Skip to Content

Thursday, March 28th, 2024
من له‌وێم…پێویست به‌هاتنم ناكا …!

من له‌وێم…پێویست به‌هاتنم ناكا …!

Closed
by November 20, 2011 ئەدەب

پێویست ناكا بدوێم
ئه‌م چه‌ند وشه‌یه‌
ناو مه‌نێ‌ په‌یڤین
ڕووخسارم خۆی
نیگاری بێهووده‌یم ده‌كێشی
هیچ پێویست ناكا
هانكه‌هانك
دڵنیایی بده‌مه‌ هیلاكی فه‌رامۆشكراوم
قاچه‌كانم خۆیان
وڕێنه‌ی هاتنم كورت ده‌كه‌نه‌وه‌
ئه‌و چۆڵه‌وانییه‌,
ئه‌و چۆڵه‌وانییه‌ی…
به‌ئێسك ودره‌خت شینبووه‌
به‌ئازایه‌تییه‌كی ترساو
به‌ئازادییه‌كی نیگه‌ران
به‌ته‌م ویاقووت گه‌مارۆ دراوه‌
هه‌رله‌م غه‌ریبییه‌ی من دێ‌
ئه‌م ئاوه‌دانییه‌
خاپووری ده‌سته‌مۆی كردووه‌
كووچه‌و كۆڵانه‌كانی پڕن له‌نووستنی ده‌نگ
كه‌ده‌لیلی پشووی خامۆشییه‌
له‌ بێبه‌هابوونی شكۆفه‌ی روحدا
كه‌شتیگه‌لێكه‌ بۆ گواستنه‌وه‌ی باڵنده‌ی خه‌واڵوو
بنواڕه‌ چۆن داهات بۆ نقووم بوون كۆده‌كاته‌وه‌..؟
سه‌یریكه‌ چۆن ده‌ڕمێ‌..!؟
تا فڕین ببه‌خشێته‌ وه‌چه‌ی داهاتوو
تاكو بێداری بداته‌وه‌ به‌ زه‌نگ
ئاخر ئه‌م ئاوه‌دانییه‌
وه‌حشه‌ت ده‌یكێڵێ‌
تاریكی چاندوویه‌تی
سه‌رئه‌نجام
هه‌رده‌بێ‌ خۆر
به‌سه‌ریا بچه‌مێته‌وه‌
ڕۆشنایی كرنووشی بۆبه‌رێ‌
چاوه‌رێی بووژانه‌وه‌ی هه‌نگاوه‌كانم مه‌كه‌
قامكه‌كانم له‌وێن
شوێن په‌نجه‌م به‌سه‌ر خوێنته‌وه‌ دیاره‌
به‌ته‌مای نووژه‌نبوونه‌وه‌ی ژوانت نیم
چوون هاتنت قورسه‌قورس
وه‌كو هاتنه‌وه‌ی ناوونیشانی به‌رخێك
له‌نێو حیكایه‌ته‌كانی قه‌ڵای گه‌له‌گورگێكدا
هاتنه‌وه‌ت سه‌خته‌سه‌خت
وه‌ك گه‌ڕانه‌وه‌ی
ئه‌و گۆرانییه‌ی
هه‌روه‌كو موورو كه‌وته‌ ژێر زه‌ریا
رۆژه‌كانی من له‌كه‌دارن
سه‌ربه‌ئێوارانی پێنجشه‌مه‌ی خه‌مبارن
له‌گه‌ڵ كێله‌كان گوڵ و ناوونیشان  ده‌گۆڕنه‌وه‌
به‌شداری زه‌ماوه‌ندی مردووه‌كان ده‌كه‌ن
سپێده‌كانی من
خل ده‌بنه‌وه‌ نێو جۆگای ساڵه‌كان
ئه‌وه‌تا,
سه‌عاته‌كانی من
ژه‌نگ توینێتی چه‌ورییان ده‌شكێنی
خه‌نجه‌ره‌كه‌م بۆبه‌زین هه‌ڵكێشاوه‌
شانه‌ی ئه‌م تفه‌نگه‌ بۆماوه‌م
پڕه‌ له‌فیشه‌كی خۆبه‌ده‌سته‌وه‌دان
نیاز لێم زیزه‌
جارێكی تر بگه‌ِرێیته‌وه‌ ناو دۆڵابی رۆژمێره‌كه‌م
هه‌ركاتێك هه‌وه‌سی بینینت بمبزوێنێ‌
دیدارت بیه‌وێ‌ راڤه‌م كا
ده‌چمه‌ به‌رده‌م ئاوێنه‌
شوێن پێت به‌سه‌ر دڵمه‌وه‌ جێماوه‌
سڵ مه‌كه‌ره‌وه‌
له‌خوێنی ڕژاوی مۆری ڕیشاڵی ئه‌ڤین
مه‌ترسه‌
ده‌وران ده‌ورانی شۆرش وجه‌نگه‌
جه‌نگ له‌ئاشتی زیاتر سه‌رقاڵی كردووین
دوكانه‌كان هه‌موویان داخران
له‌بازاڕ
گوڵ فرۆشێك نه‌ماوه‌ته‌وه‌
شووشه‌یه‌ك خه‌نده‌
گۆزه‌یه‌ك تریفه‌
قوومێك روناكی
له‌تێك مانگ
پاروویه‌ك خۆشبه‌ختی
چه‌ند ئه‌ستێره‌یه‌كی زێرینی لێبكڕین
تۆ لێره‌ی
كه‌واته‌ چاوه‌رێی هاتنت ناكه‌م
من له‌وێم
كه‌واته‌ به‌ته‌مای سه‌ردانم مه‌به‌
قه‌یناكا
ده‌با مێژووی رۆژهه‌ڵات
هه‌روا ته‌پ وتۆز
 تووڕه‌یكات

بورهان ئه‌حمه‌د  burhanahmad57@yahoo.com
مانگی(8) 2011

Previous
Next
This site is registered on wpml.org as a development site.