Skip to Content

Tuesday, January 19th, 2021

له‌كوێڕای لانه‌كه‌ت ده‌نوی … ستار ئه‌حمه‌د

Be First!
by May 3, 2013 هۆنراوە

 

 

 

 

ئاگر سنگتی داگیرسان

دڵت…

سارد…

سارد…

سارد…

وه‌ك گیرفانی..

ئه‌و كراسه‌ی،

په‌نجه‌كانت..

بۆ ژماردنی گڕ،

تێدا گڕده‌دا.

چێژت ..

له‌نه‌سیمی،

خه‌نده‌كان وه‌رده‌گرت.

راست…

دارێكی ئه‌زموون بووی.

گه‌ڵات به‌زه‌یی،

به‌رت قه‌قنه‌س،

به‌ژنت پێكه‌نین و

به‌یانیت به‌سه‌را ده‌باری.

گه‌رداوت ده‌خوارده‌وه‌..

مه‌ییت یارمه‌تی،

مه‌زه‌ت ده‌سگرتنی

هاوڕێیان بوو.

رۆیشتی…

دووكه‌ڵێك، 

شه‌پۆلی ئاو،

تراویلكه‌یه‌ك خۆر،

به‌ردێك حه‌سره‌ت،

بۆهه‌ستیاری هزرت،

ده‌ریایه‌كی بزه‌ن.

له‌ئاستی بێده‌نگی،

سره‌وتن له‌ماڵ،

بردن بۆشار،

سه‌فه‌ربێئاو،

مه‌له‌ ده‌نگی غوربه‌ت،

چاوه‌ڕوانی نه‌غمه‌ی هاوژین،

بزربوون، 

سه‌فه‌ری ژێر ورژمی،

ئاخێكی هاوسه‌رتن.

بردتیان به‌ره‌و گه‌زۆی به‌هه‌شت..

خواردتیان له‌بری سوێسكه‌ی لوتكه‌،

نه‌هاتییه‌وه‌..

واتده‌خواست..

بۆ خۆزگه‌ی ،

ده‌سله‌ملانی ئاشته‌وایی.

تۆڕێك له‌هاژه‌،

ئاسمانێك بۆئه‌ستێره‌،

خێزانێك بۆ بێده‌ربه‌ستیت،

كرده‌ سه‌ربه‌رستی قه‌ڵه‌م.

زمانی ئاڵوو 

چه‌ندایه‌تی ئه‌مدیوو 

ئه‌و دیوت پاڵاوت،

زانیت ئه‌م عه‌شقه‌ت ،

بۆگوڵه‌ ئه‌ستێره‌،

له‌خوار به‌ده‌نی گڵه‌وه‌ ،

چۆن ده‌ژی.

به‌فامبووی…

له‌ژانی خورپه‌،

شكانی باده‌م،

سووتانی داو،

پژانی خه‌نه‌ی به‌هارو

داماڵینی كه‌ژی دار ، له‌خه‌زان،

كه‌وتنی ناوكۆكه‌.. 

له‌ته‌مه‌نی ره‌گ، 

كوژرانی دڵ..

له‌توانه‌وه‌ی زمان،

بنبڕكردنی  هزر، 

له‌پشكنینی ئاكام، 

بڕینه‌وه‌ی گه‌ردن،

له‌گیرفان،

سڕینه‌وه‌ی  په‌نجه‌.. 

له‌نه‌خشه‌ی ده‌ست.

هه‌ڵسانی ترپه‌ی دڵ.. 

له‌خرۆشانی خوێن،

كڕینه‌وه‌ی ئازادی.. 

له‌شه‌هیدی هه‌ڵه‌بجه‌،

ئه‌نفال و

برینی بتوێن.

رۆیشتی.. 

خاڵێك له‌ناونیشانمان.. 

كه‌وته‌ خواره‌وه‌،

ژماره‌یه‌ك له‌پیرۆزی..

بووه‌ گه‌ردیله‌،

تابووتی نارنجۆك،

لانكی ئاوو

فه‌وتانێك..

له‌ره‌حمی دایك،

بووه‌ مناڵ،

ئاشووبێك له‌دووت..

زاده‌ی ئاوی كرده‌ هه‌ویر.

سه‌فه‌رت خێر..

چوویت بۆدورگه‌یه‌ك دوور.

بنوه‌ چاوه‌كانت داكه‌نه‌،

ئه‌ڵقه‌یه‌ك له‌ئاو..

به‌نووكی پێنووسه‌كه‌ت دیاریبكه‌،

نیگا مه‌كه‌..

برۆكانت هه‌ڵده‌وه‌رن،

گلێنه‌كانت ده‌ته‌قنه‌وه‌.

ئێسكه‌كانت ده‌پووكێنه‌وه‌.

چۆن چوویت؟

به‌باڵ، 

یاخود به‌سواری شنه‌ی با؟

ئاسمان به‌ئه‌ستێره‌ بسپێره‌..

خاك به‌ژان،

ژیان بۆ فرمێسك جێبهێڵه‌،

ناتبینمه‌وه‌..

بینین له‌هه‌واره‌كان وه‌رناگری.

ده‌سته‌كانم نابنه‌ سایه‌ت،

سێبه‌رێك راناچه‌نێ‌ بێكۆشت.

بنوه‌…

خه‌ون به‌عه‌شق بسپێره‌،

گڵ به‌خاك و

داره‌كان به‌لقه‌كانیان.

ره‌نگه‌ ئه‌ندێشه‌ به‌رۆكت نه‌دڕێ‌،

ئیتر شه‌پۆله‌كان.. 

به‌سه‌رتا نه‌ده‌نه‌وه‌.

به‌تینوێتی..

رووت له‌ئاودا بتشارنه‌وه‌.

نه‌كه‌یت ده‌ست له‌شه‌پۆل هه‌ڵگری.

له‌كوێڕای لانه‌كه‌ت ده‌نوی..؟

رووباره‌كان ده‌زانن..

یاقووته‌كان گه‌مه‌ت له‌گه‌ڵدا ده‌كه‌ن،

هه‌ناسه‌كان ده‌تخۆن،

گه‌ردیله‌كانت..

ئاو له‌لێوت ده‌سوون..

ئارامبه‌…

ئا.ئا.را .را.م

 

Previous
Next

Leave a Reply