Skip to Content

Friday, September 25th, 2020

فلیمی فیتنەو كۆدە شاراوەكەی ناوی هەڵوێستەیەك

Be First!
by April 2, 2008 گشتی

  ڕێبوار عارف   ……
 
 بۆ یەكەم جار نزیك بە سێ مانگ لەمەوبەربوو كە هەواڵی دەست بەكاربوونی (خیرت ویلدرس ) بیست لەسەر فلیمێك كە دەربارەی ئیسلامە. لەوساتەدا بەدوا ڕۆژانە گوێقولاخی ئەم هەواڵەبووم وكونچكاوانە بیرم لەوە دەكردەوە كە ئاخۆ (خیرت ویلدرس ) دەیەوێ لەو فلیمەدا چی بڵێت ؟ ئاخەر جیاواز لەوەی كە مۆتیڤی من چیبوو بۆ بەدواچوون و تامەزرۆبوونی ئەم بەرهەمە، هاوكات هەردوو بەرەی ( مخالف وموافق ) واتە لایەنگرانی بەرهەمەكەی (خیرت ویلدرس )و ئیسلامیەكان هەر پێشوەخت لە ِووبەڕِووبوونەوەیەكی قورسدابوون و هات وهاوارێكی گەورەیان لەبارەی ڕیگە پیدان و نەدانی ئەم فلیمەوە بەرپاكردو هەڕەشەكانی (خیرت ویلدرس ) نیگەرانیەكی زۆری بۆ ئیسلامەیەكان بەرپاكردو هەموو چاوەكان بەتیارامانەوە ئاراستەی ئەو ساتانەبوون كە ئەم بەرهەمە دەكەوێتە سەر شاشەی تەلەفزیون وئەنتەرنیت وپرسیارەكە ئەوە بوو كە( ئاخۆ چ داهێنانێكی ئەنجام درابێت و بەچ ڕادەیەك توانرابێت پەردە لەڕووی كارنامەو هەویتی ئەم بزوتنەوەیەو ئایدۆلۆژیاكەی هەلدرابێتەوە ؟..).
 ئەم دۆخە وایكرد كە هەر لە مەلای مزگەوت و ئیمامەكانەوە بگرە تا ئایەتووڵاو ڕوحانیەكان و دبلۆمات وسیاسەتمەدارانی ئیسلامی تەنگیان پێ هەڵبچێنراو بەر لە نیشاندانی بەرهەمەكە كەوتنە هەڕِەشەو گوڕەو شمێرهەڵكێشان لەبەرامبەر ئەگەر نیمایش كردنی ئەم فلیمەدا. هەوڵ وتەقەلاكانی حكومەتی جمهوری ئیسلامی ئیران و زۆرێك لە وولاتانی عەرەبی بۆ دانانی گەمارۆی ئابوری و سیاسی لەسەر حكومەتی هوڵند تەنیا ڕِوالەتی مەسەلەكە بوو بەلەبەرچاوگرتنی باگراوەندی ئەم جۆرە كارو ڕووداوانە ئیسلامیەكان ئەزموونێكی بەرچاویان هەیە بۆ قۆستنەوەی ئەم دەرفەتانەو تەنانەت پەنابردن بۆ كاری تووندوتیژی لەم وولاتانەدا. بەلام لەهەناوی ئەم بازاڕ گەرمكردنەی هەردوو بەرەدا، لەم ڕۆژانەدا بینیمان كە نمایشی فلیمی فیتنە كراو جیاواز لەهەرپێشبینی و خۆزەگەو ئارەزووەكانی من وتۆ شتێكی تری پیشاندراو ئەم فلیمە لەزمانی خۆیەوە كەوتە دوان وجێگەو ڕێگەو سنگەری واقعی خۆی نیشاندا كەپێی لە چ زەلكاوێكدا گیركروەو دەیەوێت بەبەهانەی داژەیەتی ئیسلامەوە چ شتێكی تربڵێت، بەم شێوە پردی هەرجۆرە خۆشخەیالی و چاوەڕاوانیەكی ڕەخنەگرانە لە ئیسلام تێكشكاو لە ماوەی 15 خولەكەدا (خیرت ویلدرس ) بە ڕۆشنترین شێوە بیروڕای واقعی خۆی بەبەهانەی دژایەتی كردنی ئیسلام پێ ڕاگەیاندین. بریا بەرلەوەی كە بێنە سەرباسی ئەم كورتە فلیمە خوێنەری بەڕێز چارەكە سەعاتێكی وەختی خۆی بۆ سەیركردنی ئەم بەرهەمە تەرخان دەكرد، ئەوكاتە زۆر بابەتیانەتر ڕاستیەكانی پشت ئەم پەردەیە ئاشكرا دەبوو وە خوێنەر مادیتر كۆدە شاراوەكانی نیو ئەم فلیمەی دەبینیەوەو هەڵوێستەی لەبەرمبەردا دەكرد. كە بەبڕوای من ئەوەی لەم فلیمەدا بەدی دەكرێت نە لە ڕووی هونەریەوە كارێكی تازەو سەرنج ڕاكێش بوو، نە لە ڕووی ناوەرۆكەوە لێكدانەوە یا ئیكتشافێكی نوێ بوو لەسەر ئیسلام وقورئان. بەڵكو لەڕاستیدا لەباشترین حالەتدا فلیمەكە دووبارەكردنەوەو نمایشكردنەوە گۆشەیەك لە كارنامەی ئیسلامی سیاسی بوو لەپاڵ كۆمەلێك خوتبەو ووتاربێژی ئیمام و دەم ڕاستەكانی باندە تیرۆرسیت و ئیرهابەیەكان و مونتاج كردنەوەی كارەكانی ئەوان لە فلیمیكدا كە لە ڕِواڵەتدا ڕەخنە بوو لە ئیسلام، بەلام بەكردوە پەیامێكی تری پێ بوو كە نابێت لەژێر ناوی ڕەخنەگرتن لە ئیسلامدا پەسەند بكرێت.
 فاكتەری سەرەكی ئەم كورتە فلیمە خستنە ڕوو نیشاندانی چەند سوورەتێكی قورئان بوو كە بەدەیان نووسەری عەلمانی و ئاتێست و سوسیالیست و پیشكەوتووخواز لێكۆڵینەوەی گەلێك مەزنتری لەسەر ئەو سوورەتانەو كۆدە داخراوەكانی ناوەوەی كردوە. ڕەنگە كۆكردنەوەو پیشاندانی گۆشەیەك لە كارنامەی ئیسلامی سیاسی لەم فیلیمەدا توانیبیتی بەیانی ڕاستیەك بكات، بەلام ئایا ئەمە بە مەبەستی ئەوەئەنجامدراوە كە لە پلەی یەكەمدا پەردەهەلمانێك بێت لەسەر ئیسلامی سیاسی ؟ من بەتایبەت لەمەیان بە تووندی گۆمانم هەیە سنووری خۆم لەو بەڕێزانە جیا دەكەمەوە كە پیان وایە ئەم بەرهەمە تەنیا پەردە هەلمالینیكە لەسەر ئیسلامی سیاسی. لەڕاستیدا پەیام وئامانجی ئەم فلیمە دووربوو لە ڕِەخنەیەكی جدی و پێشكەوتووخوازانەی وا كە خاون هەویەتێكی ئینسانی و عەدالەتخوازانە بێت بەجۆرێك كە لە ڕِوانگەی ئینسانی بوونی ئیسانەوە ڕەخنەی لە ئیسلام هەبێت بەڵكو خەریكی شەڕی ئیسلامە بە چەكیكی كۆنەپەرستانەترو نا ئینسانی تر. ئەوەندەی ئەم فلیمە ئامانجی هەلخراندنی هەست و سۆزی دژی خارجی تێدا بەهێزە بە چارەكی ئەوە مەسەلەی نیشاندانی باش وخراپ بوونی ئیسلام نیە. تەواوی غەم و هەمی (خیرت ویلدرس ) لەم فلیمەدا چووتە سەر چوونە سەرەوەی ڕێژەی خاریجان لە هولندا. هستریای ئەم پەرلمانتارە ڕاست و ڕاسیستە لەویدا بە رۆشنترین شێوە خۆی نیشان دەدا كە بەراوردی ئاماری چوونە سەرەوەی خارجیان نیشان دەدات لە هۆلندە كە چۆن لە ساڵی 1990 458 هەزار كەسی تێدا بووەو لەسالی 2004 دەكاتە 994 هەزار  بەهەمان شیًَوە دواتر ئاماری هەموو خاریحیان لە ئەوروپا نیشان دەدات كە لە سالی 2007 دەگاتە 54 ملیون كەس. كە ئەمە هیچ شتێك نیە جیاواز لە دەستەبەندی كردن وتۆماركردنی یەك بەیەكی هەموو خارجیانیك كە لەم وولاتانەدا دەژین بە ناوی ئیسلامەوە بەمن و تۆو هەموو ئەو دەیان هەزار عەلمانی و سۆسیالیست و ئاتیست و ئازادیخوازانەشەوە كە بارگاوی بوونمان بە هەر ئاین و مەزهەبێك بۆخۆمان بە سووكایەتی دەزانن و لە نازنامەیەكی ئینسانی زیاتر هیچ تر شك بەخۆمان ڕەوا نابینین ! 
 خۆلاسەی كەلام ئەگەرچی هێشتا قسەكردن لەسەر ئەم فیلمە لە میدیا كوردیدا كەمترین ڕەنگدانەوەی هەیە، بەلام بەهیوام تا ئەوشوێنەی كە گوێ بیستی ئەم هەواڵە دەبین یا فلیمەكەی دەبینین ڕواڵەتی ڕەخنەگرتن لە قورئان وئسلام غافلگیرمان نەكات و ناوەڕۆك و پەیامی واقعی ئەم فلیمەمان لەبیرنەچیتەوە كە بە قولترین شێوە ئاو كردنە بە ئاشی ڕاسیزم و نەژادپەرستیدا . دژی خارجی بوونی ئەم بەرهەمە تەنانەت لەپاش نیشاندانی ئەو ئامارانە لەم فلیمەدا (خیرت ویلدرس ) هاواری ( داكۆكی كردن لە ئازادیەكانمان ) دەكات، پرسیارەكە ئەوەیە ئایا ئازادیەكانی خەلكی هولند كە ( خیرت ویلدرز ) خۆی كردوە بە نووێنەریان، ئەو 994 هەزار خارجیە دەستی بەسەردا گرتووە یا شتێكیكە. ئەگەر قسەی ئەو لەسەر شتیكیكە بووایەو بە ڕۆشنی ڕەخنەی خۆی لەوە بگرتایە باسی لەمەترسیەكانی ئیسلامی سیاسی وەك ئیدۆلۆژیاو بزوتنەوەیەكی سیاسی بكردایە ئەوساتە دەكرا بیری لای یاساو ڕێسایەك بكردایەتەوە كە ڕێگەی بە قەسابی كردنی ژنان نادات وخوازیاری تووندترین سزای یاسای دەبوو لەسەر ئەو كەس و لایەنانەی كە لەپشت كردەوەی نامۆسپەرستی و تووندوتیژیەوە ڕاوەستاون، كە دیارە ئیسلامیەكان لەمبارەوە پشكی شیریان بەردەكەوت. بەلام ئەو هاتووە لەم فلیمەدا بە نیشاندانی وێنەیەك باس كوشتاری ژنان دەكات ئەویش بۆ هەلخراندنی هەست وسۆزی بەرەكەی خۆیەتی دژ بە خارجیانێك كە ئەو بە گشتی میدالی ئیسلامی بوون لە بەرۆكیان دەدات. بەدلنیای(خیرت ویلدرس ) بێ ئاگانیە لەوەی كە ڕۆژانە پۆل پۆل مندالان لە ئیراندا لە سێدارە دەدرێن و لە عیراقدا لەسایەی هێزە چەكدارەكانی حكومەتەكەی ئەواندا وەك هاوپەیمانی ئەمەریكا بە هۆی بەردەوام بوونی شەڕی تایفی و دینی و قەومیەوە رۆژانە سەدان ئینسان گیانی لەدەست دەچێت، كەچی ئەم ڕەخنەگرە خوازیاری ئازاد بوونە لە قوربانیانی ئەم شەڕو كوشتارەو دەیەوێت هولند لە دەستی ئەوان ڕزگار بكات و بەكەم كردنەوەو نەهێشتنی خارجیان ئازادی و عەدالەتی اجتماعی دەستەبەربكات. ئەرێ بەڕاستی لەخۆمان پرسیوە كە ئایا ئەمە دیویكی تری هەمان سیاسەتی دژ خاریجی حكومەتەكەی و وولاتانی ئەوروپا نیە لەبارەی وەدەرنانی پەنابەران و ئەو بریارانەی كە ئەمڕۆ لەسەر دیپۆرتكردنەوەی پەنابەرانی كوردو عیراقی و ئەفغانی و ئیرانی دەدرێت ؟
 ئەگەر (خیرت ویلدرس ) هەلوێستێكی جدی ولیبڕاوانەی ڕەخنەگرانەی لەسەر قورئان ئیسلامی سیاسی هەبووایەو ئەگەر وەك كەسایەتیەكی رەخنەگر لە هەمان لۆژیكی حكومەتەكەیەوە سەیری تیرۆریستی نەكردایەو هەردوو دیوی ئەم دیاریدە مەترسیدارەی دژ بە مرۆڤایەتی ببینیبایەتەوەو بەهەمان شێوەی كە ڕووداو كارەساتی 11ی سیپتمبەر بە كارێكی تیرۆریستانە دەزانیت، كوشتنی سەدان هەزار ئینسان و نغرۆكردنی كۆمەلگایەكی وەك عیراق لە سایەی جەمسەرێكی تری تیرۆریستیدا ببینیبایەتەوە، بە دڵنیای ئەوساتە بە چەكێكی ترەوە دەچوو سەنگەر ڕاوەستانەوە دژ بە ئیسلامی سیاسی. بەلام هەقیقەت ئەوەیە كە شەڕی ڕاوەستانەوەو بەرنگاربوونەوەی ئیسلامی سیاسی بە چەكی فاشیستی و نەژادپەرستانە ناكرێت و راسیزم و نژادپەرستی وئیسلامی سیاسی دوودیووی یەك دراون و جگە لە نەهامەت و پەرەسەندنی تووندوتیژ و ئیرهاب و ناعەدالەتی هیچ بەرهەمیكی تری نیەو نابیت بە بۆ مرۆڤایەتی، هەربۆیە نە فلیمی فیتنە بەشێكە لە خەبات وتیكۆشانی بەرەی ئازادیخوازی مرۆڤایەتی دژ بە ئیسلامی سیاسی و نە شەری ئیسلامی سیاسی بە ڕاسیزم و نەژادپەرستی دەكرێت !
 
 
r-arif@welho.com
 31 / 3 / 2008
 

Previous
Next

Leave a Reply