Skip to Content

Saturday, December 5th, 2020

وەزیری پشووی هەرێمی کوردستان…سڵاو!

Be First!
by August 25, 2012 گشتی

 

 

رۆژی پشوو ئەو رۆژەیە کە بایەخ و بەهاو ریزێکی تایبەتمەندی خۆی لە لای تاکی کۆمەڵ ، یان کۆمەڵێکی ئایینزا یان  حکومەت هەیەو زوربەی جار فۆرمییە و جاروبارەش نافۆرمییە، بۆ یادکردنەوەو شکۆدارکردنی بۆنەیەکی  ئایینی یان نەتەوەیی یان کەلتوری تەرخاندەکرێ  ، زۆربەی جاریش،  ئاهەنگ و داوەت و فیستڤاڵی تێدادەگێردرێت. مەرج نییە لە رۆژی پشووداندا، کارکردن ڕابگیرێت و هەموو دامودەزگاو فەرمانگەو بازارو قەیسەریەکان دابخرێن، بۆ نموونە پشووی ( جەنوکە) لە لای جولەکەکان  رۆژی ” پشووی کارە”.

میژووی پشوودان زۆر دێرینەو لە پێشینانەوە راستەوخۆ پەیوەست بووە لە گەڵ بیروڕاو رووداوە ئایینییەکەن، لەگەڵ گٶڕانی باری گۆزەرانی خەڵک و سەرهەڵدانی قۆناغی تازە لە هزر و فەلسەفەو ئابوری و سیاسیەت و کۆمەڵایەتی لە کاروانی مرۆڤایەتیدا، شێوازو تقوسی پشوو وجەژناکان گۆڕانکاریان بەسەر داهاتوە. ئێمرۆ پشووەکان بۆ چوار هۆبە پۆلیندەکرێن:

 پشووی ئایینی (وەک پشووی جەژنی رەمەزان وجەژنی قوربان لای مۆسڵمانەکان)؛ پشووی نەتەوایەتی(وەک پشووی نەورۆزو ڕاپەرێن و ئەنفاڵ لە کوردستان)؛ پشووی عیلمانی ( وەک رۆژی ژنان و رۆژی کرێکاران و رۆژی دایک) وە پشووی نافۆرمی( وەک رۆژی ڤەلەنتاین و رۆژی ژینگەو رۆژی پاک وخاوێنی) . رۆژ لەدوای رۆژیش ریزبەندی ناوی پشوو و جەژنەکان لە درێژبووندایە، بۆ نموونە لە ساڵی دوو هەزار بۆ یەکەمین جار لە ئەمەریکا  پشووی( رۆژی مەیمون) دیاریکرا.

رۆژگاری ئێستای سەرمایەدارو ئینتەرنێت  لە ژیانی سەردمی ئیمرۆماندا زۆر هەستارو ئاقڵانەو  جەژن و پشووەکانیان بۆ بەرژەوەندی خۆیان دەقۆزنەوە وهەمیشە لەهەوڵی وەدەستهێنانی گەورەترین دەستکەوتی ئابووری ودارایدان لەو بۆنانەدا،  تەنانەت لە زانکۆ بەرزەکاندا دەرس و بابەتیان لەسەر دەخوێندرێت. بۆیە زۆر جار لەدوای کۆتایی هاتنی رۆژانی پشوو حکومەت و کۆمپانییە بازرگانی و گەشتوگۆزارییە مەزنەکان بە دەخیلەی بوجەی خۆیان دادەچنەوەو دەیانەوێ بزانن چەندیان چەنگکەوتووە.

تێروانینی حکومەت و خەڵکانی دنیا دەحەق بە رۆژانی جەژن و پشوو جیاوازی هەیەو لە سونگەی هەموو گۆشەکانیانەوە. بۆ نموونە وڵاتە یەککرتووەکانی ئەمەریکا ، کە حەشامەتی  سێ سەت ملیون کەسی هەیەو(198)  نەشنالەتی تێدایە  تەنیا (9) پشووی فۆرمی هەیە بەڵام تێکڕای پشووەکانی بە هەر چوار جۆرەکەی لەسەرەوەو ئاماژەمان پێدا دەگاتە (31) پشوو لە ساڵێکدا.  لە کاتێکدا وڵاتی سعودیە تەنیا (3) پشووی فۆرمی هەیە و وڵاتی  بۆسنە (27) ی هەیە. 

لەدواین هەموارکردنەوەی پشووەکان لە لایەن بەرلەمانی عیراقییەوە (بەغدا) تەنیا (13) پشووی  بۆ عیراقییەکان بەفەرمیکردوە.  بەڵام نەیتوانیوە بە دەستورو یاساو رێسای مۆرکراو هەر هەموو رۆژانی پشووەکانی خەڵکی عیراق دەستنیشان بکات. بۆ نموونە لە بڕگەیەکی  یاسای پشوودان  دا هاتووە : ”  پرۆژەی یاساکە ماف بە ئەنجومەنی پارێزگا پێرۆزەکان ( نەجەفی ئەشرەف و کەربەلاو کازمییەو سامەرا) دەدا کە بۆخۆیان سەرپشکبن لە دیاریکردنی پشووە ئایینییەکان بەمەرجێ هیچیان لە سێ رۆژ پتر نەبێ.”  لە بڕگەیەی تریشدا ئاماژە بە رێک نەکەوتنی سونەو شیعە دەکا لە دەستنیشذانکردنی  یەکەمین رۆژی جەژنەکان ، کە دەبێتە هۆی درێژ بوونەوەی پشووەکان ،  وەک دەیبینین جەژنی رەمەزان لە سێ رۆژ دەبێتە پێنچ رۆژ.  ئەوە جگە لەو پشوانەی بۆ فەلەو و سابئیی ویەزیدیەکان دەستنیشانکراوە.

 

 لە هەرێمی کوردستانی باشووریشدا، رۆژانی پشوو  چەندە هێمنی و حەسانەوەو خۆشی بۆ خەڵکانی کوردستان دێنێ دوو هێندەش سەرئێشەو کێشەی پێیە! ئەم سەرئێشەو کێشانەی  هێندە زۆرن چارەسەرکردنیان بەدەرلەواتای بەرلەمانی کوردستانە، چوون ئەو هەر دارێژەری یاساکانەو هیچ دەسەڵاتێکی جێبەجێکاری نییە.  بۆیە بەندە پێشناری دامەزراندنی  وەزارەتێکی تایبەت بە جەژن و پشووەکان دەکات لە کوردستاندا بەلکو خوایەو عیلاجێکی پێبکرێ.

 ئەزموونی ئەو دەساڵەی دوای کوردستان، سەلماندی کە پشووەکان لە هەرێمی کوردستان هێندە تایبەتمەندی و خۆرسکن کە زەحمەتە بچنە نێو چوارچێوەی پێناسەی ( پشوو)ی هیچ فەرهەنگ و زمانناسییەیەکی هاوچەرخ.

بەڵای منەو مەرج نییە پشوو هەر لە بەرلەماندا یاسای بۆ دەرچێ و لە رێگای میدیاکانەوەو ڕابگەێندرێت و ڕۆژێکی ان چەند رۆژێک بخاێنێ ؛ بەلکو هەر کاتێکی زەمەنی کورت یان درێژ کەسێک لە فەرمانگە یان لە ماڵەوە بێ ئیش وکار ، دەستبەتاڵ بوو ئەوا ئەو زەمەنە دەچێتە خانەی پشوو- وەگرتن.

    با بەیەکەوە گەشتێ بەناو جیهانە سەیرەکەی (پشوو)ی ئەم هەرێمە دا بکەین، خودا شاهیدە کە  مەبەستم هەر جاکسازی و رێنمایکردنە  و زەڕڕەیەک لە قەڵەمەکەم قبوڵناکەم دەسکەوتی پتر لە نیوسەدە خوێنی ئەم نەتەوە ستەمدیدە زامداربکات!

 پشوو لەم هەرێمەدا، بەگوێرەی بۆنەو بریاردەرو دەستنیشانکردن و زەمەن و پرکتیزەکردنی  زۆر لق و چڵی لێدەبێتەوە:

پشوو مان هەیە لە ئەنجومەنی وەزیران و بەرلەماندا  یاسای بۆ دەرچووەو حکومەتی هەرێم پەیڕەوی دەکات و قاڵبێکی فەرمی پێدراوە ، کە نیشانەی شارستانیی و پێشکەوتنە. وەلێ زۆر جار جێبەجێکردنی پشووەکە شێوازێکی لاستیکی بێبار وەدەگرێ و خەڵک تۆشی سەرلێشێواندن دەکا، بۆ نموونە بڕوانە دەستە واژەی (ئەوەی تا ئێستا هەیە    /    به‌ڵام نازانرێت ئایا رۆژی دیکه‌ی بخرێته‌سه‌ر یان نا.) لەم پەرەگرافەی خوارەوە، دەیسلمێنێ کە  (پشوو) لەم وڵاتەدا چەندە حاڵی شڕەو چون  سەری لە ‌هاوڵاتی شێواندوە لە دانانی نەخشەوپلانی رۆژانەی:

” 

محه‌مه‌د قه‌ره‌داغی سکرتێری ئه‌نجومه‌نی وه‌زیرانی حکومه‌تی هه‌رێمی کوردستان به‌ سایتی “خه‌ندان”ی راگه‌یاند: جگه‌ له‌ رۆژانی (11 و 14) ی ئه‌م مانگه‌ که‌ په‌رله‌مانی کوردستان کردویه‌تی به‌پشوو، هیچ رۆژێکی دیکه‌ تا ده‌ستپێکردنی پشووی جه‌ژنی نه‌ورۆز نه‌کراوه‌ته‌ پشوو. 

له‌باره‌ی پشووی جه‌ژنی نه‌ورۆزه‌وه‌ روونیکرده‌وه‌ که‌ ئه‌وه‌ی تا ئێستا هه‌یه‌ رۆژانی (21 و 22 و 23) کراونه‌ته‌ پشوو، به‌ڵام نازانرێت ئایا رۆژی دیکه‌ی بخرێته‌سه‌ر یان نا.”  

 ئەوانەی شارەزای بازرگانین دەزانن ئەم جۆرە دەستەواژەیە  (ئەوەی تا ئێستا هەیە    /    به‌ڵام نازانرێت ئایا رۆژی دیکه‌ی بخرێته‌سه‌ر یان نا.) تەنیا لە بازاردا بەکار دێ. دەبێ نەخشەو پلانی مامۆستایەکی زانکۆ و ئامادەیی یان فەرمانبەرێکی گەشت وگۆزار یان بەرپرسێکی نەخۆشخانەو هاتووچوو پشت بە چ فەلسەفەو ڕینمایی و خشتەیکارێ ببەستی بۆ ڕاپەڕاندنی ئەو ئەرک و واجیبەی کە لەسەر شانیەتی و پێشتر پلانی بۆ دارشتووە؟!

یان رۆژانی پشوو درێژدەکرێتەوە ، بەبێ هۆیەکی ماقوول؛ سیرکەن چۆن شی رۆژی جەژن دەکرێ بە پێنج رۆژ؛  رووبەرنێت دەنووسێ:

“سه‌رۆكایه‌تی ئه‌نجومه‌نی وه‌زیرانی هه‌رێمی كوردستان به‌بۆنه‌ی جه‌ژنی ره‌مه‌زانی پیرۆزه‌وه‌ ماوه‌ی یه‌ك هه‌فته‌ پشوو راده‌گه‌یه‌نێت.

له‌به‌یاننامه‌یه‌كدا، سه‌رۆكایه‌تی ئه‌نجومه‌نی وه‌زیرانی هه‌رێمی كوردستان بڕیاریدا به‌بۆنه‌ی جه‌ژنی ره‌مه‌زانی پیرۆزه‌وه‌ رۆژی یه‌كشه‌ممه‌ رێككه‌وتی 19/8/2012 تا رۆژی پێنج شه‌ممه‌ رێككه‌وتی 23/8/2012 له‌هه‌رێمی كوردستان پشووی ره‌سمی بێت.”

 جۆرە پشوویەکی تری ئەم وڵاتە ئەوەیە کە  ئیدارەی سەر بە ڕەنگێک بۆ خۆی پشوویەک ڕادەگەێنێ و ئیدارەکەی تر لێی بێخەبەرە یان بەگوێی ناکات. بۆنموونە بەشێک لە کوردستان بە بۆنەی لەدایک بوونی یان کۆچکردنی گەورە پیاوێک دەیکاتە پشوو بەڵام بەشەکەی تر دانیپێدانانێ و هیچ حسابێکی بۆ ناکات و دوام  لەوێدا ئاساییە.

 جۆری سێیەم  شارێک بۆ خۆی دەیکاتە پشوو هەرچی دائیرەو مائیرە هەیە دەرگای لێکڵۆمدەدا، بەتایبەتی کە دەبێتە (رۆژی) ئەو شارە جا بەبۆنەی رووداوێك بێ یان ئاهەنگ گێرانێکی کەلتوری بێ.

بڕوانن جەماوەری بیتوێن چەندە تۆڕەن بەم پشووە.  ئاوێنە دەنووسێ:

“له‌به‌یاننامه‌كه‌ی‌ دەستەی پێشەنگی‌ دەڤەری بیتوێندا ئه‌وه‌شخراوه‌ته‌ڕوو كه‌ “وەک ئاشکرایە دەڤەری پشدەر چەند ساڵێکەداوا دەکەن‌و لەڕێگای پارتێکی سیاسییەوە کاری بۆدەکەن کەئەو مەدالیایە لەبیتوێن وەربگیرێتەوەو بدرێت بەپشدەر”.

 

له‌لێدوانێكی‌ پێشتریدا بۆ ئاوێنه‌نیوز، سكرتێری‌ یاسایی‌ ئه‌نجومه‌نی وه‌زیرانی هه‌رێمی كوردستان دكتۆر محه‌مه‌د قه‌ره‌داغی، رایگه‌یاندبوو “رۆژی‌ یه‌كشه‌ممه‌‌و دووشه‌ممه‌ی‌ هه‌فته‌ی‌ داهاتوو(4،5/3)، پشوی فه‌رمی ده‌بیێت له‌سه‌رجه‌م داموده‌زگاكانی حكومه‌تی هه‌رێمی كوردستاندا.” دیارە جەماوەری بیتوێن دەیانەوەی تەنیا پێنجی مانگ پشووبێ..

 سەیر لەوەدایە جاری وا هەیە لە ناو یەک شاردا یان ناوچەدا، لە شوێنێ دەکرێتە پشوو لە شێونێکی تریدا ناکرێتە پشوو. خۆم لە دەرسی یەکەمەوە تا دەرسی شەشەم وانەی خۆم گوتوتەوە ، لە ڕێگا پێیان گوتوم لە  فلان خوێندنگا دا دەوام نەبووە چونکەئ ئیمرۆ پشووی رەسمی یە.

رووداو-سلێمانى دەنووسێ:

“هه‌رچه‌نده‌ ئه‌مڕۆ ده‌وامى فه‌رمى بوو له‌ قوتابخانه‌كان، به‌ڵام زۆربه‌ى خوێندنگه‌ ئاماده‌ییه‌كانى سلێمانى كردیان به‌ پشوو، به‌ڕێوه‌به‌رى په‌روه‌رده‌ى مه‌ڵبه‌ندى سلێمانیش ده‌ڵێت ئه‌وه‌ى ئه‌مڕۆ ده‌وامى نه‌كردبێ غیاب ده‌درێ.

هه‌فته‌ى رابردوو ئه‌نجوومه‌نى وه‌زیرانى حكومه‌تى هه‌رێمى كوردستان بڕیاریدا كه‌ رۆژى 25/12/ و 1/1 پشووى فه‌رمى ده‌بێ بۆ فه‌رمانگه‌كانى حكومه‌ت، به‌ڵام ئاماده‌ییه‌كانى سلێمانى ئه‌مڕۆشیان كرد به‌ پشوو.

ره‌وا عوسمان، كه‌ قوتابى ئاماده‌یى شۆڕشى كوڕانه‌، ئه‌مڕۆ چوو بوو بۆ ده‌وام، به‌ڵام ده‌ڵێت “زۆربه‌ى قوتابیان نه‌هاتبوون بۆ نموونه‌ له‌ پۆلێكى 50 قوتابى، ته‌نیا 4-5 قوتابى هاتبوون، بۆیه‌ منیش قوتابخانه‌م جێهێشت و هاتمه‌وه‌ ماڵه‌وه‌”.

هێندێ پشووی تر  هەیە لەم هەرێمەدا پشووی جندوکەو لەمەچێترانە، بۆ نموونە هەشت رۆژ پێش ئەوەی ناوی هیچ پشوویەک لە کدوولەی تەردابێ، یەکێک لە بن گوێت دەچرپێنێ کە چوارشەوممەی دادی پشووە ، دەپرسی بۆ،  دەڵێ : سەبر بگرە. دوای قسەکەی دێتەدێ و دەکرێ بە پشوو، تۆمەز ئەو لە بەرپرسان ئەو خەبەرەی دزیوەتەوە. یان بووە خوێندکارەکانم هاتونەتە دەرگای بەڕیوەبەرو ویستویانە بزانن سبەینی پشووە یان نا ئەویش پییگوتون:” بەخوا رۆلە منیش نازانم ، بابە گوی لە تەلەڤزۆن بگرن بزانن دەڵی چی.” جا خۆشیەکە لەوەدایە ، روویداوە کەناڵی تەلە ڤزیۆنێ خەبەرەکە پەخشدەکا کەچی کەناڵی ئیدارەکەی تر پەخشی ناکا، ئەمسال شتێکی سەیرتریش روویدا ، کەناڵێ ئیعلانی پشوویکرد دوای زوو هەواڵەکەی قووتداوە!

بۆ یەک جار ئەمساڵ خۆم کە بەیانی چوومە خوێندنگا ئەوەی زوورۆح بوو نەمدی توموز من نەمزانی بوو درەنگانێ شەو کرا بووە پشوو.

 بەندە پشنیاری دامەزراندنی وەزیری پشوو دەکا بۆ هەرێمی کوردستان چونکە ، کێشە ی پشوو  بۆتە قەیران و دیاردە. ڕاگری زانکۆیەک بۆی گێڕامەوە کە دوای گفتوگۆیەکی دوو سعاتی لە سەروکایەتی زانکۆکەیدا نەیانتوانی بەربەستێک بدۆزنەوە تا رێگا لە زانکۆییان بگرن هێندە بۆ خۆیان پشوو بەخۆیان نەدەن. لە دوای کۆبوونەوەکە ویستبویان پێشناری ئەوە دەرکەن هەر خوێندکارێ زۆر غائب ببی لە دوا رۆژ تەرعین نەکرێت لە دامودەزگا حکومەتیەکاندا، وەک سزایەک (؟).

 مامۆستایەکم گوتی:” کچە دکتۆرێکی ئینگلیز لە کۆلێژی ئادابی بەغدا دەرسی پێدەداین ، بآش ماوەیەکی کورت بریاری دا بگەرێتەوە، کە لێیان پرسێ خێرە؟ لە وەڵامدا گوتبووی ئەم وڵاتە نابێ بەهیچ و بۆمن دەست نادات ئاخر لێرە:

(Holiday is holiday. Before holiday is holiday and after holiday is holiday.)

لەوەتەی هەم، گەر رۆژی پشوو بکەوێتە ناوەندی حەفتە ئەوا رۆژانی دوای بۆ خۆی دەبێتە پشوو. پێرارەکە رۆژی چوارشەممە یەکەم رۆژی ساڵی خوێندن بوو، هەر چەند دوام لە بەرێوەبەرەکەم کرد کە خوێندکارەکان ئیزننەداو نەیانێرێتەوە ماڵ ، بێ هود بوو. پارەکە وتارێکم بڵاوکردەوە بە ناوی ( یەکەم رۆژی ساڵی خوێندن لە وڵاتەکەی مندا) کە زۆر خوێنەرێ دڵسۆزی گریاند ،  کە هەستی بریندار بووی (داریا )ی پۆلی یەکەمی بنەرەتییان  زانی،  بەو هیوایەی وەزارەتی پەروەردە بە خشتەو بەرنامەی کاری خوێندنی دابچێتەوەو ئەمساڵیش بە دەردی پار نەچێ. وا لە (دە)ی مانگی سپتەمبەر دەوامی  خوێندنی ساڵی  تازە دەستپێدەکا، دیسان تەسادوفی رۆژی دووشەممە دەکا واتا لە زۆربەی خوێندنگاکان بە خوێندکارانیان تا رۆژت شەممەی دوای دەنێرنە ماڵەوە، وەک بڵێی ئەو سێ مانگەی ڕابردوو لە نوستن و خەوتن تێر نەبووبن. من رمڵ لێنادەم بەڵام ساڵی پار تەنیا لە شارەکەی من بە و دوو رۆژەی کە دەرسی تێدانەخوێندرا (110.000) (وانە) نەگوتراوەو لە قیس خوێندکاری بێگوناح و دڵپاک چوو! بۆ؟ لە پێناو چێ؟ کێ بەرپرسیار  و  یاخەی کێدەگری؟

با بێنەوە سەر جۆرەکانی پشووی هەرێمی باشووری کوردستان. جۆرە پشوویەک هەیە فەرمانبەر بۆ خۆی دایدەنێ و خۆشی دەیدا بە خۆی. بۆ نموونە بینم هاوڕێکم زۆر بە پەلەیەو دەڕواو غاەدەکا، دوای رونیکردەوە کە ئەو لە فەرمانگە دەرچوو بوو، دەبوایە بە پەلە بگاتەوە ماڵ تا (ئاو) هەڵێنجێ، چونکە هەر جل و هەشت سعات یەک سعات ئاویان بەردەکەوێ و کەسیش نازانێ ئەو سعاتە کەییە، جا کە درواسێیەک خەبەری (ئاو)ی دەداتێ ئەو یەکسەر فەرمانگە بەجێدەهێڵێ، ئاخر کەسی لە ماڵەوە نییەو زوو پێڕانەگا بۆ (96) سعات بێ (ئاو) دەبن.

لە زۆربەی هەر زۆری خوێندنگاکانی کوردستان مامۆستاکان بۆ خۆیان ( یان وەزارەتی پەروەردە) دوو جۆرە پشووی تایبەتییان داهێناوە. یەکەم لە گەڵ زەنگی ئەو دەرسە دەگانە خوێندنگاکە کە سەرتای دەرسی ئەوە، واتە کە مامۆستا دەرسی چوارەمەی هەبێ ئەوە لە گەڵ زەنگی دەرسی چوارەم دەگاتە ناو خوێندنگاکە. جاری واش هەیە مامۆستاکە یەک دەرسی هەیە ، زۆر بە هێمنی بەبێ ئەوەی سەرێ بە ئیدارە خوارکاتەوە، دەچێتە پۆل و دوای دەرسەکە وەک بەرزی بابان بۆی دەردەچێ و دەگەرێتەوە ماڵەوە . پشووی دەووم بشێوازێکی تری هەیە ، هەر ئەوەندە دەزانی مامۆستاکە بزر بووە، بەبێ ئەوەی هیچ بەرپرسێک ئاگادار بکاتەوە، جا یان منداڵەکانی گەیاندۆتە یان بردۆتەوە ماڵەوە یان کارێکی ناوەخت ، وەک سەردانی فیتەری هاتۆتە پێش، ئەمەیش رۆژانە دووبارە دەوبێتەوە. لە کاتێکدا لە خوێندنگەکانی کوردستان رۆژانە هەر چوار سعات دەوامە.  مامۆستای ئەوتۆش هەیە  لە هەفتەیەکدا  شەش دەرس یان کەمتری هەیە. 

 پشوویەکی تری خۆشی ئەو وڵاتەی من ئەوەیە، یەکێک هەر بە ئارەزووی خۆی فرماندەدا بە داخستی دەرگای دەمودەزگایەکی حکومی دەیکاتە پشوو. وەک بەرپرسێکی یەکێک لە رێکخراوەکانی کوردستان کردی و دەوامی لە چەند خوێندنگەیک ڕاگرت. یان وەک ئیزندانی زانکۆیان لە بەشی ناو خۆی زانکۆیەکی گەورە ، پاس و ئۆتۆمبیلیان بۆ دێنن ئیزینیان دەدەن ، لایەنی باڵای بەر پرسیش خۆی لێ بێئاگا دەکا.

هیچ مانگێک نییە لە کوردستان بەرێوەبەری خوێندنگەیەک  بە دەسان خوێندکار نەنێرێتەوە ماڵ چونکەی یاری وەرزش هەیە یان بەرەوپیری هاتنی میوانێ نەیانبە!

 کاو کاوەش بە هۆی بەستنی کۆبونەوەی باڵا  چەندان دامودەزگا لە دەست و پێدەکەوێ چونکە ئەوەی کەسی یەکەم و دووەم و سێیەمە  فەرمانگەکانە بەشداری تێدادەکەن.  واتە ناراستەو خۆ ئەو فەرمانگەیە  چۆلکراوانە دەچێتە دۆخی پشوودانەوە. ئەو جگە لەوەی تا ئێستا ئەو فەرمانگانە  لیرە لەوی ماون ، کە دوای سعات دوانزە  ، پایدۆستی لێدەکەن و ئیش و کار تییدا دەچێتە سووری خەوتنەوە.

  وتاری رەخنەئامێزیش لێرە لەوێ ناوە ناوە یاخەی پشوو زۆری بەرلەمانی کوردستان دەگرێ و بەوەی تومەتباریان دەکەن کە لە ساڵیکدا شەش مانگ لە پشوودان دان. 

 ئەمساڵ چەند ماڵپەرێک ئاماژەیان بەوە دا کەخوێندنی زانکۆ کانی کوردستان تەنیا لە (180) رۆژ چڕدەبێتەوەو کە ئەمەیش لەjێر پێوەری ئاستی خوێندنی زانکۆکانی دنیایە.

 بەخشینەوەی پشووەکان لە لایەن حکومەتی هەرێمی کوردستانەوە پتر لە ڕاڤەیەک هەڵدەگرێ. رەنگ بێ دەوام کردن و دەوام نەکردنی فەرمانبەرانی ئەم هەرێمە شتێ لە ئابووری و دارایی و خزمەتگوزاری کوردستان نەگۆڕێ چونکی جانتا دۆلاری نەوت خۆش بێ ، هەموو سەر مانگێک لە خەو هەڵسەو سەرێکی ژێر سەرینەکەت بکە ، قەندیلەکەی سندوباد ، بە سەوفتە دۆلاری بۆ هێناون. کەواتە پشوو  یەکسانە بە دەوام و دەوەامیش یەکسانە بە پشوو.

 هەنە دەڵێن  حکومەتی هەرێم هەر لە خەمێ رازیکردنی هاوڵاتیانی دایەو قەت بێ مەیلی ئەوان ناکا ، جا خۆ پشوو پارەی تێناچێ با بە زەوق و ئارەزووی خۆیان پشوو وەگرن. هەشە دەڵێی ، ئەم پشوودانە  وەک پشک و بەخشیشن بۆ کرینی (دەنگەکان) لە رۆژانی دەنگ کرین و فرۆشتندا.  بۆچونێکی تریش لە ناو خەڵك باوە کە جەماوەر بۆ خۆی قەلبی لێ رەقبووەو فێرە پشوو بووە تاقەتیکار کردنیان نەماوەو تازە بەکەس ناچنە ژێرڕکێفەوە .  خۆ فەرمانگەکانی کوردستان تا ڕادەیەکێ بەرز بێکاری دەمامکداریان تێکەوتووە. هەر ژوورەێکی فەرمانگەکان دەگرێ چەندین بێکاری تێدایە خەرێکی تەلەفۆن و یاری کارتن لە کۆموپوتەرەکان ، ئەوا جگە لەوانەی هەر بە فەرمانبەری (بندیواران) ناسراون. واتە بەقەراری قەتعی دەوام ناکەن و مووجەشیان ماشییە.

 پێش نیو سەدە (جەمال عەبدولناسر)، سەروکی پێشتری میسر لە وەتارێکیدا  ئاماژەی بەوەدا کە ئەو دوو سێ دەقیقەی بەیانیان هێندێ لە فەرمانبەرەکان دوادەکەون بیست و پێنچ ملیون دۆلار زەرەریان لێدەدا، ئەدی گەر ئێمرۆ بێتە کوردستان دەبێ چیبڵێ؟!

ئەگەر جەژن و پشوودان مایەی خۆشی و بووژانەوەی ئابوری و کەرتی گەشت و گوزار بێ  بۆ دەوڵەمەند کردنی وڵاتەکان، ئەوا بۆ ئێمەی کورد بۆتە هۆێ بەفیرۆدانی پارەی قووتی ئەو خەڵکە ڕەش و رووتە لە شەوە سوورەکانی ئەستەنبۆل و بەیروت و دوبەی، چگە لەو قوربانیانەی ژیر پێچکەی ئۆتۆمبیلەکانی سەر رێگای  هاوینەهەوارو ژووانگەکان.

 وەزیری پشووی هەرێمی کوردستان ؛ سلاو و خوا قەوەتت دا!

 

Facebook: fazil shawro

Fzgaedi’yahoo.com

 

فـازیـل شـەوڕۆ

Previous
Next

Leave a Reply