Skip to Content

Friday, March 29th, 2024
ده‌ هایکۆ له کوبایاشی ئیسا

ده‌ هایکۆ له کوبایاشی ئیسا

Closed
by July 24, 2013 ئەدەب

 

 

 

 

کوبایاشی ئیسا 15ی حوزه‌یرانی 1763ی زایینی له دایک بووه. ژیانی ئه‌و پڕاپڕه‌ له غه‌م و په‌ژاره؛ که دوو ساڵی بوو دایکی کۆچی دوایی کرد و له ته‌مه‌نی 14 ساڵی‌دا دایه‌گه‌وره‌ی مرد. دواتر سێ منداڵ و یه‌که‌م هاوسه‌ری مردن. له سێ ساڵی کۆتایی‌دا له‌گه‌ڵ کیژێکی ساموڕایی زه‌ماوه‌ندی کرد. ئیسا له هایکۆیه‌کانی‌دا باس له ژیانی پڕ له غه‌م و په‌ژاره‌ی خۆی ناکات و تا ماوه‌یه‌کی زۆر له سه‌ر شێوازی باشوو و یووسا بۆسۆن شێعری ده‌هۆنێوه‌ به‌ڵام له ته‌مه‌نی چل ساڵی‌دا گه‌یشته لوتکه‌ی شێوازی شێعری خۆی. ئه‌و زمانی کوچه بازار و زاراوه‌ جۆراوجۆره‌کانی هێنانه ناو هایکۆکانی خۆی. ئیسا 5ی ژانوییه‌ی 1828ی زایینی له گوندی خۆی کۆچی دوایی کرد.

1

له‌م جیهانه‌دا

به سه‌ر میچی دۆزه‌خ‌ هه‌نگاو ده‌نێن و

له گوڵان ڕاده‌مێنین.

 

2

له سه‌ر گڵکۆی کچم

سی ڕۆژ له دوای مه‌رگی:

بای پاییزی هه‌ڵیده‌کا و

ئه‌م گوڵه سوورانه

هه‌ر ئه‌وانه‌ن که ئه‌و

حه‌زی لێبوو بیانچنێ.

 

3

وه‌نه‌وزدانی نیوه‌ڕۆ

ده‌نگی گۆرانی 

به‌رهه‌مهێنه‌رانی برنج ده‌بیسم و

ته‌ریق ده‌بمه‌وه‌.

 

4

شێعری مه‌رگی ئه‌و:

جارێک حه‌مام

که له دایک ده‌بی

جارێک حه‌مام

که تۆ ئه‌مری؛

چ گه‌وجانه‌یه!

 

5

سه‌ردانی دووباره‌ی گۆڕستان و

سه‌گێکی پیر

ڕێگات نیشان ئه‌دا.

 

6

له ژێر وێنه‌یه‌کی بودادا

گشت ئه‌م گوڵه به‌هارییانه

نه‌ختێک ماندوو خۆ ده‌نوێنن.

 

7

به‌فر ده‌توێته‌وه‌ و

گوند له حاڵی خنکانه

وێڕای گشت مناڵانی.

 

8

جوڕه‌پۆپنه…

ده‌ڕوانێته ئێره، ئه‌وێ.

ها… چیت لێ ونه؟

 

9

ڕۆژی سه‌ره‌تای ساڵی نوێ

هه‌موو شتێک شکۆفه‌ی ده‌رکردووه

به‌ڵام من

هه‌ست به ئاسایی بوون ده‌که‌م.

 

10

نیوه‌ی ڕۆژ

خه‌ریکی سه‌رخه‌و شکاندن بووم؛

هیچ که‌سیش لۆمه‌ی نه‌کردم!

 

سه‌رچاوه‌:

 * فه‌ر‌هیختگان، وه‌رگێران له زه‌مانی سه‌ره‌کی بۆ فارسی: وه‌حید عه‌لیزاده ڕه‌زازی، 4/3/1390

* ویکیپیدیای فارسی

 

Previous
Next
This site is registered on wpml.org as a development site.