Skip to Content

Thursday, January 21st, 2021

چرکەیەک پێش کۆتایى … نەوزاد بەندى

Be First!

 

 

 

 

-1-

پێڵاوەکانم لێم هەڵگەڕانەوە و

وتیان : بۆ کوێ ئەڕۆى ؟

پێڵاوەکانم موحاسەبەیان کردم ..

 

-2-

عەلى وەردى پێش ئەوەى بمرێ ،

برسێتیى چەقۆیەکى کولى لە ملى ئەخشاند ..

برسێتیى ، دەستنوسەکانى پێ برد بۆ شەقامى (موتەنەبى )

برسێتیى ، بێ حورمەتى پێکرد ..

 

-3-

لە هەموو گیرفانەکانما بەلایەنى کەمەوە کلیلێک هەیە ..

هەیانە تازە ..

هەیانە ژەنگاویى ..

هەیانە زەرد و نەخشاویى ..

هەیانە نازانم هى چ دەرگایەک ..

چ بۆفى و کەوانتەرێکە ..

هەیانە هى سەردەمى زانکۆ ..

کلیل هەیە بە تەواوەتى خانەنشین بووە ،

ددانەکانى کەوتون و

حەز ناکا چیتر پێى بڵێن کلیل ..

هەیانە بە ئەڵقەیەکەوە ،

لەگەڵ دلخوازەکەیدا ، ئەزرنگێتەوە ..

( دز و پۆلیس و من  ،

کلیل زۆربەى تەمەنى داگیر کردووین )

 

-4-

نەوت بوو بە ڕەئیس عورەفاى وەحدە ..

هەموومانى ڕیز کرد ..

هەندێکمانى کرد بە ئاڵتون ..

ئەوانى تریش تەنەکە ..

بۆینباخى کردە ملى کۆمەڵێک و

ئەوانى تریش گوریس ..

نەوت سمێڵى بە نیوەمان تاشى و 

ڕیشى بە نیوەکەى تریش هێشتەوە ..

نەوت خەتێکى کێشا ..

لاى چەپى خەتەکەى ناو نا : ئۆپۆزیسیۆن ..

لاى ڕاستى خەتەکەى ناو نا : دەسەڵات ..

(نەوت بە دزییەوە فێرى شەراب بوو ..

کەوتە حەشیشە کێشان ..

فێرى لەشفرۆشى بوو ،

بۆ چەک ..

بۆ کچ ..

بۆ تاوەرى ناو هەور و

فڕۆکەى ناو ئاسمان .. )

 

-5-

من درەنگ کەوتمە نوسین ..

یەک کەس لە هۆڵەکە نەما ..

یەک مایک ..

یەک ڕۆژنامە ..

یەک جاسوس لە دەور و بەرم نەما ..

( شیعر بۆ 

کورسیەکان ئەخوێنمەوە ..

بە ڕێزەوە ڕاوەستاون  ،

هەرچەند چوار قاچیشن )

 

-6-

زۆر شت هەن ،

هەرچەندە ژەنگیش هەڵناهێنن و ناشکێن ،

کەچى بە کۆمەلڕ ون ئەبن ،

وەکو سەدان هەزار هەڵماتى چاخى مناڵیى ..

( بمکەن بە حوکمەت ،

با گۆڕى بە کۆمەڵى هەڵماتەکان هەڵدەمەوە ..

با لیژنەیەک بۆ دیارنەمانى 

هەزاران هەزار کۆلارە و

هەلوک و

مزراح ..پێک بێنم .. )

 

-7-

سیاسى و ئەکتەرى ئاکشن یەک جیاوازییان هەیە ،

یەکەمیان بە ڕاستى خەڵک ئەکوژێ ..

دووەمیان بە فێڵى سینەمایى ..

Previous
Next

Leave a Reply