Skip to Content

Thursday, March 28th, 2024
عیراق به‌ره‌ڤ كیڤه‌! ……عبدالرحمن بامه‌رنی

عیراق به‌ره‌ڤ كیڤه‌! ……عبدالرحمن بامه‌رنی

Closed

 

 

 

ئه‌ڤا نوكه‌ ل سه‌ر گوره‌پانا عیراقێ‌ دهێته‌ دیتن، ژ وان هه‌می ناكوكیێن ل سه‌ر بنیاتێ‌ فره‌ نه‌ته‌وه‌، ئاین و مه‌زهه‌بان په‌یدا بوین، دڤیا بایه‌ بره‌نگه‌كێ‌ دی یێ‌ ئاشتیانه‌ و لێبوردنێ‌ و پێكڤه‌ ژیانێ‌ سه‌رهلدابا یه‌، كه‌ چ مخابن شوینا وێ‌ پێكڤه‌ ژیانێ‌، شه‌ر و كوشتن ژێ‌ په‌یدابوینه‌، ژ ڤان شه‌رو كوشتارێن به‌رده‌وام ژی، ئاینده‌یێ‌ عیراقێ‌ به‌ره‌ڤ خاله‌كا نه‌دیار ڤه‌ دچیت.  ئه‌ڤ تشتێ‌ نوكه‌ ل عیراقێ‌ ره‌نگڤه‌دده‌ته‌ ڤه‌، هه‌ر ل سه‌ر وان روندك و ئازارانه‌ و سته‌مكاریێ‌، كو تاكێن عیراقێ‌ نه‌شیاینه‌ مفای ژ وانه‌یێن خوه‌ یێن رابردوی وه‌ربگرن، نه‌شیاینه‌ مفای ژ خێرو بێراتێن عیراقا په‌ترولی ببینن و به‌روڤاژی هه‌می ئه‌و دوو به‌ره‌كی و ناكوكیه‌، ل سه‌ر ئێك یێن ته‌خه‌ دبن و ده‌رئه‌نجامێ‌ ته‌خه‌بونا ڤان ناكوكیان ژی،  چ بو خالا لاوازا جوداهییا نه‌ته‌وه‌ی بزڤرن كو عیراق ژ چه‌ند نه‌ته‌وه‌یه‌كێن جودا پێكهاتیه‌ یان ژی خالا لاوازا مه‌زهه‌بی، كو پتریا پێكهاته‌یا عیراقێ‌، ل سه‌ر ئه‌ساسێ‌ (شیعه‌ و سنه‌) هاتینه‌ دابه‌شكرن. پێنه‌ڤێت، وه‌لاتێ‌ عیراقێ‌ ژ ئه‌نجامێ‌ ڤێ‌ دابه‌شكرنێ‌، دكه‌ڤیته‌ بن گوشارا كێشمه‌كێشا وه‌لاتێن ئه‌قلیمی، ئیران ب پالپشتێ‌ سه‌ره‌كی یێ‌ شیعان دهێته‌ ناسكرن و راسته‌وخو ده‌ست تێوه‌ردانێ‌ د بریارا سیاسی دا دكه‌ت و وه‌لاتێ‌ توركیا و عه‌ره‌بستانا سعودی ژی كو دوو وه‌لاتێن كاریگه‌رن ل سه‌ر سنورێ‌ عیراقێ‌ و ل به‌رامبه‌ر ده‌ست تێوه‌ردانێن ئیرانێ‌، پالپشتیا لایه‌نێ‌ سنی دكه‌ن. ئه‌گه‌ر ئه‌ڤه‌ ئالیه‌ك بیت كو هاولاتیێن عیراقی ژ به‌ر بنالن و ئه‌ڤ پێكهاته‌یه‌ ببیته‌ خالا ده‌رده‌سه‌ریێ‌ بو عیراقیان، ژلایه‌ك دیڤه‌، پاشماوێ‌ خرابێ‌ سیاسه‌تێن ئێك لدویڤ ئێكێن ده‌ستهه‌لات ل ڤی وه‌لاتی كرین و ژ هه‌میا ژی زێده‌تر ده‌ستهه‌لاتا دكتاتورانه‌یا رژێما به‌عس یا ژناڤچووی بویه‌، كو وه‌لاتیێن عیراقی كرینه‌ د خانه‌یا ل به‌ر ئێك راوه‌ستیانێ‌ و ئێك دوو قه‌بیل نه‌كرنێ‌ دا و ژ ئه‌گه‌رێ‌ ڤان هه‌می كێشمه‌كێشان، ئه‌ڤرو ده‌رئه‌نجام، بهزاران عیراقی بوینه‌ قوربانی و بهزاران زاروك بوینه‌ ئێتیم و بنه‌مال هاتینه‌ وێرانكرن و خه‌لك ژ خانیێن خوه‌ ده‌ربه‌ده‌ر بوینه‌. 

ئه‌م كورد ژ گوره‌پانا عیراقێ‌ لكیڤه‌ینه‌! ئه‌ڤه‌ خاله‌كا گرنگه‌ دڤێت ئه‌م كورد پێگه‌یێ‌ خوه‌ یێ‌ دروست بزانین و بزانین  ئه‌و چ لایه‌نن ئه‌م مامه‌لێ‌ دگه‌ل دا دكه‌ین، دێ‌ چاوان شێین پێگه‌یێ‌ خوه‌ یێ‌ دروست د هه‌ڤكێشه‌ییا ڤان هه‌می جوداهییان دا، چ یێن نه‌ته‌وه‌ی بن یان مه‌زهه‌بی دا ب پارێزین، دڤێت ئه‌م هشیارییا خوه‌ ژ به‌روكه‌كێ‌ دی هه‌ڤركیێ‌ یێ‌ ده‌ره‌كی ژی ب پارێزین، ئه‌و ژی، هه‌ڤركییا وه‌لاتێن ئه‌قلیمی و ئه‌و كێشمه‌كێشه‌ییا ل سه‌ر ئه‌ساسێ‌ مه‌زهه‌بی دئێته‌ دروژه‌ڤێ‌ دا و ئه‌م ژی دبینه‌، به‌شه‌ك ژ هه‌ڤكێشه‌یێ‌.

بویه‌ دا كو ئه‌م كورد پێگه‌یێ‌ خوه‌ یێ‌ دروست ژڤان هه‌می گوشاران بزانین و ئه‌و تشتێ‌ ئه‌ڤرو د ده‌ستێ‌ مه‌ دا، بزانین ب پارێزین، دڤێت مه‌ سیاسه‌ته‌كا حه‌كیمانه‌تر هه‌بیت، ئه‌م بزانین چاوان ڤێ‌ هه‌ڤكێشه‌یێ‌ د به‌رژه‌وه‌ندا خوه‌ دا، داڤ كێش بكه‌ین، ئه‌ڤرو چه‌كێ‌ هه‌ره‌ خورتێ‌ د ده‌ستێ‌ مه‌ دا، ئه‌م ب چ دروشمێن ته‌یسوك، نه‌ كه‌ڤینه‌  بن هیچ گوشاره‌كێ‌، به‌لكو یا گرنگ، رێكخستنا ناڤ مالیا كوردی یه‌ ل به‌رامبه‌ری ڤان هه‌می گه‌ڤێن ده‌ره‌كی چ یێن ناڤخویی یێن عیراقێ‌ بن یان ژی ئه‌قلیمی. ئه‌گه‌ر ئه‌م هزر بكه‌ین ژی كو ده‌مێ‌ به‌رسینگرتنێ‌ چوو و كێشمه‌كێشه‌ دگه‌ل هاتنا ئه‌مریكا بو عیراقێ‌ و روخیانا رژێما دكتاتور ب دوماهی هاتن، هینگێ‌ ئه‌م دێ‌ به‌رامبه‌ر مه‌ترسیه‌كا چاڤه‌رێنه‌كری خوه‌ بینین و ل به‌رامبه‌ر مێژوێ‌ ژی دێ‌ د گونه‌هبار بین، كو ب هه‌ده‌ر دانا خوینا هزاران شه‌هیدێن كوردستانێ‌، روندكێن دایكان، ده‌ربه‌ده‌سه‌ری و هه‌می كاره‌ساتێن ب سه‌رێ‌ ملله‌تێ‌ كورد هاتین، كو ئه‌م نه‌شیاینه‌ د چه‌په‌رێ‌ خوه‌ دا، ب ره‌نگه‌كێ‌ پێدڤی، به‌رگریێ‌ ژ ده‌ست كه‌فتێن خوه‌ بكه‌ین و تاكه‌ رێك ژی ئه‌ڤرو ل به‌ر سینگا مه‌، ئه‌م ئێك رێزییا ناڤ مالا كوردی بهێز بێخین و نه‌هێلین هه‌ڤركی و كێشه‌یێن مه‌، ببنه‌ خالا لاوازیا مه‌ ل به‌رامبه‌ری دوژمنێن مه‌ و پاراستنا ده‌ستكه‌فتێن مه‌.

 

Previous
Next
This site is registered on wpml.org as a development site.