گومانێك لە بێگوناهیم….هاوڕىَ خالید
گومانێك لە بێگوناهیم
هاوڕىَ خالیدبێگوناهم
من بێگوناهم باخچە خونچەكانى پیربووە
بێگوناهم شیعر گەمژەییم ناناسێتەوەو
باوكم بە قسەكانى دایكم فریو نۆشدەكات
من بێگوناهم سوراوەكانى ئێرە كاڵترن
لە بێشەرمى قەڵەمێكى درۆزنى ئەوىَ
تەنهایم باكى لە خواحافیزیم نییەو
وردە وردە ئەمداتە دەست ئەوان
ئەمداتە دەست ئاوێنەیەكى زۆربڵىَ
كە رەنگە هەر كچێكى بێدەنگ
باوەڕ بە قسەكانى بكات
كە نایەوىَ قسمەتو نسیبى لە دەست بچێت
ئاه من بێگوناهم كە ناتوانم
چەپكێك هەناسەم بە دیارى بدەم
بە كلارنێتێكى ڵاڵ
تا بەشەرمەوە پێیبڵێم قسەكردنت پیرۆز
بێگوناهم كە ناتوانم ببمەوە بە تاق تاقكەرەى
سەر دەرگاكانى بیركردنەوە
تا پێًیبڵێم:
پرسیار دەمێكە لەبەردەرگا چاوەڕێیە
تكایە رێگەبە بێتە ژوورىَ
من ئەتوانم چیبكەم
تا سەعاتى ژوورەكەم هەنگاوى بیربچێتەوەو جێمنەهێڵىَ
ئاه..ئەى عەشق
چەند پڕم لە خەونە بەجێماوەكانى تەمەنو
چەند پڕم لە تەمەناى دزینى شیعرێك لە خەیاڵ
لە رفاندنى چارەكە سەعاتێك یاریكردنى مناڵى
چەند باڵ راوەشاندنێك لە فڕین
من پیاوێكم بێگوناه
بێگوناهترم لە ژنێكى تەڵاقدراو
كە ناویان ناوە قەحپە
بێگوناهترم لەشەڕى پرتەقاڵێكى قەیرە
كە نایەوێت مێژووى خڕبوونى خۆى بیرچێتەوە
من پیاوێكم سەرتاپا بێگوناه
وەك سێوێك بەربوومەوەو فڕینم دوَڕاند
عەشقى زەوى ئەو فێڵەى لێكردم
بە چەقۆیەكى ژەنگاوییەوە
هەموو میوە خڕەكانم برینداركرد
لەبەرئەوەى چوون مەمكى ژن
بۆنى شەهوەتیان لێدێت
كلتوور ئەو تاوانەى پێكردم
زیناكەرترین پیاوى دونیام
سەدان زۆڵم لە دەستەكانى خۆم هەیە
پیاوەكانى شەرەف ئەمەیان فێركردم
مناڵیم داواى یارییەكانى خۆیم لێدەكاتو بۆم نادرێتەوە
تەمەن ئەو قەرزەى پێكردم
من بێگوناهم بێگوناه
نانا رەنگە گوناهبارترین پیاوى دونیابم
كە نەمتوانى كچێك لە تووڕەبونەكانى باوك
لە هەڕەشەو تەشەرەكانى برا رزگاربكەم
لەبەرئەوەى ئێوارەیەكى عەشق
شعرێكى نارد بۆ ئەبەدییەت
یان رەنگە گوناهباربم
كە ئایەتەكانم لەبەركرد
كچێكى ئێرەم خۆشنەویستو
گۆرانییم بۆ حۆرییەكانى خوا چڕى
باوەڕم بەوەكرد
شەرەف لەناوگەڵى ئێمەدا خۆى شاردۆتەوە
خۆ رەنگیشە گوناهباربم بەوەى
باوەشێك تەنهایم بۆ ئیوارەیەكى غەمگین
پۆست نەكرد
یان جامێك بارانم
لەیەخەى كراسى پیاسەیەك نەدا
گوناهبارم
دەستم بەسەرى مناڵێكدا نەهێنا
لەژێر ئەرخەوانێكى نەزۆكدا
نەمتوانى ماچى كچێك بكەم لەبەرچاوى مەلایەكدا
گوناهبارم ئەى عەشق گوناهبارم
بمبەرەوە لاى یاساكانى خۆت
با هەر نەوەكانى تۆ جەڵدەكانى پاكبوونەوەم لێدەنو
كەسیترنا
تا دوا ژمارەى فەرمانەكانت تەسلیمبوون
تا ئەوپەڕى ئازار خۆڕاگرى
تا دوورترین مەودا دابڕان
بەس تەنهایم لەگەڵ ئاشتكەرەوە.
2008-12-3
