Skip to Content

Monday, October 26th, 2020

هەندێک جار … نەوزاد بەندى

Be First!

 

 

 

هەندێکجار شیعر تەڵاق ئەدەم ..

ناگونجێین و بڕایەوە ..

ئەو کاتانە ،

تەنانەت دەنگى فەیروزیش پەستم ئەکا ..

تەنانەت ڕەنگى نێرگزیش ..

بۆنى گوڵە باخە پەمەییەکانیش ، پەستم ئەکەن ..

ئەو کاتانە ،

هیچ دیوارێک ، دەرگا و پەنجەرەى نامێنێ ..

هیچ چاییەک ، شەکرى تێدا نامێنێ ..

هیچ ڕوخسارێک پێکەنینى تیا نامێنێ ..

چاو ، خەوى لێ ئەدزن ..

گەدە ، خواردن ..

ئیتر شیعر تەڵاق ئەدەم ..

پاش چەند ڕۆژێک ،

دوو بە دوو ئەچین بۆ لاى ،

مەلایەکى شارەزا ،

تەڵاقەکەمان بۆ چاک ئەکاتەوە و

مەبلەغێکمان لێ ئەسێنێ .. !

*      *       *

شیعر هەیە ناوى نیە ..

سەنەوى و

ژمارە و

ناسنامە و

فۆرمى خۆراک و

کارتى کوتان و

ڕەگەزنامەى نیە ..

وەکو مناڵى دووەم

لە وڵاتى چین .. !

*    *    *

پیاوێک زۆر شانسى هەبوو ..

خزمى زۆر بوو ..

لە هەموو دائیرەیەکدا ،

چاى بۆ بانگ ئەکرا ..

سک چوون نەبووایە ،

ئەو پیاوە بە هیچ شتێک نەدەمرد 

*   *   * 

لە جیاتى گوڵەبەرۆژە ،

ئەمشەو خەممان خوارد ..

چونکە بۆمان دەرکەوت ،

مناڵەکەمان فێرى درۆ بووە ..

میزى کردووە بە خۆیدا ،

وتویەتى : ئاوى فوراتە ..

*    *    *

دەمەو عەسرێکى درەنگ ،

ویستم خۆم بکوژم ..

دواى ئەوەى بۆم دەرکەوت ،

بون و نەبونى من ،

وەک بون و نەبونى سمێڵ وایە لەم سەردەمەدا ..

ئەوەى پەشیمانى کردمەوە ، 

مناڵەکەم بو ،

کە هاوارى ئەکرد :

باوکە! ئێمە حازرین ، بمانبە بۆ سیتى ستار !

Previous
Next

Leave a Reply