Skip to Content

Saturday, October 31st, 2020

گوڵەکانی نیشتمان لە خۆر ئەبن لە بۆن ئەبن…

Be First!
by July 24, 2013 هۆنراوە

 

 

 

 

 

رۆژانێکی زوو ،چ رۆژانێکی زوو بوون ،

ئەو رۆژانە…

هەر لە بەرەبەیاندا ،لەسەر سفرەی ئاسمانی ئێمە دا ،

خۆر مێوانێکی ناوەخت نەبوو ،هەمیشە ئەهات و

ئاوا نەئەبوو….

رۆژانێکی زۆر زیندوو ،

خۆمان ئەدا بەر خۆرەتاو ،تا زیندوو ببین..

ئێمە بە خەون خەریک بووین ، خۆر بە خەون رەنگ کردن..

لە خەودا خۆمان لە بیر نەئەچوو..

لەوێوە…

بە تاوێرەکانی وڵات شۆڕ ئەبووینەوە ،تا هەورازمان تاوێر بێت ،

هەوراز شۆڕی ئەکردینەوە ، تا شۆڕ بینەوە بە هەورازێکدا ،

تا هەوراز شۆڕ بێتەوە.. 

رەزی رۆح لە دارمێوی هێشووە ماچدا ،

پڕ بوو…

خۆر ماچی لە رەزدا ئەدزی ،رەزمان ماچی لە خۆردا ئەدزی ،

لە ماچ دزیندا یەک شەڕی بە ئەوی دی ئەفرۆشت…

تا رەز دەست لە کبریائی خۆی بەردات ،چیتر کەشخە بەسەر نیشتمان نەدات..

بەلکو لەگەل کازیوەدا کاوێژێک بە ماچ ،

بۆ بەربانگ بکات…

بە بۆنی وڵات وماچی وڵات رۆژوومان نەئەشکا ،

تا بۆنێکمان ئەکرد ،

سەدەها بۆنی خۆشمان دەر ئەکرد…

رۆژانێک زیندوو بوون ،

ئەو رۆژانە..

تۆزی وڵات لە ئارەقەمان قوڕی ئەکرد ،

ئارەقەی سەرسنگ لە تابلۆیەکی رەنگارەنگ ئەچوو ،

رەنگ بۆنی وڵاتی ئەدا ،

وڵات بۆنی بوخووری سوتانی شەهیدانی لێ ئەهات…

شەهیدان لەگەل بۆنی خۆڵ بۆنی ئاو ،خاک وئاویان رائەچەناند…

دەستیان ئەگرتین ، دەستیان بەرنەئەداین…

بەرەو خۆری خۆیان ئەبردین…

چەند زیندوو بوون ئەو رۆژانە ،چەند زیندوو بووین ئێمە..

لەگەل باران سەمامان ئەکرد ،

لەگەل با باڵمان ئەگرت ،لەگەل شەهیدان روومان سپی بوو ،

روومان ئەهات تەماشایان بکەین…

سروودیان بەسەردا بهۆنینەوە..

ئەو رۆژانە باڵمان هەبوو بە خەون ئەفڕین ،

تا بارانی وڵات بە تۆزی خاکی خۆی ،

تەڕمان کاتەوە…

تا لە بەرەکەتی جوانی وڵات وبۆنە خۆشەکانی ،

دەستمان بەر نەبێت ،لە ماچی نیشتمان بەر نەبین..

بۆنی وڵاتمان لێ ئەهات ،ئەوسا…

هەناسەی خاکی نیشتمانمان ئەکرد ،ئەوسا..

هەناسەمان ئەدا..

بۆن لە هەناسەمان ئەڕۆیشت ،

بۆن لە هەناسەمان ئەهات..

ئەوسا نیشتمان لە گوڵ پڕ بوو ،

هەناسەمان لە گوڵ پڕ بوو ،بۆنی گوڵی لێئەهات..

بۆنی گوڵمان لێ ئەباری…

باخچە حەشری بە بۆن ئەکرد ،ئێمە حەشرمان بە باخچە ئەکرد..

بۆن و هەناسە بەیەکەوە شاگەشکە بوون…

تا ئێمە لە هەناسەیەکدا حەشر بە بۆنی ئازادی نیشتمان بکەین ..

 شنەبا حەسودی بە هەناسەی گوڵەکانی ئێمە ئەبرد ،

تا لە بەرەبەیانێکدا بەدزی گەمە بە پەلکەکانمان بکات..

تازە گوڵی ئێمە با بردی ، تازە گوڵی نیشتمان پیر بوون ،

لە بۆن بووین ،

لە هەناسە بووین ،پەلکمان نەزیفە بە وەران ،

لە بۆن ئەبین..

وەکو پەڕسێلکەیەکی گەریدە گەریدەم ،

تەڕ نابمەوە ،بە بارانی ئەو وڵاتانە…

لە بارانی وڵات ئەگەڕێم…

عاشقەکانی خاک هەمیشە گوڵن ، هەمیشە بۆنی گوڵ لە هەناسەیان دێت…

لە دووری خۆڵی خاک ،لە خۆل ئەبن ،

لە خۆر ئەبن ،وشک ئەبن بێ بۆن ئەبن..

ئەوان بە بێ بۆن ناژین ،لە هەر کونجێک بژین ،

باخ دائەنێن ،گوڵ دائەچێنن..

تا بۆنی گوڵەکانی نیشتمانیان بۆ بێت..

ئەوان بۆ بۆنێک ،

جارێکی تر لە دەرگا داخراوەکانی وڵات ئەدەنەوە..

کورو کیژە کوریکەکان ،ئەمڕۆ نایانناسنەوە ،

لە پەنجەرە قسەیان لەگەل ئەکەن…

ئەوسا شەوو رۆژ نێلەیان ئەدا ،

نێلەی عیشقی خاکێک لە خەوو لە خۆی ئەکردن…

تا بە خۆر بگەن ،ئێستاش لە خۆر زۆر دوورن ،

خۆری وڵات لێیان دوورە..

ساڵی جارێک بە خۆر ئەگەنەوە…

ئاخ نیشتمان چەند بە خۆرت سوتاین ،

ئێستا نۆرەی تۆیە بە خۆری ئێمە بسوتێی ، نۆرەی ئێمەیە بە خۆری تۆ بسوتێین.. 

وەکو مناڵێکی ساوای سوتاو ،لە پەلوپۆ ئەکەویت ،

لە پەلوپۆت ئەکەین ، لە پەلوپۆ ئەکەوین..

تۆ ئەی نیشتمان بە دوژمنەکانت نەسوتای ،نێڵەت ئەهات..

نێڵەت لە نێڵەمانی ئەدا..

ئێستا بە دەستی خۆمان لە نێڵە ئەبیت ، لە نێڵە ئەبین…

تا سوتماک هەڵئەکڕوزێی ،بۆنت ئەوەرێ ،

ئەوەرێین…

هەر جارێ بە شەڕێک لە بۆن ئەبین ،لە وڵات ئەبین..

شنەی شەوبۆیەک سەحەرمان ،بۆنخۆش ناکات ،

جگە لە بۆنی بوغزو پارە نەبێت ،بۆنێک ناکەین ،لەبۆن ئەبین..

من لە وڵاتی گوڵەوە دێم ،تا بۆنی گوڵەکانم بۆ بێتەوە ،

نەک بۆنی شەڕو رق وسەلکە سیرێکی حزبایەتی… 

من بە بۆن ئەگەڕێمەوە ،گوڵەکان بە بۆن ئەگەڕێنەوە…

بۆنی خوناوی گوڵەکانی جاران ناکەم..

هەناسەیەکی تەڕ نیە گوڵم تەڕ کاتەوە ،گوڵ تەڕ نابێتەوە ،

گوڵ خوناو ناکات ،خوناو لە خنکانە…

ئاو  لە ئەزمەیە ،وڵات لە ئەزمەیە ،

نیشتمان لە ئەزمە دایە..

تەڕ نابێتەوە ،لە خوناو ئەبێت ،

لە هەناسە ئەبێت ،لە بۆن ئەبێت…

رەنگ رەدوو ئەکەوێ ،بۆن کۆچ ئەکات ،

ئاو لە جۆگەلەیەکی تێنوو ئەخنکێت…

کێ بانگی رووبار ئەکاتەوە ،کێ بۆنی گوڵەکان بۆ باخچەکان ئەگەڕێنێتەوە…

تێنوومە نیشتمان زۆر تێنوو ، نیشتمان تێنووە ،

خەریکە ئەخنکێ..

من ئەخنکێم..

لە ئاوزینگ دانە ، نیشتمان ،

من ئاوزینگ ئەدەم بە بێ نیشتمان…

 

شوان عوسمان

سۆفیا ٢٣/٧/٢٠١٣

 

 

Previous
Next

Leave a Reply