Skip to Content

Sunday, September 20th, 2020

هەڵوەرینی بەفر…. لەتیف فاتیح فەرەج

Comment
by February 27, 2008 ئەدەب

مەرگ کلوە بەفرەکان
لە وەرزی وەرینی گەڵاکانی هەشتاو هەشت دەچێت
وەرزی وەرینی گەڵاکانی گەرمەسێر
وەرینی ئەو گەڵایانەی بەدەم گۆرانی وتنەوە
لە داری ژیان بەربونەوە
بەربونەوەو خەوێکیان بە ژیانەوە نەدی
مەرگی کلوە بەفرەکانی قەندیل
لەم ئێوارە ساردەی نیشتمانا
یادەوەریمان دەباتەوە بۆ لای سالم
بۆ لای پرسیارە تەریوەکانی نالی
بۆ بن دارەکەی شێخ هەباس
بۆ لای نیوە بەیتە یاخیەکەی
“ڕۆمی ئەوەندە شومن لە شەخسیش دەدەن زەرەر”
کی هەواڵی ئەو کلوە بەفرانەمم دەداتی
کە خۆیان بون بەکفنی خۆیان
ئەو کلوە بەفرانەی بەر لەوەی بەهەناسەی دڕکە پۆستاڵ لە پێکان بتوێنەوە
کلو کلو خۆیان دەکوژن
لەم وەرزی وەرینی کلوە بەفرانەدا
خوا بەگۆانیەکانی ئێمە “وەتەن ئاوا ناکا”
گەر نەزانین ئەو هەموو دارەی نیشتمان
بۆچی یەک یەک لەخاچ ئەدرێن
گەر نەزانین
ئەو بەردە بێخاوەنانە تاوانیان چیە
کە چاوی بینینیان لی دەسەنرێت
گەر نەزانین ئەم هەموو گەڵای شەهیدە
تابوتیان لە کوێوە بۆ دێ
وەتەن ئاوا نابێ ئەگەر
شەرەف لەڕستەی بونا فڕێدەینە دەرەوە
وەتەن ئاوا نابێ ئەگەر
ئازادی بخەینە تۆڕی بێدەنگیەوە
وەتەن ئاوا نابێ مەگەر
نە یەڵین کلوە بەفرەکان تەنیا بن
مەگەر
بۆ ئاسکە سەرگەردانەکانی قەندیل
جەستەمان بکەین بە پەرژین
پاڕانەوە لەخوا پاڕانەوە نیە
ئەگەر دەستەکانمان پڕ نەکەین لە بەرد
کێ دەڵی لە هەموو گەڵایەکی وەریودا
چرای چاوی خوایەک ناکوژێتەوە
کی دەڵی لەگەڵ مەرگی هەموو کلوە بەفرێکدا
خوایەک شەهید نابێ.
خوا لە قوڵایی سروشتا هەمیشە لەنێو ئەو بەفرو
گەڵایانەدایە
کە هێشتا بۆنی یەکەمین لەدایک بونی زەویان
لی دێ.
خوا کلوە بەفرو گەڵاکان جێناهێڵێ
ئەو نایەوێ هەتا پای تیایە ڕاکاو
لە دورەوە
لە رێگای شاشەی تەلەفزێونەوە
مەرگی گوڵەکان ببینێ
خوا لەوێیە
لە نێو هەموو کلوە بەفرێکی قەندیلا
گازمان دەکاو دەڵێ وەرن.

سێ شەممە 26/2/2008

Previous
Next

Leave a Reply