ماکرۆچیرۆک …خه‌وێکی سه‌یر … جوتیار
له ئێواره‌یه‌کی ناوه‌ختدا، کات به‌ره به‌ره خۆڵه‌مێشی ده‌بوو،به ڕیکه‌وت ڕێگات که‌وته به‌رده‌م ده‌ستفرۆشه عاره‌بانچیه‌کانی بازاڕی گوڵچین،چه‌ند پیاوێکی به‌ساڵداچوو ک‌ه شێوه‌یان له به‌ردی هه‌ڵکه‌ندراو ده‌چوو له به‌رده‌م عاربانه‌کانیان وه‌ستابون ، هه‌موویان نیگایان له‌سه‌رت گرمۆڵه کردبوو و تۆش هه‌ستت به هیچ شتێکی ناوازه له خۆتدا نه‌ده‌کرد،.. کاتێک ویستت به‌ره‌و ڕووی منداڵه رۆژنامه فرۆشه‌کان بچی بۆ ئه‌وه‌ی چه‌ند ڕۆژنامه‌یه‌ک بکڕی ، هه‌موویان به جارێک رایان کردو عاربانه‌‌و شوێنی کاره‌کانیان جێهێشت،
ئه‌و ڕوداوه هیچ جێگای سه‌ر سوڕمان نه‌بو بۆت..!!
له پڕ منداڵیکی حه‌وت ساڵانه به لاتدا تێپه‌ڕی و زۆر به هێواشی پێی گوتیت … گه‌وره‌م ئه‌م منداڵانه ئه‌ترسن لێت ، چونکه تۆ به وه‌زیره عینه‌ک ڕه‌شه باڵابه‌رزه‌که ناسراویت له ناو رۆژنامه‌کاندا..
14.01.2008
