Skip to Content

Tuesday, September 29th, 2020

چل ملیۆن هەورو بروسكە !!

Comment
by March 8, 2008 ئەدەب

   قوبادى جەلى زادە…..
 
 قەندیل ،
 دەریایەكە لە نوور …
 لەوىَ ،
  تێكەڵى یەك دەبن  
 هەر چوار رووبار :
 رۆژهەلات –  رۆژئاوا
 باكوور – باشوور !
 
 قەندیل ،
 ئاسمانێكە لە هەڵفڕین …
 لە وێندەرىَ ،
 كۆترەكانى كوشتەى عیشق
  لە شەققەى باڵى خوێن دەدەن :
 خەج و سیامەند
 مەم و زین .
 لاس و خەزاڵ
 فەرهادوو شیرین !
 
 قەندیل ،
 پردێكە لە خوێن و بەفر …
 لەو كێوە موقەدەسەدا،
  باوەش بە یەكتردا دەكەن :
 سنە   و   قامشلو .
 سلێمانى و  دیار بەكر !
 
 لەوىَ … لە قەندیل ،
 بەفر چەكى هەڵگرتووە .
 رووبار تەلبەندى كەمینە .
 باران دوور بینى  شەهیدى كردۆتە چاو .
 كانى  بە برژانگى خوڕە ،
  لە گاشە بەرد
 شاسەنگەرى  هەڵكەندووە .
 _ با _ ى  تەزیو ،
 هەردوو  دیدەى دوژمنانى ،
 لە دەرزیلەى
 ترس و روندك ، پڕ كردووە !
 
 لەوىَ … لە قەندیل …
 شۆڕەژنى وڵات پارێز ،
 بەرەو لوتكە
 هەنگاو بە هەنگاو ، پىَ بە پىَ .
 بە هەلهەلە
  تفەنگ  دەهێنێتە سەر پىَ !
 شۆڕە ژنى وڵات پارێز ,
 سینگى دەكا بە كێَڵگەى مین
 بە دەورو پشتى مەتەرێز !
 
 لە وىَ ..
 لە قەندیلى سوورو سپى  ،
 ژنان شەستەى ،
 چلوورەى چەقۆو ژیلەمۆن
 دادەبارن .
 ئەوان بەسەر پشتى ئەسپى ،
 بەفروو خەبات و خوێنەوە
 چل ملیۆن هەوروو بروسكەن .
 چل ،
 چل ملیۆن شۆڕەسوارن .
 
 لەقەندیل . لەوىَ
 لەژێر تۆفى ژەهروو سوژن ،
 گەریلاى پیاو
 پێشمەرگەى ژن
 لە رەشبەلەكى هەڵمەتان.
 سترانى ئازادى دەڵێن
 تارى سەركەوتن دەژەنن !
 
 

Previous
Next

Leave a Reply