د بیرهاتنا سه‌رهلدانێ دا؟
سه‌ره‌رای هه‌می هه‌لكه‌فتێن خوش و نه خوش یێن دهه‌یڤا ئادارێ دا رویداین، لێ سه‌رهلدان ل ڤێ پارچا كوردستانێ دیارترینه كو ئیرادا خه‌لكی شیایی ناڤبه‌ره‌كی بده‌ته دوو قوناغان، ئێك قوناغه‌كا گه‌له‌ك ته‌حل، كاره‌سات، ئه‌نفالكرن، كیمیا بارانكرن، ده‌ربه‌ده‌ركرن و ئه‌شكه‌نجه‌دان و هه‌می جوره‌كێ ژناڤبرنێ و كێمكرن و پاشڤه‌برن و سه‌ركوتكرنێ! تا وی رادده‌ی خه‌لك نه دشیا هه‌ناسه‌یێن خوه ب دروستاهی هه‌لكێشیت و هه‌ر كه‌سێ تو ل ده‌ف راوه‌ستابای، هه‌ر دوعایا هاتبا كرن، هه‌ر گازنده و هه‌ر دوو دلی و هه‌ر خوزی، بتنێ ئه‌و رژێمه بهێته گوهورین و ب بیته حوكمێ كوردان و كورد بخو سنورێن خو بگرن و تا ڤێره هه‌می ل سه‌ر ئێك خال درێكه‌فتی بوون، ئه‌و ژی ب روخاندن و نه‌مانا رژێما به‌عس، دێ هه‌می تشت باش بن، دێ ژیان خوش بیت، دێ پێكڤه ژیان هه‌بیت و شوكور ئه‌ڤێن هه‌نێ و ئه‌ڤ خوزیێن هه‌نێ بجهـ هاتن.
تا ڤێره ئه‌و قوناغه‌ك بو و سه‌رهلدانێ گه‌له‌ك تشت دگه‌ل خوه ئینان، هیڤی، ژیان، بێهن فره‌هی و تا رادده‌یه‌كی خه‌لك شیا گه‌له‌ك مافێن خوه یێن دیموكراسی جێبه‌جێكه‌ت، كو بو ده‌مه‌كێ درێژ دژێ دبێبه‌هر بون. هه‌ر چه‌نده هاتنا سه‌رهلدانێ یا ته‌مام نه‌بو، كێماسی هه‌بون، كێماسی درێڤه‌برنێ دا هه‌بون، عه‌قلێ چیایی شیا ل سه‌ر عه‌قلێ باژێری زال ببیت، سه‌ركردایه‌تیێ نه‌شیا وه‌كو پێدڤی خوه دگه‌ل ژیانا نوی یا باژێری بگونجینیت، سه‌ربور دكێم بون، خه‌لك پاشماوێ ژیانه‌كا ته‌حل و بر نه‌هامه‌ت بون، خه‌لك تێهنیێ گه‌له‌ك تشتان بون، ئاخفتنێ، گه‌ریانێ، سه‌ره‌دانێ و تا دخانیێ خوه ڤه یێ ئارام بیت! ئه‌ڤ خه‌لكێ هه‌نێ ژ قوناغه‌ك ته‌حل به‌ره‌ڤ ئێكا باشتر ڤه هاتن، ئه‌ڤ ژیانا نوی بو وی تشته‌كێ نویتر بو گه‌له‌ك یێ پێ ئارام بو.
هزرێن ڤی خه‌لكی لڤێره راوه‌ستان، خه‌لك نه‌شیا چ گڤاشتنان ل سه‌ر ڤێ عه‌قلیه‌تا چیایی بكه‌ت، كارلێكا دروست دناڤبه‌را ڤی خه‌لكی و كه‌سێن ژ خه‌باتێ تێكه‌لی ژیانا باژێری بوین یا ته‌ندروست نه‌بو، ئه‌ڤ كه‌سێن به‌ری سه‌رهلدانێ دكارێ به‌رپرساتیێ دا بتنێ هایژ خو هه‌بو و كه‌س چ گومانان ژ كوردینیا وی نه‌به‌ت، ژبه‌ر كو هه‌می ب جوره‌كی و دوان پاشماوێن حزبا به‌عس بون، یێن رابردویێ وان باش ژی بێده‌نگ مان و نه‌شیان د پلێن خوه یێن رێڤه‌برنێ دا بمینن و نه‌شیان پاراستنێ ل سه‌ر شاره‌زای و بسپوریا خوه درێڤه‌برنێ دا بكه‌ن، ئه‌و چوونه ئالیه‌كی و ئه‌ڤ كه‌سێن ژ خه‌باتێ زڤرین بونه خودانێ هه‌می تشتی. هه‌ر كورسیكا رێڤه‌برنێ و تا چ پایه بیت بچیك یان مه‌زن، كه‌تنه ده‌ستێ وان و ئه‌و بونه یێن حه‌ق و ئه‌ڤێن دی بونه یێن نه حه‌ق، ئه‌و بونه خودان هه‌می تشت و ئه‌ڤێن دی نه‌شیان ببنه خودانێ خوه و تشته‌كی ژی.
ژ ئه‌نجامێ ڤێ كارلێكا نه ته‌ندروست و ژ ئه‌نجامێ قوناغه‌كا ته‌حل و سه‌ربورێن نه‌خوش، ده‌نگێ گازندێ ل چ جهان یێ بلند نه‌بو و تا نوكه ژی ئه‌و ده‌نگێ هه‌نێ یێ بلند نینه. ژ ئه‌نجامێ وێ كارلێكا نه دروست، ره‌نگه دا مه گه‌له‌ك ده‌ستكه‌فتێن دی هه‌بن و مخابن ئه‌م نه‌شیاین په‌یدا بكه‌ین، شه‌رێ ناڤخویی په‌یدا بو، دوو ئیداره‌ی په‌یدا بو، جوره نه دادیه‌ك په‌یدا بو، ئه‌م نه‌شیاین ب ره‌نگه‌كێ پێدڤی به‌رگریێ ژ ده‌ستكه‌فتێن خو هه‌میان بكه‌ین، تا نوكه ژی ئه‌م نه‌شیاینه ده‌ستێ خوه دانینه سه‌ر هه‌می ئاخا خو و بكێشینه بن باوه‌شا هه‌رێما كوردستانێ و چه‌ند روژ دبورن، زڤرینا وان بزه‌حمه‌ت تر دكه‌ڤیت! چه‌ند ده‌م دبوریت، پێگه‌یێ هه‌رێمێ ل به‌رامبه‌ر به‌غدا لاواز دبیت و ئه‌و تشتێ ئه‌م دوهی دشیاین ب ده‌ست ڤه بینین، پیچ پیچه یێ دهێته ژ ده‌ستدان!
یا من دڤێت بێژم ئه‌وه، ئه‌م چاوان مفای ژڤان هه‌ردوو قوناغان وه‌ربگرین، قوناغا ته‌حلا به‌ری سه‌رهلدانێ و قوناغا په‌یدابونا حكومه‌ت و په‌رله‌مانێ كوردستانێ، ئه‌م چاوان شاشیێن خوه راستڤه‌كه‌ینه ڤه و ده‌ستێن خوه دانینه سه‌ر كێماسیان، ئه‌گه‌ر ده‌مه‌كی كارلێكا رێڤه‌برنێ نه یا دروست بیت و مه باجا وێ دابیت، ئه‌ڤرو ئه‌م یێن بره‌نگه‌كێ دی دده‌ین، ئه‌م یێ عه‌قلێ كورد زنجیر دده‌ین، ئه‌م یێ ژ داهێنانێ دڤه‌قه‌تینین، مه حزب گه‌له‌ك ژ قه‌باره‌یێ وێ مه‌زنتر دایه ناسكرن، حزب بویه خودان هه‌می تشت، دیاركرنا پایه‌یان، په‌یداكرنا ململانه‌كا نه یا ته‌ندروست و كوشتنا عه‌قلێ هه‌ڤركیێ. ئه‌گه‌ر ئه‌ڤه مافه‌كێ ره‌وایێ حزبێ بیت و سندوقا ده‌نگان ته‌حه‌كومێ بو بكه‌ت، لێ ل سه‌ر حسابا عه‌قلێ تاكێ كورد یا دهێته كرن، ئێك دڤێت سیاسه‌تێ ژ هه‌می تشته‌كی جودا بكه‌ین، حزب نه‌بیته خودانێ هه‌می تشتێن خو، حزب بتنێ رێكخستنا خوه بكه‌ت و حكومه‌ت سه‌رپه‌رشتیا هه‌می تشته‌كی بكه‌ت، ته‌له‌ڤزیون یێن حزبان نه‌بن، روژنامه و كوڤار و چ ده‌زگه‌هـ سه‌ر ب حزبان ڤه‌نه‌بن، ده‌ست نیشانكرنا پله و پایان دده‌ستێ حزبێ دا نه‌بیت، ئه‌گه‌ر بتنێ ئه‌م باره‌گایێن حزبی بهژمێرین، ئه‌گه‌ر ئه‌م سازی و ده‌زگه‌هێن حزب سه‌رپه‌رشتیا وان دكه‌ت بهژمێرین، دبیت ب جوداكرنا ده‌ستێ حزبێ، ره‌وش گه‌له‌ك به‌ره‌ف باشتر ڤه بچیت. بمن وه‌ره ئه‌گه‌ر ئه‌م شیاین ناڤبره‌كی دناڤبه‌را ڤان هه‌ردوویان دا په‌یدا بكه‌ین، كارێ حزبێ بتنێ رێكخستیێن وێ بن و بزاڤێن وێ دڤی چارچوڤه‌ی دا بن، دێ ئه‌م شێین عه‌قله‌كێ داهێنه‌ر و دهه‌می بیاڤه‌كی دا په‌یدا كه‌ین، دێ ئه‌م شێین مفای ژهه‌می شیانێن خوه و یێن خه‌لكێ خو وه‌رگرین. ئه‌ڤرو شوینا چه‌ند كه‌نالێن وه‌ك ئێك و ل سه‌ر حزبان دابه‌شكری و ئه‌ڤ سازیێن وه‌ك ئێك یێن ده‌ستێن حزبان دناڤ را، ئه‌ڤێن هه ئه‌گه‌ر كه‌تنه خزمه‌تا خه‌لكی، دێ بسپوری په‌یدا بیت، دێ هه‌ر تشته‌ك چیته دخانا خوه یا دروست دا و ئه‌م دێ شێین عه‌قله‌كی په‌یدا كه‌ین، كو هه‌می مفای ژێ وه‌ربگرن! حزب و خه‌لك و دیروك ژی سوبه‌هی وه‌ك مه بڤێت دێ په‌سنا مه كه‌ت، نه كو دێ ره‌خنه‌یێ لمه گریت. دڤێت ژبیر نه‌كه‌ین ژی، جیلێ پشتی سه‌رهلدانێ چ ژ قوناغێن ته‌حل یێن به‌ری سه‌رهلدانێ نزانیت و ژبه‌ر كو ئه‌و دێ دیروكێ نڤیسیت، وه‌ك ئه‌و دبینیت دێ حوكمێ خوه ده‌ت.
تێبینی: ئه‌ڤ نڤیسینه دكوڤارا چاڤدێر ژماره 124 دا هاتیه بلاڤكرن.
