Skip to Content

Sunday, January 24th, 2021

پەیامەکەی ئۆجەلان، نەخشە رێگای تورکیا لە زمانی ئۆجەلانەوە…

Be First!
by April 1, 2013 گشتی

 

 

 

 

 (گفتوگۆ، شەر، گفتوگۆ) تایبەتمەندیەکی سەلماوی بزوتنەوەی ناسیونالیزمی کوردە. ئەم تایبەتمەندییە، تایبەت نییە بە ناسیونالیزمی کورد لە تورکیا، بەڵکە، سیماو نەریتێکی سەرجەم بزوتنەوەی ناسیونالیستی کوردییە لە هەموو بەشەکانی کوردستاندا. پەیامی نەورۆزی ئەم ساڵی ئۆجەلان، پەیامی  پاشەکشەی گەریلاو و بێدەنگکردنی چەک، پەیامی دەسپێکی برگەیەکی گفتگۆکردنی دوای دەورەیەکی تری شەرە… بەڵام هەروەک و چۆن دەسپێکی هەموو شەرێک و هەموو گفتۆگۆیەک مۆری زەمان و هەلومەرجی تایبەتی خۆی پێوەیە، ئاواش بریاری بێدەنگکردنی چەک لە ئێستادا، مۆرو نیشانەی هەلومەرجێکی تایبەتی پێوەیە، بەدوای ئامانجێکی دیاریکراوەوەیە. 

ململانی و کێشمەکێشی بزوتنەوەی ناسیونالیزمی کوردو تورک لە سێ دەهەی رابردودا، تا هاتووە زبر و توندوتیژ و قوڵتر بۆتەوە و خوێن بەربوونی زۆرتر بووە. مەبنای ئەم جەنگ و خوێن بەربوونە، ریشەی لە ستەمی نەتەوایەتی سەر خەڵکی کوردستانی تورکیادایە، ستەمێک کە ڕژێمە یەک لەدوای یەکانی تورکیا، بە پێی دەستورو یاسای بنەرەتی دەوڵەت، کە ناسنامەی تورک بوونی داوە لەناوچەوانی تورک زمانی تورکیا، ئەمەش بۆتە هۆی دابەشکردنی باقی دانیشتوان لەسەر بنەمای ناسنامەی قەومی. وە بەکردەوەش نەک هەر حاشایان لە ناسنامەی خەڵکی کورد زمانی تورکیا کردووە بەڵکە خودی کورد بوون و بە زمانی کوردی قسەکردنیش، بە تاوان ناسێنراوە و مامەڵەی لەگەڵ کراوە، وە هەر دەنگ و بزوتنەوەیەک کە بەرووی ئەم دۆخەدا هاتبێتە ئاراو خۆی نواندبێت خراوەتە  قاڵبی بزوتنەوەی تیرۆریستی. بزوتنەوەی نارەزایەتی خەڵکی ستەم لێچووی کوردستان بەدژی دەوڵەتی ناوەندی و ناسیونالیزمی تورکیدا، دەوازەی خوڵقاندووە بۆ ئەوەی بزوتنەوەی ناسیونالیستی کوردی، ئەم دۆخە بکاتە ژینگەی هەڵسورانی سیاسی و سەربازی و خونواندنی لە گۆرەپانەکەدا… پەکەکە یەکێک لەو هێزو بزوتنەوە ناسیونالیستیانەیە، کە توانیویەتی سواری بزوتنەوەی رەوای خەڵکی کوردستانی تورکیا ببێت، کە بەدژی ستەمی نەتەوایەتی خۆی نیشانداوەو هاتوتە مەیدان. بەم پێیە چ ناسیونالیزم و شۆفینیزمی تورکی و چ ناسیونالیزمی کورد، لە سێ دەهەی رابردودا، کێشەو ستەمی نەتەوایەتی سەر خەڵکی کوردستانی تورکیایان، نەک هەر بەلارێدا بردووە، بەڵكە رۆژ بەرۆژ قوڵتریان کردۆتەوە… شۆفینزمی تورکی، بە بەپیرۆزراگرتنی ناسنامەی توکی و بە خۆلادان لە چارەسەری ئەم پرسە و دەستبردنی بۆ پاشەکشەکردن بە بزوتنەوەی رەوای خەڵکی کوردستان و حاشاکردنی لە بوونی کورد و ستەمی نەتەوایەتی و… رێگای سەرکوت و داپڵۆسین و پاکتاوکردنی قەومی بەدەستەوە گرتووە. ناسیونالیستی کوردیش لەسەر بنەمای ئەو زوڵمەی دەوڵەتی تورکیادا بەرامبەر خەڵکی کوردستان نەک بۆ چارەسەری ئەم پرسە، بەڵکە بۆ بەش پێبڕانی لە دەسەڵات و هاوبەشیکردنی، خۆی بەبزوتنەوەی لابردنی ستەمی نەتەوایەتیدا، هەڵواسیوەو لەو چوارچێوەیەشدا، جەولەکانی شەر، گفتوگۆ، شەرو دوبارە سازانی کردۆتە سیماو تایبەتمەندییەکی بەرجەستەو حاشالێنەکراو. ئاگربەستەکان و جەولەکانی پێشتری  شەرو گفتوگۆ، باگرواندی بێدەنگکردنی چەکەکانی ئێستاو  و دەستبردنە بۆ گفتۆگۆ لەگەڵ دەوڵەتی تورکیادا، بەڵام لە دۆخێکی جیهانی و ناوچەیی تایبەتدا.

 

شۆرشەکانی ساڵی ٢٠١١ و دنیای عەرەب و باکوری ئەفریقیا

 شۆرشەکانی ساڵی ٢٠١١ ی دنیای عەرەب و باکوری ئەفریقا، بەتایبەتیش کەوتنی دەسەڵاتی حوسنی مبارک لە میسر، وەک یەکێک لە هێزو دەوڵەتە کاریگەرەکانی ناو دنیا عەرەب و ناوچەکە، وە کاریگەری شۆڕشەکان لەسەر تورکیا…لە دوو لایەنەوە دۆخێکی تازەی هێنایە ئاراوە. دەوڵەتی تورکیا بە کەوتنی پێگەی میسر لە دنیای عەرەب و ناوچەکەدا، سەرمەستی قوتبیبوونەوەی پێگەی سیاسی خۆی بوو لە ناوچەکەدا. بە تایبەتیش کە هەم رژێمی ئێران لە مەنگەنەیەکی نێودەوڵەتی و ناوچەیدایە، وە دەوڵەتی سوریاش دەرگیری جەنگێکی سەراپاگیرو هەموو رۆژەو لەسەر لێواری کەوتنە، ‌هێندەی تر پیگەی دەوڵەتی تورکیا لە ناوچەکە بەهێز کردوەو تا رادەی خولیای دامەزراندنەوەی ئیمپراتۆریەتێکی بەهێز لە ناوچەکەدا، بەڵام هاوکات کاریگەری شۆرشەکانی ناوچەکە و خواستی جەماوەری بێداربووە بۆ نان و  ئازادی و توردانی دیکتاتۆری و خستنەگەری ئیرادەو شکۆی ئینسانییان، ئەم دۆخەیە نەخوازراوەیە کە لە دڵی قڵشتی قوڵی چینایەتی کۆمەڵگای تورکی و لە ناوجەرگەی درێژەدان بە ستەمی نەتەوایەتی سەرخەڵکی کوردستاندا، ئیرادەی خەڵکی توکیای بەگشتی بۆ ئاڵوگۆر بۆ ژیانێکی باشتر و گوزەرانێکی ئینسانی تر و تەسەل تر، لەگەڵ خواستی خەڵکی کوردستان بۆ کۆتایی هێنان بەستەمی میللی… دوو مەسەلەی جدی و هاوکات دەکرێت لێکهەڵپێکرێن، کە ئەمە نەک هەر خەونی زڵهێزی و بە ئیمپراتۆر بوونی توکیا و جێگەگرتنی لە یەکێتی ئەوروپادا، روبەرووی کێشە کردۆتەوە، بەڵکە ترس لە دەسپێکردنی “بەهاری تورکی” و بەهاری کوردی” لە تورکیادا، کردۆتە واقعیەت و ترسێک. چ کرێکاران و خەڵکی دەست تەنگی تورکیاو چ خەڵکی تورەو نارازی بە ستەمی نەتەوایەتی سەر خەڵکی کوردستان، ئەو ‌هێزە بەرینە جەماوەرییەن، کە بەشێوەی جیاواز بەربینی بە رژێمی تورکیاو خەونەکانی گرتووە.

شارەکان وەکو سەکۆی بزوتنەوەیەکی جەماوەری

بزوتنەوەی ناسیونالیستی کورد، نەک هەر لە تورکیا بەڵکە لەهەموو بەشەکانی تریش، بزوتنەوەیەکە کە زۆرتر و بەشێوەی سەرەکی پشتی بە ناکۆکی نێوان وڵاتەکان و قڵشت و بەرامبەرکێ ناوچەیی و جیهانیەکان، بەستووە. نەریتی چەکداری ئەو ڕێگا سەرەکیەیە کە سیماو تایبەتمەندییەکی بەرجەستەی بزوتنەوەی ناسیونالیستی کوردیە. ئەمە نەک هەر بۆ بەرامبەرکێ بەرامبەر بە دەوڵەتی ناوەندیدا، بەڵکە بۆ جڵەوکردنی بزوتنەوەی جەماوەری و شاری و دورخستنەوەی دەوریان لە پرۆسەی سیاسی و ململانێی سەر گۆرەپانەکە… هەروەها تابلۆ و بانگەشەی یەکێتی نەتەوەیی و رزگاری نیشتمانی، کە ناسیونالیزمی کورد بەدەستیەوە دەگرێت، و نەریتی چەکداری دەکاتە سەکۆی بەرامبەركێ لەگەڵ دەوڵەتی ناوەندیدا، ململانێی چینایەتی نادیدە دەگرێت و دەشارێتەوەو لە قاڵبی جاری کاتی خەباتی چینایەتی نییە، دەیەوێت هەرچی وزەو ‌هێزی چینی کرێکارە بخاتە خزمەت بە بزوتنەوەی ناسیونالیستی و نەتەوەییەوە.

دوو سێ ساڵی رابردوو، بزوتنەوەی نارەزایەتی جەماوەری و شاری، بەجەستەترین سیمای بەرەورووبونەوەی خەڵکی کوردستان بەدژی شۆفینیزمی تورکی بووە. شۆڕشەکانی دنیای عەرەبیش، بە شکاندنی تەلیسمی ترس، تەکانێکی گەورەی بەخشی بەم بزوتنەوەیە، پەکەکە لەدڵی ئاوا دۆخێکدا و هەموو هەوڵێکی بۆ ئەوە بوو تا لەلایەکەوە پێشرەوی بە هێزە چەکدارەکانی بە ئاراستەی ناوخۆی تورکیادا ببات، لەلایەکی تریشەوە هەموو هەوڵێکی خستەگەر تا جڵەوی بزوتنەوەی شاری، بگرێتە دەست و رێگە بگرێت لەوەی ئەم بزوتنەوەیە لە چواچێوەو قەوارەی تردا، خۆی رێکبخات و ریزی سەربەخۆیی خۆی بپارێزێت.

دۆخی سوریا و پێگەی پەکەکە

بەیەکدادانی ‌هیزەکانی بەعسی عەرەبی ئەسەدی لەگەڵ دەستەو تاقم و هێزە قەومییە عەرەبی و کوردیەکان و دەستەو تاقمی ئیسلامی هەمەرەنگ و ئیستیراد کراودا، سوریای لە جەنگێکی ناوخۆیدا نقوم کردووە، ئەم دۆخە لە بەشی کوردستانی سوریادا بۆتە هۆی ئەوەی کە پەکەکە، لەو بۆشایەی دروست بووە بە پشتیوانی دەوڵەتی سوریا، بەهرەبەرداری بکات و تارادەیەکی بەرچاویش کۆنترۆلێ ئەم بەشە بکات، هاوکات پەکەکە توانیویەتی ئەم بەشە کۆنترۆڵکراوە بکاتە پشتی بەرەیەکی جەنگی بۆ روبەرووبونەوەی سوپای تورکیا. ئەم دۆخە بووە هۆی ئەوەی کە بەشێکی زۆر لە هێزە چەکدارەکانی پەکەکە بتوانن، بچنە ناو قوڵایی توکیاو گورزی سەربازی لە سوپاو ‌هێزەکانی تورکیا، بوەشێنن و کاریگەری بزوتنەوەی جەماوەری شاری تورکیاش بخاتە ژێر سێبەری بەیەکدادانی چەکدارییەوە. لەبەرامبەردا رژێمی تورکیا بەچری دەستیدایە سەرکوتی چالاکوانانی سیاسی و زیندانیکردن و راوەدونانیان، لەژێر ناوی هاوکاری و پەیوەندیان بە پەکەکەوە زیندانەکانیشی سیخناخ تر کرد. ئەم هەلومەرجە دەوڵەتی تورکیای خستە ناو کەشێکەوە کە سەرکوتگەرییە بی پەردەو ئاشکراکەی، سەرنجی هەموو دنیا بۆخۆی رابکێشێت و دۆسیەی پەیوەست بوونی بە یەکێتی ئەوروپاوە، هێندەی تر دوربخاتەوەو سڕ بکات.

ئۆجەلان وەکو بارمتەیەکی سیاسی لە گفتوگۆکاندا

 زیندانی بوونی و ئۆجەلان و دەستبەسەر بوونی لەئیمرالێ و لەژێر چاودێری وردی دەزگای میت و سوپای تورکیادا، هەوڵی چرو پڕی پەکەکە بۆ ئازادکردی ئۆجەلان لە زیندان، ئۆجەلانی کردۆتە کارت و بارمتەیەکی سیاسی پر بەها بە دەست دەوڵەتی تورکیاوە، تا هەرکات خواستی و ویستی دەستی بۆ ببات و بیجوڵێنێ و پەیامی پێ ڕابگەیەنیت.

گومان لەوەدا نییە، کەسی زیندانی و دەست بەسەر، لەهیچ رویەکەوە کەسێکی ئازاد نییە، ئیرادەشی زیندانییە. بریاری ئازادنەی هەر ئینسانێک، پێش مەرجەکەی ئازدبوونی خۆیەتی، کەسی زیندانی ناتوانێ پەیامێک بگەیەنێت کە مۆری زیندان و زۆری زیندان و گوشاری زیندانی بەسەرەوە نەبێت. بەجیا لە باگراوند و پێگەی ئۆجەلان، پێداگری زیاد لەرادەبەدەری پەکەکە بۆ ئازادکردنی و بەستنەوەی هەموو راسپاردەو بڕیارە گرنگەکانی ‌هێزەکەی بەبڕیارو دیدی ئۆجەلانەوە، ئۆجەلانی کردۆتە نێچیرێکی دەست بەستراو هاوکات قورمیشکراو بەدەست زۆرداری دەوڵەتی تورکیاوە، تا هەر کات ویستیان، بەکاری بهێنن و هاوکات لە زیندانیشدا بیهێڵنەوە.

پەیامەکەی ئۆجەلان، پەیامی تورکیا لە زمانی ئۆجەلانەوە

خوێندنەوە بۆ پەیامەکەی ئۆجەلان، بە بێ لەبەرچاوگرتنی ئەم دۆخە سیاسی و ناوچەیی ئێستا، لە کاریگەری شۆرشەکانی ناوچەکەوە بۆ پێگرتنی بزوتنەوەی جەماوەری شارییەوە تا پێگەی پەکەکە لە ئاڵوگۆرەکانی ناوچەکەو سوریاو  نەریتی و چەکداری و ئەو دۆخەی ئۆجەلان تیایەتی…تاد، ناتوانێ خوێندنەوەیەکی بابەتی و دروست بێت.

ناوەرۆکی پەیامەکەی ئۆجەلان بریتیە لە “بانگەشەکردن بۆ تورکیایەکی نوێ، دنیایەکی نوێ و داهاتوویەکی نوێ…” کشانەوەی هێزە چەکدارەکان، بێدەنگ کردنی چەکەکان، رێگای دیموکراتی و سیاسی…”

 کرۆکی ئەم پەیامەی سەرەوە، پەیامێکە کە دەبوو دەوڵەتی تورکیا رایبگەیەنێت و کە بە گۆڕینی دەستور و گوڕینی ناسنامەی قەومی دەوڵەتی تورکی بەناسنامەی هاوڵاتی بوون و بەرەسمی ناسینی مافی یەکسان بۆ سەرجەم هاوڵاتیان و دەستهەڵگرتنی لە سەرکوت و بێمافی، لەشکرکێشی، گەرانەوەی بۆ رای خەڵکی کوردستان بۆ چۆنیەتی چارەسەری پرسی کورد …تاد، بانگەشەی تورکیایەکی نوێ و دنیایەکی نوێ و داهاتویەکی نوێی راگەیاندابا…نەک لایەنی تر کە نەتوانای ئەو کارەیان هەیەو نە زەمینەو نە بواری وەها کارێکیان هەیە. هێزو ئۆپۆزیسێۆنێکی محەلی نەدەتوانێت دەوڵەت لە کەنارەوە بروخێنێ و نە دەتوانێ ئاراستەی سەرەکی سیاسەتی بنچینەیی دەوڵەت بگۆرێت و نە دەتوانێ پایەکانی دیموکراتی دەوڵەتێک لە ناوەندا، بچەقێنی. ئەمە کاری دەوڵەت و سیستەمی سیاسییە لە مەرکەزدا. دەوڵەتی فاشستی تورکیا لە تەنگانەیەکی زۆر تایبەت و لە دۆخێکی زۆر هەستیاردا، پەیامی خۆی لە رێگای ئۆجەلانەوە راگەیاند، کە گەریلاکانی پەکەکە بکشێنەوە، چەکەکان بێدەنگ بن، پرۆسەی دیموکراسی بگیرێتە بەر. ئەو لایەن و هێزانەش کە پێشوازیان لەو پەیامەکە کرد، پێشوازی بوو لە نەخشە رێگایەکی تورکی، هەم تورکیا پێشوازی و مەرجی جێبەجێکردنی بە گرنگ زانی و هەم ئەمریکاو ئەوروپا، بە هەنگاوی گرنگیان لەقەڵەمداو هەم بارزانی پێشوازی لێکرد و پێداگری کرد کە تاکتیکی و کاتی نەبێت…تاد. هەموو ئەو لایەنانە کە پێشوازیان لە پەیامەکەی ئۆجەلان کرد، لە پشتی دەوڵەتی تورکیا بوون و پەکەکەیان بەسەرچاوەی نائارامی تورکیاو زانیوەو وەکو هێزێکی تیرۆریست ناساندویانە و هیچ کامیش لەو لایەنانە بە فەرمی کێشەی خەڵکی کوردستانی تورکیاو هەوسارپچراوی و سەرکوت و بە رەسمی نەناسینی مافی خەڵکی کوردستانیان، لەلایەن دەسەڵاتی قەومی و ئیسلامی تورکیا، بەسەرچاوەی نائارامی تورکیا و ناوچەکە، لەقەڵەم نەداوە.

ترسی دەوڵەتی تورکیا، لە پێگەو باڵادەستی چەکداری پەکەکە لە کوردستانی سوریا، ترسی لە بوونی ‌هێزی چەکداری پەکەکە لەناوخۆی تورکیادا. ترسی بەرینتر بوونەوەی هەرچی زیاتری بزوتنەوەی جەماوەری و شاری لەناو خۆی تورکیاو ترس لەوەی ئەمە “بەهاری تورکی” لە کوردستانەوە چەغماخە لێبدات، یان ترسی “بەهاری کوردی” لە شارەکانی کوردستان و دروستبوونی بۆشایەکی ئیداری، وە ترسی درێژبوونەوەی دورمەوداتری بۆ قبوڵبوونی بە ئەندام لە یەکێتی ئەوروپادا…تاد، ئەو هۆکارە بناغەیانە بوون بە مەبنای پێداویستی ئەم پەیامە و هەڵبژاردنی کاتەکەشی بۆیە خرایە نەورۆز چونکە نەورۆز گەورەترین بۆنە و جەژنی ناسیونالیستییە، کە تیایدا زۆرترین خەڵک ئامادەی دەبن. بۆیەش بە ئۆجەلان سپێردرا تا ئاراستەی بکات چونکە، ئۆجەلان خاوەن پێگەیەکی بەهێزە لە ناو پەکەکەو بزوتنەوەی ناسیونالیستی کورددا، کە دەشێت لە لایەن پەکەکەو لایەنە سێبەرەکانی پەکەکەوە، پێشوازی لێبکرێت و گوێی لێبگیرێت. بۆ تورکیاش ئەو دەستبەسەرێکەو دەشێت بەبەڵێنی ئازادکردنی، لاپەرەی سپی واژۆ بکات و مل بدات بەخواستەکانی دەوڵەتی تورکیا…بۆ پەکەکەش ئازاد بوونی ئۆجەلان ویستێکی بە هێزتر لە خواستی چارەسەری کێشەی کوردەو خۆ هەڵواسین بە پرسی خەڵکی کوردستانەوە، رێگاو گەمەیەکی دەستراگەیشتنیانە بە سوچێکی دەسەڵاتی بێکاریگەرەوە.

ئەو پەیامە کە ئۆجەلان ئاراستەی کرد، نە باسی چارەسەری کیشەی کورد و نە باسی لەئارادابوونی هیچ هەنگاوێکی ئیجابی دەوڵەتی تورکیای تیابوو. پرسیار ئەوەیە بۆچی باسی چارەسەری پرسی کورد لە پەیامەکەدا نەبوو؟ بۆچی ئاماژە بەهیچ هەنگاوێکی ئیجابی دەوڵەتی تورکیا، جێگای نەبوو؟ رۆشنە نە دەوڵەتی فاشستی تورکیاو نە پەکەکە و ئۆجەلان بەدوای چارەسەری کێشەی خەڵکی کوردستان لەرێگای رێزدانان بۆ ئیرادەی خەڵکی کوردستان نیین. خوازیاری چارەسەری ستەمی نەتەوایەتی نین. بەڵام جیگا نەبوونی هیچ کام لەم مەسەلانە جێگای هەڵوێستەیە. بزوتنەوەی ناسیونالیستی کورد هەمیشە بە تابلۆی رزگاری نیشتمانی!! و بە بانگەشەی چارەسەری کێشەی خەڵکی کوردستانەوە، خۆیان نیشانداوەو لەو رێگایەشەوە توانیویانە خەڵکی خۆشباوەر بکەن و بیانکەنە بەردەبازی ئامانجە سیاسییەکانی خۆیان کە بەشداربوونە لەدەسەڵاتدا. دەسەڵاتی ناسیونالیستی نەتەوەی بان دەستیش، لەکاتی دەستبردن بۆ گفتوگۆ و مانور و بانگەشەکانیاندا درۆی هەمە چەشن و بەڵێنی فریوکارانەیان لێنەبراوە، کەچی ئەم پەیامە خاڵییە لەهەرکام لەو بانگەشانە.    

ئەم پەیامەی کە ڕاگەیەنرا، پەیامێکی پر مەترسییە. نە پەیامی ئاشتی و نە دیموکراتیە…پەیامێکە کە دەیەوێت بزوتنەوەی نارەزایەتی جەماوەری خەڵکی کوردستانی تورکیا، بخاتە کەنارەوە. دەیەوێت بزوتنەوەی چەکداری بە وێنەی ناوەرۆکی بزوتنەوەی جەماوەری، بۆ کۆتاییهێنان بە ستەمی میللی نیشان بدات… وە دەیەوێت لە رێگای بەڵێندانی بێمەرجی چەک دانان و پاشەکشەپێکردن بە گەریلاکانی پەکەکە، زەمینەی گفتۆگۆ لەگەڵ رژێمی فاشستی تورکیا، سازبکات و لەو رێگایەشەوە نەک داماڵینی چەک لە پەکەکە، بەڵکە بزوتنەوەی نارەزایەتی و جەماوەری و شاری بۆ کۆتاییهێنان بە ستەمی نەتەوایەتی، پاشەکشە پێبکات و بیکاتە بەردەبازێک بۆ گفتوگۆ و سازان و بەش وەرگرتن لە دەسەڵاتی ناوەندیدا… دیارە بزوتنەوەی حەقخوازانەی شاری خەڵکی کوردستانی تورکیا، بە چەکدانانی پەکەکەو دەستهەڵگرتن لە چەک، خامۆش ناکرێت. ئەمە بزوتنەوەی چەکداری ١٩٧٤ نییە، کە جێگایەک بۆ بزوتنەوەی شاری و جەماوەری نەهێڵرابۆوەو بە تەسلیم بوونی مستەفا بارزانی، بزوتنەوەکە کۆتایی بە تەمەنی هات و باجی سازش و تەسلیم بوونی بارزانیش، خەڵکی ستەم دیدەی کوردستان، دایان. لە کوردستانی تورکیادا، بزوتنەوەی نارەزایەتی شاری، زۆر لە بزوتنەوەی چەکداری پەکەکە بەرینتر و فراوانترە و شانسی خۆ دەربازکردنیشی لەئاسۆی ناسیونالیستی، بە تایبەتیش ئەگەر پەکەکە خۆی بکاتە خاوەنی ئەم پەیامە، زۆر زیاتر بۆ فەراهەم دەبێت… بزوتنەوەی ناسیونالیستی دەمێکە توانای چارەسەری کارسازی کێشە و ستەمی نەتەوایەتی لەدەستداوە، هەر چەشنە خۆشباوەریەک بەوەی بزوتنەوەی ناسیونالیستی کۆتایی بە زوڵمی قەومی دەهێنێ، خۆشباوەریەکی بیجێگایە… وە هەموو رێکەوتنێکی سەرو خەڵکی و نێوان دەوڵەتی تورکیاو حزبە ئۆپۆزیسێۆنەکان و ناسیونالیستەکان، خۆی نارەوایەو بە قازانجی خەڵکی ستەملێکراودا تەواو نابێت. کۆتاییهێنان بە زوڵمی قەومی سەر خەڵکی کوردستانی تورکیا، تەنها لە رێگای بەرپاکردنی ریفراندۆمێکی ئازاد و دوور لە هەرەشە و میلتاریزەکردنەوە دەشی ببرێتە پێشەوە کە ماف بە خەڵکی کوردستان بدات لە نێوان مانەوە لە ناو تورکیا بە مافی یەکسانەوە یان جیابونەوەو پیکهێنانی وڵاتێکی سەربەخۆ، یەکێکیان هەڵبژێرن و کام یەک لەم دوو هەڵبژاردنە، مانەوە یان جیابوونەوە، سەرکەوتنی بەدەست هێنا، رەسمیەتی پێبدرێت… ئەم رێگا چارەیە تەنها دەتوانێ رێگاچارەی ئەحزابی کۆمۆنیست و چەپ یان مۆدیرن و ئازادیخواز بێت، نەک کاری ئەحزابی قەومی کە بەکردەوە لە دژی ئەم بەدیلەن و خۆیان کۆسپێکی واقعی بەردەمی ئەم چارەسەرە کارسازەن. پەیامی ئۆجەلانیش، پەیامێکی ترسناکە دژ بە ئیرادەی ئازادانەی خەڵکی کوردستان و رێگا چارەیەکی ئینسانی و کارسازدا…

کۆتایی مارسی ٢٠١٣

  عەبدوڵا مەحمود            

abdulla.mahmud@gmail.com

www.abdullamahmud.com

Previous
Next

Leave a Reply