Skip to Content

Friday, March 29th, 2024
هەندێک هەقیقەت کە بڕواى پێناکەن

هەندێک هەقیقەت کە بڕواى پێناکەن

Closed

 

 

 شیعر

 

 

 

 

-1- 

کە خێزانم دروست کرد ،

پێیان وتم :

پیر و خەڕۆ بن !!

(ئەو قسەیەم زۆر پێ ناخۆش بوو )

 

-2- 

خودا هیچ دوو کەسێکى دروست نەکردووە

ئەوەندەى باوک و دایکم ،

ڕقیان لە یەکترى بێ .. !!

 

-3-

هەمو ڕۆژێک

بۆ ماوەیەکى دیاریکراو ،

بیر لەو ماددانە ئەکەمەوە 

کە مرۆڤى لێدروست کراوە ..

 

 

-4-

جیاوازى نێوان ئێمە و مێش چیە ؟

هەردووکمان لە دەرگاکانەوە ئەڕۆینە ژوورەوە و

بە خواردنەکانەوە ئەنیشینەوە ..

 

-5-

24 سەعات ،

بەشم ناکات ..

بۆیە لە داخاندا زۆربەى ،

بە خەو بەسەر ئەبەم ..

 

-6-

بە شەقامێکدا پەڕیمەوە ،

لەگەڵمدا ژیان و مردنیش پەڕینەوە ،

پۆلیسى هاتوچۆیشى لێ نەبوو

کەچى هیچ کاممان ئۆتۆمبیل نەیشێلاین

 

-7-

دنیایەک پێشتر موڵکى دیناسۆرەکان بوو بێ ،

نازانم چۆن شیعر جێگاى ئەبێتەوە ؟

 

-8-

هەموومان لە ماڵەوە ،

یەک بەرمیل

یان دوو بەرمیلى بە تاڵمان هەیە ،

بۆ نەوتى زستان ..

کەچى نە بەفر ئەبارێ ..

نە چلورە بە گوێسەوانەکاندا دێتە خوارەوە ..

 

-9-

لە ڕۆژهەڵاتى ناوەڕاست ،

خەڵک لەبەر بێ ئیشى ،

ئەبنە پۆلیس

ئەبنە ڕۆژنامەنوس

ئەبنە نیشتمان پەروەر ..

 

-10-

خێرا کەن ، بچن بۆ سەیران ..

لێرە بەهار 

تەنها ڕیکلامێکى کورتە بۆ  سەوزایی،

لە نێوان وشکە سەرماى زستان و

وشکە گَەرماى هاوین ..

 

-11-

تا لە کرێچێتى ڕزگارم بوو ،

کوڕەکەم توشى ئۆتیزم بو ..

ئێستا ئامادەم ببم بە قەرەج ،

بە مەرجێک ئەو 

چاکبێتەوە ..

 

-12-

جاران یەک گۆڤار و ڕۆژنامە دەردەچوو ،

زۆربەى خەڵک نوسخەیەکى بە دەستەوە بوو ..

ئێستا سەدان ڕۆژنامە و گۆڤار دەردەچن ،

 

تاک و تەرا ،

کەسێک ئەبینیت

گۆڤارێکى بە دەستەوە بێ ..

تومەز خەڵک یەکپارچە بوون بە نوسەر ..

خوێنەرمان نەماوە..

 

-13-

کچان  ناتوانن بە مەزاتخانە و

پێشانگاى ئوتومبیل و

مەیدانى کرێکاران و

ئاسنگەراندا بڕۆن ..

نازانم بۆچى ؟

 

 

-14-

پێش بەروارى لە دایکبونمان ،

ئێمە لە کوێ بوین ؟

لە قۆریەکەى عەلادین ؟

یان لە ئەهرامەکاندا ؟

لەسەر ئەستێرەکان ؟

یان لە بنى دەریاکاندا ؟؟

 

-15-

لەو بڕوایەدام ،

گۆڕى بە کۆمەڵ لە گۆڕى تەنها خۆشتر بێ ..

هەر نەبێ ،

یاریەکى هەڵماقۆ ..

دامە..

سێڕسکێن ، لەگەڵ ئەوانى تردا ئەکەى ..

یان بەلایەنى کەمەوە ،

هەست ئەکەى لە مەجلیسێکدایت و

کارەبا کوژاوەتەوە و

هێشتا موەلیدەى ئەهلى ،

نەهاتۆتە کۆڵانەکەتان ..

 

-16-

دەوڵەمەندێک ،

بە پارەیەکى زۆرەوە ڕۆیشتە ناو دارستان ..

دۆلارەکان شەفاعەتیان بۆ نەکرد ..

شێرەکان خواردیان

ئینجا کەمتیارەکان

ئینجا داڵەکان ..

ئەوەى مایەوە ،

تورەکەیەک پارە بوو

لەگەڵ پەیکەرێک ئێسقان

 

 

 

 

 

 

 

Previous
Next
This site is registered on wpml.org as a development site.