Skip to Content

Thursday, October 22nd, 2020

چوونه‌ سه‌رمانگ دیوی مۆدێرنه‌ی خودایه‌

Be First!
by February 9, 2012 ئەدەب

ئه‌م باوه‌ڕه‌ له‌سه‌رمدا درێژه‌ی هه‌یه‌                                       
كه‌ی ئه‌م دیوارانه‌ به‌جێمان دێڵن؟                                                                    
ماڵ زنجیرێكی هه‌ڵئاوساوه‌،  مرۆڤبوون په‌تایه‌كی كوشنده‌یه‌
چوونه‌ سه‌رمانگ دیووی مۆدێرنه‌ی خودایه‌

به‌فر وه‌ك ڕیشۆڵه‌ له‌شاره‌كان دوور كه‌و تۆته‌وه‌
سرووشت ئه‌و ئارایشته‌ی جاران ناكات
مرۆڤ به‌خته‌وه‌ره‌ به‌وه‌ی گه‌ردوون ماڵی ئه‌وه‌
بۆمن كۆ تای هه‌فته‌ زه‌مه‌نی تێگه‌یشتنه‌ له‌شته‌كان


هاوڕێم

ئه‌م به‌دمه‌ستییه‌ له‌ئاوه‌ لێڵه‌كانی سه‌رتدا بشاره‌وه‌
ئه‌م ئافره‌ ته‌ ڕووتانه‌ ببه‌وه‌ ژووره‌ داخراوه‌ كانی دڵت
له‌زه‌وی په‌شیمان به‌ره‌وه‌ ئاسمانه‌كانت خۆشبوێ
منیش له‌شاره‌ كان تارماییه‌كان ئه‌بوونه‌ هاوڕێم
شه‌وانه‌له‌ماڵێك ئه‌گه‌ڕام به‌سه‌ر ده‌ریادا بڕوانێ‌…

ئه‌و ڕووناكییه‌ی سه‌رپێستت داپۆشه‌، ئه‌وشه‌وه‌ی مانگ دیاربوو مه‌یه‌ ده‌رێ‌
به‌ ژێر تیشكی گڵۆپه‌كاندا مه‌ڕۆ
له‌كوچه‌كانداپۆلیسی ئه‌خلاق هه‌یه‌….!

چاوه‌كانی ئاسمان من ئه‌بینن تێده‌گه‌ن له‌دۆستێكی بریندار
خوێنێك له‌و به‌رزییه‌وه‌ ئه‌ڕژێته‌ دڵم
هه‌ور به‌من نامۆ نییه‌! ئاشنایه‌تی من به‌مانگ به‌ر له‌ ناسینی خودا دێت

شتێك له‌دره‌ختی لاڕێكانم تێدایه‌، باركراوم به‌تۆزی خنكاوی جاده‌كان
له‌ئاسمانی شاره‌كه‌م چرایه‌ك ده‌گڕێ‌
له‌سه‌ری كۆڵانه‌كه‌مان دووكاندارێكی پیر هه‌یه‌
ماڵه‌كه‌م نزیك زه‌وییه‌ 
ژوورێك هه‌ناسه‌ی گرتووم  ژوورێك درێژكراوه‌ی ماڵه‌كه‌م

ئیمانداران له‌مزگه‌وت ئه‌گه‌ڕێنه‌وه‌
كرێكارانی ماندوو چیرۆكی ئه‌وڕۆژه‌ ئه‌به‌نه‌وه‌ ناوخێزانه‌كانیان
منداڵانی زێڕین بێره‌دا ڕه‌ت ئه‌بن منیش له‌ژووره‌ كه‌مدا دانیشتووم، به‌رد ئه‌گرمه‌ دڵنیاییم تا دڵنیابم له‌ دڵنیاییم

ده‌ستگێڕو عه‌ره‌بانچییه‌كان توندتر بانگ  له‌ كڕیاره‌ كانیان ئه‌كه‌ن
تادێت
ده‌نگی فرۆشیاره‌ كان به‌رزتر ئه‌بێته‌وه‌
شه‌قام پڕئه‌بێت له‌داوای چكۆله‌ی مناڵان له‌دایكیان
له‌گڕوگرتن له‌جۆره‌ كاڵایه‌ك كه‌مناڵان ئه‌خاته‌ یادی توندوتیژی

په‌ڵه‌ هه‌ورێك له‌سه‌ر سه‌رمان وه‌ستاوه‌. درێژبۆته‌وه‌ تا ده‌ركه‌وتنی  قورسای سێبه‌ره‌ كان
ڕوباره‌كان خوێنێكن به‌ته‌نیشتما ئه‌ڕۆن…
وه‌ك  دۆزه‌خییه‌ك  ژیانێكی  كوردیانه‌ ئه‌ژیم
قوربانی یه‌كه‌م له‌فڕۆكه‌كه‌دا منم

دڵی وێران هه‌ر ئه‌مه‌ بوو…
وانه‌كانی قوتابخانه‌ هیچیان پێنه‌وتین
ئه‌فسانه‌كان نه‌بوونه‌ پردێك بۆپه‌ڕینه‌وه‌ له‌ئاگایی
ئه‌و ڕۆژانه‌ چاوه‌ڕوانییه‌كی درێژئه‌گوزه‌ راین
سوپاس بۆبرسێتی  كه‌وای كردجۆری گیاكان بناسین


نیشتمانم

به‌پۆستاڵ و داری  ده‌ستی پۆلیسه‌كانتا
به‌تێپه‌ڕینی ماشێنه‌ قاچاخه‌ كانت
ئه‌تناسمه‌وه‌…
تۆ له‌ شه‌قامێكی  دره‌نگانی من ئه‌چیت
كێڵگه‌ی سه‌وزت  هێنده‌ كه‌مه‌ نانی جوانیت كه‌س تێرناكات.

P_ali84@yahoo.com
ئه‌م ده‌قه‌ له‌ژماره‌ 54ی گۆڤاری گه‌لاویژی نوێ‌ بلاوبۆته‌وه‌
خه‌لاتی سیهه‌می شیعری ڤیستیڤالی گه‌لاوێژی بردووه‌
       پشتیوان علی

Previous
Next

Leave a Reply