Skip to Content

Tuesday, January 26th, 2021

قەیرانی ریفۆرم لە یەکگرتوودا …1

Be First!
by August 31, 2012 گشتی

 

 

بەشدارییەک لەو گفتوگۆیانەی دەربارەی شەشەمین گۆنگرەی یەکگرتوو لە ئارادان

 

 

بەشی یەکەم

 

بابەتی ریفۆرم لەناو یەکگرتوودا، ساڵانێکە  وەک پرسێکی گرنگ لەلایەن ژمارەیەک سەرکردە و کادر و رۆشنبیریی حزبەوە دەوروژێنرێت، باسکردنێکی بەردەوام لە پێویستی  ریفۆرم لە شێوازی کاری سیاسی و، تەنانەت دنیا بینی یەکگرتوو لە ئارادابوە، هەڵبەتە ئەم بانگەشانە  بۆ ریفۆرم و نوێکردنەوە لە نێو یەکگرتوودا  لەژێر کاریگەری گۆڕانکارییەکانی دنیا و ناوچەکەدا سەریهەڵداوە ، ئەنجامی هەستکردنە بە بوونی کۆمەڵێک قەیرانی جددی لە شێوازی سیاسەتکردن و، لە دیدگای ئەم حزبە بۆ ئایین و سیاسەت و کۆمەڵگا، هەوڵێکە بۆ خۆگونجاندن لەگەڵ گۆرانکارییەکانی سەردەم و بەرەوپێشچوونە دیموکراتیەکان لە دنیادا، رەنگە دەرکەوتنی مۆدێلی دادوگەشەپێدان لە تورکیا و، ئەزموونی  ئیسلامی لیبرالیزەکراو لە مالیزیا و، تەنانەت ئەزموونی ئیسلامی لە مەغریبی عەرەبی و ، هەندێک شوێنی دی ؛ ئەم بانگەشانەی نێو یەکگرتووی جددیتر و  راشکاوانەتر هێنابێتە ئاراوە و، پاساوی بابەتی بە بوونی بەخشیبێت، پرسیاری گرنگ لێرەدا ئەوەیە  ئایا ئەم بانگەشانە بۆ ریفۆرم لە  شەشەمین کۆنگرەی یەکگرتوودا بە کۆی گەیشت؟ ئایا یەکگرتوو توانیتی بە ئاڕاستەی حزبێکی مەدەنی و کراوە هەنگاو هەڵبگرێت یان بە ئاڕاستەی گەڕانەوە بۆ ریشە سەلەفی و ئایینییە توندەکانی هەنگاوی نا؟ لەم کۆنگرەیەدا یەکگرتوو  نزیک بویەوە لە نموونەی دادوگەشەپێدانی تورکی  یان نزیکبوویەوە لە نموونەی حەماسی فەلەستینی و حزب اللە لوبنانی؟  ئایا خەونی جیاکردنەوەی دەعوە و تەنزیم  بە کوێ گەیشت ؟ کامانەن ئەم پێوەرانەی کە دەتوانین بەکاریان بهێنێن  تا دەستنیشانی سەرکەوتوویی یان سەرنەکەوتوویی شەشەمین کۆنگرەی یەکگرتووی پێبکەین و، دواتریش کاریگەری ئەم کۆنگرەیە لەسەر ئاییندەی یەکگرتوو بزانین؟

ئێمە لەم نوسیینەدا هەوڵدەدەین  لە پرسی ریفۆرم بدوێین لە شەشەمین کۆنگرەی یەکگرتوودا، بە پشت بەستن بەو دیکۆمینت و نوسراوانەی لەبەردەستدان وەڵامی ئەو پرسیارانە ئەدەینەوە و ، شیکاری  بوون و پێگەی ریفۆرم ئەکەین لە یەکگرتوودا و مامەڵەی شەشەمین کۆنگرەی یەکگرتوو لەگەڵ ئەو پرسەدا.

ریفۆرم هەمیشە بەرهەمی سەردەمێکە کە تیایدا  مرۆڤ هەست بە قەیران و گرفتەکانی نێو خۆی ئەکات، دەکەوێتە گومان و دڵەراوکێ لە بوون و رەوایەتی و پێویستی ئەو دۆخە دیاریکراوە ، ئیدی لێرەوە  ریفۆرم وەک بانگەشەیەکی نوێ بۆ پێداچوونەوە بەو دۆخەدا و تێپەڕاندنی قەیران و چارەسەری گرفتەکان دێتە ئاراوە ، یەکگرتووی ئیسلامی وەک حزبێکی  ئیسلامی ئیخوانی  لە یەکەم رۆژی کارکردنییەوە مەحکوم بوە بە کۆمەڵێک گرفتی جەوهەری، یەکگرتوو وەک حزبێک کە بناغەی سیاسەتکردنی خۆی لەسەر بنچینەی ئایین بونیادناوە و ، لێکدانەوەشی بۆ ئایین پابەند کردوە بە قوتابخانەیەکی فیکری دیاریکراوەوە کە قوتابخانەی ئیخوان موسلمینە، لە هەناوی بوونیدا کۆمەڵێک قەیران و گرفتی قووڵی هەڵگرتوە،  کە ئەم گرفتانە  هوکاری سەرەکی بوون بۆ ئەوەی یەکگرتوو وەک حزبێکی مەدەنی هاوچەرخ بوونی نەبێت ، وەک حزبێک بوونی نەبێت کە پڕۆژەی مەدەنی و نیشتیمانی هەبێت، بەڵکو وەک حزبێکی ئایدۆلۆژی پشت بەستوو بە ئسولییەتی ئایینی بوونی هەبێت و کار بکات، وەک حزبێک کە پڕۆژەی بە ئایینکردنەوەی کۆمەڵگای هەیە و، نوێنەرایەتی گروپگەلی بچووکی فەندەمینتال ئەکات، ئەم گرفتانەش خەونی هەموو ئەو کەسانەیان لەبار بردوە کە ویستویانە یەکگرتوو بکەن بە حزبێکی مەدەنی خاوەن پێگەی بەرینی جەماوەری.

ئێمە لێرەدا لە گرنگترین ئەو گرفتانە ئەدوێین کە نەیانهێشتوە یەکگرتوو ببێتە حزبێکی مەدەنی هاوچەرخ و ، لە هەمانکاتدا ئەو جومگە گرنگانەی جەستەی یەکگرتووشە کە پێویستی بە ریفۆرمی ریشەیی هەیە، دواتریش هەوڵدەدەین  ئەوە شی بکەینەوە کە شەشەمین کۆنگرەی یەکگرتوو  چۆن مامەڵەی لەگەڵ ئەو بابەت و کەیسانەدا کرد کە لە ناو یەکگرتوودا پێویستی بە ریفۆرمە و ساڵانێکی زۆرە رەوتی ریفۆرم لە ناو یەکگرتوودا جەختی لێ ئەکەنەوە.

ئیسلام وەک بنچینەیەک بۆ سیاسەت، یان وەک پاشخانی ئەخلاقی بۆ سیاسەتکردن؟

یەکگرتوی ئیسلامی یەکێک لە کێشە هەرە گەورەکانی کە رێگر بوە لەوەی ببێتە حزبێکی مەدەنی هاوچەرخ، بریتییە لە دانانی ئیسلام بە بناغەی سەرەکی سیاسەتکردن، تەوزیفکردنی ئیسلام بۆ هەموو بەرژەوەندییەکی سیاسی و ، پێدانی مۆرکی رەوایەتی ئایینی بە هەموو هەنگاو و پراکتیکێکی سیاسی ئەم حزبە ، ئەمەش وایکردوە ئەم حزبە  وەک حزبێکی ئایدۆلۆژی فەندەمینتال دەربکەوێت ، حزبێک کە بۆ مامەڵە لەگەڵ هەموو جیاوازییەکانی کۆمەڵگا پێوەرێکی ئایینی ئسوڵی هەبێت، بۆ مامەڵەکردن لەگەڵ بابەتی دیموکراسی و ئازادی و ماف و ئەرکە مەدەنییەکان روانگەیەکی  ئایینی هەبێت، زیاتر لەوەش ئایین وەک ئامرازێکی کاریگەری فراوانکردنی نفوزی سیاسی بەکار هاتوە، مەلایەک لەسەر مینبەرەوە بە هەموو خرۆشێکی ئایینیەوە ئەگری و باس لە وەرع و بۆخوا ژیان و ژیانی سۆفیانە ئەکات، بەڵام دواتر ئەم مەلایە کادرێکی دیاری حزبە و گریانی سەر مینبەر و بانگەشەی وەرع و تەقوا بۆ  ململانێی سیاسی و کۆکردنەوەی دەنگ بەکار دێنێت،  بانگخوازە ئیسلامییەکان بانگەشەی زیندووکردنەوەی روحانییەت و ژیان لەگەڵ قورئان و بۆ قورئان ئەکات، بەڵام هەوادارەکانی خۆی ئەکاتە کەرەستەی خاو بۆ حزب و کانیدیان ئەکات بۆ ئەندامبون لە حزبدا ، ئەم مەلا و بانگخوازانە بە هەموو توانایانەوە لە پیناو بەرژەوەندی سیاسی خۆیان و حزبیاندا سۆزی ئاییندارانەی خەڵک ئەجوڵێنن، هەر لەبەر ئەمەش مەلا و بانگخواز و ئسوڵییەکانی نێو یەکگرتوو جومگە سەرەکییەکانی سیاسەت و حزبایەتیان بە دەستەوەیە و لە پێشەوەن، لە هەڵبژاردنی رابردووی پەرلەمانی عێراقیشدا ئەفەندییەکانی نێو یەکگرتوو کەوتن و مەلا و بانگخوازەکان دەنگی پێوانەییان هێنا، تەنانەت خودی یەکگرتوو بۆ سوود وەرگرتن لەو جەماوەرەی کە بەهۆی جوڵاندنی سۆزی ئایینییەوە لە یەکگرتوو کۆبوونەتەوە  بانگخواز و مەلاکانی کاندید کرد و ، بەکردەوەش وەک وتمان ئەفەندییەکان کەوتن و بانگخواز و مەلاکان دەنگیان هێنا ، ئەمەش خاڵێکە کە نەک مەترسی لەسەر رەوشی ئازادی و مافەکانی مرۆڤ دروست ئەکات، بەڵکو بە بڕوای من خودی یەکگرتوو ئەخاتە قەیرانێکی ویژدانی و ئەخلاقی گەورەوە، بانگەشە بۆ کاروانی قیامەت و بۆخوا ژیان بەکاربهێنێت بۆ شەڕی بەرژەوەندخوازانە و هەڵپە و تەماعی سیاسی ، بۆ هەڵمەتی هەڵبژاردن خەڵک بە ئاگری دۆزەخ بترسێنێت و بە خۆشی بەهەشت مژدە بدات، هەروەک چۆن بینیومانە لە هەموو هەڵبژاردنەکاندا یەکگرتوو لە رێگەی مەلا و بانگخوازەکانییەوە پێمان ئەڵێت دەنگ بە کێ بدەیت لە قیامەتدا لەگەڵ ئەوە حەشر ئەکرێت ، دەنگ بە ئیسلامی بدەیت ئەوا لەگەڵ ئەوانداحەشر ئەکرێی و دەنگ بە عەلمانی و بێ دینەکان بدەیت دیسانەوە لەگەڵ ئەوان حەشر ئەکرێیت، ئەمە ئاماژەیەکی روونە  لە ترساندنی خەڵک بە قیامەت و حەشر لە پیناو مەبەستی سیاسیدا، فێڵێکی نا ئەخلاقی زۆر گەورەیە لە سۆز و باوەڕی ئیمانداری سادەی کۆمەڵگا ، یاریکردنێکی زۆر میکاڤیلیانەیە بە قیامەت و رۆژی حەشر، بەمەش بە هەموو شێویەک هەموو پیرۆزییە ئایینەکان دەخەنە خزمەت هەڵپە و تەماعی سیاسییەوە، ئەو مەلایەی لەسەر مینبەر  ئەگری و دواتریش داوای دەنگمان لێ ئەکات ، ئەوە گەورەترین بازرگانە بە ئایین و گەورەترین یاریکەرە بە سۆز و هەستی کەسانی ئیماندار، لە هەمانکاتدا گەورەترین نەخشەسازە بۆ فاسیدکردنی هۆشیاری مرۆڤی مسوڵمان،چونکە مەسەلەی سیاسەتکردن و دەنگ و هەڵبژاردن مەسەلەیەکی تەواو دنیەوییە و ، پەیوەستە بە رادەی پێشکەشکردنی خزمەتگوزاری و دابینکردنی ژیانێکی باشتر و سەلامەتتر بۆ هاوڵاتیان، نەک مەسەلەیەکی ئایینی بێت  و بە قیامەت و حەشر دەنگدەران بترسێنێت لە پێناو بەدەستهێنانی دەنگ بۆ حزبێکی سیاسی ، ئەمەش کۆشپی راستەقینەی بەردەم  بوونی یەکگرتوە  بۆ بوونی بە حزبێکی  مەدەنی هاوچەرخ، هۆکاری سەرەکی مانەوەیە لە فۆرمە عەرەبییە ئیخوانییەکەدا کە سیاسەت وەک ئەرکێکی ئایینی تەماشا ئەکات و، خودی ئایینیش بە ئامراز و بنچینەی سیاسەتکردن لەقەڵەم ئەدات ، هەر ئەمەش وایکردوە ژمارەیەک لە سەرکردە بەرجەستە و رۆشنبیرە جدیەکانی یەکگرتوو رەخنە لەمە بگرن و هەوڵی ئەوە بدەن یەکگرتوو چیدی بەم فۆرمە کارنەکات، چیدی ئەم فۆرمە ئیخوانییە عەرەبییە لە سیاسەتکردن کۆتایی پێبهێنن و، نزیک ببینەوە لە فۆرمی دادوگەشەپێدانی تورکی، یان لە فۆرمی ئیسلامی مالیزی، یان بە لایەنیکەمەوە لە دادوگەشەپێدانی مەغریبی و وابکەن رۆڵی ئیسلام لە ناو یەکگرتوودا  رۆڵێکی ئەخلاقی بێت نەک سیاسی،  ئایین ئامرازی تەوزیفی سیاسی و کەرەستەی شەڕە سیاسییەکان نەبێت،  ئەبوبەکر عەلی ئەندامی مەکتەبی سیاسی یەکگرتوو دەڵێت(( کە باس لە ئەزموونی  ئیسلامی عەرەبی ئەکەین مەبەستمان ئەوەنییە کە ناتوانریت هیچ سودێکی لێوەربگیرێت و بە تەواوی رەتی بکەینەوە، بەڵکو دەمانەوێت بڵێن واقعی کوردستان و گەشەکردنی کاری سیاسی لایەنە ئیسلامییەکان لە داهاتوودا و ، لوژیکی سەردەمەکە و،گۆرانە خێراکان و هەڵسەنگاندنی ئەزموونە مەیدانییەکان لێمان دەخوازن ئەو نموونە نەکەین بە پێشەنگی خۆمان و رۆڵی خولگەیی لە بیرکردنەوەماندا نەبێت)) لا 10 دواتر بۆ بەهێزکردنی قسەکانی و بانگشەی بۆ تێپەراندنی فۆرمە عەرەبییە ئیخوانییەکە  نموونە بەهەوڵەکانی د موحسن  عبدالحمید ئەهێنتەوە و دەڵێت ئەو((پێی وایە هەڵبژاردنەکانی 7/3/2010ی ئەنجومەنی نوێنەرانی عێراق خستییەروو کە تێگەیشتنی ئیخوانیانە بۆ کاری سیاسی بە دەردی واقیعی عیراق ناخوا))1 پاشانیش بەرێز ئەبوبەکر عەلی داوای لێکردنەوەی پاشگری ئیسلامیش ئەکات(( من یەکێکم لەو خاوەن بیر و سیاسییە ئیسلامیانەی چەندین ساڵە داوای لێکردنەوەی ئاوەڵناوی ئیسلامی لە هێزە ئیسلامییەکان و لە پێشەوەی ئەوانیشەوە لە یەکگرتووی ئیسلامی کوردستان دەکەم و ئێستاش لەسەر هەمان داوام سوورم))2 جگە لەمە سەرکردەکانی دیکەی باڵی ریفۆرم لە یەکگرتوودا بەشێوەی جیاواز پرسی لەم شێوەیەیان وروژاندوە.

لێرەدا پرسیاری گرنگ ئەوەیە ئەم بانگەشانە بۆ ریفۆرم و دەرچوون لە فۆرمە ئیخوانییە عەرەبییەکە لە شەشەمین کۆنگرەی یەکگرتودا بە کوێ گەیشت؟ هەوڵەکانی کۆتاییهینان بە مامەڵەی بەرژەوەندخوازانە لەگەڵ ئایین و تەوزیفکردنی ئایین بۆ بەرژەوەندی سیاسی چی لێهات؟ تا چەند ئەم کۆنگرەیە  توانیتی ریفۆرم بەرجەستە بکات و گوێ لە خواستی سەرکردە ریفۆرمخوازەکان بگرێت و تێزەکانیان بە هەند وەربگرێت؟

بەهەڵسەنگاندنێکی خێرامان بۆ شەشەمین کۆنگرەی یەکگرتوو ئەگەینە ئەو باوەڕەی کە کۆنگرەی یەکگرتوو کۆنگرەی شکستپێهێنانی رەوتی ریفۆرمخوازی بوو، کۆنگرەی کوشتنی ریفۆرم بوو، کۆنگرەی  تۆخکردنەوە و پێداگیری بوو لەسەر شێوازی کاری ئیخوانی و بە سیاسیکردنی ئیسلام و بە ئیسلامیکردنەوەی تاک و کۆمەڵگا، جەختکردنەوە بوو لەسەر پرۆژەی ناسنامەی ئایینی لە کاری سیاسیدا نەک ناسنامەی نیشتیمانی، دەکرێت بۆ روونکردنەوە و شیکاری پێویست بۆ ئەم مەسەلەیە سەرنجی ئەم چەندخاڵە بدەین 

یەکەم: لێدانێکی کوشندە لە رەوتی  ریفۆرم:

یەکێک لە ناوەرۆکە گرنگەکانی شەشەمین کۆنگرەی یەکگرتوو لێدان بوو لەو باڵەی داوای جۆرێک لە ریفۆرم و پێداچوونەوەی هەیکەلی کارگێری و جیاکردنەوەی دەعوە و تەنزیم و هەندێکجاریش لێکردنەوەی پاشگری ئیسلامی ئەکرد لە ناوی حزب، ئەم رەوتەی ناو یەکگرتوو لە چەندین بۆنەدا و بەتایبەت لە کۆنفراسی پێشووی یەکگرتوودا ئەم پرسەیان بە جددی هێنایە ئاراوە، بەڵام لە شەشەمین  کۆنگرەدا بە توندی  لێیاندرا و بێدەنگ کران، بەرێز ئەمینداری پێشووی یەکگرتوو لە راپۆرتی خویدا  هێرشی توندی کردە سەر ئەم رەوتە، ئەمینداری پێشوو بوونی ئەو رەوتەی وەک یەکێک لە گرنگترین ئاستەنگ و گرفتەکانی خولی پێنجەم ناوزەد کردوە و ، لە ژێر ناوی  (( گرنگترین ئاستەنگ و گرفتەکانی خولی پێنجەمدا) بەمشێوەیە ئەم ئاستەنگە( کە بوونی دەنگ و رەوتی ریفۆرمخوازییە) دیاری ئەکات(( سەرنەکەوتنی کۆنفراسی مایسی 2010 لە پێکانی ئامانجەکانی و بوونی بە سەرەتای کردنەوەی هەندێک کێشە و گرفت و بوونی بە رزقی رۆژنامەگەر و دڵخۆشکردنی ناحەزان کە ئەگەر بە سنگفراوانی و حیکمەت ئیدارە نەکرایە ئەگەری قەیرانێکی ناوخۆیی لێ چاوەڕوان ئەکرا؟)) ئەم دەستەواژەیە لێدانێکی روون و ئاشکرا بوو لە رەوتی ریفۆرم و سەرکردەکانی،  ئێمە نازانین چۆن و بە چ پێوەرێک ئەو کۆنفراسە سەرکەوتنی بەدەستنەهێنا؟ ئایا لەبەرئەوەبوو لەو کۆنفراسەدا بۆ یەکەمجار بەراشکاوی باس لە ئاڵوگۆڕی دەسەڵات کرا لە نێو یەکگرتوودا؟ یان لەبەر ئەوەی ویسترا فۆرمە عەرەبییە ئیخوانییەکە لە کاری سیاسیدا تێبپەرێنریت و پاشگری ئیسلامی لە ناوی حزب بکرێتەوە؟ یان لەبەر ئەوەبوو  بەشێوەیەکی ئاشکرا و روون خواستی جیاکردنەوەی دەعوە و تەنزیم خرایە روو ؟ یان لەبەرچی بوو؟  پاشانیش دەستەواژەی دڵخۆشکردنی ناحەزان دەستەواژەیەکی دروست نییە، تۆ لەناو  پرۆسەیەکی سیاسیدایت و کۆمەڵێک رکابەری سیاسیت هەیە و ئەتخویینەوە، کۆمەڵێک چاودێر و توێژەریش هەیە کە دید و هەڵسەنگاندنی تایبەتییان بۆ چالاکی و کۆنگرە و دیدی پارتە سیاسییەکان و کۆمەڵگای مەدەنی هەیە، ناکریت بە ناحەزان ناوببرێن، دەستەواژەی ناحەزان پتر لەو دیدگایەوە نزیکە کە بەردەوام دوژمنی وەهمی دروست ئەکات و، بەهۆی ئەو دوژمنانەوە دەرگا و ماڵی دا ئەخا و هەموو شوێنەکان بە تاریکی ئەهێڵێتەوە، بەردەوام باس لەوە ئەکرێت کە کۆمەڵێک ناحەز هەیە پێویستە دڵمان پێخوش نەکەن و، ئەمەش هەم وەک پاساوێک بەکاردێت بۆ سەرکوتکردنی ناڕەزاییە ناوخۆییەکان و، هەمیش  بۆ نەهیشتنی شەفافییەت و هێشتنەوە باس و گفتوگۆکان لە تاریکیدا، ئەم تێزەی ئەمینداری یەکگرتوو کە وا وێنای دنیا ئەکات کە کۆمەڵێک ناحەز هەمیشە گەمارۆیانداوین و چاوەڕێ ئەکەن دڵمان پێخوش بکەن ، کاریگەرییەکی خراپی لەسەر شعور و هەستی ئەندامانی یەکگرتوو دروست کردوە  بەو ئاراستەیەی هەموو دەنگ و خوێندنەوەیەک لە بۆ یەکگرتوو بکرێت بە دژ و ناحەز لەقەڵەم ئەدەن و کاردانەوەی توند نیشان ئەدەن.

جگە لەمە، ئەمیندار یەکگرتوو لە راپۆرتەکەی خۆیدا هەر لە باسی گرفت و ئاستەنگەکانی خولی پێنجەمدا، پتر لەسەر ئەم باڵە ریفۆرمخوازییە ئەوەستی َ و رەخنەیان ئەکات(( گواستنەوەی پرسی پەیوەندی نێوان دەعوەو سیاسەت وەک بڕیارێکی سیاسی و شیکردنەوەیەکی فیکری بۆ ئاستی خوارەوەی ریکخستن و سەرقاڵکردنیان بەو باسەوە کە نە ئەوان بەرپرسن لێی و نە لای ئەوان چارەسەر دەکرێ)) ئەم دەستەواژەی ئەمینداری پێشوو  لێدانێکی دیکەی  رەوتی ریفۆرم بوو، هەر لە بنەڕەتەوە پۆلێنکردنی باس و خواسی پەیوەندی نیوان دەعوە و سیاسەت و بانگەواز بۆ جیاکردنەوەیان لە خانەی گرفت و ئاستەنگەکان؛ ئەو مانایە بە دەستەوە ئەدات کە وروژاندنی ئەم باسە ئاستەنگ و گرفتە و وروژێنەرانیشی دروستکەری ئاستەنگ و گرفتن بۆ یەکگرتوو، بەتایبەت کاتێک ئەم تێزە لای ئەندامانی خوارەوە شیکردنەوەی بۆ بکرێت،  لە راستیدا ئەگەر ئەمینداری پێشووی یەکگرتوو  لانیکەمی باوەڕی بەوە هەبوایە کە پێویستە پێداچوونەوە بکرێت بە پەیوەندی نێوان دەعوە و سیاسەت  و لەبارەیەوە گفتوگۆ پێویستە، ئەوا ئەو گفتوگۆیانەی لە خانەی گرفت و ئاستەنگدا  پۆلێن نەئەکرد، بەڵکو پێویست بوو کە ئەو گفتوگۆیانە وەک خاڵێکی گەش وێنا بکات کە یەکگرتوو جیاوازی فیکری و تیۆری تێدایە، بەڵام بەهۆی باوەڕنەبوونی بە بوونی جیاوازی  ئەمە بە گرفت و ئاستەنگ بە ئەندامانی کۆنگرەی یەکگرتوو ئەناسێنێت، پاشانیش بۆ ئەبێت ئەندامانی یەکگرتوو (یان وەک ئەمینداری پێشوو دەڵێت ئاستەکانی خوارەوە) بێبەش بکرێن لەو گفتوگۆیانە، لە کاتێکدا ئەوان ئەندامی حزبن و مافی گفتوگۆیان هەیە لەمەڕ هەموو ئەو پرسانەی پەیوەندی بە ژیانی سیاسی و فیکری حزبەوە هەیە،  مافی ئەوەیان هەیە لەمەڕ کێشەکانی نێو حزب و ژیانی سیاسی بەگشتی عەقڵ و هزریان بەکار بهێنن و داوای ئەرگۆمێنت و مونازەرە لە هەموو لایەن و دیدگا جیاوازەکانی نیو حزب بکەن، یان مەسەلەکە ئەوەیە ساڵەهای ساڵە ئەندامانی یەکگرتوو بەو پەروەردە کلاسییکییەی قوتابخانەی ئیخوان پەروەردە ئەکرێت و، ئێستا باس و خواسێکی جیاواز ببیستن یان ببینن رەنگە توشی شۆک یان کاردانەوەی چاوەڕواننەکراو ببنەوە..  ئەوە پاساوێکی بەهێز نییە لەبەر ئەوەی چارەسەری کێشەکە لە دەستی خوارەوەدا نییە ئیتر ئەبیت لایان باسنەکرێت و بۆیان شینەکرێتەوە، ئەمە هێمایەکە بۆ فەرامۆشکردنێکی مەترسیداری خوارەوە ، بەجۆرێک تەنها ئەرکیان گوێرایەڵی بڕیارەکانی سەرەوەیە نەک شیکردنەوەی و گفتوگۆی پرسەکانی پەیوەست بە حزبەوە.

ئومێد قەرەداغی

سەرچاوەکان:

 

1) ئەبوبەکر عەلی، لە کلتوری جەماعەوە بەرەو حیزبێکی پاشخان ئیسلامی هاوچەرخ، لە بڵاوکراوەکانی سەنتەری نەهری بۆ لێکۆڵینەوەی فیکری و سیاسی، چاپی یەکەم ، 2011، ل 29

2) هەمان سەرچاوە و لاپەرە

 

Previous
Next

Leave a Reply