Skip to Content

Tuesday, September 29th, 2020

پۆخڵەوات….سدیق عه‌لی

Be First!
by October 8, 2008 ئەدەب

 
 
 تكان
 عەشق دەسرۆكەی هەوری نابەستێو
 لەپشت دیواری ماڵە بۆن ریحانەكاندا خۆی ناشارێتەوە
 شانو ملی بە پەڵە هەورێكی تەڕو
 سنگو ملی بە سەرپۆشە ئاونگیەكان داناپۆشێت
 كەچی لێرە
 لە حەمامێكی پڕ كەفی دوای جەنابەت
 لە سەربانی پیاوێكی داوێن تیژو
 چەقۆ تیژو نینۆك تیژ
 عەشق لێرە
 لەناو بلوتوزی مۆبایلێكی حەرامزاد
 بیجامە چاوچنۆكەكان پڕ دەكات
 لە دەنوكی شیرینو ئابڕوی تاڵ
 شەڕواڵەكان پڕ دەكات لە خوێنی داوێنو
 خوێنی گەردن
 لێرە
 بە عەزیەیەكی روتەوە
 گوێ لە گۆرانیە ئاگرینەكانی هەیفا وەهبیو
 هاژەی رژانی پرچی ژنێكی پەمەیی دەگرێ
 
 بارین
 برادەرێكم هەبوو
 پڕ بوو لەجوانی بەیانیانو
 بەتاڵ بوو لە قەسوەتی دوای نیوە شەو
 ئێستا پڕە لە تاریكیو بەتاڵە لە بارانی چێشتەنگاو
 
 لای لایە
 بگری رۆڵە
 قۆڵتی بێشكەكەی تۆ قوڵترە
 یان چاڵی یادگاریە تاڵەكانی ئەو
 سێدارەی دەسرازەكانی تۆ توند ترە
 یان مەقسەلەی پەنجە سوێرەكانی دایكت
 هەرگیز
 بڕۆ
 چونكە دوای رۆیشتن
 یەكەم هەنگاوی گەڕانەوە دەست پێدەكات
 
 پیاسە
 دەستم بە دەستەوە دەگرمو
 تۆ بە وجودمەوە
 رۆمانەكانی دەسبەتاڵی چەند درێژن
 
 مەرگ
 هیچ گوێت نەدایە ئەوەی
 كۆڵان لەبەر چاوم دەكەوێ
 یان چاوم لەبەر كۆڵان دەكەوێ
 رۆیشتی
 
 ماڵئاوا
 ئەوانەی گوڵێك ئاو دەدەن
 نازانن كێ دەیقرتێنێو
 بۆنی دەكاو توڕی دەدا
 ئومێد
 بۆ تاوتوێكردنی بابەتی هەڵچونەوە
 پیرێك لەگەڵ گۆچانەكەیدا
 بە بەردەمی ماڵی لاولاودا پیاسە دەكەن
 
 
 
 
 
 
 
 
 

Previous
Next

Leave a Reply