Skip to Content

Tuesday, September 29th, 2020

رۆژىَ شار بوو بە عەشقستان …. حەمە سەعید كەلارى

Be First!

           
 "" بەم  حاڵە  ئەگەر  دەفعەیە تر  بچمەوە  كەركوك
     مەعلومە   بە مەردى   نەڕواوە   لە سەرم   تووك   ""
                                                                 " شێخ رەزاى تاڵەبانى "
            
 
 ئەسپە بۆرەى  كەللە گڕ و
 تەوێڵ غەڕ و
 یاڵ پەرێشان
 ئەى پرمان و
 ئەى چەپۆكان ،  
 ئەو رۆژە   من
 لە سێبەرى دیوارێكى بوغزاویدا
 چاوەڕوانیى           تەنورێك بوو
 ئەمى برژان ،
 عەجوولیم  لەغاو   ئەكرد و
 سەبووریم ماڵ بەماڵ ئەیدا لە دەرگاكان
 لەو كاتەدا 
 پێكى شەرابى  موعەتق
  ئەیخواردمەو و
 یادەوەرى   شۆخەكچێك 
 ئەمى هەژان
 لە پڕێكا
 شەنەبایەك   هەڵیكرد و
 گەواڵە هەورێكى ئاوس
  بە لەتافەت ،      
 پەردەى شەرم و ترسى دڕى و
   بە سەر رۆحما دایبارن
 فریشتەیەك       بەدەستێكى
  چەپك چەپك  زەردە خەنە و
 بەو دەستەكەى
 شانەى لە گوللە گڕ و گوڵ 
 پڕ ئەكرد و
 ئەیوت    ئیتر
 شارم ئەبىَ  بە   عەشقستان
 *
 لەو دەمە دا
 وتم ئۆخەى
 عومرم بەدوانە ئاوسە
 تەمەنێكەو دووبەهارە،
 شار سەر پۆشى ڕەش لائەدا
 دوگمەى       سوخمە و
 سینەى خەفەت  ئەترازێنىَ
 هەموو شەوىَ
 لە مەیدانى      ڕمبازیدا
 شادمانى ،
 پۆلىَ كچی ئێسك سووك بوو
 هەڵئەپەڕى   و   ئەیقریوان
 ئەو    شەوانە
 من  و   بەهار
 بەهارى عشق
 تاریكیى مێژوومان ئەكرد بە چراخان ،
 بەڵام سەد داخ
 بەر لەوەى عەشق  چرۆ كا و
 شەختەى حەز      بتاوێتەوە
 " عەلى مەردان "  هەڵسێتەوەو
  بچركێنىَ
 تەرزەى  رەشى  بەخت بارى  بە سەرمانا
 بە ناچاریى
 دیسانەوە
 كچى      ئاگر
 وەكو    قەرەج
 بارو بنەى پێچایەوەو
 سەفەرى  كرد ،
 ئەمجارەیان
 سەفەرێكى  درێژ درێژ و  توولانى
 بەرو نادیار
 *
 لەو رۆژەوە
 هەموو      شەوىَ
 لە كەنارى یادەوەریى
 مەئویسیما
 ئەیبینم و
 پرچى رەشى  بەدبەختى  دەسكەنە ئەكا،
 كە خەو پرژێنى    دیوانى عەشق   ئەكەم
 وام پێ ئەڵىَ :
  ئێستە لەوىَ /  بڕوا  ناكەم /  ژەنگە تیغى بیرچوونەوە/   
 لەگەردنى یادە جوانەكان بسوىَ
 ناا وا ناڵێم ،
 خوانەكەردان
 چۆن دڵم دىَ
 بڵێم    لەوىَ
 كەناریەك لە باخى شیعرم سەر ئەبڕێ
 جریوەیەك  /  پەڕەسێلكەى  /ئەو بەهارە جوانە مەرگەم/
 لە هێلانەى   چاوى تەڕى    ئەتۆرێنێ ،
 قەت وا ناڵێم
 وا  ناڵێم  نا
 *
  یەژن لەوىَ
 نزیك بە قامەتى "بیگ بن " 
   لە سێبەرى دەوەنێكى گەلىَ  خوێن سارد
 لە پاڵ خنجەرێكى  كورتە باڵاى   كەم زاخ
 لە تەك  دەریایەكى كپى     شەپۆل مردوو
 بە بەر   چاوى    هەتاوێكى     بێتینەوە
 لەوانەشە هەورێكى كوێر تەماشاى بكا
  یا نەیكا ،
 لەژێر پرووشەى بارانى خەندەیەكا
 ئەشىَ تەڵىَ لە پەرچەمى  شێتى  تەڕ بكا ،
  یانەیكا
 بە ناچاریى
 چاوى حەزى
 بە   درۆى "" بلێر "" ئەڕەژێ و        " * "
  خۆى رووت  و  قووت  ئەكاتەوەو
 پارچە پەیڤێكى ئاوریشمین
 لە ناسكیى  شیعرى  (نالى )
 دەنگە   زوڵاڵەكەى (  تارا  )          " *  *"
 لە بەر ئەكا و
 هەرچەن ئەكا
 (رەحیم ئاوا)و (ئیمام قاسم )
  بڵێسەى بێكەسیى لە بیر ناباتەوە 
 *
 یەژم  ئازیز
 ئەو رۆژانە
 لە باوەشى         عەشقستانا
 لێوى حەسەرتمان ئە كرۆشت
  كرمى گومان
 كەللەو میشكى هەڵئەكوَڵین ،
 لەدیوانى  شیعرى   گەرما
 ئەو شەوانە
 گشت   كەست   بووم
 لە مەیدانى شاسواریدا
  تۆ بەشم بووی ،
 كە شەستە بارانى خەفەت
 دای ئەكرد لێت
 من بەست بووم
 كەچیى   ئێستا
   یەژن     لەوىَ
  شەرمن  شەرمن چێنراوى
 منیش   لێرە
 دوورلە باڵات
 " نامۆ " یەكى  تاڵمەشرەبى گۆشە گیرم
 حوجرەیەكى شپرزەم لە  شیعر و كتێب
 دەرگاى تەكیەى  حاڵ و  سۆزم   ئاوەڵایە
 زیكرى تەنیایم لە زیكرى
 ئەو كەنیشكەى
 لە بەفرا خۆى    ئەسووتێنى
 گەرمترە ،
 دڵنیا بە
 گەر    شەوىَ     بویت    بە    فریشتە
 بە ئیلهامى هەڵبەستێكى چاو نەترسم 
 بە هەسێرەی ئاسمانى شەوى تەنیایم ،
 ئەگەر هات و
 لە خەونێكدا  خزایتە    ژوورەكەمەوە
 دودڵ نابم
 وەكو جاران بە قەڵەمەكەى نێو پەنجەم
 دێڕىَ شیعر  ئەنووسم  و
 دوو دێڕ پرچت ئەهۆنمەوە ،
 گەر خوا كردى
 لەم بەستەڵەكى عەشقەدا
 كەڕەتىَ تر ،
  شارەكەم  بوو بە عشقستان
   تۆش وەكو  گڕ
 وەك هەورە بروسكەى بەهار
 چەخماخەت دا  و هاتیتەوە
 رۆحم  رووت  رووت   ئەكەمەوە و 
 لە بەر تیشكى گەرمە نیگاى چاوەكانتا
 من لە جێى تۆ
  ئەتوێمەوە ،
 *
 ئالەم گەرمیانى رۆحەدا
 چەشنى  كانى
 گەر رێت كەوتە ئەم بنارە
 خۆم ئەزانم
  چۆن دەم ئەنێمە چاوتەوەو
 ئەتخۆمەوە .
                  *
 
 *    مەبەست " تۆنى بلێر " ى سەرەك وەزیرانى ئنگلیزستانە
 ** مەبەست خانمە هونەرمەندى  دەنگ نازك " تارا جاف "ه                       
 

Previous
Next

Leave a Reply