Skip to Content

Tuesday, October 26th, 2021

شانۆیى…..ئۆڤیلیا و وەهمى هاملێت

Be First!
by December 10, 2008 شانۆ

 شانۆیى
 ئۆڤیلیا و وەهمى هاملێت
 نیهاد جامى

 
 وێنەى یەكەم
 ئۆڤیلیا لەنهۆمى سەرەوەى قەڵاكەدا لەژوانى هاملێتدایە، چاوەڕوانە لەو بەرزاییەوە لەباوەشى بگرێت، بێتاقەت دەبێت لەدوا كەوتنى، لەشوێنەكەى خۆى هەڵدەستێتەوە، دێت بە ڕارەو و كوچەكانى قەڵاكە دەسووڕێتەوە، لەیەكێك لە پەنجەرەكانەوە پاشا دەبینێت كە ڕووت كراوەتەوە و جل و بەرگ و تاجەكەى دەدزن و خۆشى دەخنكێنن، هاملێت لە قووڵایى قەڵاكەوە دەردەكەوێت، ئۆڤیلیا شڵەژاوە، هاملێت بەرەو ڕووى دەچێت و دەستەكانى دەگرێت و بۆى دەچەمێتەوە سەر زەوى، ئۆڤیلیا ڕاستى دەكاتەوە بەرەو ڕووى یەك دەوەستن، سەماى مردن ساز دەكەن.
 
 وێنەى دووەم
 بێدەنگیەكى سەیر باڵى بەسەر قەڵایەكى كۆن داگرتووە، نیوەڕۆیەكى هاوینى گەرم، لەیەكێك لەخانووە دوو نهۆمیەكانى ئەو قەڵا خابوورە، دەرهێنەرێكى شانۆیى دەبینرێت، سیماى تەواو شڵەژاوە، لەناوەڕاستى نهۆمى خوارەوەى خانووەكە وەستاوە، بیر لەشتێك دەكاتەوە، خۆشى نازانىَ چیە، دەیەوىَ بگاتە نهێنیەك، هاوار دەكات (ئۆڤیلیا.. ئۆڤیلیا بێدەنگ بوونت دەمكوژێت) لەنهۆمى سەرەوەى خانووەكە تارماییەك دەردەكەوێت، دائەچڵەكىَ بە پەیژەكانەوە بەرەو خانووەكە سەردەكەوىَ، گەنجێك بە جلێكى ڕەشەوە، شمشێرێكى بریسكەدارى بەدەستەوەیە، دەرهێنەرە شانۆیەكە بەترسەوە لێى دەچێتە پێشەوە (تۆ تۆ كێى؟) جل ڕەشە شمشێر بەدەستەكە شمشێرەكەى دەخاتەوە كێڵان (من هاملێتم، ئەو عاشقەى بووە قوربانى تۆڵەكردنەوەى كەسانیتر) دەرهێنەر زمانى تەتەڵە دەكات: هاملێت! تۆ هاملێتى؟ سەروەرم دڵى من ماركۆ پۆڵۆ پەردەكەى هەڵداوەتەوە، تەنیا تۆ دەتوانى ئەودیو ڕووخسارم ببینى، باش لێم وورد بەوە كەلاوەى زەمەن تەرمى خۆم و بۆنى شەرابى ڕژاوى یار تێكەڵ بە بۆنى پێڵاوى كوڕە گەنجەكان دەكات " هاملێت دەیەوىَ خۆى كۆبكاتەوە، دەست دەخاتە سەر ڕووخسارى دەرهێنەرەكە" دەرهێنەر هێمن نەبۆتەوە: لێرە كەس دەرفەتى نیە سەیرى كەلاوەى دڵ بكات، سەروەرم هەر سەردەمێك و ئۆڤیلیایەك هەیە بمانگرێنىَ و خۆشى شێت بكات " دەستى هاملێت دەگرێت و لەسەر پەیژەكان بەدواى خۆى ڕایدەكێشىَ، دەگەنە ژوورێكى نهۆمى خوارەوە، هاملێت لەوە ناچىَ ئەو ژوورەى لەبیر مابێت، بەحەسرەت و ترسەوە لێى دەپرسىَ " ئێرە كوێیە؟ من لە ژیانم ئێرەم نەدیووە، خەریكە دێتەوە خەیاڵم جاران ئێرە باخچە بوو، من و ئۆڤیلیا لێرە بووین، بیرمە لێرە نامەكەم پێیدا" دەرهێنەر لەوە بە ئاگا دێتەوە كە هاملێت شوێنەكانى لىَ تێكەڵ بووە، بۆیە پێى دەڵێت: ببوورە گەورەم ئێرە قەت باخچە نەبووە، ئێرە ئەو ژوورەیە كە یادەوەریەكانى شاى باوكتى تیا بوو، دواتر بوو بە زیندان بۆ دڵى من، (وڕێنە دەكات) هەمیشە ووتومە جارێكیتر نایەڵم دڵ فریووم بدات، بەڵام ئەوەتە سەرەتاى هەڵەیەكى نوىَ لە ژیانما دەردەكەوێت، ئەم ئێوارەیە هەستدەكەم قژى درێژى ئۆڤیلیا لەقوڕگم دەبێتە پەتى سێدارە، كچە پاڵتۆ سورەكەى هاوڕێم شەوان لەكاتى خەودا بیرى دەكەومەوە، كەچى من بێدەنگى بارانم بەلاوە مەبەسترە، دەمەوىَ بڕۆمە شاخ چەك هەڵگرم لەپێناو عەشقەكانى خۆمدا شەڕ بكەم و بكوژرێم، گرنگ فیشەكێك ساردم بكاتەوە و بكوژرێم (هاملێت بە ئاگاى دێنێتەوە) بۆبیر لە مردن دەكەیتەوە؟ باران بە بێدەنگى دەمانكوژێت؟ دەرهێنەر دەیبڕێت (بەڵام گەورەم هاملێت كچێكى پاڵتۆ سووریش ئێستا منى بیر دەكەوێتەوە) هاملێت وون دەبێت، دەرهێنەر شێتانە تەواوى كونج و كەلەبەرى ماڵەكەى بەدوا دەگەڕێت، بێئومێد دەبێت لە گەڕان، ترس تەواو لێى دەنیشىَ، بەشێوەیەك دادەنیشىَ وەك ئەوەى وێرد بخوێنىً: بەستەزمان هاملێت وەك باوكە كلۆڵەكەى بۆتە تارمایى و لەماڵەكەدا دەردەكەوێتەوە، هەموومان دواى مردن دەبینەوە تارمایى و لەو ماڵەدا دەردەكەوینەوە. هەموو ژیان ویستوومە شكستى عەشق بنووسمەوە، ئێستا وورد دەبم و كەسێك لەوانەى خۆشیان ویستووم نامبینن، وەك ئەوەى جامى پەنجەرەیەك بم و مناڵێك بەدار لاستیكەوە بەردم تێبگرێت دەشكێم، كەس شكانم نابینىَ (هەڵدەستێتەوە خەریكى چاڵ هەڵكەندنە، كەللە سەرێك لە چاڵەكە دەدۆزێتەوە) لەسەر خۆڵەكەى دادەنىَ) بەدواى كەللەسەرێك دەگەڕێم لەخۆم بچێت، خەڵك چاوەڕوانن لەسەر دەستى من شانۆ ببینن، كەچى من دۆڕاوێكى عەشقم و خەون بە شانۆیەكى نوێوە دەبینم، تەنیا شانۆ و دوا دۆڕانى حیكایەتێكى تەواو نەكراوم بۆماوەتەوە (چنگێك خۆڵى بەدەستەوەیە، بە بەرزایى باڵاى خۆى ڕووى دەكاتە سەر زەوى) ئیدى نەكەس ئارەزووى سەیركردنى شانۆى هەیە و نە مەخلوقێك دان بە دۆڕانى عەشق دەنێت (وا پێشبینى دەكات، ڕۆژى نمایشەكانیەتى و بینەران سەیرى دەكەن، خۆى هێمن دەكاتەوە بەڕادەى ئەوەى بتوانىَ سەرنجى بینەران بۆلاى خۆى ڕابكێشێت) منى شانۆكار بۆ ئەبەد دۆڕام.. تا مردن خۆم بە تەنیا لەو قەڵایە دەمێنمەوە، ئەكتەرێك لەدەورم نامێنىَ، هەموویان بەرەو ڕوناكى بلاجیكتۆڕى هۆڵە نایابەكان دەڕۆن، ئەو شانۆیە بە گەمەیەكى بێزاركەر دەبینن، ئێوەش نیازتانە لەگەڵ تاریكایى جێمان بێلن (دەیەوىَ بینەران بەڕىَ بكات، بۆ ئەوەى تەنیا خۆى بمێنێتەوە) نا ئاساییە گەورەم خەمى منتان نەبێت، تۆزێكیتر دەمرم و سەگەكان دەورم دەدەن ئەوان لەدوا هەناسەى سەرە مەرگم ڕادەمێنن، كە دڵنیابوون لە مردنم، دەمیان لە جەستەم دەنێن.. هەر پارچەیەكم بە دەمى یەكێكیانەوەیە، خواتان لەگەڵ (ئێستا پێشبینى دواى مردنى خۆى دەكات) چەند دەترسام ڕۆژێك سەگ بمخوات، ئەوەتە بەدەست كەڵبەى خوێناوى سەگەكانەوە لەنێو خۆڵى قەڵا بۆگەن دەكەم و ووشك دەبم، خۆر ئێسقانەكانم ووشكدەكاتەوە (هاملێت لەسەر چاڵە خۆڵاویەكە دەردەكەوێت، كەللە سەرەكە بەدەستیەوە دەگرێت و تێى ڕادەمێنىَ و دەیدوێنێت) ڕۆژێك لێرە خەونت هەبوو، خەونى پڕۆژەى شانۆیى جیاواز، پێویستە تارمایەكە ئەمجارە دەربكەوێتەوە لەو نهێنیە ووریاى بكەمەوە، ئەوەى ویستى لە شانۆیەكدا ئێمە بێنێتە ئەو ماڵە ئەوەتە كەللە سەرەكەى بەدەستى منەوەیە، ئەو جارێكیتر لێرە خەریكى شانۆ نابێت. (دەرهێنەرە شانۆییەكە تىَ دەگات لەوەى كەللە سەرە ووشك بووەكە سەرى خۆیەتى) بەڕێز هاملێت ئەوە كەللە سەرى منە؟ باوەڕ ناكەم ئەوەتە كەللە سەرم لاى خۆمە (هاملێت بەرەو ڕووى دەچێت) ئەوەیان وەهمى خۆتە، سەرە ڕاستەقینەكەت ئەوەتە بەدەست منەوەیە.. لێى وورد بەوە چەند جار قسەت پێى كردووە بەچاوەكانت كە ئێستا تەنیا دوو كونى بۆشن پێى گریاوى، ئەو بۆشایە ترسناكەت دیوە ئەوە لێوەكانتە چەندین جار لەعەشقدا گەرمترین شوێنى تۆ بووە (دەرهێنەر دەكەوێتە گریان) مردووم.. مردووم و بە خۆم نەزانیووە (هاملێت بێدەنگ بەپەیژەكە سەردەكەوىَ بەرەو ژوورەكەى سەرەوە، كەللە سەرەكەى بەدەستەوەیە، ڕووى بۆ دەرهێنەرەكە دەسوڕێنێت) كەللە سەرەكەت لەنێو تاقەكان دادەنێم، بەتەك سەرى شا كوژراوەكەى باوكم دایدەنێم، ئەوەتە فرمێسك بە ئێسقانى چاوە هەڵكۆڵدراوەكانت دێتە خوارىَ، بەسە مەگرى دنیا تەواو تاریك بووە (دنیا تەواو تاریك داهاتووە، دەرهێنەرەكە دەچێتە ناو چاڵەكە و هاملێت دێت بە خۆڵەكەى سەرى چاڵەكە پڕ دەكاتەوە، لەژوورەكەى خوارەوە هاملێت دەمێنێتەوە، هەندێكجار تەنها هەست بە هەناسەى دەكرىَ، جار و بارێكیش بە ئاستەم دەبینرێت، دێتە بەردەم پەنجەرەكە دەڵێت) ڕِۆژێك ئەو ماڵە ژیان و شانۆى تیا بوو
 وێنەى سێیەم
 ئۆڤیلیا شێت بووە هەر لەوشوێنەى تاوانى كوشتنى پاشاى تیا بینى، دەردەكەوێتەوە، دەنگێك دەردەخات لەشێوەى (لالالالالالالالالا) زیاتر لەدەنگى گۆرانیبێژى ئۆپیرایى دەچێت، هاملێت دەستى دەگرێت بەرەو پەیژەكان دەیبات، بەیەكەوە دادەنیشن، بە بێدەنگى دەڕواننە گۆڕى دەرهێنەرە شانۆییەكە، ئۆڤیلیا خێرا لەسەر پەیژەكان دەچێتە خوارەوە، لەبەرامبەر گۆڕەكە دەوەستىَ، دەیەوىَ وێرد بخوێنىَ، بەڵام گریان ڕێگاى نادات. بە قووڕگى پڕ لە گریان دەڵێت
 ئۆڤیلیا: تۆ ڕۆژێك دەتویست من لەسەر لاپەڕەى كاغەزەوە بكەیتە حەقیقەت، خەونت بەكەسێكى وەكو من عاشق دەبینى، گەورەم تۆ هاملێتە ڕاستەقینەكە سەر بەرزكەوە، من نازانم كامتان حەقیقەتن؟
  هاملێت: "توڕە بووە و لەسەر پەیژەكان هەڵساوەتەوە و شمشێرەكەى بەڕووى ئۆڤیلیا بەرز دەكاتەوە" ئۆڤیلیا! من حەقیقەتم، لەمن زیاتر كەس هاملێت نیە.
 ئۆڤیلیا: بەڵام تۆ پێت ووت كە كەللە سەرەكە كەللەى ئەوە نەك هاملێت، ببورە هاملێتى دانیماركى، تۆ خۆت دانت بەوە نا كە ئەو هاملێتى ڕاستەقینەیە، منیش چیتر ئەو ئۆڤیلیایە نیم كە لە شانۆگەریەكە دەخوێنرێمەوە، ئەوەتە منیش هاتمە دەرەوەى گەمەى نووسین و بوومە بە شێك لە حەقیقەت، ئەگەر شێتیش بم ئەوە لە ئەنجامى گەڕانى بەردواممە بەدواى هاملێتى ڕاستەقینە، تۆش "ئاماژە بۆ هاملێت دەكات" پێویستە بەدواى ئۆڤیلیاى ڕاستەقینەى خۆت بگەڕێى نەك من، چونكە ئەوەتە عاشقەكەى من لەناو گۆڕە "دەرهێنەرەكە دەدوێنێت" سەروەرم سەر بەرز كەوە من خۆشم ئەوێى
 هاملێت: "تووڕە بوونێكى شێتانە بەڕووخساریەوە دیارە هەر بەو شیتایەیتەوە لەسەر پەیژەكان دێتە خوارەوە، ئۆڤیلیا دەكوژێت"
 ئۆڤیلیا: "بە برینداریەوە" ئەوەتە هاتم بەرەو ڕووت هاملێتى خۆم، هاملێتى سەر كاغەز منى كوشت، ئەو دەیویست بۆ ئەو بم گەر بۆ ئەو نەبم دەبىَ بمكوژىَ، ئەو زۆر تەڵەكەباز بوو كە بۆ ئەو نەبم دەبىَ بكوژرێم، سەروەرم ئامێزت بكەوە با بێمە گۆڕەكەتەوە.
 "ڕوناكى لەسەر ئۆڤیلیا و گۆڕەكە نامینێت، تەنیا شمشێرە بەخوێنەكەى هاملیت دەبینین، خوێن تەواوى قەڵاكەى داگرتووە، واتێدەگات هەموو دونیا بە شمشمێر ڕووبەڕووى دەبنەوە، شەڕى هەمووان دەكات، بەترسەوە پشتاو پشت دەگەڕێتەوە سەر پەیژەكە، شمشێرەكەى خۆشى دژى ڕادەوەستێتەوە، تارمایەكى نادیار بە شمشێرەكەى خۆى دەیكوژێت، لەسەر پەیژەكان غلۆر دەبێتەوە خوارەوە" 
   
 
 
 5 ى ئادارى 2008
 كەركوك
 
 

Previous
Next

Leave a Reply