Skip to Content

Saturday, September 26th, 2020

شەو………باران………..بەهار

Be First!
by April 4, 2008 ئەدەب

    هێرۆ مەولوودی ……
 
 ئاسمان
 بە سەر پێكەنین و ساتە مەستەكان
 گوڵی سپی ئەوین شاباش دەكا.
 گەڵای دار
 چۆپی كێشە و
 بەبزە سەما لە بەر پێیان دەكا.
 لە گەڵ سكالای دڵ
 خەونەكانم لە پێخەفی ژانێكی سور بە جێ دێڵم.
 حەز دەكەم بە هۆنراوە
 چیرۆكی عەشقی
 _ زەوى و باران _
 بهۆنمەوە
 بە لاوك و حەیران
 گەڵا و گوڵی
 _ئەم بەهارە سوتاوە_
 بگەرێنمەوە.
 دوو مۆمی كوژاوەی چاوى نیشتمانم
 بە تریفەى مانگ
  بگرسێنمەوە.
 شەو  و
 باران و بەهارم خۆش دەوێ.
 باران
 رابردووم دەشواتەوە
 شەو
 هێدى ،هێدی لە عەشق دەدوێ.
 بەهار
 ئاواز و گۆرانی بۆ جوانی دەڵێ.
 من _عاشقم_
 عاشقی ئەو بەهارەم
 ئەو بەهارەی
 تارای سوور
 بۆ رووخساری گوڵاڵە
 خەڵات دێنێ.
 ئەو بەهارەی
 زیندوو دەبێت و سروشت جێ ناهێڵێ.
 باڵندەكان
 گەرووی هاواریان
  بە بارانی ئەم بەهارە تەر دەكەن
 چیرۆكی عەشق پەروەرى
 _گوڵ و باران_
 بۆ هەور دەبەن.
 من لە ئاوا وڵاتێكەوە
 باسی
  تەنیایی
   عاشقترین عاشقی باران و
 بێكەسی
 شاعیرترین شاعیری بەهار
 بۆ شەو دەكەم.
 ئاخ بەهار
 بەهاری تاوانبار
 لە نێو ئەم بێكەسی و تەنیایی یە
 لە نێو ئەم بێدەنگى و نامۆییە
 بروانە
 سروشت بۆ تۆ و باران
 شیعر دەڵێ.
 بگەرێوە
 گەڵای دارەكان
 سەما دەكەن
 ئەوان دڵنیام دەكەن
 من و
 تۆ و
 باران و
 شەو
 بە یەك دەگەین.
 
 
gelarezan@yahoo.com
 

Previous
Next

Leave a Reply