Skip to Content

Sunday, February 28th, 2021

عه‌داله‌ت خان….. سه‌لام محه‌مه‌د

Be First!
by November 6, 2008 ئەدەب

  عه‌داله‌ت خان….. سه‌لام محه‌مه‌د 
 
 عه‌داله‌ت خان ،
 هیچ شاعیرێك توانای وه‌سفی
 شێوه‌و جوانی و تام و بۆن و
 ده‌نگ و ره‌نگی تۆی نییه‌
 ئه‌وه‌ته‌ی مێژوو هه‌یه‌ تۆیش هه‌یت ،
 هه‌ر له‌ حامۆرابیه‌وه‌ تا ده‌گاته‌
 فه‌یله‌سووف و گرووپ و ئه‌کادیمیاکانی ئه‌مڕۆ
 باس ته‌نیا باسی نازداری و شۆخوشه‌نگی تۆیه‌
 هه‌ر که‌سێکیش ،
 به‌ جۆره‌ی به‌رژه‌وه‌ندی خۆی
 چه‌کی بیر و چه‌کی هێزی
 خستۆته‌ کارو
 له‌ پێناوی تۆدا خه‌بات ده‌کات
 رۆژێك ناوت ده‌نێن : دیموکراتی
 رۆژێکیتر ده‌بیت به‌ : سۆشیالیستی
 جارێك ده‌تکه‌ن به‌ پرۆلیتار و جارێکیش به‌ شۆڤینی
 ئینجا فراوانترت ده‌که‌ن و
 ناوت لێده‌نێن : سۆسیال دیموکرات
 هه‌ندێك ده‌تکه‌ن به‌: موجاهید و
 هه‌ندێکیتر به‌ : بیروکرات
 عه‌داله‌ت خان گه‌لێ جه‌نگی گه‌وره‌ گه‌وره‌
 له‌ پێناوی ناوی تۆدا به‌رپابووه‌
 هه‌ردوو به‌ره‌ی شه‌ڕکه‌ری هه‌موو  جه‌نگێکیش
 لافی خۆشه‌ویستی و لایه‌نگری تۆ لێده‌ده‌ن
 ته‌ورات و ئنجیل و قورئان
 له‌پێناوی تۆدا هاتوون ،
 ستراتیژ و ئامانجی هه‌موو حزبێك ، تۆی
 ‌‌
 
 
 
 چ به‌زمێکت ناوه‌ته‌وه‌ عه‌داله‌ت خان
 تۆ تاك و ته‌نیا هه‌ر خۆتی
 یه‌ك وشه‌یت و
 به‌ هه‌زاران واتایان بۆت داڕشتووه‌
 که‌ جیاواز و دژ به‌ یه‌کن
 زۆر جاریش ئه‌و جیاوازیه‌
 ده‌بێته‌ هۆی دژایه‌تی و
 کوشتارو ته‌فر و تونابوون
 تۆ بڕوانه‌ عه‌داله‌ت خان
 چۆن چۆنی له‌ گشت وڵاتێ
 هه‌موو کاتێ
 به‌ زمانی لووسی قسه‌که‌رێکی فاشیل
 به‌ هات و هاواری ده‌رهێنه‌رێکی فاشیل
 چ شانۆیه‌کی فاشیل
 بۆ کۆمه‌ڵێ بیرئیفلیجی فاشیل دروست ده‌بێت !1
 به‌ڵام تۆ خۆت خانی خانان عه‌داله‌ت خان
 چاك چاك دڵنیای ده‌مێکه‌ و  زۆر له‌ مێژه‌
 هه‌تك بوویت و په‌رده‌ی کچێنیت نه‌ماوه‌
 سه‌دان و هه‌زاران هیتله‌ر
 به‌ ( سیغه‌ ) ماره‌یان کردی و ته‌ڵاقیاندای
 ته‌نیا هه‌ر خۆتیش ده‌زانیت
 له‌ مێژووی مرۆڤایه‌تیدا
 چه‌ندین ملیۆن  بێچووه‌ ( سیغه‌ ) ی
 نهێنیت لێکه‌وتۆته‌وه‌..
 
 05 / 11 / 2008 – سوید
 

Previous
Next

Leave a Reply