Skip to Content

Monday, October 26th, 2020

یاخیبوون … بەرهەم خالید

Be First!
by March 30, 2012 ئەدەب

    ١
دەگەرێمەوە بۆ ڕابردوو
نیشانەی هەڵە
لەهەموو ئەو ڕستانە ئەدەم
کە مامۆستا دەیوت ڕاستن

      ٢
ئەوە ئێمە بووین
هیچ بۆشاییەکمان
بە وشەی گونجاو پڕ نەکردەوە

     ٣
لەناو هەریەکێ لە ئێمەدا
بتێک هەیە
لەخۆمان زەلیلتر
وای لە ئێمە

    ٤
با خەمەکانمان هەڵبڕێژین
هەریەکەو تەورێکی لێ دروست بکەین
بۆ شکاندنی بتەکان

    ٥
لێرە درۆ
هێندە قەڵەو بووە
فویەک بکات
 ڕاستی با دەیبات

    ٦
ئەوەی وەک سۆکرات ژەهر نەنۆشێ
هەر زوو دەمرێ

     ٧
با ڕقەکانمان کۆ بکەینەوە
بیانکەین بە ڕستە
ڕستەکان ببن بە پرد
تا ئەوانی دی
نەکەونە نێو چاڵەکەوە

       ٨
ئێسکی شەهیدەکان کۆ دەکەمەوە
دابەشی خیانەتەکانی ئێوەی دەکەم
هیچ نامێنێتەوە !
ئای لەو بەدبەختییە !

       ٩
ببورە سوهراب
لە تەنیشت هەر دەسەڵاتدارێکی وڵاتی ئێمەوە
چاندنی داریک بەس نییە
بۆ پاکبوونەوەی ژینگە،
پێویستە دارستانێک دروست بکەین  *

      ١٠
نیشتیمانەکەم  پڕە لە ڕۆمیۆ
شکسپیرێک نییە
بیان نوسێتەوە
……………………….

*  لەتەیشت هەر سیاسییەکەوە
داڕێک بڕوێنن
تا ژینگە پاک بببێتەوە…. سوهراب

Previous
Next

Leave a Reply