Skip to Content

Thursday, March 28th, 2024
من ئیتر بە چاوەكانی ئاو دەڕوانم….ناڵە حەسەن

من ئیتر بە چاوەكانی ئاو دەڕوانم….ناڵە حەسەن

Closed
by December 27, 2008 ئەدەب

 من ئیتر بە چاوەكانی ئاو دەڕوانم
 ناڵە حەسەن

   Nala_hassan@yahoo.ca
 
 من لە مەودوا   
 لە نێو خەیاڵ و
 لە نێو ووڕێنە و وشە و نیگارە شیعرییەكانم دا
 بە چاوەكانی ئاو دەڕوانم
 نەبادا ,
 سووتانی پەنجەی منداڵێكی نیشتیمانم لە بیربكەم
 نەبادا ,
 شەپۆڵێك , هاوارێك , ڕاسانێك
 ژانێك , گریانێكی
 مرۆڤە برسیەكانی نیشتیمانم لە بیربكەم
 نەبادا ,
 ونبوونێك , مردنێك , دڵتەنگیەكی
 عاشقانی نیشتیمانم لەبیربكەم
 نەبادا ,
 سەرخۆشبوونی پەپوولەیەك
 بێهۆشبوونی باڵندەیەك
 ڕەشهەڵگەڕانی گەڵای درەختێكی نیشتیمانم
 لە بیربكەم
 نەبادا ,
 چرپەیەك , هەناسەیەك ,
 بزەیەكی سەر ڕوخساری
  شەقامێكی پاییز و
 وەرزەكانی تری نیشتیمانم لە بیربكەم
 نەبادا ماسیەكی فەرامۆشكراوی
 نێو چەم و ڕووبار و دەریاچەیەكی نیشتیمانم
 لە بیربكەم
 نەبادا ,
 شەوێك لەو شەوانەی
 كە مانگ بیر لە خۆكوشتن دەكاتەوە
 یان ,
 كۆڵانێك لەو كۆڵانە تاریكانەی
 نێو ڕۆحە بریناوییەكەی
 ئەو ژنانەی
 بەر لە چركەكانی خۆسووتاندن , لە بیربكەم
 نەبادا ,
 تابڵۆیەك لەو تابڵۆیانەی
 خوێن و نەفرەت و فۆبیای
 نێو نیگا و سیما بەفریناوییەكەی
 مرۆڤەكانی نێو لم و بیابانەكان , لە بیربكەم
 
 من لە مەودوا
 لە نێو پیاسە و سەفەر و گەڕانەكانم دا
 بە چاوەكانی ئاو دەڕوانم
 نەبادا ,
 بەفرانبارێك دیار نەمێنێ لە زەمەن دا
 باخچەیەك بمرێت لە سروشت دا
 ڕەنگێك بریندار بێت
 لە نێو ڕووبەرەكانی جوانی دا
 نەبادا ,
 مۆمێك بكوژێتەوە
 لەنێو ژوورەكانی
 زیكر و سەما و تێكئاڵان و جووتبوون دا
 نەبادا ,
 حەرفێك , وێنەیەك
 بسڕێتەوە
 لە نێو دیوانە شیعرییەكانی عەشق دا
 نەبادا ,
 باران و تاڤگە و قەقنەسەكان
 بەفر و خاك و پنجەگیاكان
 گۆرانی و ویقارە وەهمیەكانی خۆیانیان
 بیربچێتەوە
 نەبادا ,
 شۆڕەبی و شەهلایەك
 ڕەیحانە و ڕێواسێك
 سنەوبەر و سەوسەنێك
 ناز و لەنجە و عیشوە ڕۆژهەڵاتیەكەی خۆیانیان
 بیربچێتەوە
 نەبادا ,
 بێدەنگی سپێدەیەك
 خنكانی ئێوارەیەك
 مەستبوونی درەنگەشەوێك
 دەرنەكەوێت لەنێو بازنەی كاتژمێرەكانی
 نێو ژوورەكانی غوربەت دا
 نەبادا ,
 بێڕەنگبوونی خوێنی نێو دەمارەكانی ئەستێرە و
 بێدرەختبوونی گۆڕستانەكانی نێو مەملەكەتی گەردەلوول
 لە نێو توانەوەی مۆمی
 نێو شەوەكانی لەدایكبوونی شەونم دا مانبگرن
 نەبادا ,
 پەپوولەیەك نیگەرانیەكانی
 شكۆفەی گوڵەباغێك
 نەناسێتەوە
 ڕێبوارێك بە تەنیشت بیستانێكی سەربڕاودا
 ڕەتببێ و
 ئاورێك لە بە خۆڵەمێشبوونی
 پەڕوباڵی كۆترەكانی زەمەن نەداتەوە
 نەبادا ,
 شەپۆڵە خەواڵووەكانی دەریا
 چیتر گوێ لە ژانە تیشكە لەبارچووەكانی
 هەتاو ڕانەگرن
 نەبادا ,
 بوومەلەرزەی نێو دارمەیتی كیشوەرەكان
 لەگەڵ زەردهەڵگەڕانی گوڵەگەنمەكانی بەهار
 سڵاوێك لە یەكتری نەكەن
 
 من بە چاوەكانی ئاو دەڕوانم
 ئەودەمانەی كاسە و پیاڵەی
 شەڕابی عەشق و خۆشەویستیمان
 پڕدەبێ لە حەسرەتە پەمەییەكانی
 بنار مەمكۆڵە گەرمەكانی یار
 مانگەشەوە سەرخۆشەكەی
 سەرلێوە قورمزیەكەی ئاگر
 شوێنپێی ماچەكانی
 گوڵە هەنارەكانی هەور , ناناسێتەوە
 ئەو سەحەرانەی
 بوخچەی غەریزە تەڕەكانی
 بنار مەمكۆڵە گەرمەكانی یار
 لەنێو زەردەپەڕی ئاوێنە ئیرۆسیەكان , ناكرێنەوە
 ئەو شەوانەی
  ئایەتەكانی عەشق
 لەنێو مەجلیسی ژێر ڕەشماڵی
 بنار مەمكۆڵە گەرمەكانی یار
 ناخوێندرێنەوە
 ئەو دوای نیوەڕۆیە فێنكانەی
 كانیە بەهارییەكانی
 بنار مەمكۆڵە گەرمەكانی یار
 دەنگیان دەنووسێ و
 گۆرانی بۆ پێدەشتە تێنووەكانی
 جەستە شەقار شەقار بووەكەی
 نێو ڕۆحی من ناڵێنەوە
 
 من ئیتر بە چاوەكانی ئاو دەڕوانم
 نەبادا ,
 شنەبایە شینەكانی عەشق
 لە نێو باڵكۆنی غوربەت دا لە بیرم بكەن
 كۆڵارە كۆچەرییەكانی چارەنووسیش
 لەسەر پشتی خۆیان هەڵم نەگرن
 بەرەو خەمە سپیەكانی
 بنار مەمكۆڵە گەرمەكانی نیشتیمانم
 نەمبەنەوە … !                                                     
 
                                                          كەنەدا : سەرەتای ئۆگستی 2008
 
 

Previous
Next
This site is registered on wpml.org as a development site.