سەفەرنامەی تەمەنێکی موسافیر ،نوسینێک کە تەواو نابێت…..

 

تەمەن وسەفەر لە ساڵی تازەی ٢٠١٣ دا…

 

تەمەن لە سەفەری خۆی دایەو

منیش وەکو موسافیرێکی نابەلەد ،

لەناو سەفەری گەڕانێکی لاتەریکدا ،

بەدوای رۆژو مانگ وساڵە لاتەریکەکانم ،

ئەگەڕێم..سەفەر ئەکەم…

تا لاتەریک نەبم…

سەفەر ئەکەم ،

رێگا ئەبڕم.

تا سەفەرێک ئەکەم ئەبێت رێگایەک ببڕم ،

تا رێگایەک ئەبڕم، 

هەزارەها رێگای تر بۆن ئەکەم..

من ناتوانم بێ رێگا بم ،

گەر بێ رێگا بم ،

بێ سەفەر ئەبم ،

گەر بێ سەفەر بم ،

لە رێگا ئەبم، لە ژیان ئەبم…

من لە سەفەردا خۆم ئەبینمەوە..

بەپەلەم تا رێگایەک ئەبینمەوە ، 

رێگایەکیش ببڕم ،

رێگاکان هەرچەند دوور بن ،

من ئەوەندە دوورتر ئەڕوانم ،

دوورتر ئەڕۆم…

تا رێگایەکی تر ئەبینمەوە ،

خۆمی تێدا خڕ ئەکەمەوە…

بۆ وێران بوونی ئەو سنوورانەی رێگاکانم لێ وێران ئەکەن ،

من چەند کوتلەیەکی شەختەی درز درزم ،

من ئەبێت رێگا ببرم ..

تا پارچە پەرتەکانم خڕ کەمەوە ،

من چەند پەرت وبڵاوم ،

پەرتتر لە پارو بڵاوتر لە پێرار…

تا رێگایەک بمێنێت بۆ وێرانیم ،

بڵاوتر ئەبم ،

قەوارەکەم پەرتتر..

قەوارەکەم چەند پەرت وبڵاوە ،

لە نێوان دەستاڕەکانی سنووردا ،

دەستم لە قاچم ئەبێت و

قاچم لە قەدم..

من لە هەنجن هەنجن بوونی خۆم دام..

من ئەڕۆم و

ئەوان لێ ناگەڕێن هەست بە پەلەکانی خۆم بکەم ،

لێ ناگەڕێن پارچەکانی خۆم خڕ کەمەوە ،

بە هەورازی تەمەن ئەڕۆم ،

لە هەناسەیەک ئەگەڕێم ،

هەناسەم سوار ،

خۆم سواری ملی خۆم ئەبم…

ساڵ ئەڕوات و ساڵ دێت ،

من هەر لەوێم ،

لە وڵاتێکی وێران ،

وێران بوو بەمن بەتۆ بە شەڕ ،

بە سیاسەتی پیاوە ناسیاسیەکان…

من هەر لەوێم ،

لە مەفتەنێکی پڕ ئافات وئاشووب…

ساڵ دێت ومن ئەڕۆم ،

من هەر لەگەل خۆم دام ،

لەگەل خۆم و سێبەرەکەم ئەڕۆم ،

لەوێوە دانابڕێم…

خۆم ورابردووم ،

رابردوو وبیرەوەیە تاڵەکانی دوێنێکە ،

هەریەکە لە پێشبڕکێی یەکتربڕینی مندان ،

گرەویان لەسەر ئەوەیە ،

کێ زووتر بە مەفتەنێکی نەهامەتی بوونی خۆیم ئەبات..

من نەجات نابم لە خۆم لە نەهامەتیەکانی نیشتمان ،

کێ ئەتوانێت لە تەڵەزگەکانی نیشتمان ،

دەربازم کات…

من وتەمەن ،

دوو سواری سەر یەک ئەسپین ،

هەریەکەمان بۆ خۆی بەرووی بادا ئەروات و

ئەکەوێتە رێ..

هەریەکە بۆ خۆی سەول بەلایەک لێ ئەدات و

ئەبێتە پێ..

من وتەمەن ،

لەو دەربەندەدا ،

هەردووکمان بە دووڕیانێکی بێ دەربەست ،

رەت ئەبین..

رێگایەک نیە دەستمان بگرێت و

تەمەنێک نیە بۆنێکی بەختەوەریمان پێدا بپژێنێت ،

بە دەروویەکی قورتاریی بوون تێمانپەڕێنیت..

هەر ئەبێت بەو خەرەندە هاتونەهاتەدا تێپەرین ،

تێئەپەڕین وتەرمی خۆمان لەکۆڵەو

بەدارەبازێک بە دونیادا رێ ئەپێوین..

وەکو رێبوارێکی دەروێشی تەنیا ،

مەرگەساتەکانمان بەدەم سەفەرە ،

بەبا ئەکەین..

ژانەکانمان بە دەم باوە ،

وەر ئەکەین..

بە دەفێک کارەساتەکانمان ئەژەنین ،

بە شمشێرێکیش سەری خۆمان لەت ئەکەین….

ئەرۆین وسەفەر ئەکەین ،

رێگا ئەبڕین .

شوێنپێیە ونەکانی خۆمان هەڵئەگرین ،

تا لە شوێنێکدا ون نەبین ،

بزر نەبین.. 

تا لە قەبرستانێکی شارەوانی شارێکدا ،

خۆمان لێ بزر نەبێت ،

ناومان لێ بزر نەبێت ..

ساڵەکان شەقار شەقار ئەبن ،

ساڵی تازەتر شەقار شەقارترمان ئەکات ،

ئێمە چەند شەقارین چەند عاشقی شەقار بوونین… 

تەمەنیش ئەڕوات و

دەرەقەتی شەقاربوونمان نایەت و

لەگەل ساڵی پێشوو ئاشت نابێتەوە..

کێ لەگەلمان ئاشت ئەبێتەوە ،

من لەگەل خۆم ئاشت نابمەوە ،

تۆ چیتر باسی ئاشتیم بۆ مەکە..

کە شەڕ چیتر بەردەرکەم بەر نادات ،

تەمەن دەست لەخۆی بەرئەدات..

من بە بێ ساڵ چیم ،

من بە بێ تەمەنێکی بەلەد چیم ،

من بە بێ قەوارەیەکی یەکگرتوو چیم ،

من بە بێ نیشتمان چیم ،

نامەوێ ساڵ دوای ساڵ بژمێرم ،

ژمارەکان لە کێشی خۆم زیاترن ،

تا کەی لە سفرەوە دەست پێ بکەم ،

کە خۆم سفر بم…

تەمەنم لێرەوە باوێشک ئەکا ،

زیاتر بەدوای وەنەوزی خۆی راناکات….

من ئەمەوێ لێرە بەبێدەنگی لە غوربەتیێکدا ،

راکشێم…

من وخۆم وتەرمی خۆم ،

خۆم وتەمەن وتەرمی خۆم ،

بەرلەوەی بچینە ناو ساڵێکی تر ،

نەگبەتی نەهامەتیەکی تر ،

من لێرەوە خۆم ئەنێژم..

من لێرەوە ماڵئاوایی لە خۆم ئەکەم..

پەیکەرم لە خۆم یاخیە ،

لە تەرمێک ئەگەڕێت..

تەرمم لە خۆی یاخیە ،

لە تابووتێک ئەگەڕێت..

تابووتم لە هەڵگرتنی خۆی یاخیە ،

لە داربازێک ئەگەڕێت..

خۆم لە خۆم یاخیم..

نامەوێ بچمە ناو ساڵی خەمێکی تر ،

بەو هەموو تەرم وتابووت ودارەبازو

پەرت بوونە..

نامەوێ زیاتر پەرت و

پارچە پارچەتر بم..

هیچ ساڵێک نیە یەکم خاتەوە ،

هیچ تەمەنێک نیە رابردووم ،

لەبیر بباتەوە..

من تا هەم هەر لە سەفەرم ،

هەر لە رێگا بڕین و

رێ پێوانم… 

من تا هەم لە رێ پێوانی خۆم دام..

لە گوازتنەوەی تەرم و

دارەبازی تەمەنێکی پەرت و

 موسافیر دام..

 

    ‌شوان عوسمان- هۆڵەنده

رۆزن بێرخ -٢١/١٢/٢٠١٢