Skip to Content

Wednesday, October 21st, 2020

دنیا پێویستی بە شۆڕشی کرێکارییە

Be First!
by March 2, 2012 گشتی

ئێمە ٩٩%، وال ستریت داگیر بکەن، ئەزمەی ئابوری ئەوروپا، “بەهاری عەرەبی”، شۆرش، گەڕانەوەی مارکس، کاپیتاڵ، مانگرتن و خۆپیشاندان… مەقۆلە سەرەکیەکانی تۆری میدیا هەمەرەنگەکانی، جیهان لە ساڵ و نیوی رابردوودا بوون.
ساڵ و نیوی رابردوو پڕ رووداوترین و بڕگەیەکی مێژووی هاوچەرخی جیهان و دەستپێکردنی سەردەمێکی نوێ بوو.  جگە لە روداوو تسۆنامیە سروشتیەکانی وەکو بومەلەرزەکانی کەنارەکانی رۆژهەڵاتی یابان قوربانییەکانی لە ١١ ئازاردا، وشکەساڵی هەڵوشینی سەدان هەزار ئینسانی سۆدان لە برسان، زریانی “ئیرین” ی‌ 20ی ئابدا کە كه‌ناره‌كانی ڕۆژهه‌ڵاتی ئه‌مریكا و كه‌نه‌دای گرته‌وه، تاوانی ئه‌ندرێ بێهرینگ بریڤیك)ی نه‌رویژی له‌ 22ی ته‌مموزدا کە چه‌ند ته‌قینه‌وه‌یه‌كی له‌چه‌ند باڵه‌خانه‌یه‌كی حكومی له‌ ئۆسلۆی پایته‌ختی نه‌رویژ ئه‌نجامدا و دواتر ته‌قه‌ی له‌ كامپێكی گه‌نجانی پارتی كرێكارانی ئه‌و وڵاته‌ كرد و 69 كه‌سی كوشت، بوومە لەرزەکەی وان، یاخی بوونەکانی لەندەن، کوژرانی بن لادن و قەزافی، پاشەکشەی زوربەی سوپای ئەمریکا لە عێراق، ….دنیا پێی نایە دەورەیەکی نوێووە، دەورەیەک کە وەکو هەموو دەوران و بڕگە مێژوویەکانی دنیا، سەرجەم هاوکێشە ئابوری و سیاسی و کۆمەڵایەتی و تەنانەت فەرهەنگیەکانی دنیا دەخاتە ژێر کاریگەرییەکانی خۆیەوە.
بنبەستی ئابوری سەرمایەداری کە بە شکستی وال ستریت دەستی پێکردو پاشان داروخان و لەدەستدان و مایەپوچی سەدان بانکی بەدوای خۆیدا هێنا و ڕۆچووە شادەماری ئابوری دنیای سەرمایەداری… ئاوابوونی ئاسۆی ئابوری نیزامی سەرمایەداری و شیوازی بازارە لیبرال و ئازادەکەی، دەستی نایە بینەقاقای سەرچاوەی سودی سەرمایەو سیستەمەکەی، تا ڕادەی ئەوەی کە دەوڵەت ناچار بوو وەکو پارێزەری دەسەڵاتی سیاسی و چینایەتی سەرمایەداری و نوێنەری کەمایەتیەکی کەمی خاوەن هۆیەکانی بەرهەم هێنان ١%  روخساری دزێوی خۆی نیشانی کۆمەڵگا بدات و درۆ زەبەلاحەکان و پشتی تیۆرییە ئارایشداراوەکانی وەکو دەوڵەت کاری بە بازارەوە نییە، دەوڵەت نوێنەری تاکەکانی کۆمەڵگاو پاراستنی سەروەری ئاسایشی نەتەوەیی و ئایندەی هاوڵاتیان و بەرژەوەندییە هاوبەشەکانی دانیشتوانە… کاری بەسەر بازاڕو بەرهەم ‌هێنانەوە نییە، دەرخست، کە دەوڵەت ئامڕاز و چوارچیوەی دەزگایەکی زەبەلاحی پاریزەری سیاسی و ئابوری و سەرمایەوە چینی سەرمایەدارو مانەوەیەتی لەقەڵەمرەوی سیاسیدا، لە بەرامبەر بە چینی کرێکارو تاکەکانی کۆمەڵگا. ئەم دەزگا زەبەلاحەی ناوی دەوڵەتە بۆ رزگارکردنی بانکەکان و ئەزمەی سەرمایەداری و بۆ بەرگرتن بە داروخانی زیاتر بە ئاشکراو بەبەرچاوی پەرلەمان و لەناوجەرگەی پیاهەڵدان  بە سیستەمی پشت بەستووی دیموکراسی لیبرالی و..دا، کەوتە بەرگری لە چاوچنۆکی سەرمایەو بانکەکانی و تا سنورێک بۆ دابەزینی رادەی سودی سەرمایە دابنێت و فریای بکەوێت. کەمکردنەوەی بیمە کۆمەڵایەتی و تەندروستی و تەرفیهیەکان، تا دەگات بە دەرکردنی بە لێشاوی کرێکاران و بردنە سەری تەمەنی خانەنشینی و سەندنەوەی ماف و دەسکەوتەکانی چینی کرێکارو …دۆخیكی نەخوازراوی بەسەر چینی کرێکاری بەرهەمهین و تەنانەت چینە ناوەراستەکانی کۆمەڵگادا،سەپاند کە ئاستی بەرێوەچوونی ژیانی سەدان ملیۆن ئینسانی هێنایە خوارەوەو لەبەردەم نابودیدا داینان. شەپۆلی ئەم هێرشەی بۆرژوازی بەمەبەستی قەرەبووکرنەوە و خاڵی کردنەوەی ئەزمەکەی و دانانی سنورێک بۆ دارمان و داڕوخانی زێدەتر، گواستنەوەی کاریگەرییەکانی ئەم ئەزمەیە بوو بۆ وڵاتانی زونی کاری هەرزان و داسەپاندنی دۆخێکی سەرسام ئاوەر بۆ بەسەر چینی کرێکارو جەماوەری دەستتەنگ و برسی و بێکارو نەدارو بێبەشی کۆمەڵگا… ئەم هەلومەرجە کاردانەوەی شەقام کۆمەڵگاو چینی کرێکارو نەدارانی کۆمەڵگا بەدوای خۆیدا هێنا و خرۆشان و ڕاپەرین و شۆڕشەکانی تونس و میسرو درێژ بوونەوەی و تاوسەندنی بۆ زۆریک لە وڵاتانی تری عەرەبی و پاشان بۆ وڵاتانی ئەزمەگرتووی وەک و یۆنان و ئیتاڵیا و پرتوگال و ئیسرائیل و… هاتنەمەیدانی چینی کرێکار بۆ بەرگری لەخۆی و هەوڵی بۆ هەڵپێچانی ئەم نیزامە چاوچنۆک و ستەمکارەی سەرمایەداری، کە بەهەڵپێچانی دیکتاتۆرەکانی وڵاتانی عەرەبی، تونس میسر چەخماجەی داو بە بزوتنەوەی واڵ سترت و داگیر بکەن و بزوتنەوەی بەدەستەوەگرتنی بانقەکان لە ئەوروپادای بەدوای خۆیدا هێنا، ئاسۆی سیاسی نیزامی سەرمایەداری بە ئاقاری داکوژان و کزبردندا، کیش کردووە. چۆن تائیستا ئاسەوارێک نابینرێ بۆ رزگاری نیزامی سەرمایەداری لەو ئەزمەیەی کە چارهەڵنەگری خۆی نمایش دەکات، ئاواش بزوتنەوەی کرێکاری و جەماوەری ڕێگایەکی تری لەبەردەمدا نییە جگە لەوەی لەو نەبەردە چینایەتیەی سەردەمدا، رێکخراوتر و بەئاقاری ئاسۆدارکردنی بزوتنەوەکەیدا، هەنگاوی سەراسەری و گەورەو یەکپارچە، بهاوێت.
ئێمە ٩٩%، وال ستریت داگیر بکەن ، ئەزمەی ئابوری ئەوروپا، “بەهاری عەرەبی”، شۆرش، گەڕانەوەی مارکس، کاپیتاڵ، مانگرتن و خۆپیشاندان…وەک مەقۆلە سەرەکیەکانی جیهانی ئەم سەردەمە، دەرهاویشتەی ئەو ئەزمەیەی سەرمایەداری و ناکامیەکانیەتی تائیستایەتی بۆ دەربازبوون، لەم دۆخە.
ئەم دەورەیە، دەورانێکی تازەو هاوکات چارەنووس سازە بۆ بەشەیەتی ئەم گۆی زەوییەو چەندین نەوەی ئایندەی. تازەیە چونکە مۆدیلی سەرمایەداری بازاری ئازاد،  ئاسۆی ئابوری ئەم سیستەمە شکستی بەکردەوەی لەئاستێکی فراونی جیهانیدا دەستی پێکردووە. لەبەرامبەر بە کاریگەری و هێرشەکانیشدا بۆ سەر چینی کرێکارو جەماوەری ملیاردیدا، خۆهۆشیاری و هاتنەمەیدانی چینی کرێکارو جەماوەری نەدار و لە ژێر شمشیر راگیراوی برسێتی و گرانی و بێکاریدا، پێی ناوتە دەورەی وەستانەوەو هاتنە مەیدان و وەرێخستنی بزوتنەوەیەکی کۆمەڵایەتی فراوان. هاوکات توڕدانی رژێمەکانی دەست پەروەردەکراو و پاریزەری دەستی ئەمریکاو غەرب لە دنیای عەرەب و باکوری ئەفریقیا و دێژ بوونەوەی بۆ بەشیک لە وڵاتانی ئەوروپا…ئەمەش بەمانای داکوژانی ئاسۆی سیاسی و شکستی سیاسی، سەرمایەیە لەئاستی جیهانیدا کەنەک توانایی بەرگریکردن لە مانەوەی دەسەڵاتەکانی وابەستە بەخۆی لەدەستداوە، بەڵکە هەموو هەوڵێکی خستۆتە گەر تا بەرەی دژە شۆرش، لەبەرامبەر شۆرشدا پەرەپێدات و لەو شوێنانەش شۆرش سەرکەوتووە، خۆی بەسەرکەوتنەکانیانەوە ئاوێزان بکات.
لەدڵی ئەم دۆخە لەداروخانی ئاسۆی ئابوری و سیاسی سەرمایەدا، هاوکات کێشمەکێشەکانی دنیا و پێکهاتەی بەرامبەرکێ سەرەکییە سیاسیەکانی دنیاش ئاڵوگۆریان بەسەردا هاتووە، ئەگەر لەدوای ١١ سیبتەمبەری ٢٠٠١ وە دنیا، کێشمەکێشی دنیا لە نێوان دوو قوتب و بلۆکی تیرۆریزمی دەولەتی بەسەرکردایەتی ئەمریکا و تیرۆریزمی ئیسلامی، رەوتگەلی هەوسارپچراوی دنیادا، بوو. ئیستا ئیتر ئەم دوو بلۆک و قوتبە جیگاو ڕیگایان گۆراوە. ئیستا دنیا لە نێوان دووبلۆکی سەرمایەداری و دەولەتەکانیان لەلایەک و بزوتنەوەی کرێکاری و جەماوەری تورە لەدەسەڵاتە تاڵانچی و دیکتاتۆرو ستەمکارەکان، سیمای بەرجەستەو نوێی ئەم سەردەمەیە.
ئەگەر تا بەر لە “بەهاری عەرەبی” هەموو ئاڵوگۆرەکان و زوربەی جەنگەکان و ئاڵوگۆر لەدەسەڵاتە سیاسیەکانی دنیادا مۆری ململانێی هەردوو قوتبی تیرۆریستی ئەمریکاو ئیسلامی سیاسی پێوەلکابوو، یان لە ژێر کاریگەری هەژمونی ئەواندا دەبزوا، ئەمڕۆ ئیرادەی جەماوەری و بزوتنەوەی دژی نابەرابەری و بێمافی بەدوور لەدەوری ئەوان و لەدژی دەسەڵاتی وابەستەی ئەوان، بزوتنەوەیەکی فراوانی جیهانی و جەماوەرییە کە لە هەندیك شوینی وەکو میسرو تونس دەسەڵاتی رامالیوەو لە هەندیک شوینی وەک و یەمەن و سوریا لە پرۆسەی راماڵیندایەوە لە هەندی ولات و دەوڵەتیش پرۆسەی خۆ ئامادەکردن دەپێوێ و لە وڵاتێکی وەکو لیبیاشدا بۆ زارەکترەک بردنی خەڵک لە شۆڕش شۆرشیان کردە قوربانی بۆ پاشەکردن بە شۆرش لەوڵات و دەوڵەتەکانی تردا… بەڵام ئەم رەوتی شۆڕش و هەلومەرجە شۆرشگێرانەیە بەردەوامەو خامۆشکرنەوەی سادە نیییە. بزوتنەوەی ول ستریت داگیر بکەن کە بە دوای “بەهاری عەرەبیدا” لە ئەمریکاوە پەڕیوەتەوە زوربەی هەرەزۆری وڵاتانی ئەوروپا، لەگەڵ ئەوەدا بەرهەمی بنبەستی ئابوری وسیاسی سەرمایە بوو هاوکات بەرهەمی ناکامی تیكشاندنی شۆرش لە وڵاتانی تری عەرەبیدا بوو.
شۆڕش و دۆخی  شۆرشگێڕانە بە ئازادبوونی شکۆ و ئیرادەی چەند دەهە کۆنترۆلکراو، هاتەوە مەیدان، کە لەگەڵ خۆیدا تەلیسمی ترسی زەبەلاحی دەسەلات و بۆرژوازی تیکشاند و نیشانیدا توانایی ئەم دەسەڵاتانە چەندە بۆشن لە بەرامبەر بەسێڵاوی حەقخوازانەی جەماوەریی راپەڕیوو شۆشخوازدا. هەروەها نیشانیدا هەڵسان لەخوارەوەی جەماوەر و شۆرش لە خوارەوە بۆ هەڵتەکاندنی دەسەڵاتی سەروخەلکی، چەندە کاریگەریترو و پر دەستکەوترە لە گەمەی پەرلەمانی زۆرویژانی بەکرێگیراوی سیاسیان کە لە ژێر ناوی دەستاو دەستپێکردنی دەسەڵات لە رێگای سندوقەکانی هەڵبژاردنەوە، یان لە ژیر بیانوی دەستاودەستپێکردنی ئاشتیانەی دەسەڵاتەوە، هەموو هەوڵیان ئەوەیە رێگە لە دەوری ئازادانەو دەستبردنی جەماوەر لە خوارە بۆ شۆڕش کردن بگرن و ئیرادەی سیاسیان پایمال و رادەستی کۆمەڵیک سیاسی و دەزگای بان خەڵکی و جەماوەری و درۆی دیموکراسی و سیستەمی پەرلەمانی، بکەن.
بزوتنەوە شۆرشگێریەکانی ناوچەکە و خۆپیشاندان و مانگرتنە کریكارییە نەسرەوتووەکانی ئەمریکاو ئەوروپا، لەدڵی قەیرانی ئابوری و سیاسی بۆرژوازی دنیادا لەگەڵ خۆیدا، مارکس هێنایەوە ناو جەرگەی ململانێکان. کاپیتاڵ و مانفیستی کۆمۆنیستی تارادەیەکی حاشا هەڵنەگر، کردۆتەوە بە مانفیستی بزوتنەوە سیاسی و سۆسیالیستەکان و بزوتنەوەی رادیکاڵی کریکاری، لە حالیکدا دەمێک بوو بانگەشەی کۆتایی هاتنی مارکس و مارکسیزم و شۆڕشی کرێکاریی، ماندوبونیکی زۆرو خەرجیەکی زۆری ویست تا نیشانی دنیای بدەن کە بەسەر چووون و کاتیان تەواو بووە، کەچی زیندوبوونیان لەدڵی بزوتنەوە کرێکاری بزوتنەوە پێشرەوەکانی دنیادا، نیشانیدایەوە تا پەیوەندی نیوان ئینسانەکان پەیوەندی زاڵمانە بێت، مارکس و کاپیتاڵ، مانفیست و شۆرشی کرێکاریی، پێداویستیەکی لەکارنەکەوتوون بۆ رزگاری خۆشبەختی ئینسانی.
   دیارە بەشکست کێشانی شۆرشی لیبی یان دزینی ئەوشۆڕشە لەجەرگەی شۆرشدا لەلایەن ناتو و ئەوروپاوەو پاشەکشەپێکردن بە رۆڵی جەماوەری و جێگرتنەوەی بە بۆمب و جەنگی ناتوو ئەوروپا لەگەڵ دەسەڵاتی لیبی کە چەندین دەهەبوو پشتیوانیان لە قەزافی و رژێمەکەی دەکرد، بۆ ئەوە بوو خەڵک لە وڵاتەکانی تر بترسێنن و رەوەندی شۆرش لەدڵی دۆخی شۆرشگێڕانەی ناوچەکەدا، رابگرن… بەڵام ناکام مانەوە و شۆرش و دۆخی شۆرشگێرانە نەوەستێنرا. هەروەها ئیستا و لەئاکامی پرۆسیسیکی دەخالەتگەرانەی دژی شۆرشدا، دەنگ هێنانی ئیسلامیەکان لە هەڵبژاردنەکاندا لە تونس و میسرو نەخشی ئیسلامیەکان لە لیبیا و سیناریۆی برنەوەی رەوتە ئیسلامیەکان لە هەڵبژاردنەکانی کویت…دیسان هەوڵی بەنەخشەی دژە شۆرشی بۆرژوازی و نۆکەرەکانیانن بۆ بەشکست کێشانی ئاسۆی شۆرش و بزوتنەوە جەماوەرییەکان، کە کۆتاییهینان بوو بە ستەمکاری و دەسەلاتی بۆماوەیی،  شۆرشێک بوو بۆ ئازادی و نان و گێرانەوەی شکۆ و ئیرادەی پایماڵکراویان.
لەناو دڵی شۆڕشەکاندا و لە پرۆسەی بەردەوامی شۆرشدا، سەرکەوتنی ئیسلامیەکان لە هەڵبژاردنەکانی تونس و میسردا… وەکو خاڵی لاوازی شۆرش و ناکامی شۆڕش و ترس لەشۆرش وێنا دەکرێت، بێگومان ئەم حاڵەتە جێگای هەڵوێستەیە و هێندەی پەیوەندی بە نارێکخراوی جەماوەری کرێکارو زەحمەتکیش لە رێکخراوەی سەربەخۆی خۆیان و نەبوونی حزبی مارکسی و کۆمۆنیستی و کرێکارییەوە هەیە، هێندە نیشانەی سەرکەوتنی ئیسلامیەکان نییە… بەتایبەت نابیت ئەوە نادیدە بگرین کە شۆرش هێشتا بەردەوامی هەیەو ئەم دۆخی مەستی ئیسلامیەکان بەسەرکەوتنیان لە گەمەی دیموکراسیدا!! تەنها دەتوانێ مەستی کاتی بێت و دەسەڵاتی راگوزەریشیان راگوزەر.
دنیای ئەم سەردەمە سەختە ئەمە قبوڵ بکات، جەماوەریك کە بۆ نان و ئازادی و خۆشبەختی شۆرشیان کردوە، ئیسلامیەکانی دژی نان و ئازادی و شکۆی ئینسان و خۆشبەختی و مافی تاک… بتوانن شۆرش دزی بکەن و تاقیکردنەوەی شۆرشی ١٩٧٩ ی ئێران، دوبارە بکەنەوە. بەڵام ئەمە تێکۆشان و بەردەوامیدان بە شۆرشی دەوێت.
بێگومان دەرسی زۆر گەورە لە شۆرشەکانی ناوچەکەدا و وانە بۆ شۆرشی ئایندەی ئەم دۆخە سیاسی و کۆمەڵایەتیەی دەشی رووبدەن، ئەوەیە کە شۆرش بەبێ رێکخراوبوون و ئاسۆی سیاسی رۆشن و حزبی سیاسی کۆمۆنیستی و کرێکاریی و پێشرەو، ناکرێت چاوەروانی سەرکەوتنی دڵخوازانەی جەماوەری بەدواوە بێت، لە باشترین حاڵەتدا دەکرێت دەسەڵاتێیکی رۆپۆشکراو بەهەمان ناوەرۆکی ستەمکاری و ریفۆرمخوازی کاتی جێگای دەسەڵاتی توڕدراو بگرێتەوە و هەمان دۆخی پێشوو بەکەمێک ئاڵوگۆری روکەش دابسەپێتەوە.
شۆرشی ناتەواو یان بەسەرئەنجام نەگەیشتنی شۆڕش و لە نیوە رێگا مانەوەی بەکردەوە یانی قۆستنەوەی لەلایەن باڵێکی تری بۆرژوازییەوە یان کۆنترۆڵکردنی لەلایەن دەزگاکانی تری دەوڵەتەوە. کاتێک دەوترێت دەوڵەتێک لەدەسەڵاتخرا ئەگەر ئەم لەدەسەڵات خستنە هەموو پایە بنەرەتیەکانی و هەموو دەزگا ئۆرگانەکانی پارێزەری ئەم دەوڵەتە تیكنەشکێنیت، بێگومان هەر یەکێک لەو دەزگا و وەسیلانە دەتوانن چ لە رێگای ریاکاری و فریوکاری و چ لە رێگای زۆرەوە دەسەڵاتی هەمان چینی بۆرژوازی بە گۆڕینی دەم و چاوەکان و کابینەی بەناو نوێی حکومەتی، بگێڕنەوە ژێر سایەی خۆیان رکیفی قەلەمرەوی سیاسی خۆیان دابسەپێنەوە. بۆرژوازی بۆ پاراستنی دەسەڵاتەکەی تەنها حکومەت پەرلەمان نییە، هاوکات لەگەڵ ئەمانەدا تۆرێک لە ناوەندو دەزگاو  ئاشکراو نهێنی و وەسیلەی رەسمی و نارەسمی هەیە کە دەسەڵات و داهاتی زۆری لەبەردەستە، سوپا و دەزگا نهێنیییە سیخوریەکان، ناوەند دینی و مەلەکی و پاشایەتیەکان، هەموو وەسیلەن و کەڵکیان لێوەردەگیرێت. لە وڵاتی میسر مانەوەی سوپاو بەشیكی زۆری دەزگا سیخوریی نهێنیەکان و دەربازبوونی لەدەستی شۆڕشدا و تیك نەشکاندن و هەڵنەوەشاندنەوەی ئەمانە هۆکارێکی سەرەکی بوون و هەن بۆ گێرانەوەی دەسەڵات و قۆرغکردنی شۆڕش لەلایەن بەشیكی تری بۆرژازی وەستانەوەیان بەرامبەر بەشۆرش و شۆرشگێران و  هەوڵەکانی شۆرش بۆ تەواوکردنی کاری شۆرش و بەدیهێنانی خواستەکانی بزوتنەوەی شۆرشگێرانەی جەماوەری. ئەمە دەرسێکی تری گرنگە بۆ هەر شۆرشێک، هەموو شۆرشێک کرێکاری بیت یان جەماوەری و پێویستە بەردەوامی پێبدرێت تا کۆتایی تەواوەتی بە هەموو پایەکان و وەسیلەو ئامرازەکانی دەسەڵاتی بۆرژوازیی دەهێنێت. پێ بەپێی چونە پیشی تیكشکاندنی ئەمانەش پێویستی بە بینا کردنەوەو رێکخسنەوەی دەسەڵاتی پشت بەستوو جەماوەری و وەسیلەو ئامرازەکانی پاراستنی دەسەڵاتی تازەی جەماوەری هەیە.
هەروەها هێزەکانی دژە شۆرش لە ئاستی جیهانی و  محەلیدا، بەهەموو تواناو رێگاکانی بەدەستیانەوە، لە هەوڵی ئەوەدا لە ژێر ناوی ناتەواو مانەوەی شۆرشدا، یان سەرکەوتنی بالێکی تری بۆرژوازیدا بۆسەر تەختی دەسەڵاتی تازە… ناوەرۆکی بزوتنەوەی شۆرشگێرانەی جەماوەری و کرێکاری بچوک بکەنەوە و لە قالبی شۆرشی بەرتەسکی دژی رژێمی و دژی دیکتاتۆریدا قەتیسی بکەن، و ئەو راستیە بشارنەوە کە بزوتنەوەی شۆرشگێرانەی ئەم دەورەیە لە ناوەرۆکدا شۆرش و راسانی جەماوەرییە لەدژی نیزامی سەرمایەداری کە دیکتاتۆریەتی بێپەردەی بۆرژوازی ئەلگۆیەکی ناسراو دیاریەکی قێزەونی خودی بۆرژوازییە بۆ پاراستنی سەرمایەو قازانج پەرستی بۆرژوازی لە زوونی دەستی کاری هەرزانی جیهانیدا. دەسەڵاتی بۆرژوازی لە ئەمریکا و ئەوروپا بێت یان لە میسر و تونس و یەمەن و عیراق و کوردستان، دەسەڵاتی پارێزەری سەرمایەن و یان لەرێگای دیکتاتۆریەتی بێپەردە و یانیش دیکتاتۆریەتی شاراوەوە پاریزگاری لەدەسەڵات و کەڵەکەی سەرمایەو سەراپاری نیزامی سەرمایەداری دەکەن، نابێ ئەو راستیە نادیدە بگرین کە دیکتاتۆریەتی شاراوە کە هەڵبژاردنی پەرلەمانی و دیموکراسی و لیبرلیزمی بۆرژوازی دیوی دەرەوەیەتی لەکاتی پێویست و بۆ بەرگری وەستانەوە بەرووی شۆرش و هەڵسانی جەماوەریدا هیچی لەدیکتاتۆریەتی بێپەردەی قەزافی و سەدام حسین و ئاخوندەکانی ئیران دەسەڵاتە دیکتاتۆرو چنگ بەخوێنەکان کەمتر نییە.   
ئەم دەورەیە، دەورەی “نا” وتن و راسانی بزوتنەوەی کرێکاری وجەماوەرییە بەدژی دەسەڵاتی تاڵانچی سەرمایە. شۆڕشە جەماوەرییەکانی دنیا عەرەب و باکوری ئەفریقیاش، کاردانەوەی خێرای بزوتنەوەی جەماوەرییە بەرووی ئاکامە وێران کەرەکانی قوڵبونەوەی ئەزمەی سەرمایەداری و کاریگەرییەکانی. ئێمە ٩٩% بێداربوونەوەی بزوتنەوەی کرێکاری و راسانی ئۆردویەکی ملیۆنییە کە لە ناوجەرگەی پایتەخت و هەموو شارە سەرەکیەکانی دنیا، بە دروشمی داگیرکردنی بانقەکانەوە،لە مەیداندایە، ڕۆژانەش دنیا بۆتە سەکۆی مانگرتن و خۆپیشاندانی بەرفراونی کرێکاری لە ئەمریکاوە بۆ فەرەنساو یۆنان و ئیتالیا و بەریتانیاو ئەرجەنتین و پورتوگال و ئیسرائیل و…تاد. ئەم بزوتنەوەیە هەڵگری ماکی شۆڕشی کرێکارییە و مارکس و مانفیستی لەگەڵ خۆی هەڵگرتووە، ئەم بزوتنەوەیە حزبی کریکاری و کۆمۆنیستی و ئەنتەرناسیونالی و مارکسیستی گەرەکە بۆ سەرکەوتنی یەکجاری و بناتنانی دنیایەکی نوێ و گۆی زەویەکی خاڵی لە ستەم و چەوساندنەوە و نابەرابەری وهەڵاوردن و بێمافی. چینی کرێکاری کوردستان بەشیکە لە چینی کرێکاری جیهانی و پیویستە بەهێنانە مەیدانی ریزی سەربەخۆی خۆی و لە ژێر ئاسۆی سۆسیالیستیدا و لە ژیر ئاڵای حزبی کۆمۆنیستی کرێکاریدا، بەدژی دەسەڵاتی تاڵانچی و بۆرژوازی کورد، بێتە مەیدان و ریزی بزوتنەوەی کریکاری بەهێزتر بکات. دنیا پێویستی بە شۆڕشی کرێکارییە.

 ناوەراستی فێبریوەری ٢٠١٢


     عەبدوڵا مەحمود

abdulla.mahmud@gmail.com
www.abdullamahmud.com

Previous
Next

Leave a Reply