدایە كە خوێنەرگەلێك هەن، جگە لەوەى تواناى تێگەشتنیان ناشكێتەوە بەسەر بابەتەكاندا، ئیدى دەكەونە رەخنە گرتن( نەك رەخنە گرتن، بەڵكە پەلاماردانێكى زەلیلانە و بێكەرەستانە، كە هەر لە یەكەم پەلاماردانیانەوە، دۆڕاندنیان بە دیار دەكەوێت)، من لاریم نییە لەوەى كە هەموو مرۆڤێك مافى رەخنەى هەیە، بەڵام لێرەدا پرسیارێك دێتە پێشەوە، ئایە مرۆڤێك تواناى تەفسیركردنى خودى خۆى نەبێت، دەتوانێت ئەوانى دى رەخنە بكات؟ بۆیە دەشێت لەم لایەنەوە كەمێك بە هەستیارییەوە دەست بەرین بۆ وەڵامەكان، چونكە خودى پرسیارەكە روبەڕوى حاڵەتێكمان دەكاتەوە، كە بیركردنەوەكان لە بەرانبەر ئەم پرسیارەدا كەمێك قوڵتر بكەینەوە، چونكە وەڵامى ئەم پرسیارە هەروا بە ئاسانى خۆى نادات بەدەستەوە، بۆیە لێرەوە دەبێت بگەڕێینەوە سەر ئەو تێڕوانیانەى كە مرۆڤ لە بارەى خودى خۆیەوە بۆى دروست دەبێت، لە كوێدا مرۆڤ توانى تەواوى كارە باش و نا باشەكانى خۆى رەخنە بكات و بتوانێت خودى خۆى وەك ئەوەى ئەویتر لە دەرەوەى خۆیەوە دەیبینێت بناسێت، ئەوكات دەتوانێت ئەوانى دى بهێنێتە بەر دید و رەخنەیان بكات، بەڵام ئایە ئەم حاڵەتە دروست دەبێت؟ ئەمەش گەڕانێكى ترى دەوێت، بۆ ئەوەى بە دروستى تێبگەین، كە ئایە پرۆسەى خودناسى لە چ رەهەندێكەوە، دەتوانێت خودەكان بخاتە بەر رۆشنایى و لە ناو بیركردنەوەكانى خۆیاندا، جێگەیەك بدۆزێتەوە بۆ ئەوەى بیر كردنەوەى خود، بۆ لاى خود و لە بەرانبەر خود جێگیر بكات، ئەوكات ئەم پرۆسەیە دەگاتە قۆناغێك، كە مرۆڤ وەك بونەوەرێكى بیركەرەوە، یەكەمین قۆناغى تێفكرینى لە دواى روانین بە دەوروبەردا، لە خودى خۆیە دەست پێبكات، ئەم دەسپێكەش لەوەوە سەرچاوە دەگرێت، كە مرۆڤ لە پرسیار كردن لە بارەى خۆى و چۆنێتى دروستبونى(( ئەمەش زۆرجار رەهەندێكى میتافیزیكى وەردەگرێت، بە تایبەت ئەو كاتەى، كە مرۆڤ لە رەهەندە ئاینییەكەوە لەم بابەتە بڕوانێت)) دەست پێبكات، من بۆ دروستبووم، ئەركى من چییە لەم ژیانەدا، مافم چییە، من دەتوانم چ زیادەیەك بخەمە سەر شتەكان، من چۆن لە دنیا دەڕوانم، لە كوێدا هەڵەم و لە كوێشدا تێڕوانینەكانم بەرەو ئاراستەى دروستى رێگە دەبڕن، لە هەمووى گرنگتر، ئایە من خاوەنی تێگەشتنێكى كامڵم لە بەرانبەر ئەو بابەت و كایانەى، كە پێویستە تەفسیركردنیان بۆ بكەم؟ …هتد، ئەمانە چەند پرسیارێكن هەر كاتێك خود توانى ئاڕاستەى خودى خۆى بكات، ئەو كات یەكەمین هەنگاوى خودناسى دەست پێدەكات، كە ئەم پرۆسەیە گرنگییەكەى لەوەدایە، تێگەشتنى مرۆڤ لە بارەى هەموو كایەكانى ژیانەوە قوڵتر و فراوانتر دەكات، لەو حاڵەتەشدا كۆمەكى مرۆڤ دەكات، بۆ تێگەشتن لەو كایانەى كە دەیەوێت تەفسیریان بۆ بكات، لەسەروى هەمووشیانەوە تێگەشتن لە فیكر و پەیامى ئەوانیتر كە سەرنجى رادەكێشن.
 فلیپ سۆلەرز لە بارەى بەر پرسیارێتى نووسەرەوە دەڵێت"من لەو بڕوایەدام كە بەرپرسیارێتى سەرەكى نووسەر، لە ئیلتیزامیدایە بە جوانناسى و شێوەى نووسینشیەوە"، نووسین بەرپرسیارەتییە، وەك چۆن رەخنە و تەفسیركردنش بەرپرسیارەتییەكى گەورەترە، هەڵە بەكار بردنى هەندێك پەیامى نووسین، لە هەندێك تێگەشتندا خۆى لە خۆیدا هەوڵدانە بۆ تیرۆر كردنى مانا فراوانەكەى نووسین، كە ئەمەش هەندێك خوێنەرى تەمبەڵ پەناى بۆ دەبەن، نووسەر كاتێك دەتوانێت راستەوخۆ بەشدار بێت لە پرۆسەى هەڵوەشاندنەوەى حاڵەتە ناتەندروستەكان و سەرلەنوىَ بونیادنانەوەى بە شێوەیەكى تەندروستانە، كە بتوانێت جوانییەكان لە ژیانەوە بگەڕێنێتەوە بۆ خودى ژیان، كە بتوانێت لە یەكەمین هەنگاوییەوە باوەڕە چەقبەستووە نەگۆڕەكان هەڵتەكێنێت و لە جێگەیدا هەوڵى بونیادنانەوەى ئازادییە مەودا فراوانەكان بدات، كەواتە نەبوونى بەرپرسیارەتى ئەوە نییە كە تۆ شتە ناباشەكانى رابردووەكان رەت بكەیتەوە، بەڵكە هەست نەكردن بە بەرپرسیارەتى ئەوەیە مرۆڤ نەتوانێت دان بە حەقیقەتەكاندا بنێت، خوێنەرى تەمبەڵ ناتوانێت هەست بەم لایەنە بكات، تەنیا دەیەوێت شتەكان چۆن لە ئەزەلەوە هاتوون، دەبێت هەر واش بمێننەوە و ئەم نەگۆڕییەش روویەكى رەسەنایەتى و پیرۆزییان پێببەخشێت، ئەمەش وامان لێدەكات لە بەرانبەر شتە نەشاز و نامەعقولەكانى ئێستادا دەستاوسان بوەستین، چونكە ئەم شتانەش كە بوون بە رابردوو، بە شێوەیەكى ئۆتۆماتیكى دەبنە رەسەن (بە قەولى ئەوان)، بۆیە رەسەنایەتى حاڵەتێكە بە بڕواى من دەبێت هەڵبوەشێنرێتەوە و پەراوێز بخرێت، چونكە رەسەنایەتى هەندێك شتى چەقبەستووە، كە پێدانى شوناسى رەسەن، رێگە دەگرێت لە بەرانبەر هەڵوەشاندنەوە و فڕێدان و پەراوێزخستن و كەم بایەخ كردن و تێپەڕاندنیان، ئەمەیە جیاوازى خوێنەرى تەمبەڵ و خوێنەرى هوشیار، چونكە خوێنەرى تەمبەڵ ناتوانێت دەست بۆ رابردووەكان بەرێت، لەبەر ئەوەى رابردوو بۆتە بەشێكى موقەدەس لە ژیان و بیركردنەوەكانى، پێكهاتەى رابردووەكانیشى، بۆتە رەسەنایەتى و رەسەنایەتیش وایلێدەكات، كە ئەگەرچى لەم سەردەمەدایە، بەڵام وەك مرۆڤێكى كۆنینە تێبهزرێت، هەمیشە دروستكەرەوەى هەمان وێنەى رابردووەكانى بێت، نەتوانێت هێما تازەكانى ژیان و وێنە تازەكانى دەوروبەر لە دیدگایەكى فراوانەوە وێنا بكاتەوە.
 كەواتە كەمدەستى لە تێگەشتنى خوێنەرى تەمبەڵ، وادەكات كە نەتوانێت راستى و دروستى حاڵەتەكان بخوێنێتەوە، ناتوانێت لە بەرانبەر ئەو پەیامانەى كە گوێبیستى دەبێت، تێگەشتنێكى كامڵى هەبێت، بۆیە زۆرجار روبەڕوى ئیشكالیەتى گەورەى فیكرى دەبێتەوە، ئیشكالییەتێك كە دەبێتە هۆكارى جیگیر نەبوونى بڕوا و متمانەكانى خۆى، بەو گوزارشتانەى كە دەریدەبڕێت، ئەوكاتە هەر خودى خۆى، دەبێتە بكوژى ئەو پاڵنەرانەى كە هەمیشە وەك پاڵنەرى مرۆڤەكانى دى، دەیبەن بەرەو ئاراستەى تێگەشتنێكى قوڵ و كامڵ.
 خوێنەرى تەمبەڵ كارەكتەرى سەرەكى ئەم حاڵەتەیە، كە خۆى دەبێتە بكوژى ئەو پاڵنەرانەى دەیكەنە مرۆڤێكى كامڵى بە ئەزموون، ئەزموونى ژیانیش فێرى ئەوەى بكات، تەفسیركردنى بۆ ژیان تەفسیركردنێكى سەرپێییانە نەبێت.
 
 Rohani1983@gmail.com
 
 
 تێبینى
 ئەم نوسینە لە ژمارە 136 رۆژى دووشەم 6/10/2008ى رەخنەى چاودێر بڵاوكراوەتەوە
 

Previous
Next

Leave a Reply