Skip to Content

Monday, September 28th, 2020

چاوپێکه‌وتن له‌گه‌ڵ وه‌زیری ڕۆشنبیری.فه‌له‌که‌دین کاکه‌یی

Comments
by May 30, 2008 گشتی

 لە بێكاری ناترسم چونكە كارم زۆرە گەر لە وەزارەت نەمێنم ئەوا گەورەترین پۆست چاوەڕوانمە مەگەر خۆم نەمەوێت!
 
 فەلەكەدین كاكەیى:
 بڕوا ناكەم میللەتێكی بەگلەیی وەكو خەڵكی ئێمە هەبێت

 
 سازدانى: سۆران عەزیز………
 سەبارەت بە كار و بەرنامە و كێشەكانى نێو وەزارەتى رۆشنبیرى حكومەتى هەرێمى كوردستان ئەم دیدارە تایبەتیەمان لەگەڵ "فەلەكەدین كاكەیى" وەزیرى رۆشنبیرى ئەنجامدا.
 
 كوردستان راپۆرت: لە چەند چاوپێكەوتنێكدا باس لەوە دەكەیت كە لە جێى وەزارەتێك چەندین وەزارەت هەیە، دەڵێیت ئەم وەزارەتە كێشەى زۆرە،لەكاتێكدا ئەمە چەندین جارە ئەم پۆستە وەربگریتەوە، بەڵام گرفتەكان وەك خۆیان ماونەتەوە، ئەوەندەى من ئاگاداربم تەندروستیشت تەواونییە، بۆچى دەست لەكار ناكێشیتەوە؟
 
 فەلەكەدین كاكەیى: من ئا ئەوە  بوومە. هێشتاش لەو رۆژانە دوورنەكەوتوومەتەوە.پێكەنینم بەم رۆژگارە سەیرو سەمەرەیە دێ. وەزیری چی?! گزیری چی?! راكشانی ناو لانك و تەماشای هاتووچۆی پەڕەسێلكەو چۆلەكەو دوو ماری بنمێچی ماڵی خشت و گل و پرمەی گێسك و بەعەی بەرخ و هی ترم لەلا خۆشتر بووە. رۆژێك سەگەبۆر هاتە ژوورەوە تەماشای منی كرد، قاچی لێستمەوە، ئەم مێوانەی نەدەناسی، رەنگە بەخێرهاتنی كردبم. تەشتی نان پڕبوو. نانى نەبرد. بە ئەسپایی چووە دەرەوە. باسی گرفتەكانی وەزارەت دەكەیت؟ ژیان هەمیشە گرفتدارە. بیرمەندێك دەڵێ: ژیان بریتییە لە زنجیرەی سەدان و هەزاران پرۆسەی(چارەسەری گرفت)… لە گرفتێك دەبیتەوە، یەك دووی تر دێتەپێش: گرفتی ئابووری، كۆمەڵایەتی، فیكری، كارگێڕی، خێزانی، تەندروستی، كێشەی ناسیاوو خزم و برادەری دوورو نزیك، هاووڵاتی كوردستان، یا مێوان… تاد! چوزانم، هەندێ جار پێشوازی گرفتێكە، بە رێخستن گرفتێكی دیكەیە. لە پڕدا تلفۆنێكی دوورت بۆ دێ، گلەیی و بۆڵەو رەخنەیە(شتیشی بۆ كراوە)… گلەیی… گلەیی… گلەیی، وەكو بڵێی سزادراوین ئەبەد، گلەیی و گازەندە ببیستین، گلەیی(بنۆشین)، گلەیی لەبەر بكەین، لەسەر سەرینی گلەیی بنووین… بڕوا ناكەم میللەتێكی بەگلەیی، وەكو خەڵكی ئێمە، هەبێ. هەندێكی هەقیانە، زۆریش ناهەق. خۆ دەتوانن بە زمانی شیرین دەریببڕن، نەك یەكسەرو بێ(سەلام و عەلیكم) بە بزمارو مێخی گلەیی بەر ببنە جەستەی رۆح و رەوانت. كورد، سەدان ساڵە چەوساوەو ژێردەست و بێبەشە، هەموو دەردو داخ  و ئازاریان بە سەرتا دادەڕێژن. بەلاى منەوە، رووبەڕووبوونەوەی گرفتەكان،(گرفت) نییە، بەڵكو شێوەی دەربڕین و زمانی رەق و وشك و بێ بەزەییانە(گرفتی منە). حاڵی عەرزم بووی?! كاكە گیان: من بە ئاسانی بە پیری هەر گرفتێكەوە دەچم، بەڵام گرفتی زۆر بچووك، بە زمانی رەق و برینكەر، لێمی دەكەن بە كێوی قاف، بە گرفتی ئێجگار گەورە، وەكو بڵێی بڕیاری هەڵسووڕانی گشت گەردوون، یا راوەستانەوەی جوولەی گەردوون، لەسەر چارەسەری ئەو گرفتە راوەستاوە. ئەمجاش(گرفتی گەورەتر) دێتەپێش كە كەم كەس لە كۆمەڵگاكەماندا رازی دەبێ بە مافی خۆی. تۆ كە دەڵێی: ئەمەیە سنووری دەسەڵاتی یاساییمان، ئەوەیە بوودجەكەمان، رازی نابن، نایانەوێ تێبگەن یەكسەر دەتخەنە بەر تیری وشەی نابەجێ و ناشایستە. هەق، ناهەق، دەیانەوىَ بەئامانجى خۆیان بگەن!  گرفتی من هەبوونی گرفتەكان نییە، ئەوەندەی گرفتی شێوەی دەربڕینی ئەم و ئەوە. گەرنا هیچ وەزارەتێك دوور لە گرفت نییە. هەریەكەیەكی كۆمەڵایەتی و كارگێڕی و سیاسی گرفتی خۆی هەیە. هەندێ گرفتی وەزارەتی رۆشنبیری كۆنە، بۆ سەرەتای دامەزراندنی دەزگاكە دەگەڕێتەوە، ئەوەش  بە هۆی سیاسی و ئابووری و یاسایی و كۆمەڵایەتی و رادەی هۆشیارییەوە بەندە. لەوە گلەییم نییە. هەندێ گرفتی هەنووكەیی هەیە،  وردە وردە دەكەوینە چارەسەركردنی. زۆربەی گرفتەكانی پێشوومان چارەسەركردووە، یا لە چارەسەربوونیان نزیك بووینەتەوە. بەگشتی، وەكو وتم، گرفتم لەگەڵ رووبەڕووبوونەوەی گرفتەكان نییەو، ناڕەحەت نابم. بەلای منەوە كێشەی بنەڕەتیمان نەشارەزایی لە هونەرو زانستی (كارگێڕی)،یە. زۆربەی گرفتەكان لەوێوە سەرهەڵدەدات. گرفتی وەها هەیە دەتوانرێ لەكات و ساتی خۆیدا، بەهێمنی چارەسەر بكرێ، بەڵام دوای دەخەن و شتی دیكەی لێدەكەوێتەوەو گرفتی دیكەی لێپەیدا دەبێت، تا لە پڕدا دەبێ بە كێوێكی ترسناك و دەتەقێتەوە. هەر گرفتێك لە كات و جێگەی خۆی چارەسەر نەكرێت، خێرا گرفتی دیكەو… دیكەی لێدەكەوێتەوە تا گەورە دەبێت. هەندێ گرفتی وەزارەتی رۆشنبیری و وەزارەتەكانی دیكەش لە(لێنەپرسینەوە) دێت. واتە: كەس نییە بوێری كارمەندی هەڵە یا كەمتەرخەم و لادەر، یەكسەر رووبەڕووی هەڵەو كەمایەسییەكانی بكاتەوە. رەنگە رێگای لێپرسینەوەی یاسایی و كارگێڕی دیار بێ، بەڵام كارگێڕی چاونەترس و شارەزامان نییە بتوانێ رووبەڕووی كارمەندەكەی تر(یا بەڕێوەبەرایەتییەكە) ببێتەوە هەڵەكانیان دەستنیشان بكات. واتە:(چاوپۆشین) لە هەڵەكان هەیە. یا هەندێ كەس ناوێرن باسی بكەن، یا نایانەوێ، لەبەر هەر هۆیەك بێ، ئەم (چاوپۆشینە) دەردێكی دیكەی كارگێڕی و كاروباری وەزارەتەكانە. هەربۆیەش گرفتی وەها هەیە كە لەكاتی خۆیدا بە یەك دوو كاتژمێر چارەسەر دەبوو، بەڵام كە گەورە دەبێتەوە دەبێ بە نەخۆشی رۆژانەی دەزگاكە، یا گشت وەزارەت و، دەیان رۆژو چەندین هەفتەو مانگ پێوەی دەبن، ئەمجاش بە دروستی چارەسەر نابێ، مەگەر بە سزای كارگێڕی، یاهی تیر… كەواتە: لە چارەسەری گرفتەكانا،(كات) دەبێتە قوربانی. ئەوەش گرفتێكە، وەكو بڵێی(كات) شتێكی بێهودەو بێبەهایە، هەر چۆن بە فیڕۆی بدەین، (گرفت)نییە. نە، برادەران، كات ئێجگار بە نرخ و بەهادارە. ئێمەی نەتەوەی كورد زۆر بە جێماین. دەبێ تەكانێكی بەهێز بدەین و رۆژێك بەفیڕۆ نەدەین. كات لە بەرژەوەندی ئێمەدا نییە. كات بەخۆی یاسای خۆی هەیە، چركە بە چركە، خوولەك بە خوولەك دەڕواو چاوەڕوانی هیچ تاك و هیچ كۆمەڵگایەك نییە. كات پێویستی بە ئێمە نییە، ئێمە پێویستمان بە كاتە، زۆر كاتمان لە دەسچووە، كەممان بە دەستەوەیە. تا هەزاران ساڵیش گلەیی لە بەختی خەواڵوو و داگیركردن و زۆرداران و جەنگ و ماڵوێرانی بكەین، بێهودەیە، دەبێ راستەوخۆ بچینەسەر خشتەی كاری گرفتەكان. دەبێ فێری (هونەری چارەسەری گرفت)و(دیالۆگی چارەسەر) ببین. كە هەر گرفتێك هاتە پێش بە ئاشكرا بیخەینە خشتەی كارەوە، هۆ و ئەنجام و رێگای چارەسەر بدۆزینەوە، گلەیی و بۆڵە بۆڵ بەولاوە بنێین. بە عەقڵی ماتماتێكی زانستی روون و سادە بیر بكەینەوە، بە تین و گەرمی و حەماسەتی عەشق و میهرەبانی كار بكەین بۆ جێبەجێكردنی چارەسەرەكە. كەواتە، لە وەزارەتدا لە گرفتەكان ناڕەحەت و هەراسان نیم ، دەزانم گرفت هەبووەو سبەینێش دەبێ. گرفتی من شێوەی رووبەڕووبوونەوەی نا بەرپرسانەو ناپرسینەوەو كەموكوڕیی كارگێڕییە. ئەمجا، گرفتم(زمانی باسكردنی)گرفتەكانە، كە لەجیاتی زمانی روونی ماتماتیكی و زانستی و ورد، زمانی گلەیی و بۆڵە بۆڵ لەسەر شتگەلێك دەهێنتەوە كە لە گرفتەكەوە دوورە، یا شتی رابردووی كۆنە، تازە كار لە كارترازاوەو بڕاوەتەوە، رەنگە ئەو شێوەیە لە قسەكردن هەر بۆ دووركەوتن خۆدزینەوە لە چارەسەری دروستی گرفتەكان بێ. ببوورن كە وەڵامی پرسیارەكە درێژەی كێشا. دەتوانن وەڵامەكانم بە دوو سێ بەش بڵاوبكەنەوە. بمبەخشن، نامەوێ بە هەلی بزانم بۆ هەڵڕشتنی دەردو گرفتەكانم. بەڵكو رێگەم بدەن، منیش (گلەیی خۆم)بكەم، بىَ ئەوەى ئازارى خۆم بدەم، چونكە شێوەی فیكریی تایبەتیم هەیە لە قووتدانی ئەوەی پەیوەندیی بە شەخسی خۆمەوە هەیە، لە كەس ناڕەحەت نیم، شێوەی تایبەتیم هەیە كە چۆن بچمە ژێر گرفتەكان و باریان هەڵبگرم، دان بەخۆما بگرم. رەنگە هەندێ جار منیش بكەومە گلەیی و بۆڵەو بۆڵ… ئەگەر وەهابوو، بزانن كە لەبەر ئەو هۆیانەیە كە ئێستا باسم كردن. دەڵێم: گرفت نییە چارەسەر نەكرێ، مەگەر یەكێك بمرێ، ئەوە ئیتر حسێب و كتێبی دەبڕێتەوە! سوپاسی (كوردستان راپۆرت) دەكەم چونكە زمانی پرسیارەكان سادەو روون و دوورە لە گلەیی. جاری واهەیە كە پرسیارم لێدەكەن سەرەتا كۆمەڵێك گلەیی و رەخنەی توند دەهێننەوە ئەمجا ئەسڵی مەبەستی پرسیارەكە دەدەبڕن. وەكو بڵێی پێشەكی(سزام) دەدەن. گلەیی و گازندەكانیان هەندێ جار قەزاوەت و سزایە! لە جەوهەری پرسیارەكەت دوور نەكەوتوومەتەوە. جارێكی تر دەڵێم كە دەتوانن ئەم وەڵامانەبە 2-3 بەش بڵاوبكەنەوە. چونكە هێشتا روونكردنەوەم لەمەڕ(تەندروستی)و (دەستكێشانەوە)ماوە. حەوسەڵەتان هەبێ. دەربارەی(دەسكێشانەوە) لە وەزارەت، چەندین جار لە رۆژنامەكانی دیكەدا، وتوومە كە دەسكێشانەوە، لەلای من، ئاسانترینیانە. لەو بڕوایەدام كە هەر مرۆڤێك لە هەر كارێكدا بوو، هەر كات هەستیكرد ئیتر پێی ناكرێ یا ناتوانێ سوودبەخش بێ، دەبێ راستگۆ بێ، بە ئاشكرا داوای خۆكێشانەوە بكات. خۆ ئەگەر خۆی دەسەڵاتی ئەوەبوو، ئەوا دەبێ بە هێمنی خۆی بكێشێتەوە. گرنگ ئەوەیە كە ئینسان، تەنیا خۆی نییە، بەڵكو لە ناو كۆمەڵێك پەیوەندیی كۆمەڵایەتی و سیاسی و كلتووری و بەرژەوەندی جۆربەجۆرە. دەبێ بزانێ كە لە هەمووشتێكدا ئازاد نییە بەڵكو بەو پەیوەندی و بەرژەوەندییانەوە بەندە. واتە دەبێ رەچاوی دەوروبەری بكات. هەر وەزیرێك، لە سیستەمی پەرلەمانی دیموكراتیدا، نوێنەری فراكسیۆنی حزبێك یا گرووپێكە. ئەوان دەستنیشانی دەكەن(بە دەگمەن هەنە لە دەرەوەی فراكسیۆنەكانن). لە ئەوروپاش وەهایە. لە پەرلەمان و حكومەتی كوردستان و هی عێراقی فیدراڵیش، وەهایە. وەزیرەكانمان نوێنەری حزبەكانیانن. بۆ نموونە، من لەلایەنی فراكسیۆنی زەردی پارتییەوە دەستنیشانكراوم. بەپێی ئەخلاقیاتی كارو كۆمەڵ و ئامانجی سیاسیی، دەبێ تا لە پۆستی وەزارەتدام دەبێ رەچاوی بەرژەوەندو رێنومایی پارتی بم، بێگومان لە سنووری یاساو رێبازی گشتیدا. وەزیری هەر فراكسیۆنێكی دیكە وەكو منە. ئەوەش بە شتێكی سروشتی دەزانم، مادامەكی نوێنەرایەتیی حزبم لە حكومەت قبووڵكردووە. واتە بۆ دەسكێشانەوەش دەبێ تەماشای بیروڕای حزب بكەم. نابێ سەربەخۆ كارەكە بەجێبێڵم و خود سەرانە دەس لە كار بكێشمەوە، خۆ پەلەی ناوێ، چ پارتی یا هەر حزبێكی دیكە، وەختێك وەزیرەكەی داوای دەسكێشانەوە بكات و سووربێ لەسەری، ئەوا لێی وەردەگرن. ئەمە نەریتێكی فەرمانڕەواییە لە گشت وڵاتە دیموكراتییەكاندا. كەواتە، ئەگەر بەوە گەیشتم كە دەبێ ئیتر دەس لە كار بكێشمەوە چونكە لەوە زیاتر بەرهەمم نابێ، یا تەندروستیم رێگە نادات، دەبێ یەكەمجار بە سەرۆكایەتی حزب و فراكسیۆنەكەم بڵێم، دوای گفتوگۆ و قەناعەت پێهێنان ئەنجامەكە رادەگەیندرێ. ساڵی 1999 هەر وەها بوو، لەسەر داوای خۆم لە وەزارەت دەستم كێشایەوە،.. بە هەرحاڵ. من ئەگەر بەوە گەیشتم ئیتر هیچم پێناكرێت، یا بڕوام بە هەندێ رێنومایی و بەرنامەی كارو شێوەی بەڕێوەبردنی نەما، ئەوا بەبێ یەك و دوو دەسكێشانەوەم بە فراكسیۆنەكەم رادەگەینم. بە جوانی نابینم راستەوخۆ و خودسەر و بێ پێشەكی بە خۆمی رابگەیەنم، كە رەنگە دەنگۆی سیاسی و پڕوپاگەندەی نابەجێی لێبكەوێتەوە، كە بێهوودەیە. وابزانم خوشك و برا وەزیرەكانم لەو راستییانە ئاگادارن و حاڵى هەموویانە. مەبەستم ئەوەیە كە تائێستا شتێكی وەها نەهاتووەتە پێشم تا لە دەسكێشانەوە پەلە پەل بكەم. شتێكی دیكەش هەیە، چ پارتی دیموكراتی كوردستان، یا هەر حزبێكی دیكە، بۆی هەیە بڕوا لە هەر پەرلەمانتارو وەزیرێكی فراكسیۆنەكەی بسەنێتەوە. ئەگەر پێویستی بە گۆڕانكاری بوو، ئەوا… یا بە وەزیرەكە دەڵێ دەس لە كار هەڵبگرە، و داوای دەسكێشانەوە بكە. یا حزبەكە یەكسەر لادانی وەزیر یا پەرلەمانتارەكە رادەگەیەنێ. 
 كەواتە: دەسكێشانەوەمان ئاسانترین كارە. پێشووتر لە چەندین پۆست و كار بەرپرسێتی دەستم كێشاوەتەوەو كاری دیكەیان پێ راسپاردووم. من لە "بێكاری" ناترسم، چونكە كارم زۆرە. گەر لە وەزارەت نەمێنم ئەوا گەورەترین پۆست چاوەڕوانمە، مەگەر خۆم نەمەوێت!  ویستم لە "كوردستان راپۆرتدا" وەڵامی زۆر رۆژنامەنووسی هاوكارم بدەمەوە، كە دەڵێن تۆ ئەگەر تەندروستیت تەواو نییەو لەوەزارەت تووشی گرفت دەبێ، ئەدی بۆچی دەسناكێشیتەوە. هەمیشەش دەڵێم: ساناو ئاسایە، خۆ من  بەوەزارەت دڵم خۆش نیە، نە نارەحەتیش دەبم  لە وەزارەت دەربچم. بەر لە ئێستا لە پەرلەمان و وەزارەت و پلەو پۆستی حزبی و رۆژنامەگەری و هی دیكە، بوومە. لە نەمانی هیچ پۆستێكم پەشیمان نیم. دڵم بەهیچ كامەیان خۆش نەبووە. چاوم لە هیچ پلەو پۆستێكی دیكە نییە. پلەی بەرزتر هەیە. بە خۆی بۆم دێ ، بۆم ئامادەیە، مەگەر خۆم نەمەوێ. پلەو پۆستم لەلاگرنگ نییە. "كار"م لەلا گرنگە. حەز لە كار ئەكەم. هەر كارێكی پێم سپێردرابێ، كە بۆ كۆمەڵ سوود بەخش بووە، بەدڵەوە ئەنجامم داوە. كەواتە گرنگ عەشق بەكارە، كاری بەرهەمهێنەرو سوودمەند بەكۆمەڵ و داهاتووی مرۆڤایەتی. هەندێ جار، ئەگەر بەناچاریش هەندێ كارم وەرگرتووە، ئەوا هەوڵمداوە بەدڵەوە بیكەم، تا حەسانەوەو دڵنیایی ویژدانم بەركەوێ. كەواتە (ویژدان) قازی و پێوەرو دادوەرە. هەموو شتێك بەدەستی (ویژدانەوە) بدەین، بۆ ویژدانی ئازادوو پاك بەجێهێلین، هەمیشە بەختەوەر دەبین. دەمێنێتەوە (تەندروستی)… نایشارمەوە كە تاڕادەیەك نەخۆشم. نزیكەی (15) ساڵە نەخۆشیم لێدەركەوتووە، لێ رێگەی كاركردنی لێنەبەستووم. من لە خودی كاروباری هونەری و رۆشنبیری و كارگێڕیی وەزارەت ماندوو نابم. كاری لابەلایی كۆمەڵایەتی و سیاسی و فشاری گرفتی خەڵك (لە دەرەوەی وەزارەت) رێگەم لێدەگرن. ئەوەش وەزارەت بەرپرس نییەو كەس ناتوانێ بۆم چارەسەری بكات، چونكە ئەو فشارانە لە وەزارەتەوە نایەت، بەڵكو لە كۆمەڵێك پەیوەندیی كۆمەڵایەتی دێت، كە وەكو تۆڕی جاڵجالۆكەیە، زۆر كەس لە نەوەی من، گیرۆدەی ئەوە بوونە. بەدرێژایی 64 ساڵی تەمەن لەم وڵاتە وێرانكراوەدا، هەریەك بەشێوەی خۆی، بەندی دەیان و سەدان پەیوەندیی كۆمەڵایەتی سەردەمی قوتابخانە، یا كار، ئاوارەیی، پێشمەرگایەتی حزبی و سیاسی، سەندیكایی، گەڕەك و دێهات و شارەكان، كە لەبەر كۆچكردن و ئاوارەیی و راونان، و سەدان پەیوەندیی دیكە، ئێستا باجی دەدەینەوە. هەندێ جار یەكێك لە وەزارەت یا دەزگایەكی دیكەی تر، كێشەكەی چارەسەر نابێ یا پشتگوێ دەخرێ، ناچار دەچێت بۆ لای نزیكتر بەرپرس كە دەیناسێ "پەیوەندیی" واسیتەو واسیتەكاری هەموو شتێكی لێمان تێكداوە ئەزیش لێی دەرباز نەبوومە. واتە: گرفتی من هی كاروبارى ناو وەزارەت نییە بەڵكو گرفتی لابەلایى كێشە دێرینەكانی كۆمەڵگایە كە  جیا لە كاروبارى وەزارەت، تووشمان دەبىَ. هەمیشەش، بەپێی توانا، بەپیری گرفتی خەڵكەوە دەچم، خۆشحاڵ دەبم ئەگەر توانیبێتم هەندێكیم چارەسەر كردبێ. هەندێك جاریش سەرنەكەوتووم. تەنانەت كێشەی لابەلایی سیاسی و گرفتی هەندی كوردی هەرێمەكانی دیكەو، كێشەی دیكەش رووبەڕووم دەبێتەوە. بەدرێژایی ساڵانی خەبات پەیوەندیی سیاسی بەرفراوانم هەیە، چ لەناو عێراق یا دەرەوە. دەزانم كە هەندێ لەو گرفتانە لەسەر حیسابی وەخت و تواناو تەندروستی و كاری وەزارەتیش، تەواو دەبێ. بەڵام نابێ لە گرفت سڵ بكەینەوە. دەبێ رووبەڕووى ببینەوە.  دڵنیام كە زۆربەی چارەسەر دەبن. مرۆڤ بەس بمێنێ. گرفتەكەی چارەسەر دەبێ.  دەربارەی (تەندروستیم) بەكورتی دەڵێم: هێشتا لەكارنەكەوتووم. ئەوەیە كە پتر لە جاران رەچاوی باری تەندروستیم دەكەم. ئەگەر كاری من تەنیا كاروباری ناوخۆی وەزارەت بێ، ئەوە هیچ گرفتێكم نییە. بە ئاسانی بەڕێوەی دەبەم. مەبەستم لەو قسەیە ئەوە نییە لە وەزارەت بمێنمەوە چونكە دەتوانم! نەخێر.. وەكو گوتم روانینی خۆم لەمەڕ مەسەلەكانی ژیان و گەردوون هەیە. تەمەنم ئێستا لە (64) ساڵ رەتبووە. بەشێكی زۆری تەمەنم بە هەژاری و نەداری و ئاوارەیی و سەختییەكانی خەباتی سیاسی، چووەتە سەر. لەوەش گلەییم نییە. باری كۆمەڵایەتی و ئابووری و سیاسی سەردەمی من و نەوەكەم ئەوە بووە.  دوای (64) ساڵ، لەگەڵ سوپاس بۆ پەروەردگارو ستایشی میهرەبانیی ئەو دانا جوانە، ئێستا هەردەبێ سوپاسی قاچەكانم بكەم كە ئەو هەموو ساڵە منیان هەڵگرتووە، سوپاسی دڵم بكەم چونكە شەوورۆژ خوێنی جەستەمی سووڕاندووە، سوپاسی مێشكم بكەم كە تا ئێستا ماندوو نەبووەو تێكنەچووە، و سوپاسی و جودی خۆم و گشت گەردوون بكەم كە بەشێكی هەمووانم، جا سبەیی ودووسبەی چی دەبێ?! نازانم.. هیچ شتێك نییە ئەگەر نەمام خەمی بۆ بخۆم. من ئەوەمە و ئەوەندەم پێكراوەو…هیچ! دواتر چی دەبێ ؟!. مەرگ بىَ، ئەوا مەرگ جوان و خۆشە. خۆكوژی جیایە، كە زۆر خراپ و تاوانێكی چەندین بەرابەرە بەهیچ شێوەیەك پاساوی خۆكۆژی نییە، هەروەها كوشتنی هیچ ئینسانێك رەوانییە. تاوانە. زۆرینەى هەرە زۆرى خەڵك بەسروشتى دەمرن.  سەرەڕای سەختی و دژواری، ئێستاو پێشووتریش هەمیشە ژیان و گەردوونم بە موعجیزە زانیوە، جوانترین (خوا-دایە)، جوانترین دیاریی پەروەردگارە پێی بەخشیوین. من لە جوانیی گەردوون تێر نابم.. تەنانەت (مەرگ)یش تێدا جوانە. بڕوایەكم هەیە تایبەت بەخۆمە، و پێویست نییە بڕوای پێبكەن یانە، چونكە باوەڕوبڕوا زۆر بەزەحمەت لە كەسێكەوە بۆ كەسێكی دیكە دەگوێزرێتەوە. دەڵێم: باوەڕێكم هەیە كە (ئەودیوی) ژیان، كە مەرگە، لە (ئەم دیو) جوانترو شادمانەترو لە زەتبەخشترە. هەر لێرەوە، لەمدیوەوە، (لەوێ) جیهانێكی جوان و فێنێك و دڵگەش و تەڕوتازەم دروستكردووە. ئەوە جیهانی خۆمە، تێدا سەربەست و سەربەخۆم. هیچ كەس و هیچ هێزێكی (ئەم دیو) ناتوانێ لێمی زەوت بكات. لەوێدا ئازادو رەهام.. وەكو پەپوولەیەكی شاد، ئازاری بەهیچ شتێك ناگات. لە ژیان بێزارنیم. هۆیەك بۆ بێزاری نابینم. دەتوانن بڕوام پێنەكەن. دەتوانن بەدێوانەو خەیاڵپەروەرم بناسن، دەتوانن گوێ لەم قسانە نەگرن. من جیهانەكەی ئەودیوم لەلا بەرزو جوانە. كەواتە: سبەی، چی دەبێ و چی نابێ?!… مەرگ گواستنەوەیەكە لە گەردوونێكی جوان و بەرزو شادیبەخشی ئێستا لێردەا، بۆ گەردوونێكی جوانتر شادیبەخشترو و …،…،…،!  لەوێدا شتێك نییە دەستی لێبكێشمەوە. دەسكێشانەوەی چی?! پێكەنینم دی بەوەی خۆی ماندوودەكات تا بزانێ ئایامن دەسدەكێشمەوە یان?! شتێك نییە دەستی لێبكێشمەوە.چونكە هەمووی هیچە! هیچێكى بێپایان و بێسەروبەربن.
 دەمینێتەوە چەمكى (مەرگ)،كە بە باوەڕى من…. مەرگ وریابوونەوەیە، كردنەوەیە لە دونیایەكى پاكتر و جوانتر. ئەوەى تا ئێستا لێت وون و شاراوە بووە، ئاشكرا دەبێت.
  مەرگ، بەو مانایە، شادیبەخشە بۆ ڕۆح و ڕەوان. (بوودا)بە زیندوویى وریا بووەوە، لە ژیانیدا مەرگى خۆى تاقیكردەوەو سنوورى دەربازكرد. هەزاران (وریابووەوە) وەك بوودا هەبوونەو پەیدا دەبن. لە كوردستانا سەدان وەكو (بوودا) هاتوونەو چوونە.
 (بوودا)وشەیەكى زمانی سەنسكرتیییە، لە ڕیشەوە خزمى زمانى كوردییە.
 ماناى ڕاستەوخۆى (بوودا) هۆشیاربوونەوەو وریابوونەوەیە، واتە: حاڵەتێكە تێدا ئادەمیزاد لەپڕدا، ئەودیوى شتەكان دەبینى و ڕاستى گەردوون دەناسىَ و بە ئاگا دىَ. ئاگابوونەوە، وریابوونەوەیە. وەكو نووستووییەك چاو دەكاتەوەو دەبینىَ لەخەونانییە، بەڵكو لەڕاستى ژیاندایە. هەر هەستانەوەیەك لەخەو وریابوونەوەیەكە… بەڵام فێرنەبووینە بەو چاوە تەماشا بكەین، جوانى مەرگ ئا لەوێدایە. بەو مانایە بىَ، ژیانیش مەرگى كاتییە، مەرگ ژیانى هەمیشەییە. بۆخۆتى لێیبدەرەوە!
 
 

Previous
Next

Leave a Reply