Skip to Content

Friday, October 30th, 2020

دنیا ئاخرى … نەوزاد بەندى

Be First!

 

 

 

شیعرێکم بینى لە کەلاوەیەکا ،

بە پێوە میزى ئەکرد ..

وتارێکم بینى ڕیشى بەڕێوەبەرێکى گشتى 

ئەتاشى و

سمێڵى بۆ تەرازوو ئەکرد ..

بە دەزوو ، مووەکانى سەر ڕوومەتى  هەڵئەگرت ..

(دنیا ئاخرییە )

دنیا ئاخرى ..

لە ئەمریکا نزیکەى پێنج ملیۆن کەس بێ داڵدەن و

نزیکەى بیست و پێنج ملیۆن خانوویش چۆڵن ..

(دنیا ئاخرى ..)

کورتە چیرۆکێکم بینى ،

لە ڕۆمانێ ون بوبو ..

نەخوێندەوارێ هەڵى گرتەوە و

خەڵاتێکى مەحەلى پێ وەرگرت ..

لەگەڵ کۆمەڵێ مێز گرد..

(دنیا ئاخرییە ..دنیا ئاخرى )

سیاسیەک دەمى داپچڕیبوو ..

فەیلەسوفێ ، چۆلەکەى بیرۆکەکانى بەردابووە دەم و ددانى ،

بۆ ئەوەى پاشماوەى برنج و

گۆشت و

کورسى نەعنا و

فستق و

بندق و

کازۆ و

ڤیاگرا و

گەزۆ ى بۆ دەربێننەوە ..

فڕۆکەیەک پڕ بوو لە مێینەى سۆزانى ..

کۆمەڵێ نەخۆشى شێرپەنجەیش ،

بە ئومێدى ڤیزە و

فڕۆکە و

نەخۆشخانەیەکى هەندەران ،

کۆتاییان بە ژیان هانى..

(دنیا ئاخرییە.. )

سوپایەک وەزیر و پەلەمانتار ،

دایان بەسەر ئاواییدا ،

یەک گوڵە گەنمیان بە ساغى نەهێشتەوە ..

دوێنێ و

ئەمڕۆ و

داهاتوویان خوارد ،

بە کۆمەڵێ جۆر لە چێشتەوە ..

(دنیا ئاخرییە ..دنیا ئاخرى )

 

 

 

Previous
Next

Leave a Reply