Skip to Content

Sunday, September 20th, 2020

دەرپێى بەفر پڕە لە ریشۆڵە ..!! قوبادى جەلى زادە

Comments
by January 12, 2008 ئەدەب

  كاگوزار
 بەر لە كارگوزار ،
 بەفر گەیشتە باخچەى منداڵان و
 بە زوقم ،
 لەسەر دەرگاكەى نووسیى :
    ئەمرۆكە دەوام نیە !
 
 پــــرچ
 مانگ ،
 بەدەست و پەنجەى تریفە ..
 سەرو پرچ و
 شان و ملى
 لە بەفر دادەتەكێنێت !
 
 كانـى
 ئەستێرەیەك ،
 لەسەر شەختەى كانیلەیەكدا
 هەڵخلیسكاو
 دەستى شكا !!
 
 تیـشك
 هەموو گەردى بەیانییەك ،
 خۆر
 لە بەفرى سەركەلەوە ، گلۆردەبێتەوە
 بەر پەنجەرەى ،
 ماڵە سەرمابردوەكانى شار !
 
 زریــكە
 لەسەر سوچى كۆڵانەكەماندا ،
 گوێم لە زریكەى ژنێك بوو .
 كە لە پەنجەرەوە سەیرم كرد ،
 رەشەبا بوو ،
 بە قژ بەفرى رادەكێشا !
 
 میــوە
 كە كڵۆیەك بەفرت خوارد ،
 دەبىَ ناوكە پشكۆكەى
 فرێدەیتە ئاگردانەوە !
 
 ردێـن سپى
 كزەبایەك ،
 دەم و چاوى بارانى تەزاند و
 سەروو ریشیى سپى كرد !
 
 ئــاوێنە
 كاتىَ بەفر ،
 لەبەر دەم ئاوێنەیەكدا
 خۆى رووت كردەوە :
  ژنێك بو لە هەڵم !!
 
 خــەون
 پشكۆ ،
 خەو بە كوولووى بەفرو
 بەفریش ،
 خەو بە پشكۆوە دەبینىَ !
 
 ئاگـردان
 بەم نیوەى شەوە ، 
 _ با _
 لەپەنجەرەو دەرگاى ماڵەكانمان دەدات .
 گەرەكییەتى :
 دەست و پەنجەى تەزیوى ،
 لەبەر پشكۆى مەمكى ژنێكدا ،
 گەرم بكاتەوە !
 
 چــــــرا
 ژنێك ویستى ،
 پەنجەرەیەك لە –با- ى قەسرى و بكاتەوە .
 كەچى چرا ،
 چرا دەستەو دامانى بوو !
 
 ســـوور
 بەفر هەمیشە سپى سپى …
 ئەو بەفرە نەبێت ،
 كەبەسەر قەندیلا دەبارێت !!!
 
 بــازگە
 پێش ئەوەى بگاتە ناو شار ..
 پێشمەرگەیەك ،
 فریشتەى بەفرى پشكنیى :
  مەمك بەندى پڕ لە گوڵ و
  دەرپێى پڕ لە ریشۆڵە !!
 
 

Previous
Next

Leave a Reply