Skip to Content

Monday, September 21st, 2020

هه‌ناسه‌کانی خۆڵ …..عومه‌ر حاجی ده‌ربه‌نی

Be First!
by May 28, 2008 ئەدەب

                                  -1-
                       سینه‌م هێنده‌ ته‌سك بۆته‌وه‌
                              هه‌رچه‌ند ده‌که‌م
                       به‌ به‌ری هه‌ناسه‌ قوڵه‌کانم ناکات
                                       -2-
                       په‌نجه‌کانم دایه‌ دادگای گه‌ستن
                       چون له‌ به‌ستنی قرتیله‌که‌یدا
                       ده‌سکێ پرچی ته‌ڕم له‌ خاچ دا
                                      -3 –
                     گه‌ر چاوی گه‌شێ مناڵه‌ ئه‌نفالێکیان
                               بکردایه‌ به‌ مۆم
                       ماڵ به‌ ماڵی ئه‌م هه‌رێمه‌ تاریکه‌ی
                                ده‌کرده‌ چراخان
                                       -4-
                          حه‌ز ناکه‌م له‌ شوێنت بێم
                               چونکه‌ ده‌ترسم
                        شوێن پێکانت بشێوێنم و
                      ئیتر هیواکانی گه‌ڕانه‌وه‌ت کوێر بن
                                       -5-
                            هه‌تا خۆشه‌ویستیم
                      نه‌خسته‌ چاوی خۆری شیعر
                           نه‌مزانی زێـــــــڕه‌
                                       -6-
                           چاوه‌کانی من و ئاسمان
                        له‌ یه‌ك وه‌رزدا ده‌گه‌نه‌ یه‌ك
                          ئه‌ویش وه‌رزی گریانه‌
                                     -7-
                                بایه‌ك له‌ لم
                           ئاسمانێك له‌ خۆڵ
                         زه‌مه‌نێك پڕ له‌ زوڵم
                          چاوێك پڕ له‌ تاڵانی
                        وێرانه‌یه‌کیان  دروست کرد
                              ناویان نا
                    شاری خه‌ونه‌کان له‌ گه‌رمیان
                                     -8-
                               له‌وه‌ته‌ی هه‌م
               به‌ دوای ته‌زبیحێکی ده‌ستی رۆژدا وێڵم
                      که‌ ده‌ستم ده‌گاته‌ گوڵه‌نگی پرچی
                             له‌ پڕێکا شه‌و دێت و
                      به‌ ده‌ستمه‌وه‌ هه‌ڵی ده‌پروچقێنێ
                                      -9-
                    دڵم له‌ ڕوباری عه‌شقێکا غه‌رق بوو
                          به‌ بێ ڕۆح و به‌ بێ جه‌سته‌
                    تا ئێسته‌ش هیچ ماسیه‌کی خیانه‌ت و
                                قه‌وزه‌یه‌کی دوو دڵی
                              زه‌بریان پێ نه‌بردوه‌                 
                                     -10-
                       پشتمان به‌ پشتی ئاو قایم کراوه‌
                                هه‌تا ئه‌ژنۆمان
                      وه‌ك و نێرگس له‌ مێرگدا نووقم بووه‌
                            ئاو که‌پری سه‌رمانه‌
                          هێنده‌ له‌ ئاوا سه‌مامان کرد
                              پێمان ده‌ڵێن ماسی
                             دیاره‌ به‌ که‌له‌بچه‌وه‌
                        ده‌مان به‌نه‌ سه‌ر به‌نده‌ره‌کان
                              بۆیه‌ له‌ جیاتی لێو
                            لوتمانی تێ ده‌سوین و
                        هه‌میشه‌ خاکی پێکه‌نینمان
                               شه‌قار شه‌قاره‌      
 
 
                                                      
                                                                        به‌هاری 2008   ده‌ربه‌ن
 
                                                 
   
 
 

Previous
Next

Leave a Reply