پشكۆ … ستار ئه‌حمه‌د
0
Be First!
لرفه‌ی خه‌ونی زه‌رد هه‌ڵگه‌ڕاو
قاقای لێوی ووشكه‌وه بوو
له ئاوێنه‌ی برسێتیا
له من ده‌بن به هه‌زار چاو
له دادگای پاكانه‌ی دڵ
به‌رۆك دڕاو راوه‌ستاوم
له هه‌ر شوێنێك ده‌نگێكی تۆ
ره‌نگی وێنه ئاڵه‌كانت
چپه‌ی ده‌نگیان راڤه بكرێ
ئا ئه‌و كاته چرۆی دڵم ده‌كرێته‌وه
زامی ناخم قه‌تماغه‌ی برینێ ده‌گرێ
هه‌موو شتێك له تۆ ده‌كا
مانگ , ئه‌ستێره‌كان
ده‌رگای داڵانی په‌رستگاو
ژووری ته‌نهایی هاوسه‌رم
گوڵزاری به‌هاری ته‌مه‌ن
كه دێم هه‌موو تراویلكه‌ن
بۆ گه‌رووی حه‌ز
هه‌ڵاتنێك به‌رپا ده‌كه‌ن
له خۆم ناگه‌م
له باڵای تۆش زوو ره‌نجاوم
به‌ڵام یادت
شێوه‌و ده‌نگت
خه‌زانی باڵای گوڵاویت
چێژو له‌ره‌ی باڵاو ره‌نگت
وه‌ك مۆسیقا ده‌مهه‌ژێنن
چی بنووسم
كه‌ی پێت ده‌گا
هه‌واڵ.. ره‌نجه‌رۆیی منه‌و
كۆچباری یه‌كجاری تۆیه
بۆیه هه‌موو شیعره‌كانم
ئاگردانی بێپشكۆیه
