Skip to Content

Thursday, March 28th, 2024
هەلەبجە  بە باڵی پەپوولەکانی هەڵدەنیشێت و دەچێتەوە ئاسمان

هەلەبجە بە باڵی پەپوولەکانی هەڵدەنیشێت و دەچێتەوە ئاسمان

Closed
by March 15, 2013 ئەدەب

 

 

١

لە نێوان تۆ و برین

ژەهر و لاسکە گیا

سێو و ڕۆژژمێرێکی کۆندا ، هەزاران گوڵە سپیی

بە هەناسەی قەڵەڕەشێک وەرین ،

دەیان شەونمی سەر گەڵا رۆح پەمەییەکان

وشک وشک

کەوتنە نێو گیرفانی حەسرەت و ئازار ، دڵی ڕەنگەکان

هەناوێکی داغ بووی بە قومێ ژەهر

بە سیخە سەهۆڵەکانی زستانی ” شینروێ ” سارد نابێتەوە

 

٢

لە نێوان تۆ و هەناسە گەرمەکانی دایکێک

فرمێسکی منداڵێک و

تابڵۆی ئاسمان و گریانی هەورێک ، هەزاران دەنگ

کپ کپ

کێ کێ کێ ؟ لە ڕوونی ئاو و سیحری تەنیایی ناگات

کێ نازانێ بڵندی “عەنەب ” پڕە لە نێرگز و

سێو چ ڕەنگ و چ بۆن ،

گریانی باوکێک و تەنیایی دایکێک چ کارەساتێک ؟

 

 

٣

لە نێوان خۆم و خۆمدا

دەمەوێت هەر خۆم بم بە تەنها

بەرگی هەموو ڕەنگەکانم لێرە دابنێم ، خۆشم بڕۆم

بەیانی دار سنەوبەرەکان ، بیرەوەرییەکان و کۆڵانەکانم بۆ پڕمەکەن ، ئێوە

نەرگی

گوڵە وەنەوشەییەک

گریانی منداڵێک و

کراسی ڕەشی دایکێکم ، بۆ ژیربکەنەوە

رۆحم شەکەت ، دڵم پڕە لە چاوەڕوانییدا

هەموو ساڵ و مانگ و هەفتە و رۆژ و کاتژمێرێک و خولەکێک و چرکەییەکم

لێ تێپەڕی ، قا قای پێکەنینی مناڵێکیان بۆ نەهێنامەوە

تا ئەو دیو سنور

هەر خۆم و تەنیا هەر خۆم هەناسە ڕەش و سپییەکانم

هەزاران خەون و

هەزاران گوڵە نێرگزەکان دەسوتێنێت

 

٤

کە هەلەبجە هاتەوە چیرۆکەکانی خۆی بۆ نیوەڕۆییەک گێڕاییەوە

پڕ بوو لە بۆن

بۆنی تاریکایی و بۆنی تەنیایی

بۆنی پەپوولە و بولبول و گیژۆڵە ناسکەکانی

خستە گیرفانێک و دای بە شەپۆلەکان

بۆنی پیاوە پیرەکان و پیرەژن و

مناڵ و ژنەکانیشی دا بە تارماییەکانی سێوێک

 

٥

بالابمۆ وتی :

هەزارەها ڕێگەی تر هەن ، پشتم هێشتا هەر ساردە

بهێڵن ئاگرێ تینی بەرم کەوێ ، چی دەبێت ؟

بست بە بستم بەپێییەکانی مناڵان و گەنجان

بشێڵن ، بەلام چۆن ؟

دارێک لقەکانی لە ئاسماندا گریا وتی :

هەڵم مەتەکێنن ، دەستم ناگات بە بیرەوەرییەکان

هێشتا خۆم ڕاهاتووم بەسەر تەرمی گەڵاکاندا

لقەکانم پڕن لە شکان

وەختێک با دێت

دەترسم

گوێم لە گۆرانییەکانی کیژۆڵان نەبێتەوە

بێ ڕەنگی بمهەژێنێت ، بەلام قەڵەڕەشێک قەزوانەکانی خوارد

چەمێ وتی :

بهێلن پێلووی ئاو شەوانە یەکەمین ماچی

بۆ من بێت

نەبادا درەختە بچوکەکانم ، شەکەت بن ، بهێڵن ڕەشبەڵەک بکەن

 

٦

ئێوارەییەک خۆی خستە نێو بەرگێک وتی :

سبەی کام گۆرانیی ئەچریت ؟ تۆ

تەنیا پەنجەکانت بخە نێو گیرفانی ئازارەکانم ، دەسوتێن

پێییەکانت تا ڕێگا ، ڕەشەبا دەبڕێت بڕۆ

پرسیارێک وتی : ئێستاکە بۆم مەگەڕێن

من ئەوەتام لە نێو گەرووی مناڵێکدا مردووم ، بێ وەلامم

هێشتا باڵندەکانم

دەفی زکریان هەڵنەگرتووە ، تا

نێرگزە چاو مەستتەکان تابڵۆیێک پڕ بە هەستەکانم ببینم

سەمفۆنیایێکم بۆ بژەنن ، وەک گەلا کەوتووم

دەمەوێت قومێ ئاوی ئەم بەهارە بخۆمەوە ، پڕم

لە فرمێسک

 

٧

هەلەبجە لە ڕەشەمێدا دێتەوە پڕ بە گەرووی وشکهەڵاتووی دەلێت :

فرمێسکەکانتان بسڕنەوە

بەهێمنی وەرن با عومەری خاوەر و مناڵەکەی و هەزاران رٶحی دیکە لە شیرین خەو ڕانەچڵەکێن

هەمان ئێوارە ، هەزاران پەپوولەی باڵنەخشین لەکانی عاشقان دێن و 

هەلەبجە هەڵەفڕێنن و دەیبەنەوە بۆ ئاسمان 

 

 

٨

دەکرێت هەموو شت بدەینە دەست با . هەڵوەرینی هەناسەی منداڵان و ژنێک لە دەم کانیاوێکدا چ کارەسات و چ گۆرانییەکی غەمگینە ، لە نێوان هەزاران خەونی پڕ ئەستێرە و تریفەیی مانگەشەودا ، سەدای دکتاتۆر تا ئەو پەڕی ئاسمان گوێچکەی خەلکی کەڕ کرد و چاوی جیهانی کوێر کرد

دایکێک بە دەم نانکردنەوە ، کیژۆڵەییەک بە دەم یاریکردنەوە چوون تینووێتییان بە ئاوی چەمەکان بشکێنن ، با هەڵیکرد تا ڕێی ئەودیو ، ڕێحانەکان بێ بۆن مانەوە لە ژێر کراسی دایکێک و پشدێنی باوکێک چەند بە نەرمی مردن

 

 

درود درود بۆ هەلەبجە

 

سیروان خۆشناو

شەقلاوە

 

Previous
Next
This site is registered on wpml.org as a development site.