Skip to Content

Sunday, May 9th, 2021

شتى دیکە…. نەوزاد بەندى

Be First!
by February 4, 2013 ئەدەب

 

– 1 –

 

 

ئێمە لە فەرمانگە ،

هەریەکەمان یەک خانو

یەک ئوتومبیل

یەک موچە

یەک ژن

یەک کوڕ

یەک کچ

یەک خەون..

یەک سەلاجەمان هەیە …

بەڵام بەڕێوبەرەکەمان ،

بێجگە لە خانویەک ،

کۆشکى دیکە ..

شوقەى دیکە ..

ڤیللاى دیکەى هەیە ..

ئەو بێجگە لە مارسیدس بێنز

ئوتومبیلى دیکەیشى هەیە ،

وەکو : تاهو

لاریدۆ

فۆرد ئێکسپلۆرەر

ئەو بێجگە لە موچەى فەرمى،

موچەى دیکەیشى هەیە ،

وەکو نەسریە

حەوافیز

ئۆڤەر تایم ..

سیمى پریڤەیت و

موچەى دیکەیش ..

بەڕێوبەر بێجگە لە یەک ژن ،

ژنى دیکەیشى هەیە ..

کوڕى دیکەیشى هەیە ..

کچى دیکەیشى هەیە ..

هەر بۆیە بەڕێوبەر ،

بە هیچ جۆرێک ڕازى نییە ،

کورسیەکەى 

بۆ بەڕێوبەرێکى دیکە چۆڵ بکا ..

بە هەموو چەکێک 

لەو پێناوەدا ئەجەنگێ :

بە یاسا

بە واسیتە

بە بەرتیل

بە شەڕ

و

چەکى دیکەیش …

ئێمە خودا ئەمانپارێزێ و

هیچ کەسێک حیمایەمان ناکا ..

بەڵام بەڕێوبەر ،

بێجگە لە کەمال و مارف ،

حیمایەى دیکەیشى هەیە 

وەکو

سکرتێر و

چا لێنەر و

پۆلیس و

شۆفێر و

نهێنگر ..

 

– 2 –

( حەز )

 

جاران حەزم لە هەموو شتێک بوو ..

دۆستایەتیم لەگەڵ بەهار و

هاوین و

پاییز و

زستاندا هەبوو ..

خزمایەتیم لەگەڵ شەو و 

رۆژدا هەبوو ..

لە یەک کاتدا ،

گۆرانى فارسى و

عەرەبى و

ئینگلیزى و

کوردى 

لە یەک ساتدا ،

عاشقى 

مەیادە حەناوى و

برۆک شێڵدز و

هیمامیلانى و

بریجیت باردۆ بووم ..

جاران پەیوەندیم لەگەڵ هەموو خواردنێکا هەبوو ..

لەگەڵ هەموو خواردنەوەیەکا ئەچوم بۆ پیاسە ..

سەعیم لەگەڵ هەموو جۆرەکانى چەرەس و

ترشیاتدا ئەکرد ..

هەموو جۆرەکانى جگەرە هاوڕێم بوون ،

هاوڕێى تەنگانە ..

هەموو ئیستگەکان دڵدارم بوون :

مۆنتیکارلۆ ،

لەندەن ..

دەنگى ئەمەریکا ..

سەوتولجەماهیر ..

ئیزاعەى بەغداد ..

هەموو بڵاوکراوەکان هاوەڵم بوون :

بەیان

رۆشنبیرى نوێ

شەرارە

ڕێبازى نوێ

کاروان

هاوکارى

مجەلەتى

مزمار

راسید

قادسیە

عێراق

سەورە ..

ئەلموعەلیمولجەدید

تەبیبەک

شەبەکە

نجوم

ئەلعەرەبى

جاران هەموو شارەکان 

قەرەوێڵەیەک و

لۆکەرێک و

بالیفێکیان بۆ دانابووم :

بەغداد

موسڵ

ئەنبار

حللە

کەرکوک

هەولێر

جاران دڵم زۆر گەورە بوو ..

جێگاى ئەو هەموو شتەى تێدا ئەبۆوە ..

ئێستایش هەموو تەمەنم لە نیوان 3 ژووردا بەسەر ئەچێ :

ژوورى نوستن

ژوورى فەرمانگە

دوکانەکەم

ئێستا هەموو تەمەنم لە شارێکا بەسەر ئەچێ :

سلێمانى 

ئێستا چاوەڕوانى هیچ شتێک ناکەم ،

تەنها بەڕووى ئەوانەوە پێدەکەنم ،

کە چاوەڕوانى منن ،

ئیشەکانیان بۆ ڕاپەڕێنم 

 

Previous
Next

Leave a Reply