Skip to Content

Friday, May 7th, 2021

دەرگا …. هۆنراوەی: سەرکاو

Be First!
by December 11, 2012 ئەدەب

 

 

 

 

ڕەگ و ڕیشەم دەچێتەوە سەر دوو دار بەڕوو

ئەو دوو دارەی دارا دیتنی

نا.. بۆ پێکەنین وا دەڵێم..

دوو داری لەوانەی دارا دوورتر

زۆر دوورتر

. . .

لە ناوەندی کۆڵانێکدام

گاوران و سابوونکەران پێکەوە دەبەستێتەوە

پشتیشم قەزازەکانە

. . .

کۆڵانەکەمان وەک مارێک

وەک زنجیرێک

وەک ڕووبارێک

بەناو سێ گەڕەکە دێرین و گڵینەکەی شاردا تێدەپەڕێ

. . .

پارێزگاری لە ماڵێکی گڵین دەکەم

پاسەوانی شەرەفم

. . .

هەر من ماوم لەم گەڕەک و کۆڵانەدا

هەموو دەرگا دارینەکانی تر کۆچی دواییان کردووە

یا بەزۆر هەڵکەندراون

. . .

پڕم لە قۆبچەی ئاسنین

زیوین

لەڕاستیدا سەرە مێخن

بزماری گەورە گەورە

لە هەر لایەک کوناودەریان کردووم

. . .

شێرێک لەسەر سینەمە

هەر میوانێ کە دێ

سەری شێرەکە دەکێشێ بە دڵما

. . .

چاوێکیش لەسەر ناوچەوانمە

بۆ چاوەزار

. . .

زۆر کرامەوە و داخرام

زۆر پێوەدرام

زۆر جیڕەم کرد و شیڕاندم

پشیلەی ئەو کۆڵانانە نەما چڕنووکم لێ نەگرێ

سەگی گەڕەک نەما خۆیم لێ نەسوێ

هەندێ جار دزیشم پێدا تێپەڕیوە

بێ ئەوەی نووزەم بێ

. . .

زۆرم لێ بیستن گوایە لەسەر پشتم

من کە لە هەموو ژیانمدا

نە جارێ بەلادا هاتووم

نە شانم داداوە

نە کەوتووم

لەسەر سکبێ یا لەسەر پشت

. . .

لەو کاتەوەی بۆ یەکەم جار

دایک و باوکم بەدەستی داربڕ بڕدران و کەوتن

بەدەستی دارتاش

توێکڵیان ڕنرا و لەت کران

ساف و لووسکران

بە بزماری ئەستوور

لەو مێخە ئاسنینانەی عیسای مەسیحیان بە خاچدا پێ داکوترا

بۆ هەتاهەتایە لێک مارە بڕدران

. . .

ئێستەیش هەوای سەر ئەو گردەی دایە و بابە لە مێشکم دەدا

کە هەندێ جار بە کۆڵانەکەدا تێدەپەڕی و دەهات بۆ لام

هەواڵی خاڵوان

مامەکان

ئامۆزا و پوورزا و خزمانی ئەوانی بۆ دەهێنام

باسی گەڵا و ڕووبار و سمۆرەکانیشی بۆ دەکردم

. . .

لە ڕەشەباکانەوە خۆمم ناسی

ئەوان بوون یەکەم جار هەواڵی درەختەکانی دارستان و کۆسارانیان بۆ هێنام

ئەوان بوون بە ڕابردووی خۆمیان ناساندم

ئەوان بووم پێیان وتم لەکوێوە دێم و هاتووم..

.. ڕەشەباکان

. . .

مرۆڤەکان و

خاوەنەکانم و

ماڵداری ئەم ماڵە

وادەزانن مردووم

چونکە بێ دەستم

بێ ڕەگوڕیشە ماوم

بێ چڵ و گەڵا

بەم ڕووە لووس و سافکراوەمەوە

. . .

ڕاست دەکەن

ئەوە نییە هەر ڕێبوارێکی نەناس

(تەنانەت هەندێ جار خەڵکی گەڕەک)

کە بە بەردەممدا تێدەپەڕێ تەماشایەکم دەکات و دەڵێ:

ـ بەخوا کۆنە ئەم دەرگایە!

ـ ئەمە کەی درووستکراوە؟

ـ دەستی ئەو دارتاشە خۆش بێ درووستیکرد

ـ جوان دایتاشیوە ئەو دارە

 

Previous
Next

Leave a Reply